Iehova Ena Hereva be Ia Mauri Noho

Galatia, Efeso, Filipi, Bona Kolose Bukadia Edia Hereva Badadia

APOSETOLO PAULO be revareva ta amo Galatia kongrigeisen taudia dekenai sisiba aukana ia henia, badina ia kamonai Keristani taudia haida be tomadiho goevana idia rakatania bona Iuda tomadiho idia abia dae. (Gal. 1:2) Unai revareva be lagani 50-​52 C.E. huanai ia torea, bona unai revareva lalonai sisiba bona hagoadaia herevadia ia gwauraia.

Lagani 10 murinai, Paulo be Keriso Iesu ena hesiai gaukara ia karaia dainai Roma dibura rumana ai ia noho, bona unai nega ai Efeso, Filipi, bona Kolose kongrigeisen dekenai revareva ia torea ia sisiba henidia bona hagoadaia totona. (Efe. 3:1) Baibel bukadia Galatia, Efeso, Filipi, bona Kolose edia sivarai ita duahia neganai, ita do idia hagoadaia danu.​​—Heb. 4:​12.

EDENA DALA AI “DIRAVA ENA VAIRANAI ITA MAOROMAORO”?

(Gal. 1:1–​6:​18)

Iuda tomadiho taudia be mai koikoi ida idia ura Paulo ena ladana idia hadikaia, unai dainai Paulo ese ena mauri sivaraina ia gwauraia bona ia hahedinaraia ia be aposetolo tauna momokani. (Gal. 1:11–​2:​14) Paulo be edia hereva koikoidia ia koua totona, ia gwau: “Dirava ena vairanai tau ta lasi be maoromaoro Taravatu ia badinaia dekena amo. Lasi, to Dirava ena vairanai ita maoromaoro dalana be tamona, gauna be inai: Iesu Keriso bema ita abidadama henia.”​​—Gal. 2:​16.

Paulo ia gwau, Keriso ia mai ena badina be: ‘Taravatu henunai idia noho taudia ia hoia lou’ bona ena igui amo idia ia ruhaia totona. Paulo be Galatia taudia ia hamaoroa: “Ura kwalimu do umui dogoatao noho, tau haida ese umui do idia guia lou garina.”​​—Gal. 4:​4, 5; 5:1.

Baibel Henanadaidia Edia Haere:

3:​16-​18, 28, 29​​—Hari, Aberahamo gwauhamatana be mai anina, a? Oibe. Taravatu gwauhamatana be Dirava ese Aberahamo ida ia karaia gwauhamatana ena gabu ia abia lasi, to unai gwauhamata ida ia hakapua. Unai dainai, Taravatu ia “haorea” neganai, Aberahamo gwauhamatana be ia do noho. (Efe. 2:​15) Unai gwauhamata be Aberahamo ena garana korikorina​​—Keriso Iesu, bona “Keriso ena taudia” dekenai ia henia.

6:2​​—“Keriso ena taravatu” be dahaka? Unai taravatu lalonai Iesu ena hadibaia herevadia bona hahegani idia noho. Unai hahegani ta be inai: “Umui ta ta dekenai umui lalokau henia.”​​—Ioa. 13:34.

6:8​​—Edena dala ai ‘lauma ena gau ita hadoa’? Unai ita karaia bema iseda noho dalana be ia goeva bona Dirava ena lauma helaga be iseda mauri lalonai ia gaukara. Lauma helaga ena gau ita hadoa ena anina be, mai eda kudouna ibounai ida hesiai gaukara idauidau ita karaia, unai amo lauma helaga be iseda mauri lalonai ia gaukara diba.

Ita Dibaia Gaudia:

1:​6-9. Kongrigeisen lalonai hekwakwanai ia vara neganai, elda taudia be karaharaga unai hekwakwanai idia hamaoromaoroa be namo. Mai aonega ida Baibel siridia idia gaukaralaia diba lalohadai kereredia idia hamaoromaoroa totona.

2:​20. Namona be mauri davalaia boubouna be inai bamona ita laloa: Ia be Dirava ena harihari gauna ita dekenai.​​—Ioa. 3:​16.

5:​7-9. Hebamo dikana ese eda dala ia hadikaia diba, vadaeni hereva momokani ita badinaia lasi. Aonega dalana be hebamo dikana do ita dadaraia.

 6:​1, 2, 5. Bema ita be mai iseda hekwakwanai eiava ita diba lasi dainai, kerere ta ita karaia, ‘lauma helaga idia kamonai henia taudia’​—elda taudia​—ese ita idia durua diba. To, inai hereva “ta ta sibona ena metau, ena metau do idia huaia” ena anina be, iseda Keristani maduna be sibona do ita huaia, hegeregere Baibel duahiduahi, sibona eda stadi, haroro gaukara, bona hebou lao henia karana.

‘GAUDIA IBOUNAI BE KERISO ESE DO IA BIAGUA’

(Efe. 1:1–​6:​24)

Paulo be Efeso kongrigeisen ia tore henia neganai, ia gwau: “Inai palani do ia haorea nega korikori ia ginidae neganai, . . . Dirava ia karaia gaudia ibounai, guba dekenai bona tanobada dekenai, be Keriso ese do ia biagua.” Keriso be “harihari gaudia taunimanima dekenai ia henia,” unai amo idia ese ita ibounai idia durua iseda “abidadama do ia tamona” totona.​​—Efe. 1:​10; 4:​8, 13.

Keristani taudia be Dirava idia hanamoa bona mai lalotamona ida idia noho totona, ‘mauri matamata do idia atoa’ bona ‘ta ta dekenai do idia hemataurai be namo.’ Danu, namona be tuari dabua ibounai idia kwatua, unai amo ‘do idia gini goada, bona Satani ena koikoi karadia do idia koua’ diba.​​—Efe. 4:​24; 5:​21; 6:​11.

Baibel Henanadaidia Edia Haere:

1:​4-7​​—Edena dala ai horoa Keristani taudia be idia do vara lasi neganai, Iehova ese idia ia makaia vadaeni? Iehova ese taunimanima ta ta ia makaia lasi, to orea ta ia makaia guna. Adamu bona Heva be natudia dekenai kara dika idia do henia hanai lasi neganai, Dirava ese unai orea ia herevalaia. Dirava ese Genese 3:​15 ai ia noho peroveta herevana be kara dika taudia idia do vara lasi neganai ia gwauraia, bona unai peroveta herevana ena anina ta be Keriso murinai idia raka taudia haida be Iesu ida guba dekenai do idia lohia.​​—Gal. 3:​16, 29.

2:2​​—Inai tanobada ena lauma be dahaka, bona edena dala ai tanobada ia biagua? “Inai tanobada ena lauma” ena anina be taunimanima ese sibona edia ura idia badinaia bona idia karaia gwau-edeede karadia. (1 Kor. 2:​12) Unai lauma ese hanaihanai taunimanima edia lalona ia veria kara dikadia bona lebulebu karadia idia karaia totona.

Ita Dibaia Gaudia:

4:​8, 11-​15. Iesu Keriso ese ia “abia mauri mai guia taudia” anina be, Iesu ese Satani ena siahu amo tatau haida ia ruhadia bona ia gaukaralaidia Keristani kongrigeisen idia hagoadaia totona. Namona be ita idia hakaua taudia do ita kamonai henia bona kongrigeisen totona idia hegaegaelaia daladia ita badinaia, unai amo mai lalokau ida “Keriso ena mauri dala lalonai do ita tubu daekau.”​​—Heb. 13:​7, 17.

5:​22-​24, 33. Hahine be ena adavana do ia kamonai henia bona ia matauraia. Unai bamona ia karaia totona, namona be ia “laloa manau, bona dagedage lasi,” ena hereva amo ena adavana ia hanamoa bona ena adavana be abia hidi ta ia karaia neganai, do ia durua.​​—1 Pet. 3:​3, 4; Tito 2:​3-5.

5:​25, 28, 29. Tau be ia sibona ia “ubua” hegeregerena, namona be ena adavana be hemami bona tauanina dalanai do ia naria, bona adavana do ia durua Iehova kahirakahira ia lao totona. Namona be tau be nega ia atoa ena adavana ida ia helai, mai lalokau ida ia hereva henia bona mai hemataurai ida ia kara henia.

6:​10-​13. Demoni dikadia ita tuari henia totona, namona be mai eda kudouna ibounai ida Dirava ese ia henia tuari dabua ibounai do ita kwatua.

“HADIBAIA HEREVA ENA DALA DO ITA BADINAIA NOHO”

(Fili. 1:1–​4:​23)

Paulo be Filipi kongrigeisen ia tore henia neganai, lalokau ia herevalaia momo. Ia gwau: “Dirava lau noia noho inai bamona: Umui emui lalokau be do ia bada lao noho, mai emui laloa diari, bona mai emui aonega danu.” Paulo ese ia sisiba henidia sibona edia diba dekenai do idia tabekau lasi, ia gwau: “Mai gari bona mai heudeheude danu emui hamauria do umui tahua noho.”​​—Fili. 1:9; 2:​12.

Paulo ese lo Keristani taudia ia hagoadaia ‘kwalimu ahuna be guba dekenai mauri  matamata, Dirava ese ia boiria gauna’ idia tahua totona. Ia gwau: “Guna ita abia dae hadibaia hereva ena dala do ita badinaia noho be namo.”​​—Fili. 3:​14-​16.

Baibel Henanadaidia Edia Haere:

1:​21-​23​​—Paulo ia hahedinaraia dahaka gau “rua” ia lalohekwarahilaia, bona ena ura gauna be dahaka? Paulo dekenai idia vara gaudia dainai, ia lalohekwarahilaia gau rua be inai: Do ia mauri eiava do ia mase. (Fili. 1:​21) Ena be unai siri ese ia hahedinaraia lasi ia be edena abia hidi ia karaia, to iena ‘ura bada be Keriso dekenai do ia lao.’ (Fili. 3:​20, 21; 1 Tes. 4:​16) Paulo be Keriso ena noho negana ai Iehova ese ia hegaegaelaia hahenamo do ia abia.​​—Mat. 24:3.

2:​12, 13​​—Edena dala ai Dirava ese ita dekenai goada ia henia iena ura ita karaia totona? Iehova ena lauma helaga be iseda lalona dekenai ia gaukara diba, bona iseda ura ia habadaia hesiai gaukara ita karaia goadagoada totona. Unai amo heduru ita abia ‘eda hahemauri do ita tahua noho’ totona.

Ita Dibaia Gaudia:

1:​3-5. Ena be Filipi taudia be idia ogogami, to idia ese ma haida dekenai hariharibada karana idia hahedinaraia dainai, idia be haheitalai namona ita dekenai.​​—2 Kor. 8:​1-6.

2:​5-​11. Iesu ese ia hahedinaraia, manau karana be manoka ena toana lasi, to ia be lalogoada ena toana. Danu, Iehova ese manau taudia ia hanamoa.​​—Aon. 22:4.

3:​13. “Kara gunadia” be pei bada moni gaukara, taga bada ruma besena, eiava guna ita karaia kara dika badana ta, to ita helalo-kerehai bona Dirava ese “ia huria goeva vadaeni.” (1 Kor. 6:​11) Unai gaudia ita laloaboio be namo, anina be, ita lalodia momo lasi bona ‘vaira negana gaudia do ita goadalaia.’

KERISO “DO UMUI ABIDADAMA HENIA GOADA”

(Kol. 1:1–​4:​18)

Paulo be Kolose taudia ia tore henia neganai, hahediba koikoi taudia edia lalohadai ia hahedinaraia. Ia gwau hahemauri be Taravatu amo lasi, to ‘Keriso abidadama henia noho’ karana amo. Paulo be Kolose taudia ia hagoadaia, “Keriso ena latanai emui mauri do umui haginia, ruma idia haginia nadi goadana ena latanai bamona.” Edena dala ai unai ese edia kara ia hanamoa?​​—Kol. 1:​23; 2:​6, 7.

Paulo ia gwau: “Unai kara ibounai ia hereaia kara be lalokau. Do umui lalokau henia, vadaeni do umui noho hebou namo herea, mai laloa tamona danu. Keriso ena maino nega ibounai do umui abia noho emui kudouna lalonai.” Ma Paulo ia gwau: “Emui hesiai gaukara ibounai lalonai, mai emui kudouna ibounai do umui karaia. Do umui karaia, ia be tau ta ena gaukara lasi, to Lohiabada ena gaukara umui karaia bamona.” Paulo ia gwau, kongrigeisen murimurinai idia noho taudia vairanai “kara namodia mai aonega danu do umui karaia.”​​—Kol. 3:​14, 15, 23; 4:5.

Baibel Henanadaidia Edia Haere:

2:8​​—Paulo ia gwau dahaka gaudia do ita dadaraia? Ita ia sisiba henia Satani ena tanobada gaudia ibounai​​—tanobada taudia ese idia abia dae lalohadai bona ura idauidau​—ita dadaraia totona. (1 Ioa. 2:​16) Unai gaudia haida be taunimanima ese idia abia dae lalohadai idauidau, kohu momo ura henia karana, bona tomadiho koikoi.

4:​16​​—Dahaka dainai Paulo ese Laodikea dekenai ia siaia revareva be Baibel lalonai ia noho lasi? Reana, ena badina be unai revareva be anina lasi hari inai nega totona, eiava reana unai revareva be Baibel ena revareva ma haida ida idia hegeregere dainai, Baibel lalonai idia torea lasi.

Ita Dibaia Gaudia:

1:​2, 20. Dirava ena hariharibada karana dainai, ia ese mauri davalaia boubouna ia henia, unai ese iseda lalomamina ia hanamoa bona lalomaino ia havaraia.

2:​18, 23. Manau koikoi karana​—tau ta ia ura taunimanima ese idia hanamoa totona manau karana ena toana sibona ia hahedinaraia. Hegeregere, kohu ia dadaraia bona sibona ena tauanina ia hahisia. Unai bamona ia karaia tauna ia hahedinaraia “tauanina ena laloa kavakava dainai, hekokoroku kava be unai tauna ena lalonai ia vareai.”