Abidadama be Badina Maorodia Laloa Karana amo Ia Vara be Namo, A?

“United States dekenai tomadiho stadilaia sikuli ta ia gunalaia tauna ta ia gwau: “ ‘Tomadiho’ taudia momo be tomadiho ta idia badinaia badina laloa karana idia ura lasi.” Ma ia gwau: “Idia ura ‘abidadama dainai’ gau ibounai idia abia dae sibona.”

UNAI ena anina be sibodia idia gwauraia abidadama taudia momo ese idia badinaia gaudia idia abia dae ena badina eiava edia abidadama ena badina ia noho eiava lasi idia lalohadailaia lasi. Unai dainai ita daradara lasi, momo idia ura lasi tomadiho idia herevalaia.

Madi, unai bamona tomadiho lalonai laulau gaukaralaia bona guriguri tamona gwauraia loulou karana ese badina maorodia laloa karana ia hamaragia. Unai bamona kara bona ruma mai hairaidia, galasi uindo mai edia hairai, bona lalona veria miusiki, ese taunimanima milioni momo edia tomadiho toana ia hahedinaraia. Ena be dubu taudia haida idia gwau edia abidadama be Baibel dekena amo, to edia hahediba herevana ‘Iesu do oi abia dae bona mauri do oi davaria’ ese Baibel stadilaia karana idia hagoadaia lasi. Ma haida ese taunimanima edia hekwakwanai hanamoa herevadia eiava politikol herevadia idia harorolaia. Unai gau ibounai dainai dahaka ia vara?

North America dekenai unai kara ia vara dainai, tomadiho sivarai torea tauna ta ia gwau: “Keristani tomadiho . . . be dobu gauna lasi, [bona] idia badinaia taudia be idia hadibaia namonamo lasi.” Ripoti ia karaia tauna ta ese United States ia gwauraia “Baibel idia duahia momo lasi tanona.” Unai kara be Keristani tomadihona ia noho tanodia haida dekenai ia vara danu. Keristani lasi tomadiho oreadia momo ese badina maorodia laloa karana idia hagoadaia lasi to ane abia badabada karana idia herevalaia momo, guriguri helagadia, bona laloa dobu kara helagadia idauidau idia karaia, to badina maorodia bona namodia idia laloa lasi.

To, unai taunimanima, edia tomadiho ia abia dae hereva idia maoro eiava idia momokani idia laloa maragi taudia, be edia dina ta ta maurina lalonai nega momo gau ma haida idia laloa maoromaoro. Bema tau ta be motuka ta​​—⁠gabeai rabisi negea gabuna dekenai do ia noho gauna​​—⁠ia tahua namonamo do ia hoia totona, do oi hoa bema ena tomadiho ia herevalaia ia gwau, ‘Bema lauegu tama sina dekenai ia hegeregere, lau dekenai do ia hegeregere danu,’ ani?

Bema ita ura momokani Dirava ita hamoalea, ia dainai ita abia dae herevadia idia maoro momokani ita laloa maoromaoro be gau badana, ani? Aposetolo Paulo ese iena nega ai idia noho tomadiho taudia haida ia herevalaia, ia gwau: “Dirava ena hesiai gaukara idia ura karaia namonamo, to karaia dalana be idia diba lasi.” (Roma 10:⁠2) Unai bamona taudia be ruma penia tauna ta ida ita hahegeregerea diba, ia gaukara goada ruma ia penia totona to biaguna ena hereva ia kamonai lasi  dainai kala kererena ia gaukaralaia. Ruma penia tauna be ena gaukara do ia moalelaia, to biaguna ese do ia abia dae, a?

Dirava ese tomadiho momokani dekenai ia abia dae gaudia be dahaka? Baibel ese unai ia haerelaia, ia gwau: “Inai bamona kara be namo, badina be inai dekena amo iseda Hamauria Diravana ita hamoalea noho. Dirava ia ura taunimanima ibounai ese mauri do idia davaria, bona hereva momokani do idia diba.” (1 Timoteo 2:​3, 4) Haida idia laloa unai bamona diba be hari inai nega ai idia noho tomadiho momo lalonai idia davaria diba lasi. To mani oi laloa​​—⁠bema Dirava ena ura be taunimanima ibounai be hereva momokani ena diba maorona do idia diba, idia dekena amo do ia hunia, a? Baibel ena hereva be unai bamona lasi, ia gwau: “Bema oi ese Lohiabada oi tahua, ia ese oi do ia abia dae.”​​—⁠1 Sivarai 28:⁠9.

Edena dala ai Dirava be ia idia tahua mai edia momokani ida taudia dekenai sibona ia hahedinaraia? Hereva gabena ese haere do ia henia.