MASE TAUDIA DAINAI IDIA LALOHISIHISI TAUDIA DURUA DALADIA
Heduru Namodia Idia Lalohisihisi Taudia Totona
MASE NEGADIAI TAUNIMANIMA BE IDIA DARADOKO, BONA VANEGAI MOMO BE UNAI TOPIK DEKENAI TAHUA GAUKARA BADANA IDIA KARAIA. CT100To, inai magasin ena rau 6 ia lao 12 ai ia hedinarai, Baibel sibona be heduru maorona ia henia diba. Idaunegai bona hari inai negai, Baibel be taunimanima ia hakaua namonamo. To, Baibel lalonai be sisiba hereva sibona idia noho lasi. Danu, mase taudia dainai idia lalohisihisi taudia ia hagoadaia hereva momo be Baibel lalonai idia noho danu.
-
Ita diba mase taudia be idia hisihisi lasi
Baibel dekenai, Hadibaia Tauna 9:5 ia gwau: “Mase taudia be gau ta idia diba lasi.” Salamo 146:4 ia gwau, mase taudia “idia ura idia karaia gaudia be do idia doko.” Ioane 11:11 ia gwau, mase taudia be idia mahuta noho.
-
Lalokau Diravana ita abidadama henia neganai ita goada
Baibel dekenai, 1 Petero 3:12 ia gwau: “Iehova * ena matana be kara maoromaoro taudia ia itaia, bona ena taiana amo edia guriguri ia kamonai.” Eda sivarai ia kamonai henia tauna ta ita hereva henia amo lalogoada ita abia hegeregerena, Dirava guriguri henia karana amo lalogoada ita abia diba o iseda lalona ita biagua diba. Momokani, guriguri karana amo eda Havaraia Tauna ena turana ai ita lao—Ia be ena siahu ia gaukaralaia diba ita ia hagoadaia totona.
-
Vaira nega namona ita naria noho
Vaira neganai guria gabuna ai idia noho taudia be inai tanobada ai do idia mauri lou negana mani oi laloa! Baibel ese unai nega ia herevalaia momo. Baibel ese tanobada ai do ia vara gauna be inai bamona ia herevalaia: Dirava “ese mata ranu ibounai be [iseda] matana amo do ia dahua oho, bona mase be do ia ore, bona lalohisihisi, taitai, bona hisihisi danu be do idia ore.”—Apokalupo 21:3, 4.
Baibel ia havaraia Diravana, Iehova, idia abidadama henia taudia momo be mase taudia dainai idia lalohisihisi to edia lalona ia goada badina idia abia dae vaitani mase taudia be do idia toreisi lou. Hegeregere, Ann be ia headava bona lagani 65 murinai ena tau ia mase; ia gwau: “Baibel ese lau ia hadibaia mase taudia be idia hisihisi lasi bona Dirava ese ia laloatao taudia ibounai be do ia hatoredia isi lou. Egu tau lau laloa negadiai, unai hereva ese lau idia hagoadaia dainai, lau dekenai ia vara metau badana lau haheaukalaia!”
Inai magasin ena rau 4 ai ia ita herevalaia hahinena, Tiina, ia gwau: “Timo ia mase dinana amo, Dirava be lau ia sapot. Egu lalohekwarahi negadiai, Iehova be lau ia durua. Bona Baibel ese ia gwauhamtalaia toreisi lou herevana be lau abia dae vaitani. Unai ese lau ia durua lau haheauka noho ela bona Timo do lau itaia lou.”
Unai bamona hereva idia gwauraia taudia milioni momo danu be idia abia dae vaitani, Baibel ena hereva be do ia momokani. Bema oi laloa Baibel ena hereva be koikoi eiava nihi ta sibona, vadaeni oi sibona oi tahua Baibel ena sisiba bona gwauhamata herevadia be momokani o lasi. Reana do oi itaia mase taudia dainai idia lalohisihisi taudia do ia durua gauna hereadaena be, Baibel.
MASE TAUDIA DO IDIA TOREISI LOU ENA DIBA MA HAIDA OI ABIA TOTONA
Vidio haida oi itaia diba bema oi lao emai websait, jw.org
Baibel ia gwauhamata vaira negana ai ita ese mase taudia do ita welkam henidia
Oi lao LIBRARY > VIDEOS
MASE TAUDIA DEKENAI DAHAKA DO IA VARA?
Ita mase neganai, dahaka do ia vara? Baibel ena haere ese ita ia hagoadaia
Oi lao LIBRARY > VIDEOS (Video Category: The Bible > Bible Teachings)
OI URA SIVARAI NAMONA OI KAMONAI, A?
Sivarai dikadia be momo, to sivarai namona be edeseniai oi davaria diba? Inai vidio ese ia hereva buklet ladana be, Dirava Ena Sivarai Namona!
Oi lao LIBRARY > VIDEOS (Video Category: Our Meetings and Ministry > Tools for the Ministry)
^ Baibel ese ia hahedinaraia Iehova be Dirava ena ladana.
Reana Inai Danu Oi Ura
OIEMU LALOKAU TAUNA TA IA MASE NEGANAI
Mase Taudia Edia Helaro Momokanina
The thought of never again being able to talk to, laugh with, or hold your loved one can be most difficult to bear. Yet the Bible holds out hope.
