3 Dahaka Dainai Taunimanima Namodia be Hisihisi Idia Davaria?
Dahaka Dainai Ena Haere Ita Diba be Gau Badana?
Taunimanima namodia be hisihisi idia davaria neganai, haida be unai idia abia dae lasi. Danu haida idia mamia taunimanima namodia ai oi lao be anina lasi badina hisihisi do oi davaria.
Oi Lalohadailaia Totona
Taunimanima haida idia abia dae mauri biagua siahuna dainai dika idauidau idia vara. Haida idia laloa Dirava ese taunimanima dikadia ia panisia eiava namodia edia abidadama ia tohoa totona, idia dekenai hisihisi ia havaraia. To, ma haida idia laloparara lasi dahaka dainai taunimanima namodia be hisihisi idia davaria noho. Unai dainai inai bamona henanadai idia vara:
-
Bema mauri biagua siahuna ese gau ibounai dekenai abia hidi ia karaia, vadaeni dahaka dainai ita ura gorere lasi maurina ita noholaia bona abia hidi maorodia ita karaia?
-
Bema Dirava be taunimanima ia laloa bada, edena dala ai ia be dagedage tauna bona idia ia tohoa totona, hisihisi ia havaraia?
DIBA MA HAIDA ABIA
Inai vidio ladana, Dahaka Dainai Dirava ese Hisihisi Ia Koua Lasi? be jw.org ai oi itaia.
Baibel Ia Gwau
Hisihisi be Dirava amo ia mai panisia karana lasi.
To, ita davaria hisihisi momo be idia vara kava badina ta be gabu eiava nega kererena dekenai ia noho.
“Heau helulu dekenai, heau haraga taudia be guna lasi, bona tuari lalonai, goada taudia idia kwalimu lasi. Aonega taudia ese aniani idia abia lasi, diba momo taudia ese kohu momo idia davaria lasi, bona gaukara bada taudia be do idia hanamoa lasi. Badina ibounai ese nega dika idia davaria noho, bona inai dika ia vara kava noho.”—HADIBAIA TAUNA 9:11.
Ita be goevadae lasi taudia dainai hisihisi ita davaria.
Nega momo taunimanima ese inai hereva “kara dika” idia gaukaralaia ta ia karaia kara kererena ta idia herevalaia totona. To, Baibel ese unai hereva ia gaukaralaia danu taunimanima namodia bona dikadia ese idia abia hanai kara dika ia herevalaia totona.
“Momokani, lau be kara dika lalonai lau vara, bona kara dika lalonai egu sinana ese lau ia havaraia.”—SALAMO 51:5.
Kara dika be taunimanima dekenai ia hanaia dainai, edia mauri ia dika.
Unai ese iseda hetura karana Havaraia Tauna ida ia hadikaia sibona lasi to Dirava ena havaraia gaudia ibounai danu. Unai badina dainai taunimanima ta ta bona tanobada besena ibounai dekenai hisihisi bada ia havaraia.
“Lau ura kara namona lau karaia neganai, kara dika be lau ida ia noho.”—ROMA 7:21.
“Havaraia gaudia ibounai be idia taitai bona idia hisihisi hebou noho ema bona hari.”—ROMA 8:22.
