1. Adamu bona Heva ese dahaka hahenamo idia haboioa, bona dahaka ia vara?

OI LALOA daika be mai ena maoro namo bona dika edia taravatu ia atoa totona? Adamu bona Heva be namo bona dika dibaia au ena huahua idia ania neganai gau ta idia hahedinaraia. Idia karaia abia hidi ese ia hahedinaraia Iehova ese ia atoa taravatu idia laloa bada lasi. Idia sibona ese dahaka be namo bona dika ena taravatu idia abia hidi. (Gen. 3:22) Idia haboioa hahenamo mani oi laloa. Edia hetura karana Iehova ida bona mauri hanaihanai ena hahenamo idia haboioa. Bona kara dika bona mase be edia natudia dekenai idia henia. (Roma 5:12) Adamu bona Heva edia abia hidi ese dika bada ia havaraia.

2-3. (a) Filipo ese ia haroro henia neganai, Etiopia eunuko tauna be dahaka ia karaia? (b) Bema ita bapatiso dahaka hahenamo do ita abia, bona edena henanadai do ita herevalaia?

² Adamu bona Heva edia kara bona Filipo ese ia haroro henia Etiopia eunuko tauna ena kara edia idau mani oi laloa. Unai eunuko tauna ese Iehova bona Iesu edia lalokau karana ia laloa bada dainai maoromaoro bapatiso ia abia. (Kara 8:34-38) Bema Dirava dekenai iseda mauri ita gwauhamatalaia bona eunuko tauna bamona bapatiso ita abia, mai anina bada gauna ta ita hahedinaraia. Ita hahedinaraia ita be Iehova bona Iesu ese ita totona idia karaia gauna ita laloa bada. Ita hahedinaraia ita be Iehova ita abidadama henia bona ita abia dae ia sibona be mai ena maoro namo bona dika edia taravatu ia atoa totona.

³ Iehova ita hesiai henia neganai ita abia hahenamo mani oi laloa! Iehova ese ita dekenai ia henia hahenamo ta be inai:  Adamu bona Heva ese idia haboioa gaudia ibounai bona mauri hanaihanai do ia henia lou. Iesu Keriso ita abidadama henia dainai, Iehova ese iseda kerere ia gwauatao bona lalomamina goevana ia henia. (Mat. 20:28; Kara 10:43) Bona ita be Iehova idia hesiai henia taudia huanai ita noho bona vaira nega ai hahenamo do ita abia. (Ioa. 10:14-16; Roma 8:20, 21) Ena be Iehova idia dibaia taudia haida be unai idia diba, to idia ura lasi Etiopia eunuko tauna ena haheitalai idia tohotohoa. Dahaka ese idia ia koua bapatiso idia abia totona? Bona edena dala ai unai koua gaudia idia hanaia?

4-5. Avery bona Hannah be dahaka koua gaudia idia davaria?

⁴ Haida be abia hidi karaia totona idia daradara. Avery ena tama sina be Iehova ena Witnes taudia. Iena tamana ena kara be namo bona ia be elda namona ta. To dahaka dainai Avery be ia bapatiso lasi? Ia gwau: “Lau hegeregere lasi egu tamana ena kara lau tohotohoa totona.” Avery ia laloa bema ia bapatiso bona maduna ia abia, do ia hegeregere lasi unai maduna ia huaia totona. Bona ma ia gwau: “Lau gari badina lau do idia noia taunimanima edia vairanai lau guriguri, tok lau henia, eiava haroro gaukara ena grup do lau hakaua.”

⁵ Hannah, ena mauri lagani be 18, ia danu be abia hidi karaia totona ia daradara. Iena tama sina be Iehova idia hesiai henia taudia. To ia daradara ia be Iehova ena kara maoromaoro taravatudia do ia badinaia eiava. Dahaka dainai Hannah ia laloa ia be ia hegeregere lasi? Badina nega haida ia lalomanoka neganai sibona ia haberoa. Hannah ia gwau: “Lau karaia gauna be ta dekenai lau herevalaia lasi bona egu tama sina danu be idia diba lasi, bona lau karaia gauna dainai Iehova be lau do ia ura henia lasi.”

6. Dahaka ese Vanessa ia koua bapatiso ia abia totona?

⁶ Turadia idia laloa bada. Vanessa, ena mauri lagani be 22, ia gwau: “Lau be mai egu turana namona ta, bona kahirakahira lagani ten lalonai ia lau diba.” To, unai kekeni ese Vanessa ia durua lasi bapatiso ia abia totona. Unai dainai Vanessa be ia lalohisihisi bona ia gwau, “Tura ma ta davaria totona be ia auka, bona bema emai hetura karana lau hadokoa tura ma ta do lau davaria lasi.”

7. Dahaka dainai Makayla be ia gari?

⁷ Oi gari badina abia hidi kererena do oi karaia. Makayla ena mauri lagani be faiv neganai ena kakana be kongrigeisen amo idia atoa siri. Ia tubu daekau lalonai ia itaia iena kakana ena abia hidi ese ena tama sina dekenai lalohisihisi ia havaraia. Makayla ia gwau: “Lau gari badina bema lau bapatiso bona abia  hidi kererena lau karaia, kongrigeisen amo lau do idia atoa siri bona egu tama sina do idia lalometau bada.”

8. Dahaka dainai Miles ia gari?

⁸ Ma haida edia badu karana dainai oi gari. Miles ena tamana bona ena tamana ese ia adavaia lou hahinena be Iehova idia hesiai henia, to ena sinana korikori be Witnes lasi. Miles ia gwau: “Lau be lagani 18 lalonai egu sinana ida lau noho to lau gari egu sinana dekenai egu abia hidi lau gwauraia hedinarai totona. Egu tamana be Witnes tauna ai ia lao neganai egu sinana be ia moale lasi. Bona lau gari badina bema egu abia hidi gauna be egu sinana dekenai lau herevalaia do ia moale lasi.”

9. Iehova ena lalokau bona haheauka karana oi dibaia neganai, dahaka do oi karaia?

⁹ Adamu bona Heva ese idia karaia abia hidi ese ia hahedinaraia idia ura lasi Iehova idia hesiai henia badina ia idia lalokau henia lasi. Iehova be maoromaoro idia ia hamasea lasi, to lagani momo lalonai idia mauri bona natuna idia havaraia bona edia natudia naria dalana dekenai sibodia edia abia hidi idia karaia. Adamu bona Heva edia abia hidi amo idia vara gaudia ese ia hahedinaraia idia ura lasi Iehova idia badinaia. Edia natuna ginigunana ese ena tadina merona ia alaia mase, bona unai nega amo ema bona hari taunimanima be idia dagedage bona sibona idia laloa bada. (Gen. 4:8; 6:11-13) To, Iehova ese dala ia kehoa edia natudia​—idia ura Iehova idia hesiai henia taudia unai​—ia hamauria totona. (Ioa. 6:38-40, 57, 58) Iehova ena haheauka bona lalokau karana oi dibaia noho lalonai, emu hetura karana ia ida do ia goada. Namo lasi Adamu bona Heva edia haheitalai oi tohotohoa, to Iehova dekenai emu mauri oi gwauhamatalaia.

10. Dahaka dainai Salamo 19:7 laloa dobu karana ese oi do ia durua Iehova oi hesiai henia totona?

¹⁰ Iehova oi dibaia noho. Iehova oi dibaia noho lalonai, gau ta ese oi do ia koua lasi ia oi hesiai henia totona. Avery, paragraf foa ai ita herevalaia kekeni ia gwau: “Salamo 19:7 (duahia) ai ia noho gwauhamatana lau duahia  bona lau laloa dobu neganai, unai ese lau ia hagoadaia.” Avery be ena mauri lalonai ia itaia Iehova ese unai gwauhamata ia hagugurua neganai, iena lalokau Dirava dekenai be ia goada. Lalokau ese ita do ia durua Iehova ita hesiai henia sibona lasi, to ita ia durua Iehova ese ia ura henia lasi gaudia ita dadaraia totona. Hannah, paragraf faiv ai ita herevalaia kekeni ia gwau: “Baibel duahia bona sibona egu stadi karana amo lau laloparara, sibona lau haberoa bona hahisia neganai, Iehova lau hahisia danu.” (1 Pet. 5:7) Hannah be ‘Dirava ena hereva . . . ia badinaia’ kekenina ai ia lao. (Iam. 1:22) Dahaka hahenamo ia abia? Hannah ia gwau: “Iehova badinaia karana ena namo lau itaia neganai, ia lau lalokau henia bada. Hari lau diba momokani heduru lau tahua neganai, Iehova ese lau do ia durua.” Hannah be sibona haberoa bona hahisia karana ia karaia lou lasi. Iehova dekenai ena mauri ia gwauhamatalaia bona bapatiso ia abia.

11. Vanessa be tura namodia ia abia hidi totona dahaka ia karaia, bona unai amo dahaka ita dibaia?

¹¹ Mai aonega ida emu turadia oi abia hidi. Vanessa, paragraf siks dekenai ita herevalaia kekeni, be gabeai ia laloparara ena turana kekenina ese ia koua Iehova ia hesiai henia totona. Unai dainai edia hetura karana ia hadokoa. Bona kongrigeisen lalonai tura matamatadia ia davaria. Vanessa ia gwau: “Noa bona ena ruma bese edia haheitalai ese lau ia durua bada. Idia be Iehova idia lalokau henia lasi taudia huanai idia noho, to edia ruma bese lalonai edia hetura karana idia moalelaia.” Vanessa be ia bapatiso murinai painia gaukara ia karaia. Ia gwau: “Unai ese lau ia durua egu kongrigeisen bona kongrigeisen ma haida lalonai tura namodia lau davaria totona.” Oi danu ese tura namodia oi davaria diba bema Iehova ese ita dekenai ia henia gaukarana lalonai oi bisi.​—Mat. 24:14.

12. Dahaka dainai Adamu bona Heva be Iehova idia gwau-edeede henia, bona idia dekenai dahaka ia vara?

¹² Iehova gari henia karana oi dibaia. Nega haida ita gari be mai ena badina. Hegeregere, ita gari badina ita ura lasi Iehova ena lalona ita hahisia. (Sal. 111:10) Bema Adamu bona Heva be unai bamona gari karana idia hahedinaraia, Iehova do idia gwau-edeede henia lasi. To unai idia karaia murinai,  idia laloparara idia be kara dika taudia ai idia lao. Unai dainai kara dika bona mase be edia natudia dekenai idia henia hanai. Idia laloparara Dirava ena taravatu idia utua, bona idia hemarai badina idia be kopina kavakava.​—Gen. 3:7, 21.

13-14. (a) Petero Ginigunana 3:21 ena hereva bamona, dahaka dainai mase totona ita gari lasi be namo? (b) Dahaka badina haida dainai Iehova ita lalokau henia?

¹³ Iehova ita gari henia neganai, mase totona do ita gari lasi. Iehova be dala ia kehoa ita ese mauri hanaihanai do ita abia totona. Bema kara dika ta ita karaia bona mai iseda lalona ibounai ida ita helalo-kerehai, Iehova be iseda dika do ia gwauatao. Unai do ia karaia bema ita be iena Natuna ena mauri davalaia boubouna ita abidadama henia. Iseda abidadama hahedinaraia dalana ta be, Dirava dekenai iseda mauri ita gwauhamatalaia bona bapatiso ita abia.​—1 Petero 3:21 duahia.

¹⁴ Iehova ita lalokau henia ena badina be momo. Ita dekenai dina ta ta ai ita moalelaia gaudia ia henia sibona lasi, to ia ita dibaia totona hereva momokani bona ena ura ia hadibaia danu. (Ioa. 8:31, 32) Ia ese Keristani kongrigeisen amo ita ia hakaua bona durua. Hari ita ia durua iseda hekwakwanai ita haheaukalaia bona mauri hanaihanai helarona vaira nega totona ia henia. (Sal. 68:19; Apok. 21:3, 4) Iehova ese ita dekenai iena lalokau ia hahedinaraia daladia ita laloa dobu neganai, ia do ita lalokau henia. Unai bamona ita karaia neganai, Iehova gari henia karana do ita dibaia. Ita ura lasi ita lalokau henia Diravana ita habadua.

15. Edena dala ai Makayla be ena gari ia hanaia?

¹⁵ Makayla, paragraf seven ai ita herevalaia kekeni be ia laloparara Iehova be dika gwauatao Diravana. Ia gwau: “Lau diba ita ibounai be goevadae lasi taudia bona kerere momo ita karaia. Danu lau dibaia gauna be Iehova be ita ia lalokau henia bona mauri davalaia boubouna amo iseda dika do ia gwauatao.” Iehova ia lalokau henia dainai ena mauri ia gwauhamatalaia bona bapatiso ia abia.

16. Miles ia gari lasi totona, dahaka heduru ia abia?

¹⁶ Miles ia gari badina ia laloa ena sinana ese ena abia hidi bapatiso totona do ia abia dae lasi. To heduru totona sekit naria tauna ia noia. Miles ia gwau: “Unai sekit tauna ena sinana danu be Witnes lasi. Ia ese lau ia durua egu sinana ida lau herevahereva namonamo totona, unai amo do ia laloparara egu tamana ese lau ia doria dainai lasi, to lau sibona egu abia hidi dainai bapatiso do lau abia.” Miles ena sinana be ena abia hidi dekenai ia moale lasi. To gabeai Miles be sinana ena ruma ia rakatania bona ena abia hidi bapatiso totona ia badinaia. Ia gwau: “Iehova ese lau totona ia karaia gau namodia lau laloa neganai, unai ese lau ia durua. Bona Iesu ena mauri davalaia boubouna lau laloa dobu neganai, lau laloparara Iehova be lau ia lalokau henia bada. Unai ese lau ia hagoadaia Iehova dekenai egu mauri lau gwauhamatalaia bona bapatiso lau abia.”

17. Ita ibounai be dahaka ita karaia be namo?

¹⁷ Heva be Eden umana ai au ena huahua ia ania neganai, Dirava ia gwau-edeede henia. Adamu ese au huahua ia ania neganai, ia hahedinaraia Iehova ese ia totona ia karaia gaudia ia laloa bada lasi. Momokani ita ibounai be Adamu bona Heva edia haheitalai do ita tohotohoa lasi, to ita ura Iehova ese ita totona ia karaia gaudia ita laloa bada. Bapatiso ita abia neganai, ita hahedinaraia bona hamomokania iseda Tamana Iehova ita lalokau henia. Badina ia be mai ena maoro dahaka be namo bona dika edia taravatu ia atoa totona.

18. Edena dala ai Iehova hesiai henia karana oi moalelaia diba?

¹⁸ Ita bapatiso murinai namona be Iehova ena kara maoromaoro taravatudia ita badinaia. Dirava ena hesiai taudia milioni momo be unai bamona idia karaia noho. Unai bamona oi karaia diba bema Dirava ena Hereva Baibel oi lalopararalaia namonamo, hanaihanai emu tadikaka taihu oi bamoa, bona emu lalokau Tamana amo oi dibaia gaudia be ma haida dekenai oi herevalaia. (Heb. 10:24, 25) Abia hidi oi karaia neganai, Baibel bona Iehova ena orea amo idia mai sisiba oi badinaia. (Isa. 30:21) Bena oi karaia gaudia ibounai edia anina do idia vara momokani.​—Aon. 16:3, 20.

19. Dahaka oi laloa noho be namo, bona dahaka dainai?

¹⁹ Iehova ena heduru amo oi abia hahenamo oi laloa neganai, oiemu lalokau ia totona bona ena kara maoromaoro taravatudia dekenai be do ia goada. Bena Satani ese ia havaraia tarapu idauidau ese oi do ia koua lasi Iehova oi hesiai henia totona. Mani oi laloa, lagani tausen momo murinai, do oi laloparara bapatiso totona oi karaia abia hidi be abia hidi hereadaena!