1. Filipi 2:3 ena hereva bamona, edena dala ai manau karana ese ita ia durua Iehova bona ma haida ita tura henidia namonamo?

MAI manau ida Iehova ena taravatu ita badinaia, badina ita diba nega ibounai Iehova be iseda namo ia laloa bada. (Efe. 4:22-24) Manau karana ese ita ia durua Iehova ena ura ita atoa guna bona ma haida ita laloa bada totona. Unai amo, Iehova bona iseda tadikaka taihu ita tura henidia namonamo diba.​—Filipi 2:3 duahia.

2. Aposetolo Paulo be dahaka ia lalopararalaia, bona inai atikol ai dahaka do ita herevalaia?

² Bema ita naria namonamo lasi, tanobada taudia edia hekokoroku bona sibona laloa bada karana ita tohotohoa diba. * Toana be Keristani taudia ginigunadia haida dekenai unai be hekwakwanai ta, badina aposetolo Paulo be Roma taudia dekenai ia gwau: “Umui huanai idia noho taudia ta ta lau hamaoroa, namo lasi sibona do ia laloa bada, to ena laloa dalana amo do ia hahedinaraia ia laloa maoromaoro.” (Roma 12:3) Paulo ia laloparara nega haida sibona ita laloa be namo. To, mai laloa maoromaoro ida unai bamona do ita karaia. Inai atikol ai dala toi do ita herevalaia, bona do ita itaia edena dala ai manau karana ese ita ia durua sibona laloa bada karana ita dadaraia totona. Unai dala be (1) headava lalonai, (2) iseda hesiai gaukara maduna, bona (3) social media, unai be intanet ai ita atoa laulau, vidio, bona ita torea herevadia.

3. Dahaka dainai headava lalonai hekwakwanai idia vara, bona haida ese edena dala ai unai idia hamaoromaoroa toho?

³ Iehova ese headava ia karaia tau bona hahine ese idia moalelaia totona. To, idia be goevadae lasi taudia dainai gau haida dekenai do idia lalotamona lasi. Momokani, Paulo ia gwau idia headava taudia be hekwakwanai haida do idia davaria. (1 Kor. 7:28) Haida be nega momo edia adavana ida idia heatu, bona idia laloa reana matamanai bema idia headava lasi be namo. Bema tanobada ena lalohadai idia badinaia, do idia laloa idia divos be namo. Bona do idia laloa, gau badana be ta ta sibona edia ura idia atoa guna.

4. Dahaka ita dadaraia be namo?

⁴ Namo lasi ita laloa iseda headava be ia goada lasi. Ita laloatao, Baibel ia gwau matabodaga karana sibona dainai ta ese ena adavana ia divos henia diba. (Mat. 5:32) Unai dainai Paulo ese ia gwauraia hisihisi eiava hekwakwanai idia vara neganai, namo lasi ita laloa: ‘Egu adavana be lau ia laloa bada, eiava? Egu adavana be lau ia lalokau henia, eiava? Reana ma ta lau adavaia neganai do lau moale.’ Bema unai lalohadai ita abia, ita be sibona ita laloa bada noho, to iseda adavana ena namo ita laloa lasi. Inai tanobada ena aonega ese oi do ia doria emu kudouna oi badinaia bona oi idia hamoalea gaudia oi karaia totona, ena be unai ese emu headava do ia hadikaia. Baibel ia gwau, “sibona emui namo do umui laloa lasi, to ma haida edia namo danu do umui laloa.” (Fili. 2:4) Iehova ia ura lasi emui headava umui hadokoa, to ia ura umui hagoadaia. (Mat. 19:6) Iehova ena ura be ia oi laloa guna, to oi sibona oi laloa lasi.

5. Efeso 5:33 ena hereva bamona, headava taudia be edena bamona ta ta do idia kara henia?

⁵ Namona be headava tau bona hahine be mai lalokau bona hemataurai ida ta ta idia  kara henia. (Efeso 5:33 duahia.) Baibel ese ita ia hadibaia, namo lasi abia karana ita laloa bada, to henia karana do ita goadalaia. (Kara 20:35) Edena kara ese headava tau bona hahine ia durua diba lalokau bona hemataurai karana idia hahedinaraia totona? Unai be manau karana. Idia manau headava tatau bona hahine be sibodia edia namo idia tahua lasi, to ‘ma ta ena namo idia tahua.’​—1 Kor. 10:24.

6. Steven bona Stephanie edia hereva amo dahaka oi dibaia?

⁶ Manau karana ese Keristani headava taudia momo ia durua edia headava idia moalelaia totona. Hegeregere, headava tauna ta ladana Steven ia gwau: “Bema umui be tim ta bamona, hekwakwanai idia vara neganai do umui gaukara hebou. Do umui laloa lasi ‘dahaka be namo lau totona? to do umui laloa ‘dahaka be namo ai totona?” Iena hahine Stephanie be unai bamona ia laloa danu, ia gwau: “Ta be do ia ura lasi ena inai tauna ida ia noho. Hekwakwanai ta ia vara neganai, ena badina ai tahua namonamo. Bena ai guriguri, iseda pablikeisen haida ai duahia, bona ai herevalaia. Ta ta ai heai henia lasi, to ai hekwarahi unai hekwakwanai ai hamaoromaoroa totona.” Headava tau bona hahine idia moale diba bema idia laloa lasi ta ese ma ta ia hereaia.

7. Tadikaka ta be hesiai gaukara maduna ta ia abia neganai, dahaka lalohadai ia abia be maoro?

⁷ Dala idauidau ai Iehova ita hesiai henia be hahenamo badana. (Sal. 27:4; 84:10) Bema tadikaka ta be hesiai gaukara totona sibona ia henia, unai be namo herea. Momokani, Baibel ia gwau: “Bema ta ia ura naria tauna ena maduna ia abia, ia be gaukara namona ia ura henia unai.” (1 Tim. 3:1) To, bema maduna ta ia abia, namo lasi ia laloa ia ese ma haida ia hereaia. (Luka 17:7-10) Namona be iena tahua gauna be mai manau ida ma haida do ia hesiai henia.​—2 Kor. 12:15.

8. Diotrepe, Usaia, bona Abesaloma edia sivarai amo dahaka ita dibaia?

⁸ Ita hadibaia totona, Baibel lalonai sibona idia laloa bada taudia edia sivarai idia noho. Diotrepe be ia manau lasi bona ia ura kongrigeisen taudia “huanai ia bada.” (3 Ioa. 9) Usaia be ia hekokoroku dainai ia ura Iehova ese ia henia lasi gaukarana ta ia karaia. (2 Siv. 26:16-21) Abesaloma be koikoi dalanai taunimanima edia lalona ia veria badina ia ura king dagina ia abia. (2 Sam. 15:2-6) Unai Baibel sivarai ese idia hahedinaraia goevagoeva, sibona edia namo idia tahua taudia be Iehova ese ia lalonamo henidia lasi. (Aon. 25:27) Idia hekokoroku bona idia ura ma haida ese do idia laloa bada taudia be gabeai, hekwakwanai momo idia davaria.​—Aon. 16:18.

9. Iesu be dahaka haheitalai ia hahedinaraia?

⁹ To, Iesu be unai hekokoroku taudia bamona lasi. Baibel ia gwau: “Ena be [Iesu] be Dirava ena toana hegeregerena, to ia laloa lasi ia be dagi do ia abia, anina be Dirava ida do ia hegeregere.” (Fili. 2:6) Ena be Iesu be Iehova kahirakahira ia noho, to ia be sibona ia laloa bada lasi. Ena hahediba taudia ia hamaoroa, ia gwau: “Umui ibounai huanai ia maragi tauna be do ia bada.” (Luka 9:48) Painia taudia, hesiai taudia, elda taudia, bona sekit taudia ida ita gaukara hebou be hahenamo badana, badina idia be Iesu bamona manau karana idia hahedinaraia noho! Bema ita manau, ma haida do ita lalokau henidia bada. Bona Iesu ia gwau Dirava ena hesiai taudia korikoridia be ta ta dekenai lalokau do idia hahedinaraia.​—Ioa. 13:35.

10. Dahaka oi karaia diba bema oi laloa kongrigeisen ai hekwakwanai haida be dala maorona ai idia hamaoromaoroa lasi?

¹⁰ Dahaka oi karaia diba bema oi itaia kongrigeisen  ai hekwakwanai haida idia vara, to oi laloa elda taudia ese dala maorona ai idia hamaoromaoroa lasi? Oi maumau lasi, to namona be mai manau ida hakaua taudia oi durua. (Heb. 13:17) Unai oi karaia totona, sibona oi nanadaia: ‘Ia be momokani hekwakwanai badana bona idia hamaoromaoroa haraga be namo, a? Inai be nega maorona unai hekwakwanai hamaoromaoroa totona, a? Unai be egu maduna lau hamaoromaoroa totona, a? Lau ura kongrigeisen ia lalotamona, eiava lau ura sibona egu ladana lau abia isi?’

11. Efeso 4:2, 3 ena hereva bamona, mai manau ida Iehova ita hesiai henia neganai, dahaka ia vara diba?

¹¹ Iehova be taunimanima edia manau karana ia laloa bada, to edia diba ia laloa lasi, danu edia lalotamona karana ia laloa bada to idia hagugurua gaudia ia laloa lasi. Unai dainai namona be oi gaukara goada mai manau ida Iehova oi hesiai henia totona. Unai oi karaia neganai, oi ese kongrigeisen lalonai lalotamona do oi havaraia. (Efeso 4:2, 3 duahia.) Haroro gaukara oi goadalaia. Dala oi tahua ma haida dekenai kara namodia oi hahedinaraia totona. Taunimanima ibounai dekenai heabidae karana oi hahedinaraia, kongrigeisen ai maduna idia abia lasi taudia dekenai danu. (Mat. 6:1-4; Luka 14:12-14) Mai manau ida emu tadikaka taihu ida oi gaukara hebou neganai, do idia itaia oi be mai emu diba, to mai anina bada gauna be do idia itaia oi be manau tauna.

12. Baibel ese hetura karana be edena bamona ia herevalaia?

¹² Iehova ia ura iseda turadia bona ruma bese ida hebamo karana ita moalelaia. (Sal. 133:1) Iesu be mai ena tura namodia. (Ioa.  15:15) Baibel ese tura namodia ita bamoa karana ena namo ia herevalaia. (Aon. 17:17; 18:24) Bona ita ia hadibaia sibona ita noho lasi totona. (Aon. 18:1) Momo idia laloa social media idia gaukaralaia neganai, turadia momo do idia davaria, unai amo sibona do idia noho lasi. To, namona be social media amo ma haida hereva henia karana ita naria namonamo.

13. Dahaka dainai social media idia gaukaralaia taudia haida idia mamia, idia be turana lasi bona idia lalohisihisi?

¹³ Ripoti haida ese idia hahedinaraia nega bada idia gaukaralaia social media ai idia noho laulau, vidio bona hereva idia itaia taudia idia mamia idia be turana lasi bona idia lalohisihisi. Dahaka dainai? Badina taunimanima be nega momo social media ai edia mauri ai idia vara gau namodia idia atoa. Hegeregere idia sibona, edia turadia, bona idia loaloa gabu namodia edia laulau idia atoa. Unai dainai, unai laulau idia itaia taudia be laulau idia atoa taudia ida sibona do idia hahegeregerea, bona do idia laloa edia mauri ai gau namodia idia vara lasi. Keristani taihu ta ena mauri lagani 19 ia gwau: “Lau moale lasi badina lau itaia ma haida be wikeni ai moale karadia idia karaia, to lau be ruma dekenai lau noho sibona.”

14. Edena dala ai Baibel ena sisiba 1 Petero 3:8 ai ese ita ia durua social media ita gaukaralaia namonamo totona?

¹⁴ Momokani, social media be dala maorona ai ita gaukaralaia diba​—hegeregere, ruma bese bona turadia ita hereva henidia totona. To, reana oi itaia social media dekenai edia laulau, vidio bona hereva idia atoa taudia be idia heagi bona idia ura taunimanima ese idia do idia itaia. Toana be idia gwau, “Lau umui itaia.” Danu, haida be idia sibona eiava ma haida ese idia atoa laulau dekenai hereva mirodia idia torea. Baibel ese Keristani taudia ia hagoadaia, idia manau bona ma haida edia hemami idia laloa totona, unai dainai namo lasi social media be unai bamona idia gaukaralaia.​—1 Petero 3:8 duahia.

15. Edena dala ai Baibel ese ita ia durua sibona ita abia isi karana ita dadaraia totona?

¹⁵ Bema oi be social media oi gaukaralaia, sibona oi nanadaia: ‘Lau atoa hereva, laulau eiava vidio ese ma haida dekenai ia hahedinaraia lau heagi noho, a? Unai kara dainai ma haida ese lau idia mama henia diba, a?’ Baibel ia gwau: “Tanobada ena gaudia ibounai be  inai, tauanina ena ura, matana ese idia ura henia gaudia bona ta ese ena kohu ia heagilaia karana, unai gaudia be Tamana amo idia mai lasi, to tanobada amo idia mai.” (1 Ioa. 2:16) Baibel ma ta ese inai hereva, “ta ese ena kohu ia heagilaia karana” be inai bamona ia gwauraia, “ta ia ura hahedinaraia ia be mai ena ladana bada tauna.” Namo lasi Keristani taudia idia laloa idia be ladana bada taudia eiava ma haida ese do idia abia isi. Idia ese Baibel ena sisiba idia badinaia, ia gwau: “Namo lasi ita hekokoroku, ta ita hauraia ita kara helulu totona bona ita mama.” (Gal. 5:26) Bema ita manau, inai tanobada taudia ese idia hahedinaraia hekokoroku bona ladana abia isi karana do ita dadaraia.

16. Dahaka dainai hekokoroku karana ita dadaraia be namo?

¹⁶ Namona be manau karana ita hahedinaraia badina hekokoroku taudia be idia “laloa maoromaoro” lasi. (Roma 12:3) Hekokoroku taudia be idia hepapahuahu momo bona idia laloa ma haida idia hereaia. Edia laloa dalana bona kara ese nega momo idia sibona bona ma haida idia hahisia. Bema idia naria namonamo lasi, do idia hekokoroku bona Satani ese edia lalona ia hadiburaia bona hadikaia diba. (2 Kor. 4:4; 11:3) To, manau tauna be idau, badina ia laloa maoromaoro. Ia be sibona ia laloa bada lasi, bona ia laloparara dala idauidau ai ma haida ese ia idia hereaia. (Fili. 2:3) Bona ia diba “Dirava ese hekokoroku taudia ia dadaraia, to manau taudia dekenai hebogahisi hereadaena ia henia.” (1 Pet. 5:5) Laloa maoromaoro taudia idia ura lasi Iehova be edia inai tauna ai ia lao.

17. Dahaka ita karaia be namo ita manau noho totona?

¹⁷ Ita manau noho totona, namona be Baibel ena sisiba ita badinaia, ia gwau: “Mauri gunana mai ena kara idauidau do [ita] kokia bona mauri matamata be dabua bamona do [ita] hahedokilaia.” Unai ita karaia totona do ita hekwarahi. Namona be Iesu ena haheitalai ita stadilaia bona ita gaukara goada ia ita tohotohoa totona. (Kol. 3:9, 10; 1 Pet. 2:21) Bema unai bamona ita karaia hahenamo do ita abia. Manau karana ita hahedinaraia neganai, iseda ruma bese maurina do ita hanamoa, kongrigeisen ai lalotamona do ita habadaia, bona social media do ita gaukaralaia kerere lasi. Bona gau badana be Iehova ena hahenamo bona lalonamo do ita abia.