Lagani 1940 murinai, egu tama sina be Iehova ena Witnes taudia ida Baibel idia stadilaia. Ena be Baibel stadilaia karana idia hadokoa, to egu sinana be Watchtower bona Awake! magasin edia kopi ia abia noho. Lagani 1950 ai, New York City ai intanesinol hebouhebou ta idia abia, bona egu famili be unai hebouhebou dekenai idia lao.

Unai murinai, Tadikaka Lawrence Jeffries be ai ia vadivadi henia matamaia. Ia ura lau ia durua hereva momokani lau dibaia totona. Matamanai, Iehova ena Witnes taudia be politikol karadia bona ami gaukara amo idia gini siri karana dekenai lau lalotamona lasi. Tadikaka Jeffries lau hamaoroa bema America ai idia noho taudia ibounai be tuari dekenai idia lao lasi, iseda inai taudia ese tano do idia abia bona ita do idia biagua. Tadikaka Jeffries be mai haheauka ida lau ia durua, ia gwau: “Bema America ai idia noho taudia ibounai be Iehova Dirava idia hesiai henia noho bena edia inai taudia idia mai bona idia dagedage henidia, oi laloa Dirava be dahaka do ia karaia?” Iena hereva amo lau laloparara lau be kerere. Unai dainai lau ura bada Baibel ena hereva momokani lau dibaia.

Lau be hora momo lalonai, egu sinana ese ruma ena henunai ia noho daiutu ai ia atoa The Watchtower bona Awake! magasin gunadia lau duahia. Nega ia hanaia lalonai, lau laloparara lau be hereva momokani lau dibaia noho, unai dainai Tadikaka Jeffries ida Baibel lau stadilaia. Danu, hanaihanai hebou dekenai lau lao. Lau dibaia gaudia lau moalelaia, bona sivarai namona lau harorolaia. Lau laloparara “Iehova ena dina badana be ia kahirakahira” neganai, egu tahua gaudia lau haidaua. (Sef. 1:14) Lau ura lasi iunivesiti dekenai lau lao, to lau ura ma  haida lau durua Baibel ena hereva momokani idia dibaia totona.

Lagani 1956, June 13 ai, egu sikuli lau haorea bona dina toi murinai, sekit hebouhebou ta dekenai bapatiso lau abia. Unai negai lau diba lasi, gabeai Iehova ese lau dekenai gau namodia momo do ia henia, badina abia hidi lau karaia egu mauri ai Iehova lau dibaia bona ma haida lau durua Ia idia dibaia totona.

Lau bapatiso bona hua 6 murinai, regula painia gaukara lau hamatamaia. December 1956 ena Kingdom Ministry pepana ai, atikol ladana, “Can You Serve Where the Need Is Great?” ia noho. Unai boiboi herevana ese lau ia hagoadaia danu. Unai dainai lau ura pablisa momo lasi gabudia dekenai sivarai namona lau harorolaia.​—Mat. 24:14.

Lau be Edgefield, South Carolina dekenai lau lao. Unuseniai ia noho kongrigeisen dekenai pablisa be 4 sibona. Lau ginidae neganai pablisa ena namba ia daekau 5. Tadikaka ta ena daiutu vairana ai hebou ai karaia. Hua ta ta ai, haroro gaukara ai hora 100 lau gaukaralaia. Lau bisi bada badina haroro gaukara lau gunalaia bona kongrigeisen ai tok lau henia. Oibe, kongrigeisen ai gaukara momo lau karaia, bona egu diba Iehova dekenai lau habadaia noho.

Lau stadi henia hahine ta be mai ena funeral home, unai be Johnston taoni ai bona ia be daudau sisina. Ia ese lau dekenai pat-taim gaukara ia henia bona ai dekenai gwaumaoro ia henia ena bildin maragina ta ai gaukaralaia Kingdom Hall bamona.

Tadikaka Jolly Jeffries, egu stadi tauna ena tamana, be Brooklyn, New York amo ia mai, bona egu painia turana ai ia lao. Tadikaka ta ese ai ruaosi dekenai trailer maragina ta ai henia bona unuseni ai noho.

Saut kahana dekenai moni gaukara ena pei be maragi. Dina tamona ena gaukara davana totona 2 o 3 dola ai abia. Nega ta, lau dekenai ia noho moni sisina lau gaukaralaia sitoa dekenai aniani lau hoia totona. Sitoa amo lau raka-lasi neganai, tau ta be lau dekenai ia mai bona ia nanadaia: “Oi ura gaukara, a? Hora tamona ena davana be 1 dola.” Lau dekenai dina toi ia henia konstraksen gabuna ta lau hagoevaia totona. Lau laloparara, Iehova be lau ia durua noho Edgefield dekenai lau noho totona. To, Lagani 1958 ai, New York City dekenai idia abia intanesinol hebouhebou dekenai lau lao.

Hebouhebou ena dina iharuana ai, gau namona ta ia vara. Lau ese Ruby Wadlington lau hedavari henia, ia be Gallatin, Tennessee ai regula painia gaukara ia karaia. Ai ura misinari gaukara ai karaia dainai, hebouhebou dekenai Gilead ena hebou ai lao. Gabeai, revareva amo ai tore heheni. Bena nega ta, lau idia invait Gallatin dekenai pablik tok lau henia totona. Unai negai Ruby lau nanadaia lau ia adavaia totona. Unai murinai, Ruby ena kongrigeisen dekenai lau hanaia bona lagani 1959 ai headava.

Egu mauri lagani be 23 neganai, Gallatin ai lau idia abia hidi kongrigeisen naria tauna (hari idia  gwauraia elda oreana ena kodineita) ai lau lao totona. Charles Thompson be sekit gaukara ia karaia neganai, emai kongrigeisen ia vadivadi henia guna. Ena be gau momo ia dibaia, to sekit naria taudia ese tadikaka taihu durua daladia dekenai ia ura egu lalohadai ia diba. Unai tadikaka amo lau diba, henanadai ita henia be mai anina bada bona disisen ita do karaia lasi neganai hamomokania gaudia ita tahua be namo.

May 1964 ai, South Lansing, New York ai Basileia Hesiai Gaukara Sikuli dekenai lau idia invait, bona unai sikuli be hua tamona lalonai idia karaia. Unai sikuli ai kahana idia henia tadikaka ese lau idia durua Iehova lau dibaia noho bona ia kahirakahira lau lao totona.

January 1965 ai, lau bona Ruby idia invait sekit gaukara ai karaia totona. Emai sekit ginigunana be tano ena kahana badadia haida ia abia. Unai be Knoxville, Tennessee, amo ela bona Richmond, Virginia kahirakahira. Bona North Carolina, Kentucky, bona West Virginia ena kongrigeisen haida ai vadivadi henia. Lau be tadikaka bona taihu koremadia edia kongrigeisen sibona lau vadivadi henia, badina unai negai United States ena saut kahana ai taravatu ia noho, korema taudia be kurokuro taudia ida do idia hebou lasi. Tadikaka taihu be idia ogogami, bona ta ta durua heheni karana ai dibaia. Lagani daudau sekit gaukara ia karaia tadikaka amo mai anina bada gauna ta lau dibaia, ia gwau: “Namo lasi kongrigeisen ta oi vadivadi henia bona emu kara amo oi hahedinaraia oi be bosi ta. Bema tadikaka taihu ese oi be edia tadikaka bamona idia laloa, idia oi durua namonamo diba.”

Kongrigeisen maragina ta ai vadivadi henia neganai, Ruby be hahine matamata ta ida stadi ia hamatamaia, unai hahine ena natuna kekeni ena mauri lagani be 1. Kongrigeisen ai ta be hegeregere lasi unai stadi ia karaia neganai, Ruby be revareva amo stadi ia karaia. Emai vadivadi iharuana ai, unai hahine be hebou iboudiai dekenai ia mai. Spesel painia taihu rua be unai kongrigeisen dekenai idia mai neganai, ia ida idia stadi noho, bona daudau lasi murinai bapatiso ia abia. Lagani 1995 ai, unai be lagani 30 bamona murinai, Patterson Betele ai taihu matamata ta ia mai bona Ruby ia hereva henia. Unai taihu be Ruby ese ia stadi henia hahinena ena natuna kekeni. Ia bona ena adavana be Gilead Sikuli ena klas namba 100 dekenai idia lao.

Emai sekit iharuana be Florida ena kahana ia abia. Bona unai negai motuka ta ai ura, unai dainai davana maragi motuka ta ai hoia. To wiki ginigunana ai, motuka ena ensini ia makohi. Emai moni ia hegeregere lasi unai ai hanamoa totona. Tadikaka ta lau rini henia ai ia durua totona. Ia ese ena gaukara turana ta ia noia emai motuka ia hanamoa totona. Unai murinai, ai ura motuka hanamoa ena davana ai henia neganai, tadikaka ia ura lasi ia abia. Bona ia gwau, “Lau dekenai moni umui henia lasi.” To ia ese ai dekenai moni ia henia, unai be ena harihari gauna! Oibe, unai haheitalai amo Iehova ese ena hesiai taudia ia naria dalana ai itaia. Unai kara ese ai ia hadibaia ma haida dekenai hariharibada karana ai hahedinaraia totona.

Kongrigeisen ai vadivadi henia negadia ai, tadikaka taihu edia ruma dekenai ai noho. Unai dala amo, tura namodia momo ai davaria. Dina ta, lau hagugurua lasi kongrigeisen ena ripoti be egu typewriter dekenai lau rakatania. Hanuaboi ai lau giroa lou neganai, ai noho ruma bese ai, mauri lagani toi natuna mero be typewriter ia gadaralaia dainai lau torea ripoti ia hadikaia, unai dainai ripoti ibounai lau torea lou. Lagani momo lalonai ia dekenai unai lau hevasehalaia.

Lagani 1971 ai, lau idia invait New York City dekenai distrik naria gaukara lau karaia totona. Ai hoa! Unuseni ai lao neganai, egu mauri lagani be 34. Tadikaka ese lau, kopi korema distrik tauna ginigunana, idia welkam henia.

Lau be distrik naria tauna dainai, wikeni ta ta ena sekit hebouhebou ai ma haida lau durua Iehova idia dibaia, bona unai lau moalelaia. Sekit naria taudia momo be gau momo idia dibaia. Idia ta ese egu bapatiso tok ia henia. Tadikaka ma ta be, Theodore Jaracz, gabeai Hakaua Oreana ena memba ta ai ia lao. Bona Brooklyn Betele dekenai idia gaukara tadikaka momo danu be gau momo idia dibaia. Lau moale bada badina sekit naria taudia bona Betele taudia ese lau idia durua lau gari lasi totona. Lau itaia unai mamoe naria taudia be Dirava ena Hereva dekenai idia tabekau bona mai abidadama ida orea  idia badinaia. Edia manau karana ese lau ia hagoadaia distrik naria gaukara lau karaia totona.

Lagani1974 ai, Hakaua Oreana ese distrik naria gaukara totona sekit naria taudia haida ia abia hidi, bona lau be sekit naria gaukara lau karaia lou, to unai nega ai South Carolina dekenai lau lao. Unai negai United States ena saut kahana ai idia noho kopi kurokuro taudia bona kopi korema taudia edia kongrigeisen idia gaukara hebou, bona tadikaka taihu idia moale bada.

Lagani 1976 dokona ai, Georgia kahana ena sekit lau naria, unai be Atlanta bona Columbus huanai. Ta ese lahi amo ruma ta ia gabua neganai kopi korema natudia 5 idia mase, bona edia fineral tok lau henia negana lau do laloatao noho. Edia sinana be bero ia davaria dainai hospital dekenai ia noho. Kopi korema bona kopi kurokuro tadikaka taihu be unai tama sina hagoadaia totona hospital dekenai idia lao noho. Lau itaia tadikaka taihu edia lalokau be bada herea. Unai bamona hebogahisi karana ese Dirava ena hesiai taudia ia durua, nega aukadia idia haheaukalaia totona.

Lagani 1977 ai, lau bona Ruby idia noia Brooklyn Betele dekenai do ai lao projek ta ai durua totona. Unai projek ia ore gwauraia neganai, Hakaua Oreana ena memba rua ese ai idia noia, bema ai ura Betele dekenai hesiai gaukara ai karaia. Unai noinoi ai abia dae.

Lagani 24 lalonai, lau be Haroro Naria Dipatmen dekenai lau gaukara, bona unuseniai tadikaka be nega momo henanadai aukadia idia hamaoromaoroa. Lagani momo idia hanaia lalonai, Hakaua Oreana be Baibel ena hakaua herevadia hegeregerena hakaua daladia ia henia. Unai ese Haroro Naria Dipatmen ia durua henanadai ia haerelaia totona, bona sekit naria taudia, elda, bona painia taudia dekenai treinini ia henia danu. Unai treinini namodia ese momo ia durua lo Keristani taudia ai idia lao totona. Unai ese Iehova ena orea ia hagoadaia bada.

Lagani 1995 ia lao 2018 ai, lau be brens ofesi idauidau lau vadivadi henia badina hedikwota ese idia siaia tadikaka (guna idia gwauraia zoun naria tadikaka) ena gaukara lau karaia. Brens Komiti, Betele, bona misinari taudia ida lau hebou, unai amo idia lau hagoadaia bona durua. Bona tadikaka taihu ese lau bona Ruby dekenai edia ekspiriens idia herevalaia neganai, ai idia hagoadaia bada. Hegeregere, lagani 2000 ai Rwanda ai vadivadi henia. Tadikaka taihu bona Betele taudia ese lagani 1994 ai bese hamasea karana idia haheaukalaia ena sivarai ai kamonai neganai, idia ai hebogahisi henia bada. Momo edia lalokau taudia be idia mase. Herevana tadikaka taihu be unai gaudia idia haheaukalaia, to edia abidadama bona helaro be goada, bona idia moale noho.

Hari emai mauri lagani be 80 ia hanaia. Lau be lagani 20 bamona United States ena Brens Komiti gaukara lau karaia. Ena be iunivesiti dekenai lau lao lasi, to Iehova bona ena orea amo edukeisen namona lau abia. Unai ese lau ia durua ma haida dekenai Baibel ena hereva momokanidia lau hadibaia, unai amo namo idia davaria. (2 Kor. 3:5; 2 Tim. 2:2) Baibel ena sivarai ese taunimanima ia durua edia mauri idia hanamoa bona edia hetura karana Havaraia Tauna ida idia hagoadaia dalana lau itaia. (Iam. 4:8) Dala ia kehoa negadiai, lau bona Ruby ese ma haida ai hagoadaia noho Iehova idia dibaia bona Baibel ena hereva momokanidia be ma haida dekenai ai hadibaia, unai be Iehova ena hesiai tauna ese ia moalelaia hahenamo badana!