1. Taihu be edena dala ai iseda orea idia durua, to idia momo be dahaka hekwakwanai idia davaria? (Rau 1 ena laulau itaia.)

ITA MOALE badina kongrigeisen lalonai idia gaukara goada taihu momo idia noho! Idia be hebou ai tok bona haere idia henia, bona haroro gaukara idia karaia. Idia haida be Kingdom Hall idia hanamoa, bona danu tadikaka taihu haida idia laloa bada. Momokani, idia be mai edia hekwakwanai danu. Haida be edia tama sina burukadia idia naria. Haida be edia ruma bese edia dagedage karadia idia haheaukalaia noho. Bona idia haida be adavana lasi sina dainai, idia gaukara goada natudia idia naria totona.

2. Dahaka dainai iseda taihu durua karana ita goadalaia be namo?

² Dahaka dainai taihu ita durudia be namo? Badina tanobada taudia be hanaihanai hahine idia matauraidia lasi, to hahine ita matauraidia be gau badana. Danu, Baibel ese ita ia hagania idia ita durua totona. Hegeregere, aposetolo Paulo ese Roma kongrigeisen taudia ia hadibaia, Fibi do idia welkam henia bona ‘ia ura karaia gaudia dekenai ia do idia durua.’ (Roma 16:1, 2) Guna Paulo be Farisea tauna, bona idia huanai ia noho neganai, ia itaia unai orea taudia be hahine idia laloa bada lasi bona idia kara auka henidia. To, hari ia be Keristani tauna dainai, ia ese Iesu ia tohotohoa bona mai hebogahisi ida hahine ia kara henidia bona ia matauraidia.​—1 Kor. 11:1.

3. Iesu ese edena dala ai hahine ia kara henidia, bona Dirava ena ura idia karaia hahine be edena bamona ia lalodia?

³ Iesu ese hahine ibounai be mai hemataurai ida ia kara henidia. (Ioa. 4:27) Unai nega ai idia noho Iuda tomadiho ena gunalaia taudia edia lalohadai hahine dekenai ia abia dae lasi. Oibe, Baibel ia herevalaia bukana ta ia gwau:“Iesu ena hereva ta ese  hahine ia atoa diho o hadikaia lasi.” To Iesu ese iena Tamana ena ura idia karaia hahine ia matauraidia bada. Unai dainai, idia be iena taihudia bamona ia laloa, bona ia gwau idia bona tatau haida be iena ruma bese taudia.​—Mat. 12:50.

4. Inai atikol ai dahaka do ita herevalaia?

⁴ Iesu be hanaihanai ia noho hegaegae ena Keristani taihu ia durudia totona. Idia ia laloa bada bona idia totona ia hereva. Mani ita itaia edena dala ai ita ese Iesu ena haheitalai ita tohotohoa bona iseda taihu do ita lalodia bada.

5. Dahaka dainai taihu haida idia mamia hebamo namodia idia reaia?

⁵ Ita ibounai, tadikaka bona taihu be tura namodia bamona ita noho be namo. To nega haida taihu ese unai idia karaia be auka. Dahaka dainai? Mani haida edia hereva ita laloa. Taihu ta ladana Jordan * ia gwau: “Lau be singul dainai, nega momo lau diba lasi kongrigeisen lalonai daidia do lau bamoa, bona lau mamia kongrigeisen lalonai lau be anina lasi.” Ena haroro gaukara ia habadaia totona, gabu ma ta ia lao painia taihu ta ladana Kristen, ia gwau: “Kongrigeisen matamata dekenai oi lao neganai, do oi mamia oi be sibona oi noho bamona.” Edia ruma bese be tomadiho dalanai idia parara taudia be reana do idia mamia idia be edia ruma bese amo idia daudau, bona do idia mamia edia Keristani tadikaka taihu amo idia daudau danu. Taihu haida be idia gorere dainai ruma sibona dekenai idia noho, bona reana unai idia lalohisihisilaia. Ma haida be unai gorere tauna idia naria dainai ma haida idia bamoa lasi bona reana idia lalohisihisi danu. Taihu ma ta ladana Annette, ia gwau: “Moale karadia totona lau idia boiria neganai, lau lao lasi, badina lau sibona ese egu sinana lau naria.”

6. Luka 10:38-42 ena hereva bamona, Iesu ese edena dala ai Mareta bona Maria ia durua?

⁶ Iesu be iena Keristani taihu ia bamodia, bona idia dekenai ia be tura korikorina ta. Mani iena hetura karana Maria bona Mareta ida oi laloa, idia ruaosi be singul taihu. (Luka 10:38-42 duahia.) Iesu ese ena hereva bona kara amo ia hahedinaraia idia ia laloa bada, bona idia be ia dekenai idia gari lasi. Maria be mai gari lasi ida, hahediba hahinena bamona, Iesu ena aena badinai ia helai. * Bona Mareta be ia lalohisihisi badina Maria ese ia durua lasi, bona mai gari lasi ida Iesu dekenai ena lalohisihisi ia gwauraia. Unai nega ai, Iesu ese idia ruaosi dekenai mai anina bada gaudia haida ia hadibaia. Iesu ia hahedinaraia unai hahine bona edia tadikaka Lasaro ia lalodia bada dainai, nega ma haida ai ia vadivadi henidia danu. (Ioa. 12:1-3) Unai dainai Lasaro ia gorere neganai, Maria bona Mareta idia diba Iesu ena heduru idia tahua diba.​—Ioa. 11:3, 5.

7. Edena dala ta ai iseda taihu ita hagoadadia diba?

⁷ Taihu haida be hebou dekenai idia lao neganai, unai be nega namona tadikaka taihu ida idia hebamo totona. Unai dainai, ita ura unai negadia ai, idia ita welkam henia, idia ida ita herevahereva bona ita hahedinaraia idia ita laloa bada. Taihu Jordan ma ia gwau: “Haere lau henia bona haida ese lau idia hanamoa, idia ura haroro gaukara ai do ai gaukara hebou, eiava idia ura dala ma ta ai lau idia durua neganai, lau moale bada.” Namona be ita hahedinaraia  iseda taihu ita lalodia bada. Taihu Kia ia gwau: “Hebou ta lau reaia neganai, lau diba ta ese lau ia sekea totona, teks mesiji ta do ia siaia. Unai amo lau diba, tadikaka taihu be lau idia laloa bada.”

8. Edena dala ma haida ai Iesu ita tohotohoa diba?

⁸ Iesu bamona, nega do ita atoa taihu ita bamodia totona. Reana idia ita boiria ti kavakava ita inua o moale karadia haida ita karaia. Unai bamona negadia ai, namona be iseda hereva amo ta ta ita hagoadaia. (Roma 1:11, 12) Namona be elda taudia ese Iesu ena lalohadai idia abia. Ia diba haida dekenai singul maurina be auka, to ia hahedinaraia headava eiava natudia idia havaraia maurina ese moale korikorina do ia mailaia lasi. (Luka 11:27, 28) To, moale korikorina do ita davaria, bema iseda mauri lalonai Iehova ena hesiai gaukara ita atoa guna.​—Mat. 19:12.

9. Elda taudia be dahaka idia karaia diba taihu idia durudia totona?

⁹ Elda taudia ese Keristani hahine be edia taihudia bona sinadia bamona idia kara henidia be namo. (1 Tim. 5:1, 2) Namona be elda taudia ese nega idia atoa, hebou vairanai bona murinai taihu ida idia herevahereva totona. Taihu Kristen, ma ia gwau: “Elda ta ia itaia lau be lau bisi bada herea dainai, ia ura egu sediual ia sekea. Lau ia laloa dainai, lau tanikiu henia.” Elda taudia be hanaihanai nega idia atoa Keristani  taihu ida idia herevahereva neganai, idia hahedinaraia edia taihu idia lalodia bada. * Taihu Annette ese hanaihanai elda taudia ida herevahereva karana ena namo ta ia herevalaia. Ia gwau: “Idia lau diba namonamo bona idia be lau idia diba. Bena, hekwakwanai lau davaria neganai, heduru totona idia lau noia diba.”

10. Dahaka ese iseda taihu ia durudia idia moale totona?

¹⁰ Ita ibounai, tatau bona hahine, ita moale bema ma haida be ita karaia gaukara namodia dainai hanamoa hereva idia gwauraia. To, bema iseda diba eiava gaukara be ma haida ese idia laloa bada lasi, ita lalomanoka diba. Singul painia taihu ta ladana Abigail ia mamia, haida be ia idia diba lasi. Ia gwau, “Lau idia itaia neganai, idia gwau lau be unai taihu ena tadina, eiava unai taihu ena natuna kekeni. Toana be lau idia itaia lasi bamona.” To, mani taihu ta ladana Pam ena haheitalai ita laloa. Ia be kekeni matamata neganai, lagani momo lalonai misinari gaukara ia karaia, bena gabeai, ena tano dekenai ia giroa lou ena tama sina ia naria totona. Hari, iena mauri lagani be 70 bamona, bona ia do painia noho. Pam ia gwau: “Lau ia durua bada gauna be ma haida ese lau karaia gaukarana dainai lau idia tanikiu henia.”

11. Edena dala ai Iesu ia hahedinaraia iena hesiai gaukara ai idia bamoa Keristani hahine edia gaukara ia laloa bada?

¹¹ Iesu ese Keristani hahine edia heduru ia laloa bada badina “edia kohu idia gaukaralaia” ia idia durua totona. (Luka 8:1-3) Iesu ese ia idia durua ena hahenamo be idia dekenai ia henia sibona lasi, to Dirava ena ura ena hereva momokanidia be idia dekenai ia hadibaia danu. Hegeregere, idia ia hamaoroa ia be do ia mase bona do ia toreisi lou. (Luka 24:5-8) Aposetolo taudia ia durua hegeregerena, unai hahine ia durua do idia davaria hekwakwanai idia haheaukalaia totona. (Mar. 9:30-32; 10:32-34) Ita laloatao danu, Iesu idia dogoatao neganai aposetolo taudia be idia heau, to Iesu be hisihisi auna dekenai idia tauadae neganai, unai hahine be ia idia rakatania lasi.​—Mat. 26:56; Mar. 15:40, 41.

12. Iesu ese hahine dekenai dahaka gaukara ia henia?

¹² Iesu ese hahine dekenai mai anina bada gaukara ia henidia. Hegeregere, Keristani hahine ese Iesu ena toreisi lou idia itaia guna. Ia ese unai hahine ia noidia aposetolo taudia do idia hadibaia, Iesu be mase amo ia toreisi lou vadaeni. (Mat. 28:5, 9, 10) Bona Pentekoste 33 C.E. ai, Dirava ese lauma helaga be hahediba taudia edia latanai ia bubua neganai, reana hahine haida idia noho danu. Anina be unai horoa Keristani taihu be hoa dalanai gado idauidau ai idia hereva, bona ma haida dekenai “Dirava ena kara badadia idia herevalaia.”​—Kara 1:14; 2:2-4, 11.

13. Hari, Keristani hahine be dahaka idia karaia, bona edena dala ai oi ese idia oi tanikiu henia diba?

¹³ Iseda taihu be Iehova ena hesiai gaukara idia karaia dainai ita tanikiu henidia be namo. Unai gaukara haida be ruma haginia bona hanamoa gaukara, gado ma haida edia grup ida idia haroro, bona Betele ai volantia gaukara idia karaia. Danu, disasta gabudia ai heduru idia henia, iseda pablikeisen hahanaia gaukara, painia bona misinari gaukara idia karaia. Tadikaka hegeregerena, taihu be painia sikuli, Basileia Evanelia Sikuli, bona Gilead Sikuli dekenai idia lao. Ma danu, headava taihu be edia tau idia durua, unai amo kongrigeisen bona orea lalonai edia maduna ibounai idia huaia diba. Unai tadikaka be “harihari gaudia” bona unai gaukara idia karaia namonamo, badina edia adavana ese idia durudia. (Efe. 4:8) Dala ma haida ai iseda taihu oi durudia diba, a?

14. Salamo 68:11 ena hereva bamona, mai edia laloparara elda taudia be dahaka do idia karaia?

¹⁴ Mai edia laloparara elda taudia idia diba,  taihu be mai edia ura bada “tuari orea badana” bamona idia gaukara, bona idia be sivarai namona harorolaia taudia namodia. (Salamo 68:11 duahia, futnout amo *.) Unai dainai elda taudia be taihu edia haheitalai amo heduru idia abia diba. Hegeregere, taihu Abigail ma ia gwau, elda taudia idia ura diba teritori ai taunimanima ia haroro henidia neganai, ia be edena hamatamaia hereva namodia ia gaukaralaia. Ia idia nanadaia dainai ia moale. Ia gwau: “Unai ese lau ia durua bona lau laloparara Iehova ena orea lalonai egu gaukara be mai anina bada.” Ma danu, elda taudia idia diba, bema taihu matamata ta be hekwakwanai ia davaria, lo taihu ese taihu matamata idia durua namonamo diba. (Tito 2:3-5) Oibe, iseda taihu ita lalokau henidia bona lalodia bada be namo!

15. Edena bamona negadia ai taihu do idia ura ta ese idia ia durua?

¹⁵ Nega haida, taihu be hekwakwanai ta idia davaria neganai idia ura ta be idia totona do ia hereva. (Isa. 1:17) Hegeregere, vabu eiava divos taihu ta do ia ura ta ese ia totona do ia hereva, bona guna ena adavana ese ia karaia gaudia haida do ia karaia. Reana taihu burukana ta do ia ura ta ese ia durua doketa taudia ia hereva henia totona. Eiava painia taihu ta be tiokratik projek ma haida ia durua bona ia haroro momo lasi dainai, haida ese idia gwau henia neganai, do ia ura ta be ia totona do ia hereva. Edena dala ai iseda taihu ita durudia diba? Mani Iesu ena haheitalai ita laloa.

16. Mareko 14:3-9 ena hereva bamona, edena dala ai Iesu ese Maria totona ia hereva?

¹⁶ Keristani taihu be ma haida ese idia gwauraia kerere neganai, Iesu be karaharaga idia ia durua. Hegeregere, Mareta ese Maria ia badu henia neganai, Iesu be Maria totona ia hereva. (Luka 10:38-42) Danu ma nega ta, haida idia laloa Maria be abia hidi kererena ia karaia dainai idia gwau henia neganai, Iesu be Maria totona ma ia hereva. (Mareko 14:3-9 duahia.) Iesu ese Maria ena kara ena badina ia lalopararalaia bona ia hanamoa, ia gwau: “Ia ese lau dekenai kara namona ia karaia. . . . Ia karaia diba gauna ia karaia.” Danu, Iesu ia peroveta “sivarai namona be tanobada ibounai dekenai idia harorolaia neganai” Maria ia karaia kara namona do idia herevalaia, hari inai atikol ese ia karaia bamona. Hoa gauna be, Iesu ese Maria ena kara namona ia herevalaia neganai, ia hahedinaraia danu sivarai namona be tanobada ibounai dekenai do idia harorolaia! Haida ese Maria idia hahemaoro henia kerere dainai Iesu ena hereva ese ia hagoadaia!

17. Edena dala ai taihu ta ita durua diba? Haheitalai gwauraia.

¹⁷ Emu Keristani taihu be heduru idia ura neganai idia oi durua, a? Hegeregere, pablisa haida idia itaia taihu ta, ena adavana be witnes lasi tauna, be nega momo hebou dekenai ia leiti bona hebou murinai ia giroa haraga. Danu idia itaia, taihu be nega ta ta sibona ena natudia be hebou dekenai ia abidia lao. Unai dainai idia ese taihu idia gwau henia bona idia doria ena witnes lasi adavana do ia hereva auka henia natudia do ia koua lasi totona, bona ia ese hebou dekenai ena natudia do ia mailaia. To, idia lalopararalaia lasi gauna be, taihu be ia gaukara goada noho unai hekwakwanai ia hanaia totona. Taihu be sibona ena sediual ia karaia lasi, bona danu ena natudia totona abia hidi be ia sibona ese ia karaia diba lasi. Dahaka do oi karaia bema oi kamonai haida ese taihu be unai bamona idia hereva auka henia? Bema unai taihu ena hekwarahi dainai oi tanikiu henia, bona ma haida dekenai taihu ese ia karaia gau namodia oi herevalaia, edia maumau herevadia oi koua diba.

18. Edena dala ma haida ai iseda taihu ita durudia diba?

¹⁸ Iseda Keristani taihu ita durudia neganai,  ita hahedinaraia idia ita laloa bada. (1 Ioa. 3:18) Ena sinana ia gorere bona ia naria taihu ta, Annette ia gwau: “Tadikaka bona taihu haida be aniani idia mailaia, eiava ruma dekenai idia mai bona nega sisina lalonai egu sinana idia naria, unai amo lau be gau ma haida lau karaia diba. Unai dainai lau mamia lau idia lalokau henia bona lau be kongrigeisen ida lau noho.” Taihu ta ladana Jordan be heduru ia abia danu. Tadikaka ta ese ia dekenai motuka hanamoa dalana ia hadibaia. Jordan ia gwau: “Lau moale badina tadikaka taihu be egu seifti idia laloa bada.”

19. Edena dala ma haida ai elda taudia ese taihu idia durudia diba?

¹⁹ Elda taudia ese taihu idia durudia danu. Idia diba taihu idia kara henia dalana be Iehova ese ia itaia. (Iam. 1:27) Unai dainai idia ese Iesu ena laloa maoromaoro karana idia tohotohoa, unai amo taravatu idia atoa lasi to kara namodia bona laloparara idia hahedinaraia. (Mat. 15:22-28) Elda taudia be nega idia atoa heduru idia henia neganai, taihu do idia mamia Iehova bona ena orea ese idia ia lalokau henia. Taihu Kia ena grup ovasia ia diba Kia be ena gabu ia rakatania bona ruma ma ta dekenai do ia lao neganai, dala ia karaia haraga ia durua totona. Kia ia gwau: “Egu lalohekwarahi ia hamaragia. Elda taudia be hagoadaia herevadia bona heduru daladia idia herevalaia sibona lasi, to idia hahedinaraia danu lau be mai anina bada kongrigeisen lalonai, bona hekwakwanai idia vara neganai lau do idia durua.”

20-21. Edena dala ai ita hahedinaraia iseda Keristani taihu ibounai ita lalodia bada?

²⁰ Hari ita itaia iseda kongrigeisen lalonai, Keristani taihu momo idia noho bona ita durudia be namo. Iesu ena haheitalai hegeregerena, idia ita durua diba bema nega ita atoa idia ita bamoa bona idia ita diba namonamo. Dirava ena hesiai gaukara lalonai idia karaia gaukara dainai idia do ita tanikiu henia. Bona heduru idia ura neganai, idia totona do ita hereva.

²¹ Aposetolo Paulo be Roma taudia dekenai ia torea revareva ena dokonai, Keristani hahine nain edia ladana ta ta ia gwauraia. (Roma 16:1, 3, 6, 12, 13, 15) Paulo ena hanamoa herevadia ese unai hahine ia hagoadadia bada. Unai hegeregerena, namona be ita ese kongrigeisen lalonai idia noho taihu ibounai ita durua. Unai amo ita hahedinaraia, idia ita laloa bada bona idia be iseda Keristani ruma bese taudia.