ISRAELA taudia ese miusiki idia moalelaia bada. Baibel ai taunimanima ese miusiki gaudia idia gadaralaia bona ane idia abia sivaraidia idia noho. Momokani, Baibel ena kahana badana ta be ane idia noho, hegeregere, Salamo, Solomona Ena Ane, bona Lalohisihisi Ane bukadia. Baibel negadia ia herevalaia buka ta ia gwau, Baibel ese ia hahedinaraia goevagoeva, Israela taudia ese nega momo edia moale negadia bona gaukara ma haida ai miusiki idia gadaralaia.

Dina ta ta ai miusiki idia gaukaralaia. Israela taudia ese miusiki gaudia idia gadaralaia bona ane idia abia, unai dala amo edia hemami idia hahedinaraia. (Isa. 30:29) King matamata ta idia abia hidi negana, aria negadia, bona tuari taudia idia kwalimu neganai, hahine ese tambarin idia gadaralaia bona mai moale ida ane idia abia bona mavaru. (Hah. 11:34; 1 Sam. 18:6, 7; 1 Ki. 1:39, 40) Israela taudia be ta ia mase neganai, lalohisihisi anedia idia abia. (2 Siv. 35:25) Unai ese ia hahedinaraia, idia be miusiki idia ura henia bada.

Israela ena king taudia ese miusiki idia moalelaia. King Saulo ese Davida ia boiria ena ruma dekenai miusiki ia gadaralaia totona. (1 Sam. 16:18, 23) Gabeai Davida be king ai ia lao neganai, ia ese miusiki gaudia ia karaia, ane namodia ia torea, bona orea ta ia abia hidi Iehova ena dubu helaga ai miusiki idia gadaralaia totona. (2 Siv. 7:6; Amo. 6:5) King Solomona ena ruma ai ane abia tatau bona hahine idia noho.—Had. 2:8.

Israela taudia ese miusiki idia gaukaralaia Iehova idia tomadiho henia totona. Oibe, Ierusalema ena dubu helaga ai taunimanima 4,000 be miusiki idia gadaralaia. (1 Siv. 23:5) Idia ese simbol, miusiki gaudia mai edia varo, hap, bona kibi idia gadaralaia. (2 Siv. 5:12) Unai miusiki idia diba namonamo taudia sibona lasi, to ma haida danu be miusiki idia gaukaralaia. Israela taudia momo be lagani ta ta ai aria totona Ierusalema dekenai idia lao neganai, Daekau Lao Anena idia abia. (Sal. 120-134) Iuda toretoredia ta ese ia hahedinaraia, Israela taudia be Pasova ariana ai, Iehova hanamoa anedia idia abia. a

Hari danu, Dirava ena hesiai taudia dekenai miusiki be mai anina bada. (Iam. 5:13) Ane ita abia karana be iseda tomadiho ena kahana ta. (Efe. 5:19) Iseda tadikaka bona taihu ida Iehova totona ane ita abia hebou neganai, unai ese ita ia hatamonaia. (Kol. 3:16) Iehova hanamoa anedia ita abia, gadaralaia, eiava kamonai neganai, unai ese ita ia hagoadaia hekwakwanai ita haheaukalaia totona. (Kara 16:25) Miusiki gaukaralaia karana be dala namona ta, Iehova dekenai iseda abidadama bona lalokau ita hahedinaraia totona.