Lagani 1948 ai, sautwest Nigeria ena hanua maragina ai lau vara. Unai nega ai, egu tamana ena tadina maragina, vava Moustapha, bona egu kakana Wahabi, be bapatiso idia abia bona Iehova ena Witnes taudia ai idia lao. Egu mauri lagani be 9 neganai, egu tamana ia mase. Lau lalohisihisi bada. Wahabi ese lau ia hamaoroa toreisi lou neganai, emai Tamana do ai itaia lou. Unai hahegoada herevana ese lau ia veria Baibel lau stadilaia. Lagani 1963 ai, bapatiso lau abia. Bona daudau lasi murinai, egu kakadia rua bona egu tadina be bapatiso idia abia danu.

Lagani 1965 ai, Lagos dekenai egu kakana Wilson dekenai lau lao bona Igbobi Kongrigeisen ai regula painia taudia ma haida bamoa karana lau moalelaia. Edia moale bona haroro goadagoada karana ese lau ia hagoadaia bona January 1968 ai, painia gaukara lau matamaia.

Betele ai ia gaukara tadikaka ta ladana, Albert Olugbebi, be matamata taudia totona hebou ta ia hegaegaelaia, bona ai ia hagoadaia not Nigeria ai spesel painia gaukara ai karaia totona. Tadikaka Olugbebi ena hagoadaia herevana lau laloatao noho, ia gwau: “Umui be matamata, bona Iehova umui hesiai henia totona emui nega bona goada  umui gaukaralaia diba. Gaukara be bada herea!” Lau ura peroveta tauna Isaia lau tohotohoa bona edeseniai Iehova ese lau ia siaia, do lau lao, unai dainai, aplikeisen fom lau atoa.—Isa. 6:8.

May 1968 ai, lau idia siaia not Nigeria ena siti ta, Kano dekenai, spesel painia gaukara lau karaia totona. Unai be Biafran War negana ai, unai tuari ena daudau be lagani 1967 ia lao 1970 bamona. Unai tuari ese not Nigeria ai hisihisi bada ia havaraia bona momo idia mase bona unai tuari be ia hanaia ist Nigeria dekenai danu. Tadikaka ta ia ura lasi not Nigeria dekenai do lau lao, badina ia ura lasi dika lau davaria. To ia lau hamaoroa: “Tanikiu lau oi laloa dainai. To, bema Iehova ia ura unai gabu ai ena hesiai gaukara lau karaia, lau diba ia be lau ida do ia noho.”

Tuari ese Kano siti ia hadikaia momokani. Unai lau itaia neganai lau hebogahisi bada. Haroro gaukara lalonai, nega haida tuari lalonai idia hamasea taudia edia tauanina ai itaia. Ena be Kano ai, kongrigeisen haida idia noho, to tadikaka momo idia heau. Pablisa be 14 bamona idia noho, bona idia gari bona lalomanoka. Ai spesel painia taudia siks ai ginidae neganai idia moale bada herea. Idia ai durua dainai idia goada lou. Danu ai durudia hebou bona haroro gaukara idia hamatamaia lou bona brens ofesi dekenai, haroro ripoti bona litrisa oda idia siaia lou totona.

Ai spesel painia taudia be Hausa gado ai dibaia matamaia. Bona Basileia ena sivarai namona be edia gado ai idia kamonai neganai, idia momo be hereva momokani idia abia dae. To, Kano ai ia noho tomadiho badana edia gunalaia taudia be emai haroro gaukara idia moalelaia lasi, unai dainai namona be ai naria namonamo. Nega ta, lau bona egu painia turana be tau ta mai ena kaia ese ai ia lulua. To, ai heau haraga dainai dika ta ia vara lasi! Dika negadiai, Iehova ese ‘ai ia gimaia,’ bona pablisa taudia edia namba be ia bada ia lao. (Sal. 4:8) Hari, Kano ai kongrigeisen iboudiai be 11 bona pablisa taudia edia namba be 500 mai kahana.

Gabeai August 1968 ai, Kano dekenai hua haida lau noho murinai, lau bona spesel painia tadikaka  rua be, Republic of Niger ena siti badana, Niamey dekenai idia siaia. Ai davaria tanobada ibounai lalonai, Niger be siahu bada gabuna. Unai siahu gabuna ai manadalaia noho lalonai, French gado ai dibaia danu. Ena be unai be mai ena hekwarahi, to Iehova dekena ai abidadama bona unai siti ai idia noho pablisa haida ida ai haroro matamaia. Nega kwadogina lalonai, Niamey ai duahiduahi idia diba taudia ibounai ese The Truth That Leads to Eternal Life bukana ena kopi ta idia abia. Taunimanima be ai idia tahua unai buka ta idia abia totona!

Daudau lasi murinai, ai laloparara gavamani taudia ese Iehova ena Witnes taudia idia ura henia lasi. July 1969 ai, Niger ai sekit hebouhebou ginigunana ai karaia, idia mai taudia ibounai be 20 bamona. Ai moale bada badina pablisa matamata rua do idia bapatiso. To, hebouhebou ena dina ginigunana ai, pulisi idia mai bona hebouhebou idia koua. Spesel painia taudia bona sekit naria tauna be pulisi steiseni dekenai idia abia lao. Ai idia henanadai murinai, ai idia oda henia kerukeru do ai giroa mai. Ai mamia hekwakwanai do ia vara dainai, ta ena ruma dekenai bapatiso tok ai kamonai bona hehuni dalanai sinavai ta dekenai bapatiso ai karaia.

Wiki haida murinai, gavamani ese lau bona spesel painia taudia faiv idia oda henia, Niger do ai rakatania. Idia gwau hora 48 lalonai edia tano do ai rakatania bona sibona emai dala do ai tahua. Edia hereva ai badinaia bona maoromaoro ai lao Nigeria ena brens ofesi dekenai, unuseniai asainmen matamata idia henia.

Lau be Nigeria ena hanua ta Orisunbare dekenai idia siaia, unuseniai pablisa taudia edia grup maragina ida haroro gaukara lau moalelaia. To hua siks murinai, brens ofesi ese lau idia boiria Niger dekenai do lau giroa lou. Matamanai lau hoa bona gari, to lau moale badina Niger ai idia noho tadikaka taihu do lau itaia lou diba!

Niamey dekenai lau giroa lou. Lau ginidae dinana murinai, Nigeria bisinesi tauna ta ia diba lau be Witnes tauna dainai, Baibel ena henanadai momo ia henia. Ia lau stadi henia, bona kuku bona inuinu kekero karana ia rakatania murinai ia bapatiso. Unai murinai, tadikaka taihu ida Niger ena gabu idauidau dekenai haroro gaukara lau moalelaia, bona lau itaia metairametaira taunimanima be hereva momokani idia abia dae. Nega ginigunana unai tano dekenai lau ginidae neganai, Witnes taudia be 31, bona lau rakatania neganai, idia be 69.

December 1977 ai, Nigeria dekenai lau giroa lou treinini lau abia totona. Wiki toi ena treinini dokonai, Brens Komiti ena kodineita, Malcolm Vigo, ese Sierra Leone brens amo ia mai revareva ta ia henia lau duahia totona. Tadikaka idia ura singul, gorere momo lasi, English bona French gado ia  hereva diba tadikaka ta be Guinea dekenai sekit gaukara do ia karaia. Tadikaka Vigo ese lau ia hamaoroa lau be unai asainmen totona treinini lau abia. Ia gwau inai be asainmen aukana. Ma ia gwau: “Oi laloa namonamo guna bena abia hidi oi karaia.” Maoromaoro lau haere, “Iehova ese lau ia siaia dainai, do lau lao.”

Sierra Leone dekenai lau lao bona brens ofesi dekenai tadikaka ida lau hedavari. Brens Komiti tadikaka ta be lau dekenai ia gwau: “Ai diba lasi Guinea dekenai haroro gaukara be edena bamona.” Ena be brens ese Guinea ai idia karaia haroro gaukara idia naria, to politikol heiriheiri dainai pablisa taudia be brens ofesi ida idia herevahereva lasi. Bona brens ofesi idia ura tadikaka ta idia siaia, to ia auka. Unai dainai, lau idia noia Guinea ena siti badana, Conakry dekenai do lau lao, bona unuseniai lau noho totona gavamani amo gwaumaoro do lau abia.

Conakry dekenai lau ginidae neganai, Nigeria gavamani ena embasida dekenai lau lao. Lau hamaoroa lau ura Guinea dekenai haroro gaukara lau karaia. Lau ia hamaoroa, do lau noho lasi badina pulisi ese lau do idia dogoatao eiava hamasea. Ia gwau: “Nigeria dekenai oi giroa lou bona unuseniai oi haroro.” To lau haere, “Lau ura momokani do lau noho.” Unai dainai, ia ese Guinea gavamani ena minista ta dekenai revareva ia torea lau ia durua totona, bona unai minista ese lau ia durua.

Daudau lasi murinai, Sierra Leone ena brens ofesi dekenai lau giroa bona minista ena disisen lau hadibadia. Iehova ese egu laolao ia hanamoa sivaraina idia kamonai neganai, tadikaka be mai moale ida idia boiboi. Oibe, Guinea dekenai do lau noho ena gwaumaoro lau abia!

Lagani 1978 ia lao 1989 lalonai, Guinea bona Sierra Leone dekenai sekit gaukara lau karaia, bona Liberia dekenai sekit tauna lau durua. Matamanai, lau gorere momo. Gunika gabudiai ai nega momo unai ia vara. To tadikaka idia hekwarahi hospital ai lau idia abia lao totona.

Nega ta, lau be malaria aukana lau abia bona egu bogana lalonai gaigai maragidia idia noho. Lau namo neganai, lau kamonai tadikaka be lau do idia guria gabuna idia herevalaia vadaeni! Ena be kahirakahira lau mase, to egu asainmen do lau rakatania lalohadaina lau abia lasi. Bona lau abia dae momokani Dirava sibona ese ita ia naria namonamo bona gimaia diba, badina ena be ita mase, to ita do ia hatoreaisi lou diba.

Lagani 1988 ai, Dorcas lau hedavari henia, ia be manau bona painia taihu goadana ta. Ai headava bona sekit gaukara ai lau ia bamoa. Emai asainmen dekenai Dorcas ia gaukara goadagoada bona Iehova totona ena ura gaudia momo ia dadaraia. Ai ruaosi be kongrigeisen ta ta ai vadivadi henia, emai baege ai huaia bona kilomita 25 bamona ai raka. Gabu daudau kongrigeisen ai lao totona, motuka dekenai ai guia, to dala be kopukopu bona ia namo lasi.

 Dorcas be gari lasi hahinena. Hegeregere, nega haida huala momo idia noho sinavai ai hanaia. Nega ta ai be dina faiv lalonai gabu ta dekenai ai lao. To sinavai hanaia totona nese be ia makohia dainai, vanagi ai gaukaralaia. Dorcas be vanagi amo ia diho totona ia gini neganai, sinavai ena dobu kahana dekenai ia moru. Ai ruaosi be nahu ai diba lasi, bona huala idia noho. To, tau matamata haida be sinavai lalonai idia paudobi bona Dorcas idia durua. Nega daudau lalonai, unai nega dikana ai laloa momo, to emai gaukara ai hadokoa lasi.

Lagani 1992 ai, ai hoa bada badina Dorcas be ia rogorogo. Emai ful-taim hesiai gaukara do ai hadokoa, a? Ai gwau: “Iehova ese ita dekenai harihari gauna ta ia henia!” Unai dainai, emai natuna ena ladana ai hatoa, Jahgift (English gado ai ena anina be “Iehova ena harihari gauna”). Lagani foa murinai ena taihuna, Eric, ia vara. Emai natudia rua be Iehova ese ia henia harihari gaudia. Jahgift be lagani haida lalonai Conakry ena trensleisen ofesi dekenai ia gaukara, bona Eric be hesiai tauna ta.

Ena be Dorcas be spesel painia gaukara ia hadokoa, to regula painia ia karaia bona emai natudia ia naria. Iehova ena heduru amo, lau be spesel painia gaukara lau karaia noho. Emai natudia idia bada murinai, Dorcas be spesel painia gaukara ia hamatamaia lou. Hari ai ruaosi be Conakry dekenai misinari gaukara ai karaia noho.

Hanaihanai Iehova ese lau ia siaia gabudia dekenai lau lao. Nega momo lau bona egu adavana ai mamia ia ese ai ia gimaia bona hanamoa. Iehova ai abidadama henia dainai, kohu momo maurina ese ia havaraia hekwakwanai bona lalohekwarahi momo ai davaria lasi. Lau bona Dorcas be emai mauri ai idia vara gaudia amo ai diba, Iehova be ai ia “hamauria Diravana.” (1 Siv. 16:35) Lau abia dae momokani Iehova idia abidadama henia taudia edia mauri be ia ese “do ia gimaia, ta ese baege lalonai dava bada gaudia ia gimaia bamona.”—1 Sam. 25:29.