STADI ATIKOL 19
ANE 22 Basileia Ia Gini Vadaeni—Ia Mai be Namo!
Vaira Negai Iehova Ena Hahemaoro Karana Dekenai Dahaka Ita Dibaia?
“Iehova . . . ia ura lasi tau ta ia mase.”—2 PET. 3:9.
STADI ENA BADINA
Ita abia dae momokani, vaira negai Iehova ese taunimanima ia hahemaoro henia neganai, kara maorona do ia badinaia.
1. Dahaka dainai ita gwau diba ita be mai anina bada negana ai ita noho?
ITA BE mai anina bada negana lalonai ita noho! Dina ta ta ai, ita itaia Baibel ena peroveta herevadia idia guguru. Hegeregere ita itaia, “not kahana ena king” bona “saut kahana ena king” be ta ta idia doria lao mai, badina idia ta ia ura tanobada ia lohiaia. (Dan. 11:40, ftn.) Ita itaia Dirava ena taunimanima ese Basileia ena sivarai namona be tanobada ibounai dekenai idia harorolaia bona taunimanima milioni momo be unai sivarai namona idia abia dae. (Isa. 60:22; Mat. 24:14) Bona ita be “nega korikori ai” orea ese ia halasia gaudia momo ita abia.—Mat. 24:45-47.
2. Dahaka ita diba momokani, to dahaka ita lalopararalaia be namo?
2 Iehova be ita ia durua noho, kahirakahira do idia vara mai anina bada gaudia ita lalopararalaia totona. (Aon. 4:18; Dan. 2:28) Ita abia dae diba hisihisi badana ia matamaia neganai, ita do ia durua gaudia do ita dibaia, unai amo mai abidadama ida do ita haheauka bona unai nega aukana lalonai Iehova ita hesiai henia noho. To namona be ita laloparara vaira negai do idia vara gaudia haida be ita diba lasi. Inai atikol ai guna ita herevalaia gaudia dekenai senisi idia karaia ena badina do ita herevalaia. Bena vaira nega totona ita diba gaudia bona iseda guba Tamana ese do ia karaia gaudia do ita riviulaia.
ITA DIBA LASI GAUDIA
3. Taunimanima be dala lasi Iehova idia abidadama henia karana dekenai dahaka ita gwau, bona dahaka dainai unai bamona ita laloa?
3 Guna ita gwau hisihisi badana ia matamaia neganai, taunimanima dekenai dala be lasi Iehova idia abidadama henia bona Aramagedono ai idia roho mauri totona. Unai bamona ita gwau, badina ita laloa Abata negana lalonai idia noho taudia bona idia vara gaudia ese vaira negai do idia vara gaudia ia laulaulaia. Hegeregere, ita laloa Iehova ese lagatoi ena iduara ia koua neganai ta ia vareai lasi hegeregerena, hisihisi badana ia matamaia neganai, ta be dala lasi Iehova do ia abidadama henia bona ia roho mauri.—Mat. 24:37-39.
4. Dahaka dainai ita gwau lasi Abata sivaraina be vaira negai do idia vara gaudia ia laulaulaia? Herevalaia.
4 Do ita gwau, Abata ena sivarai be vaira negai do idia vara gaudia ia laulaulaia, a? Haere be, lasi. Dahaka dainai? Badina Baibel ese unai ia herevalaia lasi. a Momokani, Iesu ese “Noa ena nega” be iena noho negana ida ia hahegeregerea. To ia gwau lasi Noa ena negai idia vara gaudia be vaira negai do idia vara gaudia ia laulaulaia, hegeregere Iehova ese lagatoi ena iduara ia koua karana. To momokani, Noa bona Abata sivaraina amo gau ta ita dibaia.
5. (a) Abata ia do vara lasi neganai, Noa be dahaka ia karaia? (Heberu 11:7; 1 Petero 3:20) (b) Edena dala ai Noa ese ia karaia haroro gaukara be iseda nega hegeregerena?
5 Noa ese Iehova ena hadibaia herevana ia kamonai murinai, lagatoi ia haginia, unai amo ia hahedinaraia ia be mai ena abidadama. (Heberu 11:7; 1 Petero 3:20 duahia.) Unai hegeregerena, Dirava ena Basileia ena sivarai namona idia kamonai taudia ese kara ta idia karaia be namo. (Kara 3:17-20) Petero ese Noa ia gwauraia, “kara maoromaoro ia harorolaia tauna.” (2 Pet. 2:5) To atikol 18 ai ita herevalaia bamona ita diba lasi, bema Noa be Abata ia do vara lasi neganai taunimanima ibounai ia haroro henia. Hari, ita be mai ura bada ida tanobada hegegemadai idia karaia haroro gaukarana ita durua. Dokona ia do ginidae lasi lalonai ita ura taunimanima ibounai ita haroro henia, to do ita hegeregere lasi. Dahaka dainai?
6-7. Dahaka dainai ita gwau diba, taunimanima ibounai dekenai sivarai namona ita do harorolaia lasi neganai, dokona do ia ginidae?
6 Iesu ese iseda haroro gaukara ia herevalaia dalana mani ita laloa. Ia peroveta sivarai namona be “tanobada ibounai dekenai do idia harorolaia, bese ibounai idia kamonai totona.” (Mat. 24:14) Unai peroveta herevana be hari ia guguru noho. Basileia ena sivarai namona be gado 1,000 mai kahana ai idia halasia. Bona iseda websait jw.org amo, tanobada ai taunimanima ibounai be Dirava ena Basileia ena sivarai namona idia dibaia.
7 To danu, Iesu ese ena hahediba taudia ia hamaoroa, “siti bona hanua,” eiava taunimanima ibounai idia do haroro henia lasi neganai, do ia mai. (Mat. 10:23; 25:31-33) Hari iseda negai, Iesu ena hereva do ia guguru danu. Taunimanima milioni be haroro gaukara idia taravatua gabudiai idia noho. Danu, miniti ta ta ai beibi handred momo idia vara. Ita gaukara goada ‘bese ibounai bona iduhu ibounai, bona gado ibounai,’ taudia dekenai sivarai namona ita harorolaia totona. (Apok. 14:6) To ita diba momokani, taunimanima ibounai dekenai sivarai namona ita do harorolaia lasi neganai, dokona do ia ginidae.
8. Vaira negai Iehova ena hahemaoro totona, dahaka henanadai do ita henia? (Laulau itaia danu.)
8 To reana do ita henanadai: Hisihisi badana ia do matamaia lasi neganai, sivarai namona idia kamonai lasi taudia be edena bamona? Iehova bona ena Natuna, ia abia hidi hahemaoro do ia karaia tauna, be dahaka do idia karaia? (Ioa. 5:19, 22, 27; Kara 17:31) Inai atikol ena siri badana ia gwau, Iehova “ia ura lasi tau ta ia mase,” to ia ura “taunimanima ibounai be do idia helalo-kerehai.” (2 Pet. 3:9; 1 Tim. 2:4) Ena be Iehova ena kara ita diba, to sivarai namona idia do kamonai lasi taudia do ia hahemaoro henia dalana be ita dekenai ia do gwauraia lasi. Oibe, ia ese ita dekenai ia karaia vadaeni gaudia eiava do ia karaia gaudia ia gwauraia be gau badana lasi.
Hisihisi badana ia do matamaia lasi neganai, sivarai namona idia kamonai lasi taudia be Iehova ese edena bamona do ia hahemaoro henia? (Paragraf 8 itaia) c
9. Baibel ai Iehova ese ita dekenai dahaka ia hahedinaraia?
9 Iehova ese ena Hereva lalonai do ia karaia gaudia haida be ita dekenai ia gwauraia. Hegeregere, Baibel ese ita ia hadibaia Iehova ese “kara maoromaoro lasi taudia” do ia hatorea isi lou, idia be sivarai namona idia dibaia lasi bona edia kara gunadia idia haidaua lasi. (Kara 24:15; Luka 23:42, 43) Unai dainai mai anina bada henanadai haida do ita laloa.
10. Dahaka henanadai ma haida ita laloa?
10 Hisihisi badana lalonai idia mase taudia be helaro lasi do idia toreisi lou totona, a? Baibel ese ia hahedinaraia Aramagedono ai, Iehova idia inai henia taudia be ia bona ena tuari taudia ese do idia hadikaia ore bona do idia toreisi lou lasi. (2 Tes. 1:6-10) To taunimanima haida be edena bamona? Hegeregere haida be hisihisi badana lalonai gorere, buruka, bona aksiden amo idia mase, eiava haida be taunimanima ese idia hamasea. (Had. 9:11; Sek. 14:13) Unai taudia haida be tanobada matamatana ai, kara maoromaoro lasi taudia ida do idia toreisi lou, a? Unai ena haere ita diba lasi.
ITA DIBA GAUDIA
11. Aramagedono ai taunimanima be edena dala ai hahemaoro do idia abia?
11 Vaira negai do idia vara gaudia haida ita diba. Hegeregere ita diba Aramagedono ai, taunimanima be Keriso ena tadikaka idia kara henia dalana hegeregerena, hahemaoro do idia abia. (Mat. 25:40) Mamoe bamona hahemaoro idia abia taudia be horoa taudia bona Keriso dekenai edia heduru do idia hahedinaraia. Danu, ita diba hisihisi badana ia matamaia murinai, Keriso ena tadikaka be guba dekenai do idia daekau lasi ela bona Aramagedono tuarina ia matamaia neganai, guba dekenai do idia daekau. Unai dainai, Keriso ena tadikaka haida be tanobada ai idia do noho lalonai, kudou maoro taudia dekenai dala ia noho unai tadikaka bona edia gaukara idia durua totona. (Mat. 25:31, 32; Apok. 12:17) Dahaka dainai unai hereva momokanidia be mai anina bada?
12-13. “Babulonia Badana” idia hadikaia karana idia itaia taudia haida be dahaka do idia karaia? (Laulau itaia danu.)
12 Danu, hisihisi badana ia matamaia murinai, “Babulonia Badana” idia hadikaia karana idia itaia taudia do idia laloatao, Iehova ena Witnes taudia be lagani momo lalonai unai idia harorolaia. Unai idia itaia taudia haida be Iehova do idia abidadama henia, a?—Apok. 17:5; Ese. 33:33.
13 Bema unai ia vara, Mose ena negai Aigupito ai ia vara gauna ida do ia hegeregere. Laloatao, “idau taudia momo herea” be Israela taudia idia bamoa bona Aigupito idia rakatania. Unai taudia haida be reana Mose ese ia gwauraia Hisihisi Ten ia vara momokani karana idia itaia neganai, Iehova idia abidadama henia matamaia. (Eso. 12:38) Unai hegeregerena, Babulonia Badana idia hadikaia ore murinai, taunimanima haida be ita idia bamoa neganai, do ita lalohisihisi, a? Unai bamona do ita karaia lasi! Ita ura iseda guba Tamana ita tohotohoa, ia be ‘hebogahisi Diravana, ia badu haraga lasi, ena lalokau be bada herea bona nega ibounai ena hereva ia hamomokania.’ b—Eso. 34:6.
“Babulonia Badana” idia hadikaia karana idia itaia taudia do idia laloatao, Iehova ena Witnes taudia be lagani momo lalonai unai idia harorolaia (Paragraf 12-13 itaia) d
14-15. Ta ia mase neganai, eiava ia noho gabuna ese ia hahedinaraia mauri hanaihanai do ia abia, a? Herevalaia. (Salamo 33:4, 5)
14 Nega haida tadikaka o taihu ta be ena Witnes lasi varavara totona do ia gwau, “Bema hisihisi badana ia do vara lasi lalonai ia mase be namo, unai amo helaro ia noho ia toreisi lou totona.” Momokani, badina namodia dainai unai bamona idia hereva. To ta ia mase neganai, unai ese ia hahedinaraia lasi ia be mauri hanaihanai do ia abia. Iehova be hahemaoro tauna namona bona hanaihanai ia karaia abia hidi be maoro bona momokani. (Salamo 33:4, 5 duahia.) Ita diba momokani “Tanobada ibounai edia Hahemaoro Tauna” be kara maorona do ia karaia.—Gen. 18:25.
15 Danu, ita gwau lasi ta ena noho gabuna ese ia hahedinaraia ia be mauri hanaihanai do ia abia. Iehova ese taunimanima milioni momo be “nanigosi” bamona do ia hahemaoro henia lasi, badina idia noho tanodia ai dala be lasi Basileia sivaraina idia kamonai totona. (Mat. 25:46) Tanobada ibounai edia Hahemaoro Tauna be unai bamona taudia ia laloa bada. Iehova ese hisihisi badana lalonai do ia karaia gaudia ita diba lasi. Reana Iehova be bese ibounai vairanai ena ladana ia hahelagaia neganai, dala do ia kehoa taunimanima haida be ia do idia dibaia, idia abidadama henia, bona ena kahanai do idia gini.—Ese. 38:16.
Hisihisi badana ia matamaia murinai, . . . ia vara gaudia idia itaia taudia be Iehova do idia abidadama henia, a?
16. Iehova dekenai dahaka ita dibaia? (Laulau itaia danu.)
16 Baibel ita stadilaia neganai, ita diba Iehova be taunimanima edia mauri ia laloa bada. Ia ese ena Natuna ena mauri ia henia, unai amo ita ibounai be mauri hanaihanai ita abia diba. (Ioa. 3:16) Ita ibounai ese Iehova ena hebogahisi karana ita mamia. (Isa. 49:15) Ia be ita ta ta iseda ladana ia diba. Ia be ita ta ta ia diba namonamo dainai, ena be ita mase to ita ia hatorea isi lou diba badina iseda mauri dalana bona iseda lalohadai ibounai ia diba! (Mat. 10:29-31) Ita abia dae, Iehova ese taunimanima ibounai do ia hahemaoro henia namonamo, badina ia be aonega, kara maoromaoro, bona hebogahisi Diravana.—Iam. 2:13.
Ita abia dae, Iehova ese taunimanima ibounai do ia hahemaoro henia namonamo, badina ia be aonega, kara maoromaoro, bona hebogahisi Diravana (Paragraf 16 itaia)
17. Atikol 20 ai dahaka do ita herevalaia?
17 Hari inai diba matamata ita abia dainai, ita laloparara iseda haroro gaukara ita laloa bada be namo. Dahaka dainai unai bamona ita hereva? Bona dahaka ese ita ia hagoadaia mai ura ida sivarai namona ita harorolaia totona? Atikol 20 ai unai henanadai edia haere do ita herevalaia.
ANE 76 Oi Moale Bada
a Senisi idia karaia ena badina oi diba totona, Gima Kohorona March 15, 2015 ai, inai atikol “Unai be Emu Ura Hegeregerena,” ena rau 7-11 itaia.
b Babulonia Badana idia hadikaia murinai, Goga, Magoga tauna ena tuari lalonai, Iehova ena hesiai taudia do ia tohoa. Bona Babulonia Badana idia hadikaia neganai, Dirava ena taunimanima idia bamoa taudia danu be hahetoho do idia davaria.
c LAULAU: Laulau toi ese ia hahedinaraia, haida be dala lasi sivarai namona idia kamonai totona: (1) Hahine ta ia noho gabuna ai tomadiho karadia idia badinaia goada, (2) tau ta bona adavana idia noho gabuna ai politikol karadia dainai mauri be auka, bona (3) tau ta be siti amo ia daudau momokani hanua ta dekenai ia noho.
d LAULAU: Hereva momokani ia rakatania hahine matamata ta be “Babulonia Badana” do idia hadikaia karana ia laloatao. Ena lalona ia hadaia Iehova dekenai ia giroa lou bona ena Keristani tama sina dekenai ia lao. Ta be unai bamona ia karaia neganai, ita ura iseda guba Tamana ena hebogahisi karana ita tohotohoa bona ita moale badina kara dika tauna be ia helalo-kerehai bona ia giroa lou.
