1. Eden ai, Iehova ese iseda inai tauna ena sivarai be edena bamona ia gwauraia?

ADAMU ia diba momokani gaigai be idia hereva diba lasi. Unai dainai reana Adamu ia laloa aneru ta ese gaigai amo Heva ia hereva henia. (Gen. 3:1-6) Adamu bona Heva be inai aneru idia diba lasi. To, Adamu be abia hidi ia karaia ena lalokau guba Tamana ena ura ia dadaraia, bona ia diba lasi tauna ia badinaia. (1 Tim. 2:14) Maoromaoro, Iehova ese ena inai tauna​—⁠Adamu bona Heva ia koia aneruna​—⁠ena sivarai haida ia gwauraia matamaia, bona ia gwauhamata inai aneru dikana be daudau lasi murinai do ia mase. To danu Iehova ena hadibaia hereva be, nega sisina lalonai inai aneru dikana​—⁠gaigai amo ia hereva aneruna​—⁠be ena siahu do ia gaukaralaia Dirava idia lalokau henia taudia ia tuari henia totona.​—⁠Gen. 3:15.

2, 3. Dahaka dainai Mesia ia do mai lasi neganai, Dirava ese Satani ena sivarai sisina ia halasia?

² Iehova be aonega Diravana dainai, gwau-edeede aneruna ena ladana korikorina be ita dekenai ia hadibaia lasi. * Eden ai gwau-edeede  karana ia vara bena lagani 2,500 bamona murinai, Dirava ese ena inai tauna ena ladana ena anina ia hahedinaraia. (Iobu 1:6) Momokani, New World Translation ena Heberu Toretoredia toi​—⁠1 Sivarai, Iobu, bona Sekaraia​—⁠sibona dekenai inai ladana “Satan” o “Satani” do oi itaia, ena anina be “Gwau-Edeede Tauna.” Dahaka dainai Mesia ia do mai lasi neganai, Dirava ese eda inai tauna ena sivarai sisina ia halasia?

³ Oibe, Iehova ia ura lasi Satani ena sivarai bona ena gaukara be Heberu Toretoredia momo lalonai ia herevalaia. Iehova ese Heberu Toretoredia ia halasia ena badina be, ia ura Mesia do ia herevalaia bona Dirava ena taunimanima be Mesia ena murinai do idia raka. (Luka 24:44; Gal. 3:24) Mesia ia ginidae negana ai, Iehova ese Iesu bona ena aposetolo taudia amo, Satani bona ia idia badinaia aneru ibounai edia sivarai ma haida ia gwauraia hedinarai. * Unai bamona ia karaia be maoro, badina gabeai Iesu bona ena horoa taudia be Iehova ese do ia gaukaralaia, Satani bona ena murinai idia raka taudia do ia haorea vaitani.​—⁠Roma 16:20; Apok. 17:14; 20:10.

4. Dahaka dainai Diabolo dekenai ita gari be anina lasi?

⁴ Aposetolo Petero ia gwau, Satani Diabolo be “ia boiboi bada laiona bamona,” bona Ioane ese ia gwauraia ‘gaigai’ bona “huala badana.” (1 Pet. 5:8; Apok. 12:9) To Diabolo dekenai ita gari be anina lasi, badina ena siahu be bada lasi. (Iamesi 4:7 duahia.) Ita idia gimaia taudia be Iehova, Iesu bona aneru namodia. Edia heduru dainai, iseda inai tauna ita dadaraia diba. To, inai henanadai toi edia haere ita diba be namo: Satani ena siahu be edena bamona? Edena dala ai ena siahu ia gaukaralaia taunimanima ia hakaua kerere totona? Bona iena siahu ena hetoana be edena bamona? Inai henanadai do ita haerelaidia sibona lasi, to gau ma haida do ita dibaia danu.

5, 6. Dahaka dainai tanobada gavamani oreadia be idia hegeregere lasi taunimanima edia ura gaudia idia hagugurua totona?

⁵ Aneru momo be Satani ida Dirava idia gwau-edeede henia. Abata ia do vara lasi neganai, Satani be aneru haida ia tohoa, tanobada hahinedia ida idia mahuta hebou totona. Baibel ese inai hereva momokani be laulau dalanai ia hahedinaraia, huala ese guba ena hisiu orea toi amo hisiu orea ta ia veria ia ida do idia moru totona. (Gen. 6:1-4; Iuda 6; Apok. 12:3, 4) Unai anerudia ese Dirava ena guba oreana idia dadaraia neganai, idia be Satani ena siahu henunai idia noho. Inai gwau-edeede anerudia, be kerere karaia oreana ta sibona lasi. Satani be ena Basileia ta ia haginia bona sibona king ai ia halaoa, badina ia ura Dirava ena Basilaia ia tohotohoa. Ita itaia diba lasi, to Satani ese ena demoni be gavamani ena orea ta ta ai ia atodia, idia dekenai siahu ia henia, bona tanobada ena lohia ai ia halaodia.​—⁠Efe. 6:12.

⁶ Satani be ena lauma oreana amo, tanobada gavamani oreadia ibounai ia lohiaia. Satani ese Iesu dekenai “tanobada ena basileia ibounai” ia hahedinaraia neganai, unai ia hamomokania. Bona ia gwau: “Oi dekenai siahu do lau henia inai basileia ibounai bona edia hairai oi biagua totona, badina unai basileia ibounai be egu, bona lau ura do lau henia tauna dekenai do lau henia.” (Luka 4:5, 6) Ena be Satani ese taunimanima ia hakaua kerere noho, to gavamani momo be edia taunimanima totona gau namodia idia karaia. Bona lohia taudia haida be reana mai edia kara namodia haida. To tanobada gavamani o lohia tauna ta be ia hegeregere lasi taunimanima edia ura gaudia idia hagugurua totona​—⁠Sal. 146:3, 4; Apok. 12:12.

7. Edena dala ai Satani ese gavamani sibona lasi, to tomadiho koikoi bona bisinesi oreadia ia gaukaralaia? (Laulau ginigunana herevalaia.)

 ⁷ Satani bona ena demoni ese gavamani sibona lasi, to tomadiho koikoi bona bisinesi oreadia ia gaukaralaia “tanobada ibounai ia hakaua kerere” totona. (Apok. 12:9) Satani be tomadiho koikoi amo, Iehova ia gwauraia koikoi. Danu, Diabolo ena ura gauna badana be, taunimanima momo ese Dirava ena ladana do idia laloaboio. (Ier. 23:26, 27) Unai dainai, kudou-maoro taudia haida idia laloa Dirava idia tomadiho henia, to idia be demoni idia tomadiho henidia noho. (1 Kor. 10:20; 2 Kor. 11:13-15) Satani be bisinesi oreadia amo koikoi herevadia ia halasia danu. Hegeregere, unai orea ese taunimanima ia hadibaia moale korikorina be moni bona kohu momo abia karana amo. (Aon. 18:11) Unai koikoi herevadia idia abia dae taudia be edia mauri ibounai lalonai “Taga” ena hesiai gaukara idia karaia to Dirava lasi. (Mat. 6:24) Dokonai, moni bona kohu momo ura henia karana ese edia lalokau Dirava dekenai ia haboioa diba.​—⁠Mat. 13:22; 1 Ioa. 2:15, 16.

8, 9. (a) Adamu bona Heva, bona gwau-edeede anerudia edia sivarai amo dahaka gau rua ita dibaia? (b) Satani ese ena siahu amo ia havaraia koikoi karadia ita dibaia ena namo be dahaka?

⁸ Adamu bona Heva, bona gwau-edeede anerudia edia sivarai amo, mai anina bada gaudia rua ita dibaia. Ginigunana, dala be rua sibona, bona tamona ita abia hidi be namo. Iehova ita badinaia eiava Satani ita badinaia. (Mat. 7:13) Iharuana, Satani idia badinaia taudia ese idia abia hahenamo be do idia ore. Adamu bona Heva be sibodia ese dahaka be maoro bona dahaka be kerere idia abia hidi diba, bona demoni be mai edia siahu tanobada gavamani oreadia idia biagua totona. (Gen. 3:22) To, Satani badinaia karana ese nega ibounai dika ia havaraia dainai, Adamu bona Heva, bona demoni idia karaia abia hidi ese dika ia havaraia.​—⁠Iobu 21:7-17; Gal. 6:7, 8.

⁹ Satani ese ena siahu amo ia havaraia koikoi karadia ita dibaia ena namo be dahaka? Ita ia durua gavamani dekenai lalohadai maorona ita abia bona ita ia hagoadaia iseda haroro gaukara lalonai. Danu ita laloparara Iehova ia ura gavamani ena siahu taudia do ita matauraia. (1 Pet. 2:17) Bona ia ura tanobada ena gavamani taudia edia taravatu ita badinaia, bema edia taravatu be Iehova ena taravatu ia utua lasi. (Roma 13:1-4) To, politikol karadia amo ita gini siri be namo. Anina be politikol orea ta eiava tanobada ena lohia ta ena kahanai do ita gini lasi. (Ioa. 17:15, 16; 18:36) Badina ita itaia Satani ia ura Iehova ena ladana bona ena kara ia hadikaia toho, unai dainai ita ura ma haida dekenai iseda Dirava ena sivarai momokani ita hadibaia. Mai moale ida Dirava ena ladana ita abia bona gaukaralaia, badina ita diba ia ita lalokau henia karana ese moni o kohu ia hereaia.​—⁠Isa. 43:10; 1 Tim. 6:6-10.

10-12. (a) Edena dala ai Satani ese hedibagani ia gaukaralaia aneru momo ia tarapua totona? (b) Aneru momo idia moru ena sivarai amo dahaka ita dibaia?

¹⁰ Satani be taunimanima ia hamorua diba daladia haida ia gaukaralaia. Hegeregere, iena ura idia karaia totona, idia ia dibagania bona tarapua. Danu, nega haida idia ia dagedage henia ena lalohadai do idia badinaia totona.

¹¹ Mani Satani ese aneru momo ia tarapua dalana ita itaia. Reana nega daudau lalonai edia kara ia itaia namonamo, unai amo ia diba dahaka do ia gaukaralaia idia ia tarapua totona. Unai aneru haida be tarapu lalonai idia moru bona tanobada hahinedia ida idia mahuta hebou. Idia havaraia natudia be tatau badadia bona taunimanima idia dagedage henidia. (Gen. 6:1-4) Reana Satani ese unai gwau-edeede anerudia be mahuta hebou karana dekenai sibona ia tohodia lasi, to danu ia gwauhamata siahu do ia henia taunimanima idia lohiaia totona. Reana badina be ia ura Dirava ese ia gwauhamatalaia tauna​—⁠“hahine ena garana”​—⁠ena mai dalana ia koua. (Gen. 3:15, NWT) Iehova be unai ia diba dainai, Abata ia mailaia​—⁠unai negai Satani bona gwau-edeede anerudia edia palani ibounai ia hadikaia ore.

¹² Unai sivarai amo dahaka ita dibaia? Satani ese ia gaukaralaia momo hedibaganidia be, matabodaga bona sibona laloa bada karana. Satani idia bamoa anerudia be lagani momo, Dirava ida guba ai idia noho. Ena be gabu namona ai idia noho, to momo be lalohadai dikadia idia abia bona unai lalohadai dikana ia goada. Unai hegeregerena, herevana lagani momo Dirava ena tanobada oreana lalonai ita noho, to lalohadai dikadia ita abia diba. (1 Kor. 10:12) Unai dainai mai anina bada gauna be, iseda kudouna ita sekea loulou, matabodaga lalohadaidia ita kokia, bona sibona laloa bada karana ita dadaraia!​—⁠Gal. 5:26; Kolose 3:5 duahia.

13. Satani ese ia gaukaralaia hedibagani ma ta be dahaka, bona edena dala ai ita dadaraia diba?

¹³ Satani ese ia gaukaralaia hedibagani ma ta be, meamea karadia. Hari, taunimanima ese demoni idia ura henia totona, ia ese tomadiho koikoi sibona ia gaukaralaia lasi, to moale karadia danu. Hegeregere muvi, vidio gadara, bona tv program ma haida ai idia halasia meamea karadia idia moalelaia. Edena dala ai unai tarapu ita dadaraia diba? Namo lasi ita laloa, ita totona Dirava ena orea ese ia abia dae bona ia abia dae lasi moale karadia edia lista ta ia karaia be namo. Namona be ita ta ta ese sibona eda lalomamina ita hadibaia Dirava ena taravatu ita badinaia totona. (Heb. 5:14) Danu, aposetolo Paulo be ita ia sisiba henia, namona be Dirava dekenai ita hahedinaraia lalokauna be “lalokau koikoina lasi.” Bema unai ita badinaia abia hidi maorodia do ita karaia. (Roma 12:9) Sibona ita  nanadaia diba: ‘Lau abia hidi moale karadia ese idia hahedinaraia lau be koikoi tauna, a? Bema egu Baibel stiuden o lou henia taudia ese lau abia hidi moale karadia idia itaia, do idia laloa lau harorolaia gauna lau badinaia, a?’ Iseda hereva hegeregerena ita kara neganai, ita be Satani ena tarapu lalonai do ita moru lasi.​—⁠1 Ioa. 3:18.

14. Edena dala ai Satani ese ita ia dagedage henia, bona edena dala ai unai ita haheaukalaia diba?

¹⁴ Satani ese ia gaukaralaia hedibagani ma ta be, ita ia dagedage henia Iehova badinaia karana ita dadaraia totona. Hegeregere, ia ese tanobada gavamanidia ia gaukaralaia diba iseda haroro gaukara idia koua totona. Eiava Baibel ena taravatu ita ura badinaia dainai, iseda gaukara o sikuli turadia ia gaukaralaia diba ita idia kirikirilaia totona. (1 Pet. 4:4) Danu reana iseda famili ia gaukaralaia ita idia koua hebou ita lao lasi totona. (Mat. 10:36) Edena dala ai unai ita haheaukalaia diba? Ginigunana, namona be ita diba unai bamona dagedage karadia do ita davaria badina Satani be ita ia tuari henia noho. (Apok. 2:10; 12:17) Bona, unai hekwakwanai idia vara neganai, namona be inai ita laloatao​—⁠Satani ia gwau hekwakwanai ita davaria lasi dainai, Iehova ita hesiai henia noho. To bema hekwakwani ita davaraia, Dirava do ita dadaraia. (Iobu 1:9-11; 2:4, 5) Dokonai, namona be Iehova dekenai ita tabekau unai hekwakwanai ita haheaukalaia totona. Laloatao, ita do ia rakatania lasi momokani.​—⁠Heb. 13:5.

15. Satani be ita ia doria diba ita ura lasi gauna ita karaia totona, a? Gwauraia hedinarai.

¹⁵ Satani be taunimanima ia doria diba lasi idia ura lasi gauna idia karaia totona. (Iam. 1:14) Momo be idia diba lasi idia karaia gauna be Satani ena ura hegeregerena. To hereva momokani idia dibaia murinai, abia hidi idia karaia Iehova eiava Satani do idia hesiai henia totona. (Kara 3:17; 17:30) Bema iseda lalona ita hadaia Dirava ena ura ita karaia totona, Satani be gau ta do ia karaia diba lasi iseda abidadama ia hadikaia totona.​—⁠Iobu 2:3; 27:5.

16, 17. (a) Satani bona ena demoni be dahaka idia karaia diba lasi? (b) Dahaka dainai Iehova dekenai ita guriguri badabada totona ita gari lasi be namo?

¹⁶ Satani bona ena demoni ese gau haida idia karaia diba lasi. Hegeregere, Baibel ia gwau lasi idia be ta ena kudouna idia itaia diba. To ia hahedinaraia Iehova bona Iesu sibona ese unai idia karaia diba. (1 Sam. 16:7; Mar. 2:8) Dahaka dainai ita guriguri lalonai ita hereva badabada? Ita guriguri neganai, Diabolo o demoni ese ita gwauraia hereva do idia kamonai dainai ita gari, a? Lasi. Dahaka dainai? Ita be Iehova ena hesiai gaukara namodia ita karaia dainai, ena be Diabolo ese ita ia itaia to ita gari henia lasi. Unai hegeregerena, namona be iseda guriguri lalonai ita hereva badabada, bona Diabolo ese ita do ia kamonai garina ita gari lasi. Oibe, Baibel lalonai Dirava ena hesiai taudia idia guriguri badabada sivaraidia idia noho. Bona unai sivarai ta ese ia hahedinaraia lasi, Diabolo ese idia do ia kamonai garina idia gari. (1 Kin. 8:22, 23; Ioa. 11:41, 42; Kara 4:23, 24) Bema ita hekwarahi Dirava ena ura hegeregerena ita hereva bona kara, ita abia dae momokani Iehova be Diabolo ena kara dikadia dekena amo ita do ia hamauria diba.​—⁠Salamo 34:7 duahia.

¹⁷ Namona be iseda inai tauna ita diba, to ia ita gari henia lasi. Iehova ena heduru dainai, goevadae lasi taudia ese Satani idia halusia diba. (1 Ioa. 2:14) Bema Diabolo ita inai henia, ia be ita amo do ia heau siri. (Iam. 4:7; 1 Pet. 5:9) Satani ena ura gauna badana be matamata taudia ia tohoa. Dahaka idia karaia diba, Diabolo amo idia gini goada totona? Stadi gabena ese unai henanadai do ia herevalaia.