1-2. Bapatiso negana ai dahaka ia vara, bona inai stadi ai dahaka do ita herevalaia?

 HAIDA idia bapatiso oi itaia vadaeni, a? Bapatiso idia abia totona tadikaka ese henanadai rua ia henia neganai, oi kamonai mai gadona bada ida idia haere. Oi itaia edia famili taudia bona turadia be idia dainai idia moale bada. Bapatiso taudia be ranu amo idia daekau neganai, edia kiri toana oi itaia bona taunimanima ibounai edia imana idia patapataia oi kamonai. Wiki ta ta ai, taunimanima tausen momo be Iehova Dirava dekenai edia mauri idia gwauhamatalaia bona bapatiso idia abia.

² Oi be edena bamona, oi bapatiso vadaeni eiava bapatiso oi lalohadailaia noho? Bema oi ura bapatiso oi abia, inai tanobada dikana lalonai oi be mai anina bada, badina ‘Iehova oi tahua noho.’ (Sal. 14:1, 2) Herevana, oi be matamata eiava buruka inai stadi be oi totona. To, ita bapatiso vadaeni taudia danu ita ura eda lalona ita hadaia Iehova do ita hesiai henia ela bona hanaihanai. Unai dainai, Iehova ita hesiai henia ena badina toi mani ita herevalaia.

3. Dahaka dainai Iehova ena hesiai taudia be hereva momokani bona kara maoromaoro idia ura henia? (Salamo 119:128, 163)

³ Iehova ese iena taunimanima ia hagania ‘hereva momokani do idia ura henia.’ (Sek. 8:19) Iesu ese ia murinai idia raka taudia ia hamaorodia kara maoromaoro do idia badinaia. (Mat. 5:6) Unai anina be tau ta do ia ura bada Dirava ena matanai ia maoro, namo bona goeva karana do ia karaia. Hereva momokani bona kara maoromaoro oi ura henia, a? Ai diba oi ura henia. Oi ese hereva koikoidia bona kara dikadia ibounai oi inai henia. (Salamo 119:128, 163 duahia.) Hereva koikoidia  be inai tanobada ena lohia tauna, Satani, ena kara idia hahedinaraia. (Ioa. 8:44; 12:31) Satani ena ura badana ta be Iehova Dirava ena ladana helagana do ia hadikaia. Eden umana ai gwau-edeede ia vara negana amo, Satani ese hereva koikoi amo Dirava ena ladana ia hadikaia. Ia hahedinaraia Iehova be sibona ia laloa bona ia be koikoi Lohia tauna bona taunimanima amo gau namodia ia hunia. (Gen. 3:1, 4, 5) Unai koikoi herevadia dainai, taunimanima idia laloa Iehova be Dirava dikana. Bema taunimanima be “hereva momokani” idia ura henia lasi, Satani ese veridia diba kara dika idauidau idia karaia totona.​—Roma 1:25-31.

4. Edena dala ai Iehova ese ia hamomokania ia be “kara momokani Diravana”? (Laulau itaia danu.)

⁴ Iehova be “kara momokani Diravana,” bona ia idia lalokau henia taudia dekenai hereva momokani ia hadibaia. (Sal. 31:5) Unai ia karaia neganai, ia ese Satani ena hereva koikoidia amo idia ia ruhaia. Iehova ese ena hesiai taudia ia hadibaia kara momokani bona kara maoromaoro idia badinaia totona. Unai amo idia ese hemataurai bona lalomaino idia davaria. (Aon. 13:5, 6) Baibel oi stadilaia neganai, oi totona unai bamona ia karaia danu, a? Oi diba gauna be Iehova ena kara be namo herea oi bona taunimanima ibounai totona. (Sal. 77:13) Unai dainai, oi ura Dirava ena kara maoromaoro oi badinaia. (Mat. 6:33) Oi ura hereva momokani oi abia isi, bona Satani ena koikoi herevadia oi hakoikoia. Edena dala ai unai oi karaia diba?   

5. Edena dala ai hereva momokani bona kara maoromaoro do oi abia isi?

⁵ Inai abia hidi oi karaia diba: “Lau be Satani ena hereva koikoidia lau dadaraia bona hereva momokani lau abia isi. Lau ura Iehova be egu Lohia, bona dahaka ia gwau be maoro lau badinaia.” Edena bamona unai do oi karaia? Guriguri amo Iehova dekenai emu mauri oi gwauhamatalaia, bena taunimanima vairanai bapatiso amo emu gwauhamata oi hamomokania. Hereva momokani bona kara maoromaoro oi ura henia dainai, bapatiso oi abia be maoro.

6. Iesu Keriso oi lalokau henia totona, Salamo 45:4 ese dahaka badina namodia haida ia gwauraia?

⁶ Dahaka dainai Iesu Keriso oi lalokau henia? Salamo 45:4 ese badina namodia haida  ia hahedinaraia. (Duahia.) Iesu be hereva momokani, manau bona kara maoromaoro ia abia isi. Bema hereva momokani bona kara maoromaoro oi ura henia, anina be Iesu Keriso danu oi lalokau henia. Iesu be mai gari lasi ida hereva momokani bona kara maoromaoro ia abia isi karana do oi laloa. (Ioa. 18:37) To, edena dala ai Iesu ese ita dekenai manau karana ia hadibaia?

7. Iesu ena manau karana dekenai dahaka oi ura henia?

⁷ Iesu ena haheitalai amo manau karana ia hahedinaraia. Hegeregere, hanamoa ibounai be ena Tamana dekenai ia henia, bona ia sibona ia hanamoa lasi. (Mar. 10:17, 18; Ioa. 5:19) Iesu ena manau karana oi stadilaia neganai, emu hemami be edena bamona? Oi ura Dirava ena Natuna oi lalokau henia bona badinaia, ani? Oibe. Dahaka dainai Iesu ia manau? Badina iena Tamana be manau, bona ia lalokau henia bona tohotohoa. (Sal. 18:35; Heb. 1:3) Iesu oi ura henia badina ia ese Iehova ena kara namodia ia hahedinaraia, a?

8. Dahaka dainai iseda King Iesu ita lalokau henia?

⁸ Iseda King Iesu ita lalokau henia badina ia be Lohia tauna namona. Iehova sibona ese ena natuna ia hadibaia bona ia abia hidi ia lohia totona. (Isa. 50:4, 5) Danu, Iesu be sibona ena ura ia dadaraia lalokauna ia hahedinaraia do oi laloa. (Ioa. 13:1) Iesu be oiemu King dainai oi lalokau henia be maoro. Ia gwau ia idia lalokau henia taudia be iena turadia, bona iena taravatu idia badinaia karana amo edia lalokau idia hahedinaraia. (Ioa. 14:15; 15:14, 15) Iehova ena Natuna ita tura henia be hahenamo badana!

9. Edena dala ai Keristani taudia edia bapatiso be Keriso ena bapatiso ida ia hegeregere?

⁹ Iesu ena hahegani ta be iena murinai idia raka taudia be bapatiso do idia abia. (Mat. 28:19, 20) Ia be unai bamona ia karaia. Dala haida ai iena bapatiso be idau, to dala ma haida ai idia be hegeregere. (Maua itaia “ Iesu Ena Bapatiso Bona Ia Murinai Idia Raka Taudia Edia Bapatiso Ena Idau.”) Iesu be bapatiso ia abia neganai, sibona ia henia ena Tamana ena ura ia karaia totona. (Heb. 10:7) Unai hegeregerena, Keristani taudia be bapatiso idia abia neganai, idia hahedinaraia edia mauri be Iehova Dirava dekenai idia gwauhamatalaia. Hari, edia mauri lalonai Dirava ena ura idia karaia be gau badana, sibodia edia ura lasi. Unai dala amo edia Biaguna ena haheitalai idia tohotohoa.

10. Dahaka dainai Iesu oi lalokau henia bona oi ura bapatiso oi abia?

¹⁰ Oi abia dae Iesu be Iehova ena Natuna tamona sibona, bona oi moale badina Dirava ese ia abia hidi ita ia lohiaia totona. Oi diba Iesu be manau bona ena Tamana ena kara ia hahedinaraia goevagoeva. Ia be hitolo taudia ia ubudia, lalomanoka taudia ia hagoadaia, bona gorere taudia ia hanamodia. (Mat. 14:14-21) Bona, hari kongrigeisen ia hakaua dalana oi itaia. (Mat. 23:10) Danu, oi diba ia be Dirava ena Basileia ena King dainai, hahenamo momo do ia mailaia. Edena dala ai do oi hahedinaraia ia oi lalokau henia? Ena haheitalai do oi badinaia. (Ioa. 14:21) Unai oi karaia totona, gau ginigunana be Iehova dekenai emu mauri do oi gwauhamatalaia bona bapatiso oi abia.

11. Bapatiso oi abia totona dahaka be mai anina bada, bona dahaka dainai?

¹¹ Bapatiso oi abia totona dahaka be mai anina bada? Iesu ese Dirava ena taravatu badana ia hahedinaraia, ia gwau: “Iehova emu Dirava do oi lalokau henia mai emu kudouna ibounai, mai emu mauri ibounai, mai emu lalona ibounai, bona mai emu goada ibounai  ida.” (Mar. 12:30) Unai siri hegeregerena, Dirava oi lalokau henia, a?

12. Dahaka dainai Iehova oi lalokau henia? (Laulau itaia danu.)

¹² Iehova oi lalokau henia ena badina momo. Hegeregere, hari oi laloparara ia be “mauri ena badina” bona “harihari gaudia ibounai bona harihari gaudia goevadia” ia henia Diravana. (Sal. 36:9; Iam. 1:17) Oi moalelaia gaudia ibounai be iseda lalokau Diravana amo idia mai.

13. Dahaka dainai Iesu ena boubou gauna be harihari gauna hereadaena?

¹³ Iesu ena boubou gauna be Dirava ese ita dekenai ia henia harihari gauna hereadaena. Dahaka dainai unai bamona ita gwau? Mani Iehova bona ena Natuna edia hetura karana oi laloa. Iesu ia gwau: “Tamana ese lau ia lalokau henia” bona lau be “Tamana lau lalokau henia.” (Ioa. 10:17; 14:31) Lagani bilioni momo lalonai idia noho hebou dainai, edia hetura karana ia goada momokani. (Aon. 8:22, 23, 30) Dirava ia itaia ena Natuna idia hahisia bona hamasea neganai, ena hemami mani oi laloa. Iehova be oi bona taunimanima ibounai ia lalokau henia. Unai dainai ena Natuna lalokauna ia siaia, unai amo dala ia kehoa oi bona ma haida be mauri hanaihanai umui abia diba. (Ioa. 3:16; Gal. 2:20) Dirava ita lalokau henia ena badina badana be unai.

14. Dahaka tahua gauna namona oi abia hidi diba?

¹⁴ Iehova oi diba namonamo dainai emu lalokau ia dekenai do ia goada ia lao. Oi ura ia oi tura henia ela bona hanaihanai, bona unai oi karaia diba. Mai lalokau ida oi ia hamaoroa iena kudouna oi hamoalea totona. (Aon. 23:15, 16) Hereva sibona amo lasi, to emu kara amo unai oi karaia diba. Emu mauri dalana ese do ia hahedinaraia oi be Iehova oi lalokau henia momokani. (1 Ioa. 5:3) Emu mauri lalonai unai be tahua gauna namona.

15. Edena dala ai Iehova dekenai emu lalokau oi hahedinaraia diba?

¹⁵ Edena dala ai Iehova dekenai emu lalokau oi hahedinaraia diba? Gau ginigunana be guriguri amo Dirava momokanina dekenai emu mauri oi gwauhamatalaia. (Sal. 40:8) Bena, taunimanima vairanai bapatiso oi abia neganai, unai gwauhamata oi hamomokania. Bona inai atikol ai ita herevalaia bamona, emu bapatiso be mai anina bada bona moale gauna. Emu mauri matamata be Iehova totona, oi sibona totona oi noho lasi. (Roma 14:8; 1 Pet. 4:1, 2) Ita gwau diba unai be abia hidi badana, to unai ese dala ia kehoa mauri namona oi noholaia totona. Edena dala ai?   

16. Salamo 41:12 hegeregerena, edena dala ai Iehova ese ia idia hesiai henia taudia ia hanamoa?

¹⁶ Iehova be hariharibada Diravana. Herevana dahaka boubou gaudia oi henia, to hanaihanai oi do ia hanamoa bada. (Mar. 10:29, 30) Bema emu mauri oi gwauhamatalaia Iehova oi hesiai totona, herevana inai tanobada dikana dekenai oi noho, to emu mauri lalonai hahenamo bona moale do oi davaria. Emu bapatiso negana ai unai mauri dalana oi hamatamaia unai. Emu lalokau Tamana do oi hesiai henia ela bona hanaihanai. Oi bona emu Tamana huanai ia noho lalokauna do ia goada ia lao, bona ia hegeregerena, do oi noho ela bona hanaihanai.​—Salamo 41:12 duahia.

17. Iehova dekenai dahaka oi henia diba?

¹⁷ Dirava dekenai emu mauri oi gwauhamatalaia bona bapatiso oi abia neganai, emu Tamana  dekenai gau namo hereana ta oi henia unai. Ia ese oi moalelaia gau namodia ibounai ia henia. Unai dainai, oi ese guba bona tanobada ena Biaguna dekenai gau namo hereana oi henia diba, unai be mai emu ura ibounai ida iena hesiai gaukara do oi karaia. (Iobu 1:8; 41:11; Aon. 27:11) Unai be emu mauri oi gaukaralaia dalana hereadaena. Momokani, Iehova oi lalokau henia dainai oi bapatiso be maoro.

18. Dahaka henanadai oi laloa be namo?

¹⁸ Emu haere be dahaka inai henanadai dekenai, Do oi bapatiso, a? Oi sibona ese oi haerelaia diba. To oi durua totona sibona oi nanadaia, ‘Dahaka dainai lau bapatiso lasi?’ (Kara 8:36) Namona be ita herevalaia badina toi oi laloatao. Ginigunana be, hereva momokani bona kara maoromaoro oi ura henia. Iharuana be, Iesu Keriso oi lalokau henia. Ihatoina be, Iehova oi lalokau henia be mai anina bada. Sibona oi nanadaia: ‘Lau ura dina ta taunimanima ibounai be hereva momokani idia gwauraia bona kara maoromaoro idia karaia lau itaia, a?’ ‘Lau ura Dirava ena Natuna be egu King ai lau halaoa bona lau ura ena haheitalai lau tohotohoa, a?’ ‘Lau ura Iehova lau hesiai henia bona ena kudouna lau hamoalea, a?’ Bema unai henanadai dekenai emu haere be, oibe, oi bapatiso be namo. Dahaka oi naria noho?​—Kara 16:33.

19. Dahaka dainai bapatiso oi abia totona oi gari lasi be namo? Haheitalaia gwauraia. (Ioane 4:34)

¹⁹ Bema oi gari bapatiso oi abia totona, mani Iesu ia gaukaralaia haheitalai ta oi laloa. (Ioane 4:34 duahia.) Iesu ese ena tamana ena ura ia karaia karana be aniani ida ia hahegeregerea. Dahaka dainai? Badina iseda tauanina durua totona aniani be gau namona. Iesu ia diba, Iehova ia ura ita karaia gaudia ibounai be iseda namo totona. Iehova ia ura lasi ita karaia gauna ta ese ita do ia hadikaia. Iehova ia ura bapatiso do oi abia, a? Oibe. (Kara 2:38) Unai dainai, oi diba momokani bema oi bapatiso ena hahegani oi badinaia, namo do oi davaria. Bema oi daradara lasi aniani namona ta oi ania totona, dahaka dainai bapatiso totona oi daradara?

20. Stadi atikol 11 ai dahaka do ita herevalaia?

²⁰ Dahaka dainai haida idia bapatiso haraga lasi? Momo be inai bamona do idia haere, “Lau do hegeregere lasi.” Momokani, emu mauri oi gwauhamatalaia Iehova dekenai bona bapatiso oi abia be abia hidi badana. Unai dainai, namona be unai abia hidi do oi laloa namonamo, bona nega oi atoa oi hegaegae namonamo totona. To, bema oi ura bapatiso, dahaka do oi karaia oi hegaegae totona? Stadi atikol 11 ai unai do ita herevalaia.