1. Baibel oi do stadilaia lasi neganai, emu mauri be edena bamona?

 IEHOVA ENA WITNES TAUDIA ida Baibel oi do stadilaia lasi neganai emu mauri be edena bamona? Reana ita momo ita ura lasi eda mauri gunana ita laloa. Reana iseda kara be inai tanobada taudia edia kara bamona, maoro bona kerere edia idau ita diba lasi. Unai dainai, ita ‘be helaro lasi bona Dirava ita diba lasi.’ (Efe. 2:12) To Baibel ita stadilaia murinai iseda mauri dalana ia idau!

2. Baibel oi stadilaia neganai dahaka oi dibaia?

² Baibel oi stadilaia matamaia neganai, oi diba emu guba Tamana be oi ia lalokau henia bada. Oi laloparara bema oi ura Iehova oi hamoalea bona ena ruma bese tauna ta ai oi lao, namona be emu mauri dalana bona emu lalohadai oi haidaua. Bona Iehova ena kara maoromaoro taravatudia oi dibaia bona badinaia.​—Efe. 5:3-5.

3. Kolose 3:9, 10 hegeregerena, Iehova ia ura dahaka ita karaia bona inai atikol ai dahaka do ita herevalaia?

³ Iseda Havaraia Tauna bona guba Tamana, Iehova, be mai ena maoro ita ia hamaoroa dahaka ita karaia totona. Bona ita do bapatiso lasi neganai, ia ura ita hekwarahi ‘mauri gunana mai ena kara idauidau ita kokia’ totona. * (Kolose 3:9, 10 duahia.) Inai atikol ese bapatiso idia ura abia taudia do ia durua inai henanadai toi idia haerelaia totona: (1) “Mauri gunana” be dahaka? (2) Dahaka dainai Iehova ia ura mauri gunana ita kokia? (3) Edena dala ai unai ita karaia diba? Inai stadi ese  idia bapatiso vadaeni taudia do ia durua edia mauri gunana dekenai idia giroa lou lasi totona.

4. “Mauri gunana” ia badinaia tauna ena kara be edena bamona?

⁴ Mauri gunana ia badinaia tauna ena lalohadai bona kara be dika. Ia be sibona ena namo ia tahua, ia badu haraga, tanikiu karana ia diba lasi, bona ia hekokoroku. Ia ese ponografi laulau bona matabodaga eiava dagedage muvi itaia karana ia moalelaia. Ita gwau diba ia be mai ena kara namodia haida, bona reana hereva dikadia ia gwauraia eiava kara dikadia ia karaia neganai, ena hemami ia dika. To ia hekwarahi lasi ena lalohadai bona kara dikadia ia haidaua totona.​—Gal. 5:19-21; 2 Tim. 3:2-5.

5. Mauri gunana ita kokia momokani diba, a? Herevalaia. (Kara 3:19)

⁵ Ita be goevadae lasi dainai, ita hekwarahi lalohadai dikadia bona ura dikadia ita kokia momokani totona. Nega haida, ita karaia o herevalaia gauna dainai ita lalohisihisi diba. (Ier. 17:9; Iam. 3:2) To mauri gunana ita kokia neganai, tauanina ena ura bona kara dikadia ese ita do ia biagua lasi. Bona mauri dala maorona ita badinaia diba.​—Isa. 55:7; Kara 3:19 duahia.

6. Dahaka dainai Iehova ese ita ia noia lalohadai bona kara dikadia ita kokia totona?

⁶ Iehova be ita ia lalokau henia bada bona ia ura mauri namona ita moalelaia dainai, ita ia noia lalohadai bona kara dikadia ita kokia totona. (Isa. 48:17, 18) Iehova ia diba bema ta be ura dikadia ia dadaraia lasi, ia sibona bona ma haida do ia hahisia. Bona unai ia vara neganai, Iehova ia lalohisihisi danu.

7. Roma 12:1, 2 hegeregerena, dahaka abia hidi ita karaia diba?

⁷ Ita hekwarahi iseda kara gunadia ita haidaua noho dainai, nega haida iseda turadia bona famili haida be ita do idia kirikirilaia. (1 Pet. 4:3, 4) Reana do idia gwau ita be mai eda maoro dahaka ita karaia totona bona ma haida edia hereva ita kamonai lasi be namo. To, Iehova ena taravatu idia dadaraia taudia be Satani ese ia biagua, bona idia be inai tanobadana ena kara idia tohotohoa. (Roma 12:1, 2 duahia.) Ita ibounai ese abia hidi ita  karaia be namo: Ita ura iseda goevadae lasi tauanina bona Satani ese ia biagua tanobada ena mauri dalana ita badinaia noho, eiava ita ura Iehova ese iseda kara ia haidaua bona taunimanima namodia ai ita lao.​—Isa. 64:8.

8. Dahaka ese ita do ia durua lalohadai kereredia bona kara dikadia ita dadaraia totona?

⁸ Iehova ia diba ita be nega daudau lalonai do ita gaukara goada iseda lalohadai kereredia bona kara dikadia ita dadaraia totona. (Sal. 103:13, 14) To, Iehova ese Baibel, ena lauma, bona ena orea amo aonega, goada, bona heduru ia henia iseda mauri gunana ita haidaua totona, bona Iehova be unai dala amo ita ia durua vadaeni. Hari ita ese gau haida do ita herevalaia, unai amo bapatiso ia ura abia tauna do ia durua ena mauri gunana ia rakatania bona do ia hegeregere ia bapatiso totona.

9. Dirava ena Hereva ese oi do ia durua dahaka oi karaia totona?

⁹ Baibel oi gaukaralaia emu kara oi tahua namonamo totona. Dirava ena Hereva be hevarivari bamona, unai ese oi do ia durua emu lalohadai, hereva, bona kara oi sekea totona. (Iam. 1:22-25) Oi ia stadi henia pablisa bona lo Keristani taudia ma haida ese oi dekenai sisiba namodia do idia henia. Hegeregere, idia ese Baibel siridia do idia gaukaralaia, unai amo oi do idia durua oi karaia diba gaudia bona oi karaia diba lasi gaudia idia hahedinaraia. Emu kara dikadia oi dadaraia totona, idia ese oi dekenai Baibel ena hakaua herevadia tahua dalana do idia hadibaia. Bona Iehova be hanaihanai ia noho hegaegae oi ia durua totona. Ia be oi ia durua dalana ia diba, badina emu lalona ai idia noho gaudia ia diba. (Aon. 14:10; 15:11) Unai dainai dina ta ta ai Iehova oi guriguri henia bona ena hereva, Baibel, oi stadilaia.

10. Elie ena sivarai amo dahaka oi dibaia?

¹⁰ Namona be oi abia dae Iehova ena taravatu be namo herea. Iehova ese ita ia hamaoroa gaudia ibounai ita karaia neganai, namo do ita davaria. Iehova ena taravatu idia badinaia taudia be sibona edia mauri dalana idia matauraia, edia mauri be mai ena badina, bona idia moale. (Sal. 19:7-11) To, Iehova ena taravatu idia dadaraia taudia be tauanina ena kara idauidau lalonai idia vareai dainai hisihisi idauidau idia davaria. Tau ta ladana Elie ese Dirava ena taravatu dadaraia karana ia herevalaia. Ia maragi negana amo ena tama sina ese ia dekenai Iehova ena dala idia hadibaia. To Elie ia tubu daekau noho lalonai hebamo dikadia ia abia hidi. Ia be drag ia ania, matabodaga maurina ia noholaia, bona ia henaohenao matamaia. Elie be badu momo bona dagedage tauna ai ia lao. Ia gwau: “Lau be Keristani taudia ese do idia karaia lasi gaudia ibounai lau karaia.” To, Elie ia maragi neganai ia dibaia gaudia ia laloaboio lasi. Gabeai, Baibel ia stadilaia matamaia lou. Ia gaukara goada ena kara dikadia ia dadaraia bona lagani 2000 ai ia bapatiso. Edena dala ai Iehova ena taravatu badinaia karana amo namo ia davaria? Elie ia gwau: “Hari lalomaino lau abia bona egu lalomamina ia goeva.” * Elie ena haheitalai amo ia hahedinaraia, Iehova ena taravatu idia dadaraia taudia be sibona idia hahisia. To, Iehova ia ura idia ia durua edia mauri idia haidaua totona.

11. Iehova be dahaka gaudia ia inai henia?

¹¹ Iehova ese ia inai henia gaudia ita inai henia. (Sal. 97:10) Baibel ia gwau Iehova ese  “hekokoroku matana, koikoi malana, bona kerere lasi tauna ena rara ia bubua imana” ia inai henia. (Aon. 6:16, 17) Danu “dagedage bona koikoi taudia ia inai henia.” (Sal. 5:6) Oibe, Iehova ese unai kara dikadia ia inai henia momokani. Noa ena negai tanobada be kara dika ese ia hahonua dainai, Iehova ese unai dika ia kokia. (Gen. 6:13) Mani haheitalai ma ta ita laloa. Iehova be peroveta tauna Malaki amo ia gwau, koikoi dalanai edia kerere lasi adavana idia divosia taudia ia inai henia. Bona Dirava ese edia tomadiho karana ia dadaraia bona edia kara dainai do ia hahemaoro henidia.​—Mal. 2:13-16; Heb. 13:4.

12. ‘Kara dika do ita inai henia’ ena anina be dahaka?

¹² Iehova ia ura ‘kara dika do ita inai henia.’ (Roma 12:9) Gau ta ita inai henia neganai, ita ura lasi itaia. Bema ta ese oi ia hamaoroa ia bodaga vadaeni aniani oi ania, emu hemami be edena bamona? Reana unai oi laloa neganai emu hemami do ia dika. Unai hegeregerena, Iehova ese ia gwauraia dika gauna be aniani bodagana bamona ita laloa, unai amo do ita ura lasi karaia.

13. Dahaka dainai iseda lalohadai ita gimaia be namo?

¹³ Emu lalohadai oi gimaia. Iseda lalohadai ese iseda kara ia biagua. Unai dainai, Iesu ese ita ia hamaoroa kara dika badana ta ita karaia diba lalohadaina ita dadaraia totona. (Mat. 5:21, 22, 28, 29) Ita ura momokani iseda guba Tamana ita hamoalea, ani? Unai dainai, lalohadai dikadia ita dadaraia haraga be mai anina bada!

14. Iseda hereva dalana amo dahaka ia hahedinaraia, bona ita sibona ese dahaka henanadai ita laloa be namo?

¹⁴ Emu hereva dalana oi naria namonamo. Iesu ia gwau: “Uduna amo idia raka-lasi gaudia be kudouna amo idia mai.” (Mat. 15:18) Oibe, iseda hereva dalana amo iseda lalona dekenai idia noho gaudia ia hahedinaraia. Unai dainai sibona oi nanadaia: ‘Lau be hereva momokani sibona lau gwauraia, a? Lau headava vadaeni dainai, ta hauraia karadia bona herevadia lau dadaraia, a? Hereva dikadia gwauraia karana lau dadaraia momokani, a? Ta ese egu lalona ia hahisia neganai, mai manau ida ia lau haere henia, a?’ Unai henanadai idauidau oi lalohadailaia namonamo karana ese oi do ia durua. Oi gwauraia herevadia be dabua ena pitopito bamona, bema pitopito ta ta oi kokia, do ia auka lasi emu dabua oi kokia totona. Unai hegeregerena, bema emu herevahereva  karana lalonai oi hekwarahi ta hadikaia herevadia, koikoi herevadia, bona hereva dikadia oi dadaraia, do ia auka lasi emu mauri gunana oi kokia totona.

15. “Au dekenai” iseda mauri gunana ita kokoa kau ena anina be dahaka?

¹⁵ Kara ta oi karaia haraga. Aposetolo Paulo ese haheitalai ta ia gaukaralaia, unai amo ita ia hadibaia iseda mauri dalana ita haidaua be gau badana. Ia gwau iseda kara [o mauri] gunana be “au dekenai” ita kokoa kau be namo. (Roma 6:6) Anina be, ita ura Keriso ena haheitalai ita tohotohoa. Iesu be Iehova hamoalea totona ia ura au dekenai idia kokoa. Unai hegeregerena, Iehova ita hamoalea totona, mai ura ida ia inai henia karadia ita dadaraia be namo. Bema unai bamona ita karaia, lalomamina goevana do ita abia bona mauri hanaihanai ena helaro do ita moalelaia. (Ioa. 17:3; 1 Pet. 3:21) Laloatao, Iehova be ita ia hamoalea totona ena taravatu do ia haidaua lasi. To, namona be iseda kara ita haidaua bona iena taravatu ita badinaia.​—Isa. 1:16-18; 55:9.

16. Dahaka dainai ita hekwarahi tauanina ena ura dikadia ita dadaraia noho totona?

¹⁶ Ura dikadia oi dadaraia noho. Ena be oi bapatiso vadaeni, to tauanina ena ura dikadia oi dadaraia noho be namo. Mani tau ta ladana Maurício ena ekspiriens oi laloa. Ia matamata neganai, tatau be tatau ida idia mahuta hebou maurina ia noholaia matamaia. Gabeai, Iehova ena taunimanima ia davaria bona Baibel ia stadilaia matamaia. Iena mauri dalana ia haidaua murinai, lagani 2002 ai ia bapatiso. Ena be hari Maurício be lagani momo Iehova ia hesiai henia, to ia gwau: “Nega haida lau hekwarahi ura dikadia lau dadaraia totona.” Ena be unai ia vara to ia lalomanoka lasi. Badina ia gwau: “Lau diba unai ura dikadia lau dadaraia neganai, Iehova lau hamoalea noho.” *

17. Nabiha ena ekspiriens amo dahaka oi dibaia?

¹⁷ Iehova ena heduru totona oi noinoi, bona ena goada dekenai oi tabekau, to emu goada dekenai lasi. (Gal. 5:22; Fili. 4:6) Namona be ita gaukara goada iseda kara gunadia ita kokia momokani totona. Hahine ta ladana Nabiha ena ekspiriens mani oi laloa. Ena mauri lagani be 6 neganai, ena tamana ese ia rakatania. Ia gwau: “Unai kara dainai lau lalohisihisi bada.” Nabiha ia tubu daekau noho lalonai, badu haraga kekenina ai ia lao. Ia be drag ia hoihoilaia  matamaia, pulisi ese idia arest, bona dibura ruma ai lagani haida ia noho. Dibura ruma idia vadivadi henia Witnes taudia haida be ia ida Baibel idia stadilaia matamaia. Nabiha be ena mauri dalana ia haidaua matamaia. Ia gwau: “Ia auka lasi egu kara gunadia haida lau rakatania totona. To kuku rakatania karana be ia auka.” Nabiha be lagani ta mai kahana ia hekwarahi bona dokonai kuku ania karana ia rakatania. Edena bamona unai ia karaia? Ia gwau: “Mai anina bada karana be, hanaihanai Iehova lau guriguri henia, unai ese lau ia durua unai kara lau rakatania totona.” Ia ese ma haida ia hamaoroa: “Bema Iehova hamoalea totona egu mauri lau haidaua, lau diba momokani ta be unai bamona ia karaia diba!” *

18. Korinto Ginigunana 6:9-11 hegeregerena, guna Dirava ena hesiai taudia momo be dahaka idia karaia?

¹⁸ Aposetolo edia negai, Iesu ida do idia lohia totona Iehova ese ia abia hidi taudia haida be guna kara dikadia idia karaia. Hegeregere, matabodaga karadia, tatau be tatau ida bona hahine be hahine ida mahuta hebou karana, bona henaohenao karadia lalonai idia vareai. To Dirava ena lauma helaga ena heduru amo, edia kara idia haidaua. (1 Korinto 6:9-11 duahia.) Unai hegeregerena, hari Baibel ese taunimanima milioni momo ia durua edia mauri gunana idia haidaua totona. * Oibe, idia manadalaia kara dika badadia idia rakatania vadaeni. Bona edia haheitalai ese ia hamomokania, oi danu be emu mauri ai senisi oi karaia bona kara dikadia oi rakatania diba, unai amo do oi hegeregere bapatiso oi abia.

19. Atikol 11 ai dahaka do ita herevalaia?

¹⁹ Bapatiso idia ura abia taudia be mauri gunana idia kokia sibona lasi, to idia gaukara goada mauri matamata be dabua bamona idia atoa totona. Atikol 11 ese unai ita karaia dalana bona ma haida ese ita idia durua dalana do ia herevalaia.