1. Edena dala ai Salamo 15:1-5 ese ita ia durua diba?

 ATIKOL 23 ai ita diba, Iehova dekenai edia mauri idia gwauhamatalaia bona ia idia tura henia taudia be iena palai ruma ai idia noho diba. To unai bamona hetura karana ita moalelaia totona, dahaka ita karaia be namo? Salamo 15 ese unai ia herevalaia. (Salamo 15:1-5 duahia.) Unai salamo ai, idia noho herevadia ese ita ia durua Dirava kahirakahira ita lao totona.

2. Davida be palai ruma ia herevalaia neganai, dahaka ia laloa?

² Salamo 15 be inai bamona ia hamatamaia: “Iehova e, daika be emu palai ruma lalonai do ia noho? Daika be emu ororo helagana ai do ia noho?” (Sal. 15:1) Salamo torea tauna Davida ese Iehova ena Palai ruma ia gwauraia neganai, reana ia be unai negai Gibeona ai ia noho palai dubu ia laloa. Danu ia ese Dirava ena “ororo helagana” ia gwauraia neganai, reana ia be Ierusalema ai Siona Ororona dekenai ia noho palai ruma ia laloa. Unai be kahirakahira kilomita 10 amo Gibeona ena saut kahana ai ia noho, Davida be unuseniai palai ruma ia haginia bona taravatu maua ia atoa ela bona dubu helaga idia haginia.—2 Sam. 6:17.

3. Dahaka dainai Salamo 15 ita lalopararalaia be namo? (Laulau itaia danu.)

³ Oibe, Israela taudia momo be dubu helaga ai hesiai gaukara idia karaia lasi, bona haida sibona be taravatu maua ia noho gabuna dekenai idia gaukara. To Iehova ena abidadama hesiai taudia ibounai be laulau dalanai, iena palai ruma ai idia noho diba, bema ia idia tura henia noho. Unai be ita ibounai iseda ura gauna. Salamo 15 ese ia hahedinaraia gau haida ita karaia be namo, unai amo Iehova ita tura henia noho diba.

 DIRAVA BADINAIA BONA KARA MAORONA KARAIA

4. Edena dala ai ita diba ita bapatiso sibona be hegeregere lasi? (Isaia 48:1)

⁴ Salamo 15:2 ese ia hahedinaraia, Dirava ena turana be “hanaihanai Dirava ia badinaia” bona “kara maorona ia karaia noho.” Unai be hanaihanai do ita karaia noho gauna. To ‘hanaihanai Dirava ita badinaia’ diba, a? Oibe. Ita be goevadae lasi taudia, to bema ita gaukara goada bona ‘hanaihanai Iehova ita badinaia’ noho, ita do ia lalonamo henia. Dirava dekenai iseda mauri ita gwauhamatalaia bona ita bapatiso neganai, unai be ia ita tura henia ena matamana sibona. Hegeregere Baibel negadiai, ta be Israela tauna dainai, unai ese ia hahedinaraia lasi Iehova ena palai ruma ai ia noho diba. Haida be Dirava idia hanamoa, to “mai kara momokani bona kara maoromaoro” ida unai idia karaia lasi. (Isaia 48:1 duahia.) Namona be Israela taudia ese mai momokani ida Iehova ena ura idia diba bona badinaia. Unai hegeregerena, hari Dirava ena lalonamo ita abia totona, ita bapatiso bona Iehova ena Witnes taudia ai ita lao sibona be hegeregere lasi. Namona be ‘kara maorona ita karaia noho.’ Edena dala ai?

5. Edena dala ai ita hahedinaraia gau ibounai lalonai Iehova ita badinaia?

⁵ Iehova dekenai ‘hanaihanai ia ita badinaia’ bona ‘kara maorona ita karaia noho’ totona, hebou ita lao sibona be hegeregere lasi. (1 Sam. 15:22) Namona be ita gaukara goada ita karaia gaudia ibounai lalonai Dirava ita badinaia, sibona ita noho negadiai danu. (Aon. 3:6; Had. 12:13, 14) Bona gau maragidia ai Iehova ita badinaia be mai anina bada. Unai bamona ita karaia neganai, ita hahedinaraia Iehova ita lalokau henia bona ia danu ita do ia lalokau henia bada.—Ioa. 14:23; 1 Ioa. 5:3.

6. Heberu 6:10-12 hegeregerena, guna ita karaia gau namodia amo dahaka be mai anina bada?

⁶ Iehova ese guna ia totona ita karaia gaudia  ia laloa bada. To, unai ese ia hahedinaraia lasi ita hegeregere vadaeni ena palai rumana ai ita noho hanaihanai totona. Heberu 6:10-12 ese unai ia hahedinaraia. (Duahia.) Iehova be guna ita karaia gau namodia ia laloaboio lasi. To ia ura mai kudouna ibounai ida ia ita tomadiho henia noho “ela bona dokona.” “Bema ita hesiku lasi” ia be iseda turana ai do ia lao ela bona hanaihanai.—Gal. 6:9.

KUDOUNA AMO HEREVA MOMOKANI GWAURAIA

7. Kudouna amo hereva momokani ita gwauraia ena anina be dahaka?

⁷ Bema ta ia ura Iehova ena palai ruma ai ia noho, namona be ena “kudouna amo hereva momokani ia gwauraia.” (Sal. 15:2) Unai ena anina be ita koikoi lasi, to unai sibona lasi, Iehova ia ura gau ibounai lalonai mai momokani ida ita kara bona hereva. (Heb. 13:18) Unai be mai anina bada, “badina Iehova ese koikoi tauna ia inai henia, to kara maoromaoro tauna be Dirava ena turana namona.”—Aon. 3:32.

8. Edena kara ita dadaraia be namo?

⁸ ‘Kudouna amo hereva momokani idia gwauraia’ taudia be taunimanima vairanai Dirava idia badinaia bona sibona idia noho neganai unai bamona idia karaia danu. (Isa. 29:13) Idia ese koikoi karadia idia dadaraia. Koikoi tauna be reana do ia laloa, Dirava ena taravatu haida be nega momo idia maoro lasi. (Iam. 1:5-8) Ia ese Iehova ena taravatu haida ia dadaraia, badina ia laloa unai be gau maragidia sibona. Bena ia itaia bema ia utua taravatu amo dika ta ia vara lasi, kara dika badadia do ia karaia matamaia. Ena be ia laloa Dirava ia hesiai henia noho, to Iehova ese ena tomadiho karana do ia abia dae lasi. (Had. 8:11) To, ita be ita ura gau ibounai lalonai kara momokani ita badinaia.

9. Iesu ese nega ginigunana Natanaela ia hedavari henia karana amo dahaka ita dibaia? (Laulau itaia danu.)

⁹ Iesu ese nega ginigunana, Natanaela ia hedavari henia karana amo, mai kudouna ibounai ida ita kara dalana do ita dibaia. Filipo be ena turana Natanaela ia hakaua mai bona Iesu ia hedavari henia neganai, gau ta ia vara. Ena  be Iesu ese nega ta Natanaela ia hedavari henia lasi, to ia gwau: “Itaia, ia be Israela tauna momokanina, ia dekenai koikoi ta be lasi.” (Ioa. 1:47) Iesu ia diba ena hahediba taudia haida be kara momokani taudia, to ia itaia Natanaela ena kara be idau momokani. Ita bamona Natanaela be goevadae lasi. To ia koikoi lasi bona gau ibounai lalonai ia kara momokani. Iesu ese unai kara namona ia moalelaia dainai, Natanaela ia hanamoa. Bema Iesu ese ita dekenai unai kara namona ia itaia, unai be hahenamo badana!

10. Dahaka dainai ita gwauraia herevadia dekenai ita naria namonamo? (Iamesi 1:26)

¹⁰ Salamo 15 ese ma haida ita kara henia daladia momo ia herevalaia. Salamo 15:3 ese ia hahedinaraia, Iehova ena palai ruma ai ia noho tauna be “ena hereva amo ma haida edia ladana ia hadikaia lasi, ia ese ena dekena tauna dekenai kara dikana ta ia karaia lasi, bona ena turadia ia gwauraia dika lasi.” Bema iseda hereva amo ma haida edia ladana ita hadikaia, unai ese idia do ia hahisia bada bona ita be Iehova ena palai ruma ai do ita noho lasi.—Iamesi 1:26 duahia.

11. Ladana hadikaia karana ena anina be dahaka, bona ia helalo-kerehai lasi tauna dekenai dahaka ia vara?

¹¹ Salamo torea tauna ese ma haida edia ladana hadikaia karana ia herevalaia. Ladana hadikaia karana ena anina be dahaka? Unai be koikoi herevadia amo ta ena ladana ita hadikaia. Bema ta be ma haida edia ladana ia hadikaia bona ia helalo-kerehai lasi, ia be orea amo do idia atoa siri.—Ier. 17:10.

12-13. Edena dala ai ita laloa lasi dalanai iseda turadia ita gwauraia dika? (Laulau itaia danu.)

¹² Salamo 15:3 ese ita ia hadibaia Iehova ese ia boiria tauna be ena dekena tauna dekenai kara dikana ta ia karaia lasi bona ena turadia ia gwauraia dika lasi. Edena dala ai iseda turadia do ita gwauraia dika?

¹³ Ita laloa lasi dalanai, ma ta ita herevalaia neganai, ia ita gwauraia dika. Hegeregere:  (1) taihu ta be ena painia gaukara ia hadokoa, (2) headava tau bona hahine ta be Betele ai edia hesiai gaukara idia hadokoa, eiava (3) tadikaka ta be elda o hesiai gaukara ena maduna ia rakatania. Namo lasi tadikaka taihu ita hamaoroa unai taudia be reana kerere ta idia karaia dainai, edia hesiai gaukara idia hadokoa. Ita diba lasi reana badina haida dainai unai senisi idia vara. Danu, Iehova ena palai ruma ai ia noho tauna be “ena dekena tauna dekenai kara dikana ta ia karaia lasi, bona ena turadia ia gwauraia dika lasi.”

IEHOVA IDIA GARI HENIA TAUDIA MATAURAIA

14. Edena dala ai, Iehova ese ia boiria taudia be “hemarai karadia idia karaia taudia” idia dadaraia?

¹⁴ Salamo 15:4 ia gwau, Iehova ena turana ese “hemarai karadia idia karaia taudia ia dadaraia.” Edena dala ai unai ita karaia diba? Ita be goevadae lasi taudia dainai, ita diba lasi, bema ta be hemarai karadia ia karaia eiava lasi. Dahaka dainai? Reana do ita ura idia kara auka lasi taudia ita tura henia, bona ita idia hahisia taudia ita ura henia lasi. Unai dainai, namona be Iehova vairanai “hemarai karadia idia karaia taudia” sibona ita dadaraia. (1 Kor. 5:11) Idia haida be idia helalo-kerehai lasi bona kara dika idia karaia, ita abia dae gaudia idia matauraia lasi bona idia ura iseda hetura karana Iehova ida idia hadikaia.—Aon. 13:20.

15. “Iehova idia gari henia taudia” ita matauraia dalana ta be dahaka?

¹⁵ Danu, Salamo 15:4 ia gwau, namona be “Iehova idia gari henia taudia” ita matauraia. Unai dainai, dala ita tahua Iehova ena turadia ita kara namo henia bona matauraia. (Roma 12:10) Edena dala ai? Salamo 15:4 ese ia hahedinaraia, dala ta be Iehova ena palai ruma ai ia noho tauna be “ia karaia gwauhamata ia badinaia, ena be hagugurua totona be ia auka.” Iseda gwauhamata ita badinaia lasi neganai, ma haida do ita hahisia. (Mat. 5:37) Hegeregere, Iehova ia ura headava tau bona hahine ese idia headava neganai, ta ta dekenai idia karaia gwauhamata idia badinaia. Danu, tama sina be edia natudia dekenai idia karaia gwauhamata idia hagugurua neganai, Iehova ia moale. Dirava bona iseda dekena taudia ita lalokau henia neganai, do ita gaukara goada iseda gwauhamata ita badinaia totona.

16. Iehova ena turadia ita matauraia dalana ma ta be dahaka?

¹⁶ Dirava ena turadia ita matauraia dalana ma ta be, idia dekenai heabidae karana bona hariharibada karana ita hahedinaraia. (Roma 12:13) Nega ita atoa tadikaka taihu ita bamoa neganai, unai ese ita do ia durua idia bona Iehova ida iseda hetura karana ita hagoadaia. Danu, heabidae karana ita hahedinaraia neganai, ita be Iehova ita tohotohoa.

MONI URA HENIA BADA KARANA DADARAIA

17. Dahaka dainai Salamo 15 ese moni ia herevalaia?

¹⁷ Baibel ia gwau, Iehova ese ia boiria tauna be “ena moni ia henitorehai lasi atoa kau davana abia totona, bona kerere lasi tauna hadikaia totona idia henia moni ia abia dae lasi.” (Sal. 15:5) Dahaka dainai inai salamo ese moni ia herevalaia? Badina moni ita ura henia neganai, taunimanima do ita laloa bada lasi bona iseda hetura karana Dirava ida ia hadikaia diba. (1 Tim. 6:10) Baibel negadiai, haida ese edia ogogami tadikaka idia kara namo henia lasi, bona idia hamaorodia abitorehai moni latanai atoa kau moni do idia henia totona. Danu, diadi taudia haida be laloani moni idia abia dae bona dala kererena ai kerere lasi taudia idia hahemaoro henia. Iehova  ese unai bamona karadia ia inai henia.—Ese. 22:12.

18. Dahaka henanadai ese ita do ia durua, moni totona lalohadai maorona ita abia totona? (Heberu 13:5)

¹⁸ Namona be moni totona ita abia lalohadai ita sekea. Sibona oi nanadaia: ‘Nega momo moni bona do lau hoia gaudia lau laloa, a? Bema moni lau abitorehai, lau haloua haraga lasi badina lau laloa, moni ia henitorehai tauna be unai ia abia haraga be gau badana lasi, a? Moni lau abia neganai, lau mamia ma haida lau hereaia bona hariharibada karana lau hahedinaraia be auka, a? Lau itaia egu tadikaka taihu be mai edia kohu momo dainai, lau laloa moni idia ura henia bada, a? Lau ura taga taudia sibona lau tura henia bona ogogami taudia lau laloa bada lasi, a?’ Ita sibona dekenai unai henanadai ita henia be mai anina bada, badina Iehova ese ita ia boiria karana be hahenamo badana. Unai hahenamo ita gimaia totona, moni ura henia bada karana ita dadaraia be namo. Bema unai bamona ita karaia Iehova ese ita do ia rakatania lasi!—Heberu 13:5 duahia.

IEHOVA ESE ENA TURADIA IA LALOKAU HENIA

19. Dahaka dainai Iehova ia ura salamo 15 ai idia noho gaudia ita badinaia?

¹⁹ Salamo 15 ena dokonai inai gwauhamata herevana ia noho: “Inai bamona ia karaia tauna be gau ta ese ia hamarerea diba lasi.” (Sal. 15:5) Salamo torea tauna ese ia hahedinaraia dahaka dainai Iehova ia ura inai salamo ai idia noho gaudia ita badinaia. Unai ena badina be Iehova ia ura ita moale. Dirava ese ia gwauraia gaudia ita karaia neganai, mauri namona do ita abia bona ita do ia gimaia.—Isa. 48:17.

20. Iehova ese ia boiria taudia be dahaka hahenamo idia naria noho?

²⁰ Iehova ese ia boiria taudia be vaira nega namona idia naria noho. Horoa taudia be Iesu ese guba dekenai idia totona ia hegaegaelaia gabuna ai do idia noho. (Ioa. 14:2) Tanobada helarona idia naria noho taudia be Apokalupo 21:3 ese ia gwauhamatalaia gaudia idia naria noho. Momokani, Iehova ese ita ia boiria iena turana ai ita lao bona hanaihanai iena palai ruma ai ita noho be hahenamo badana!