Baibel ese ena badina ia gwauraia lasi. To, gau haida ia hahedinaraia dahaka dainai idia be Nasareta dekenai idia giroa lou lasi.

Aneru ta ese Maria ia hamaoroa ia be do ia rogorogo bona natuna do ia havaraia. Aneru ese unai sivarai ia gwauraia neganai, Maria bona Iosepa be Nasareta, unai be Iosepa ena hanua Galilea ai idia noho. (Luka 1:26-31; 2:4) Gabeai, Aigupito amo idia giroa mai neganai, idia be Nasareta dekenai idia giroa lou. Iesu be unuseniai ia tubu daekau bona Nasareta tauna ai ia lao. (Mat. 2:19-23) Unai dainai Iesu, Iosepa, bona Maria ita herevalaia neganai, Nasareta gabuna ita laloa.

Maria ena varavara ta, Iuda ai ia noho, ena ladana be Elisabeta. Elisabeta be hahelaga tauna Sekaraia ena adavana bona Ioane Bapatiso ena sinana. (Luka 1:5, 9, 13, 36) Maria be Elisabeta ia vadivadi henia bona Iuda ai ia ida hua toi ia noho. Bena Maria be Nasareta dekenai ia giroa lou. (Luka 1:39, 40, 56) Unai dainai Maria be Iuda ena gabu haida ia diba namonamo.

Gabeai, Iosepa be “ladana do idia rejista” ena taravatu ia badinaia. Unai dainai Iosepa be Nasareta amo Betelehema dekenai ia lao, unai be “Davida ena siti” bona idia perovetalaia Mesia do ia vara gabuna. (Luka 2:3, 4; 1 Sam. 17:15; 20:6; Mika 5:2) Maria be Betelehema ai Iesu ia havaraia murinai, Iosepa ia ura lasi Maria mai ena beibi matamata ida gabu daudau Nasareta, dekenai do idia giroa lou totona. Idia be Betelehema dekenai idia noho, ena daudau Ierusalema amo be kilomita 9 bamona. Unai amo beibi maragina be dubu helaga dekenai do idia abia lao bona Taravatu hegeregerena boubou gaudia do idia henia.​—Lev. 12:2, 6-8; Luka 2:22-24.

Dirava ena aneru ese guna Maria ia hamaoroa ena natuna be “Davida ena terona” do ia abia bona “do ia lohiaia.” Reana Iosepa bona Maria idia laloa Iesu be Davida ena siti ai ia vara karana be mai anina bada, ani? (Luka 1:32, 33; 2:11, 17) Reana idia laloa aonega karana be unuseniai do idia noho ela bona Dirava ena ura idia totona idia do ia hadibaia.

Maria bona Iosepa be Betelehema ai idia noho ena daudau be ita diba lasi ela bona hisiu stadilaia babalau taudia idia ginidae. To, unai negai, ruma ta dekenai idia noho, bona Iesu be beibi ta lasi, to ia be “natuna maragina. (Mat. 2:11) Toana be Nasareta dekenai idia giroa lou lasi, to Betelehema ai nega daudau idia noho bona unai be edia hanua ai ia lao.

Heroda be oda ia henia “Betelehema [ai] . . . memero maragidia ibounai . . . edia mauri lagani be rua amo ia diho” do idia alaia. (Mat. 2:16) Aneru ta ese Iosepa ia hadibaia dainai, Iosepa bona Maria ese Iesu idia abia bona Aigupito dekenai idia heau lao, bena unuseniai idia noho ela bona Heroda ia mase. Gabeai, Iosepa be Nasareta dekenai ena ruma bese ia abia lao. Dahaka dainai Betelehema dekenai idia giroa lou lasi? Badina unai negai Heroda ena natuna Akelao, be Iudea ia lohiaia bona ia be dagedage tauna. Danu aneru ese Iosepa dekenai do ia vara gauna ia hadibaia vadaeni, unai dainai ena ruma bese be Nasareta dekenai ia hakaua lao. Nasareta be gabu namona, unai amo Iosepa be Iesu do ia naria namonamo bona Iehova do ia tomadiho henia diba.​—Mat. 2:19-22; 13:55; Luka 2:39, 52.

To, Iesu be guba lao ena dala ia do kehoa lasi neganai, Iosepa ia mase. Unai dainai Iosepa be tanobada ai do ia toreisi lou. Momo ese ia do idia hedavari henia, bona Iesu ia vara murinai, ia bona Maria be Betelehema dekenai idia do noho ena badina haida do idia ura dibaia.