Armenia ai ia noho bapatiso lasi pablisa ta ladana Haykanush be nega ta ena ruma badinai passport ta ia davaria. Unai passport lalonai, banika kadi haida bona moni bada ia noho. Ia vara gauna be ena tau dekenai ia hadibaia, ia danu be bapatiso lasi pablisa.

Unai headava tau bona hahine be moni davaria dalanai idia hekwarahi bada, to edia lalona idia hadaia unai passport lalonai ia noho adres hegeregerena idia davaria moni be ena biaguna korikori dekenai idia abia lao totona. Unai moni ia haboioa tauna bona ena famili be idia hoa bada. Haykanush bona ena adavana ese unai famili idia hadibaia, idia be Baibel idia stadilaia dainai, kara momokani idia hahedinaraia. Haykanush bona ena tau idia mamia kara momokani idia hahedinaraia be gau badana, bona unai nega idia gaukaralaia Iehova ena Witnes taudia edia kara idia herevalaia bona pablikeisen haida idia rakatania be namo.

Unai famili idia ura Haykanush dekenai moni haida be ena kara momokani ena davana namona bamona idia henia, to unai ia abia dae lasi. Unai dina murinai, unai hahine ese Haykanush bona ena tau ia vadivadi henia bona ia hadibadia, ia bona ena famili edia tanikiu karana hahedinaraia totona, idia ura daimon rini ta be Haykanush dekenai idia hariharilaia.

Unai famili hegeregerena, taunimanima momo be Haykanush bona ena tau ese idia hahedinaraia karana dekenai do idia hoa. To, Iehova be unai kara dekenai do ia hoa, a? Iehova ese edia kara momokani be edena bamona do ia laloa? Edia kara momokani ese namo ia havaraia, a?

Unai henanadai edia haere be auka lasi. Ena badina be, Dirava idia hesiai henia taudia idia hamomokania Iehova ena matanai kara momokani dalana badinaia karana ese daimon, golo bona dava bada kohu ia hereaia. Oibe, Iehova ese mai anina bada gaudia bona anina lasi gaudia ia laloa dalana be taunimanima edia laloa dalana bamona lasi. (Isa. 55:8, 9) Bona ena hesiai taudia ese Iena kara idia hahedinaraia karana ese dava bada kohu ia hereaia.

Baibel ese laloa kehoa bona aonega edia namo ia herevalaia dalana ai do ita itaia diba. Aonega Herevadia 3:13-15 ia gwau: “Aonega ia davaria tauna be mai moale danu. Ia ese lalona kehoa ia davaria vadaeni. Badina be aonega ena namo ese, siliva ena namo ia hereaia, bona aonega ena davana ese, golo ena davana ia hereaia. Aonega ena davana ese, davana bada herahera nadi edia davana ia hereaia, bona oi ura henia gaudia ibounai edia huanai, ta ese aonega ia hereaia diba lasi.”

Vadaeni, kara momokani be dahaka?

Iehova sibona be kara momokani Diravana bona “ia koikoi diba lasi.” (Tito 1:2) Bona ia ese aposetolo Paulo ia hasiahua dainai Heberu Keristani taudia ginigunadia ia tore henia, ia gwau; “Ai totona do umui guriguri noho, badina ai diba emai lalomamina be ia goeva. Bona ai ura mai momokani ida gau ibounai ai karaia.”​—Heb. 13:18.

Kara momokani dekenai, Iesu Keriso be haheitalai namona. Mani unai nega ita laloa, Hahelagaia tauna badana Kaiapa be Iesu ia nanadaia neganai, inai bamona ia gwau: “Oi lau oda henia, mauri Diravana ena ladanai hereva momokani do oi gwauraia bona ai oi hamaoroa bema oi be Keriso, Dirava ena Natuna!” Iesu be mai momokani ida sibona ia gwauraia hedinarai ia be Mesia, ena be Sanhedrin taudia ese idia gwauraia diba ia be koikoi tauna bona do idia hamasea.​—Mat. 26:63-67.

Ita be edena bamona? Bema kohu abia totona hereva ta idia giroa o mogea, dahaka do ita karaia?

Momokani, taunimanima idia hekwarahi kara momokani idia hahedinaraia totona, badina inai dina gabediai lalonai taunimanima be “sibodia do idia laloa bada, moni do idia ura henia bada.” (2 Tim. 3:2) Moni ena hekwakwanai o moni  gaukara gabuna ai lalotamona lasi karana ese kara momokani karana ia tohoa diba. Taunimanima momo idia laloa henaohenao o kara koikoi karadia be kerere lasi. Unai kara be ia bada ia lao noho, badina taunimanima be kohu abia totona unai kara lalonai idia vareai neganai, kara momokani idia laloa bada lasi. Keristani taudia haida danu be abia hidi kereredia idia karaia dainai ‘koikoi dalanai’ kohu abia totona unai kara lalonai idia vareai, bena kongrigeisen lalonai haheitalai dikana ai idia lao.​—1 Tim. 3:8; Tito 1:7.

To Keristani taudia momo be Iesu idia tohotohoa. Idia laloparara Dirava ena kara ese moni bona kohu idia hereaia. Ma danu namona be Keristani matamata taudia be sikuli gabuna ai maka badadia abia totona idia koikoi lasi. (Aon. 20:23) Oibe, Haykanush bamona, kara momokani hahedinaraia karana ese nega momo harihari gaudia do ia mailaia lasi. To kara momokani ita karaia badina Dirava ese unai kara ia moalelaia, bona unai ese ita ia durua lalomamina goevana ita abia totona, bona unai be mai anina bada.

Gägikʹ ena haheitalai ese unai ia hahedinaraia goevagoeva. Ia gwau: “Keristani tauna ai lau do lao lasi neganai, kampani badana ta ai lau gaukara. Unai kampani ena biaguna be kampani ena takisi davana ia karaia namonamo diba lasi. Lau be ena henunai lau gaukara dainai, nega momo, takisi ofesi ai ia gaukara tauna be moni amo do lau bribe bena emai koikoi dalana o takisi henia namonamo lasi karana do ia laloa bada lasi. Unai dainai egu mauri lalonai koikoi karana lau manadalaia. To, hereva momokani lau dibaia neganai, unai kara lau rakatania momokani herevana egu pei be bada. Gabeai, sibona egu bisinesi lau hamatamaia. Bona dina ginigunana amo egu bisinesi lau rejista bona takisi ena davana lau karaia namonamo.”​—2 Kor. 8:21.

Gagik ia gwau: “Egu pei be ia diho momokani, unai dainai egu ruma bese naria totona, lau hekwarahi sisina. To, hari lau moale. Badina Iehova ena vairanai egu lalomamina be ia goeva. Egu natudia rua dekenai, lau be haheitalaia namona bona kongrigeisen ena maduna haida lau huaia danu. Hari, takisi idia naria taudia bona bisinesi ai karaia hebou taudia dekenai, lau be kara momokani hahedinaraia tauna.”

Iehova ese ena hadibaia dalana idia moalelaia bona ena kara hereadaedia​—kara momokani danu​—idia hahedinaraia taudia ia lalonamo henidia. (Tito 2:10) Ia ese King Davida ia hagoadaia inai hereva ia torea totona, ia gwau: “Gunaguna lau be mero, harihari lau be buruka, to nega ta kara maoromaoro tauna ta be Dirava ese ia rakatania, a? Lasi momokani, nega ta lau itaia lasi. Bona tau namona ena natuna be nega ta idia hitolo, a? O iena natuna ese aniani totona taunimanima idia noia, a? Lasi, nega ta lau itaia lasi. Lasi momokani.”​—Sal. 37:25.

Abidadama hahinena Ruta ena haheitalaia ese unai ia hahedinaraia danu. Ia ura ena ravana burukana Naomi ida ia lao, badina ia ura lasi ia do ia rakatania. Ruta be Israela dekenai ia lao badina ia ura unuseni Dirava momokanina ia tomadiho henia. (Ruta 1:16, 17) Israela ai, Ruta be ia kara momokani bona ia gaukara goada, Taravatu hegeregerena witi be dala maorona ai ia gogoa. Davida ese gabeai ena mauri ai ia davaria gaudia ese idia hahedinaraia, Iehova ese Ruta bona Naomi edia dabu gaudia ia henia. (Ruta 2:2-18) Momokani, Iehova ese tauanina dalanai Ruta ia durua sibona lasi, to hahenamo ma haida ia henia danu. Iehova ese ia abia hidi King Davida bona gwauhamata Mesiana edia tubuna ai do ia lao.​—Ruta 4:13-17; Mat. 1:5, 16.

Iehova ena hesiai taudia haida ese unai idia davaria, edia ruma bese naria totona idia hekwarahi danu. To, idia be ia auka lasi bona kara koikoi dalana idia abia hidi lasi, to idia gaukara goada bona edia moni gaukara idia karaia namonamo.  Edia gaukara goada karana amo idia hahedinaraia, Dirava ena kara hereadaedia idia laloa bada, bona unai be kara momokani, moni bona kohu ia hereaia gauna.​—Aon. 12:24; Efe. 4:28.

Ruta bamona, tanobada hegegemadai Keristani taudia ese edia abidadama amo idia hahedinaraia Iehova ese ena siahu amo ita ia durua diba. Idia ese inai gwauhamata herevana, Baibel ai noho herevana unai idia abidadama henia momokani. Ia gwau: “Lau ese umui do lau negea lasi, bona umui do lau rakatania lasi momokani.” (Heb. 13:5) Iehova ese unai siri ai, nega rua ia hahedinaraia ia ese kara momokani bona idia dabu taudia be nega ibounai do ia durudia. Ia ese idia dabu taudia edia ura gauna do ia henia gwauhamata herevana ia hagugurua.​—Mat. 6:33.

Oibe, taunimanima ese dava bada gaudia bona daimon edia davana idia gwauraia diba. To, do ita abia dae momokani iseda guba Tamana ena matanai, kara momokani bona ena kara ma haida ita hahedinaraia karana ese dava bada nadi bona daimon ia hereaia momokani!