1-3. (a) Salamo 147 be reana edena nega ai idia torea? (b) Salamo 147 stadilaia karana amo dahaka ita dibaia?

BEMA ta be oi henia gaukarana ia karaia namonamo o Keristani kara namona ta ia hahedinaraia, ia oi hanamoa be namo. Momokani, bema taunimanima ita hanamoa, Iehova Dirava danu ita hanamoa be namo! Ia ita hanamoa diba badina iena siahu be bada herea, ia havaraia gaudia amo unai ita itaia. Danu, ia ita hanamoa badina ia ese taunimanima ia kara namo henia, unai be iena Natuna ena mauri davalaia boubou henia karana amo ia hahedinaraia.

² Salamo 147 ia torea tauna ese Iehova ia hanamoa. Ma haida ia hagoadaia danu Dirava idia hanamoa totona.​—⁠Salamo 147:1, 7, 12 duahia. *

³ Ita diba lasi daika ese unai salamo ia torea, to ita diba gauna be Iehova ese Babulonia ena igui amo Israela taudia ia ruhaia bona Ierusalema dekenai idia giroa lou neganai, salamo  torea tauna be ia noho. (Sal. 147:2) Dirava ena taunimanima be tomadiho momokani ia noho gabuna dekenai idia giroa lou dainai, salamo torea tauna ese Iehova ia hanamoa. To, badina ma haida dainai unai ia karaia danu. Unai badina haida be dahaka? Dahaka dainai emu mauri ai Iehova oi hanamoa be namo?

4. King Kurese ese Israela taudia ia ruhaia neganai, edia hemami be edena bamona, bona dahaka dainai?

⁴ Israela taudia be Babulonia ena igui henunai idia noho negana mani oi laloa. Babulonia taudia ese idia oda henidia, idia gwau: “Siona ena ane ta do umui abia.” To unai nega ai Ierusalema, Iehova dekenai idia moale ena badina badana, be idia hadikaia vadaeni. (Sal. 137:1-3, 6) Unai dainai Iuda taudia be idia ura lasi ane. Edia kudouna be ia makohia, bona ta ese idia ia hagoadaia be namo. To, Dirava ena peroveta hereva hegeregerena, Parasa ena king, Kurese, ese idia ia ruhaia. Ia ese Babulonia ia halusia bona ia gwau: “Lohiabada . . . ese lau dekenai ia oda henia vadaeni, iena Dubu ta, Ierusalema dekenai do lau haginia . . . Umui emui huanai idia noho, Lohiabada ena bese taudia ibounai, be edia tano korikori dekenai do idia giroa lou, bona Lohiabada, edia Dirava, be idia danu do ia noho.” (2 Siv. 36:23) Unai ia vara dainai, Babulonia ai idia noho Israela taudia be idia moale bada!

5. Salamo torea tauna ese Iehova ena hanamoa siahuna be edena bamona ia herevalaia?

⁵ Iehova ese Israela besena be orea ta hegeregerena ia hagoadaia sibona lasi, to idia ta ta ia hagoadaia danu. Hari danu be unai bamona. Salamo torea tauna ese Dirava ia herevalaia, ia gwau: “Edia kudoudia idia makohia taudia, be Lohiabada ese ia hagoadaia lou noho, bona edia bero ia kumia noho.” (Sal. 147:3) Oibe, ita gorere o lalometau neganai, namona be ita abia dae momokani Iehova be ita ia laloa bada. Iehova ia ura dikadika ita ia hagoadaia bona iseda lalohisihisi ia hamaragia. (Sal. 34:18; Isa. 57:15) Ita dekenai aonega bona goada ia henia, unai amo ita davaria hekwakwanai ita haheaukalaidia diba.​—⁠Iam. 1:5.

6. Salamo 147:4 ena hereva ese edena bamona ita ia durua diba? (Laulau ginigunana herevalaia.)

⁶ Gabeai salamo torea tauna ese guba ia itaia, bona ia gwau Iehova ese “hisiu edia namba ia gwauraia vadaeni, bona ia ese idia ibounai edia ladana ia atoa.” (Sal. 147:4) Dahaka dainai ia ese guba gaudia ia herevalaia? Mani oi laloa: Salamo torea tauna ese ena matana amo hisiu ia itadia, to edia namba ia diba lasi. Lagani idia hanaia noho lalonai, ita itaia hisiu be idia momo idia lao. Haida idia laloa iseda Milky Way galaksi lalonai hisiu bilioni momo idia noho. Bona iunives lalonai galaksi trilioni momo idia noho! Momokani, ita ese hisiu ita duahidia diba lasi! To Havaraia Tauna ese idia ta ta dekenai ladana ia henia. Unai ese ia hahedinaraia Iehova be hisiu ta ta ia laloa bada. (1 Kor. 15:41) To tanobada ai ia havaraia taudia be edena bamona? Hisiu ta ta idia noho gabuna ia diba namonamo Diravana be ita ta ta ia diba danu​—⁠ita noho gabuna, iseda hemami, bona ita ura henia gaudia ia diba!

7, 8. (a) Iehova be ita dekenai dahaka ia lalopararalaia? (b) Edena dala ai Iehova ese goevadae lasi taudia dekenai hebogahisi ia hahedinaraia?

⁷ Iehova be oi ia laloa bada sibona lasi, to ia be mai ena siahu bona ia be hebogahisi Diravana dainai, ia ura ita ta ta ia durua iseda hekwakwanai ita haheaukalaia totona. (Salamo 147:5 duahia.) Reana do oi mamia oi davaria hekwakwanai be bada herea bona oi huaia diba lasi. To Dirava be iseda goada ena hetoana ia diba. Oibe, ia diba “ita be  kahu sibona.” (Sal. 103:14) Ita be goevadae lasi dainai, nega ibounai ita kerere. Reana hereva kererena ita gwauraia, ura kereredia ita mamia loulou, eiava ma haida edia gau dainai ita mama! To Iehova be unai bamona lasi, ia be iseda hemami ia lalopararalaia, badina “iena diba be ta ese do ia davaria diba lasi.”​—⁠Isa. 40:28.

⁸ Reana hahetoho ta oi davaria neganai, Iehova ese ena imana goadana amo oi ia durua dalana oi mamia vadaeni. (Isa. 41:10, 13) Hegeregere, painia taihu ta, Kyoko, be ena asainmen matamata dekenai ia lao murinai, ia lalohisihisi bada. Iehova ese edena dala ai ia hahedinaraia ia be unai taihu ena hekwakwanai ia lalopararalaia? Taihu ena kongrigeisen matamata ai, tadikaka taihu momo be ena hemami idia lalopararalaia. Ia mamia Iehova be ia dekenai ia gwau: “Oi lau lalokau henia, oi be painia gaukara oi karaia dainai lasi, to badina oi be egu natuna kekeni bona emu mauri be lau dekenai oi gwauhamatalaia. Oi be Witnes taihuna dainai, lau ura oi ese emu mauri oi moalelaia!” Siahu Ibounai Diravana ese edena bamona ia hahedinaraia “iena aonega be mai ena hetoana lasi”?

9, 10. Edena dala badana ai Iehova ese ita ia durua diba? Haheitalai gwauraia.

⁹ Reana tauanina dalanai oi be gau haida dekenai oi dabu. Hegeregere, oi lalohekwarahi badina emu aniani be bada lasi. To Iehova ese tanobada ia karaia dalana amo ita ibounai be aniani ita abia diba, galo manudia danu! (Salamo 147:8, 9 duahia.) Bema Iehova ese nega ibounai galo manudia ia ubua, namona be oi abia dae momokani ia ese emu dabu gaudia do ia henia.​—Sal. 37:25.

¹⁰ Mai anina bada gauna be inai, Iehova ese ita dekenai iseda abidadama idia hagoadaia gaudia ia henia. Oibe, ita dekenai “Dirava ena maino, laloparara ibounai ia hereaia gauna” ia henia. (Fili. 4:6, 7) Hegeregere, Mutsuo bona ena hahine mani ita laloa. Lagani 2011 ai Japan dekenai sunami ia vara murinai, Iehova ese idia ia hagoadaia bada. Unai nega ai idia be edia ruma ena guhi dekenai idia daekau, bona dala lasi idia heau mauri totona. Unai dina ai idia ese edia kohu ibounai idia haboioa. Hanuaboi ai, idia be edia ruma ena stori iharuana ena daiutu ta ai idia noho, gabu be ia dibura bona keru bada. Daba ia rere neganai, idia do ia hagoadaia gauna ta idia tahua. Idia davaria buka tamona be 2006 Yearbook of Jehovah’s Witnesses. Mutsuo be rau ia kehodia noho lalonai, inai hereva kwarana “The Deadliest Tsunamis Ever Recorded” ia itaia. Unai kahana ese ia hahedinaraia, lagani 2004 ai Sumatra dekenai tano mareremarere bada ia vara bona sunami ese gabu momo ia hadikaia. Mutsuo bona ena hahine be mai taitai ida unai ekspiriens idia duahia. Idia mamia Iehova ese unai nega ai idia ia hagoadaia momokani. Iehova ese tauanina dalanai idia ia durua danu. Oibe, edia tadikaka taihu ese idia dekenai aniani bona dabua idia henia. To Dirava ena orea edia gwaukau taudia be edia kongrigeisen idia vadivadi henia neganai, goada bada idia abia. Mutsuo ia gwau: “Lau mamia Iehova be ai ta ta badinai ia noho bona ai ia naria. Unai ese ai ia hagoadaia bada!” Iehova ese ita ia durua dalana badana be iseda abidadama idia hagoadaia gaudia ia henia, to tauanina durua gaudia ia henia danu.

11. Iehova ena heduru amo namo ita abia totona, dahaka ita karaia be namo?

¹¹ Iehova be nega ibounai ia noho hegaegae “manau taudia ia abia isi” bona durua totona. (Sal. 147:6) Vadaeni edena dala ai iena heduru amo namo ita abia diba? Namona be iseda hetura karana ia ida be ia goada.  Unai ia vara totona, namona be ita manau. (Sep. 2:3) Manau taudia be Dirava dekenai idia tabekau, ia ese kara gageva ia hamaoromaoroa bona edia hisihisi ia haorea. Iehova ese unai bamona taudia ia lalonamo henidia.

12, 13. (a) Iehova ena heduru amo namo ita abia totona, dahaka ita inai henia be namo? (b) Iehova be daidia dekenai ia moale?

¹² “To kara dika taudia be tano dekenai ia negedia diho noho.” (Sal. 147:6) Ita ura lasi ita dekenai unai ia vara! Iehova ena noho hanaihanai lalokauna amo namo ita abia bona iena badu be ita latanai ia diho lasi totona, namona be kara dika ita inai henia. (Sal. 97:10) Hegeregere, matabodaga karadia do ita inai henia. Anina be iseda lalona idia veria diba gaudia ita dadaraia, hegeregere ponografi. (Sal. 119:37; Mat. 5:28) Nega haida unai be auka, to bema ita hekwarahi, Iehova ese ita do ia hanamoa.

¹³ To ita sibona eda goada amo unai ita karaia diba lasi, namona be Iehova dekenai ita tabekau. Bema ita sibona eda goada dekenai ita tabekau eiava taunimanima edia heduru ita tahua, Iehova be do ia moale, a? Lasi! Momokani, “hosi ena goada be Dirava ese ia moalelaia lasi, bona tau ena aena danu ia moalelaia lasi.” (Sal. 147:10) To namona be Iehova ita guriguri henia, bona iena heduru ita noia goadagoada. Sisiba henia taudia be do idia hesiku, to ia be do ia hesiku lasi, herevana heduru totona ia ita noia loulou. Baibel ia gwau: “Lohiabada ese, ia dekenai idia gari henia taudia ia moalelaia noho. Iena noho hanaihanai lalokauna dainai, ia idia abidadama henia taudia, be Lohiabada ese ia moalelaia noho.” (Sal. 147:11) Ita diba momokani iena noho hanaihanai lalokauna dainai, ia ese ita do ia durua ura kereredia ita dadaraia totona.

14. Dahaka ese salamo torea tauna ia hagoadaia?

¹⁴ Ita abia dae momokani Iehova ese ena taunimanima do ia durua bema hekwakwanai idia davaria. Israela taudia be Ierusalema dekenai idia giroa lou neganai, salamo torea tauna be Iehova ese idia ia durua daladia ia laloa lou. Ia gwau: “Ia ese Ierusalema ena magu iduara auridia ia hagoadaia noho, bona ia ese Ierusalema idia noho taudia ia hanamoa noho. Emui tano hetoadia dekenai Dirava ese maino ia karaia noho.” (Sal. 147:13, 14) Salamo torea tauna be goada ia abia, badina ia diba Dirava ese Ierusalema ena magu ena iduara do ia hagoadaia, iena taunimanima ia gimaia totona!

15-17. (a) Iseda hekwakwanai be edena bamona ita lalodia diba, bona Iehova ese ena Hereva amo edena dala ai ita ia durua? (b) Dirava ena “hereva gauna be idia karaia haraga” dalana mani oi haheitalaia.

¹⁵ Reana oi davaria hekwakwanai ta dainai oi lalohekwarahi. Iehova ese aonega ia henia diba, unai hekwakwanai oi haheaukalaia totona. Salamo torea tauna ia gwau Dirava ese “tanobada dekenai oda ia siaia lao, bona iena hereva gauna be idia karaia haraga noho.” Bena ia gwau Iehova ese ‘sinou ia siaia, aisi ia negea, bona aisi nadi bamona gauna’ ia siaia diho, bena ia henanadai: “Iena lai ena keru dekenai daika ia gini diba?” Ma ia gwau, Iehova ese “iena oda hereva ia siaia, vadaeni aisi ia veve noho.” (Sal. 147:15-18) Aonega bona siahu ibounai Diravana, aisi nadi bona sinou ia biagua Diravana unai, ese oi do ia durua oi davaria hekwakwanai oi haheaukalaia totona.

¹⁶ Hari inai negai, Iehova ese ena Hereva, Baibel, amo ita ia hakaua. Bona “iena hereva gauna be idia karaia haraga noho,” anina be hekwakwanai negadiai ia noho hegaegae iseda abidadama ia hagoadaia totona. Baibel duahiduahi, “igui hesiai tauna mai ena kamonai bona mai ena kara maoromaoro” ese idia halasia pablikeisen idauidau stadilaia, JW Broadcasting oi itaia, jw.org oi sekea, elda taudia ida oi herevahereva, bona  tadikaka taihu bamoa karana amo oi davaria namo mani oi laloa. (Mat. 24:45) Emu mauri ai oi mamia Iehova be ia haraga oi ia durua totona, a?

¹⁷ Simone ese Dirava ena Hereva ena heduru ia mamia danu. Ia mamia ia be anina lasi, bona ia laloa Dirava ese ia do ia lalonamo henia lasi. To lalomanoka negadiai, guriguri karana ia hadokoa lasi, ia ese Iehova ia noia ia do ia durua totona. Danu, Baibel stadilaia karana ia hadokoa lasi. Ia gwau: “Nega ibounai Iehova ena siahu bona ena heduru lau mamia.” Unai ese ia durua lalohadai maorona ia abia totona.

18. Dahaka dainai oi mamia Dirava ese oi ia lalonamo henia, bona dahaka dainai ia oi hanamoa be namo?

¹⁸ Salamo torea tauna ia diba Dirava ese Israela besena ia lalonamo henia. Dirava ese unai bese sibona dekenai ena “hereva” bona ‘taravatu bona oda’ ia henia. (Salamo 147:19, 20 duahia.) Hari ita moale, badina ita sibona be Dirava ena ladana ita abia. Danu, ita moale badina Iehova ita dibaia, iena Hereva ese ita ia hakaua, bona ia ita tura henia diba. Salamo 147 ia torea tauna bamona, ita be badina momo dainai Iehova ita hanamoa diba bona ma haida ita hagoadaia danu unai idia karaia totona.