1-3. Dahaka gaudia haida dainai ita tai?

 EDENA nega ai oi tai? Nega haida, ita moale dainai ita tai. To nega momo ita lalohisihisi dainai ita tai. Hegeregere, iseda lalokau tauna ta ia mase neganai ita tai. United States ai, taihu ta Lorilei, ia gwau: “Egu natuna kekeni ena mase lau laloa negadia ai lau lalohisihisi bada, bona toana be gau ta ese lau ia hagoadaia diba lasi. Lau mamia egu lalohisihisi ia ore diba lasi.” *

² Badina ma haida dainai ita tai. Japan ai painia taihu ta, Hiromi, ia gwau: “Nega haida lau lalohisihisi badina lau haroro henia taudia idia ura lasi Baibel ena hereva idia kamonai. Nega haida mai mata ranu ida Iehova lau noia, lau ia durua kudou maoro tauna ta lau davaria totona.”

³ Nega haida emu hemami be ataiai ita herevalaia taihudia hegeregerena, a? Oibe. (1 Pet. 5:9) Ita ura ‘mai moale ida Iehova ita hesiai henia,’ to nega haida ita tai badina eda lalokau tauna ia mase, ita lalomanoka, eiava hekwakwanai ta dainai ia auka Dirava ita badinaia noho totona. (Sal. 6:6; 100:2) Unai hemami ita abia neganai, dahaka ita karaia be namo?

4. Inai atikol ai dahaka do ita herevalaia?

⁴ Iesu ena haheitalai amo gau haida ita dibaia. Nega haida, gau haida dainai Iesu ia hebogahisi bona “ia tai.” (Ioa. 11:35; Luka 19:41; 22:44; Heb. 5:7) Mani unai gaudia haida ita herevalaia. Unai amo, Iesu bona ena Tamana, Iehova, dekenai gau haida do ita dibaia. Danu gau haida dainai ita tai neganai ita karaia diba gaudia do ita herevalaia.

5. Ioane 11:32-36 ai ia noho sivarai amo Iesu dekenai dahaka ita dibaia?

⁵ Lagani 32 C.E. ai, Iesu ena turana namona Lasaro ia gorere bona ia mase. (Ioa. 11:3, 14) Lasaro ena taihuna be rua, Maria bona Mareta, bona Iesu ese unai famili ia lalokau henia bada. Unai hahine rua be edia tadikakana ia mase dainai idia lalohisihisi bada. Lasaro ia mase murinai, Iesu be Betania dekenai ia lao, unuseniai Maria bona Mareta idia noho. Mareta ia kamonai Iesu ia mai neganai, karaharaga ia lao Iesu ia hedavari henia totona. Mareta ese inai hereva ia gwauraia neganai, mani ena lalohisihisi oi laloa, ia gwau: “Lohiabada e, bema oi be iniseniai oi noho, egu taihuna be do ia mase lasi.” (Ioa. 11:21) Nega sisina murinai Iesu ia itaia Maria bona ma haida idia taitai neganai, “ia tai.”​—Ioane 11:32-36 duahia.

6. Dahaka dainai unai nega ai Iesu ia tai?

⁶ Dahaka dainai unai nega ai Iesu ia tai? Insight on the Scriptures ia gwau: “Iesu ena turana Lasaro ena mase bona Lasaro ena taihuna rua edia taitai karana dainai, ‘edia hisihisi ia mamia bona ia tai.’” * Iesu be iena turana namona Lasaro ia gorere negana ai ia abia hisihisi ia laloa noho, bona Lasaro ia diba kahirakahira do ia mase dainai ia abia hemami ia laloa danu. Danu, Iesu ia tai badina ia itaia Maria bona Mareta be edia taihuna ena mase dainai idia lalohisihisi bada. Bema emu tura namona eiava famili tauna ta ia mase vadaeni, oi danu be unai bamona hemami oi abia. Mase ia vara neganai do ita dibaia gaudia toi ita herevalaia.

7. Iesu be ena turadia totona ia tai karana amo Iehova dekenai dahaka ita dibaia?

⁷ Iehova ese emu hemami ia lalopararalaia. Iesu be ena Tamana ena “toana hegeregerena,” eiava Tamana ena kara ia tohotohoa. (Heb. 1:3) Iesu ia tai neganai, ia ese ena Tamana ena hemami ia hahedinaraia. (Ioa. 14:9) Bema emu lalokau tauna ta ia mase, namona be oi diba Iehova be emu hisihisi ia itaia  sibona lasi to ia hebogahisi danu. Ia ura emu hisihisi ia hanamoa.​—Sal. 34:18; 147:3.

8. Dahaka dainai ita diba momokani Iesu ese iseda lalokau mase taudia do ia hatorea isi lou?

⁸ Iesu ia ura emu lalokau taudia ia hatorea isi lou. Iesu ia tai murinai, Mareta ia hamaoroa: “Emu taihuna do ia toreisi lou.” Mareta be Iesu ena hereva ia abia dae. (Ioa. 11:23-27) Mareta be Iehova ia tomadiho henia hahinena dainai, ia diba peroveta taudia Elia bona Elisaia ese guna mase taudia idia hatorea isi lou. (1 Ki. 17:17-24; 2 Ki. 4:32-37) Bona Iesu ese mase taudia ia hatorea isi lou ena sivarai ia kamonai danu. (Luka 7:11-15; 8:41, 42, 49-56) Namona be oi diba momokani, oi danu be emu lalokau mase taudia do oi itaia lou. Iesu be ena turadia idia lalohisihisi dainai idia ia hagoadaia bona ia tai karana amo dahaka ita dibaia? Ita diba Iesu ia ura bada mase taudia ia hatorea isi lou!

9. Edena dala ai idia taitai taudia oi durua diba Iesu hegeregerena? Haheitalai gwauraia.

⁹ Idia taitai taudia oi hagoadaia. Iesu be Mareta bona Maria ida ia taitai sibona lasi, to edia hereva ia kamonai bona hagoadaia. Idia taitai taudia dekenai unai bamona ita karaia danu. Australia ai ia noho elda ta, Dan, ia gwau: “Egu adavana ia mase murinai, lau ura haida ese lau idia durua. Headava tadikaka taihu momo be hanaihanai idia noho hegaegae lau idia kamonai henia totona. Bona egu lalohisihisi herevadia lau gwauraia bona lau taitai neganai, lau idia koua lasi. Lau hegeregere lasi gaukara ta lau karaia neganai, idia ese lau idia durua, hegeregere egu motuka idia huria, sitoa ai aniani idia hoia, bona idia nanadu. Bona nega momo lau ida idia guriguri. Idia hamomokania ‘hekwakwanai negadia ai’ idia be tura korikoridia bona egu tadikaka.”​—Aon. 17:17.

10. Luka 19:36-40 ai idia vara gaudia herevalaia.

¹⁰ Iesu be Nisan 9, 33 C.E. dekenai Ierusalema ai ia ginidae. Siti kahirakahira ia lao noho laloa, hutuma be Iesu ia mai dalana dekenai edia dabua idia atoa, unai amo idia abia dae ia be edia King. Unai be moale negana. (Luka 19:36-40 duahia.) Unai dainai Iesu ena hahediba taudia be reana gabeai do ia vara gauna dekenai idia hoa. “[Iesu be] Ierusalema kahirakahira ia lao neganai, siti ia itaia bona ia tai.” Iesu be mai mata ranu ida, Ierusalema ai idia noho taudia dekenai kahirakahira do idia vara dika ia perovetalaia.​—Luka 19:41-44.

11. Dahaka dainai Iesu be Ierusalema ai idia noho taudia totona ia tai?

¹¹ Iesu ia lalohisihisi badina ia diba Iuda taudia momo be Basileia ena sivarai do idia dadaraia. Unai dainai, haida ese Ierusalema siti do idia hadikaia bona idia abia mauri Iuda taudia be igui hesiai taudia ai do idia halaoa. (Luka 21:20-24) Madi, Iesu ena hereva hegeregerena, momo be ia idia dadaraia. Emu noho gabuna ai momo be Basileia sivaraina idia kamonai, a? Bema haida idia ura hereva momokani dibaia, Iesu ia tai karana amo dahaka do oi dibaia? Hari gau toi ma do ita herevalaia.

12. Iesu be ena dekena taudia dainai ia tai karana amo Iehova dekenai dahaka ita dibaia?

¹² Iehova be taunimanima ia laloa bada. Iesu ia tai karana amo ita diba Iehova be taunimanima ia laloa bada. “Ia ura lasi tau ta ia mase, to ia ura taunimanima ibounai be do idia helalo-kerehai.” (2 Pet. 3:9) Hari, ita be hanaihanai taunimanima ita durua Basileia ena sivarai namona idia diba totona, unai amo ita hahedinaraia idia ita lalokau henia.​—Mat. 22:39. *

13-14. Edena dala ai Iesu be taunimanima ia hebogahisi henia, bona edena dala ai unai kara ita hahedinaraia?

 ¹³ Iesu be haroro gaukara ia karaia goadagoada. Ia be dala idauidau ai taunimanima ia haroro henia, unai amo ia hahedinaraia idia ia lalokau henia. (Luka 19:47, 48) Dahaka dainai Iesu be unai bamona ia karaia? Badina idia ia hebogahisi henia. Nega momo, taunimanima idia ura Iesu ena hereva idia kamonai, unai dainai ia bona hahediba taudia be idia “aniani diba lasi.” (Mar. 3:20) Bona hanuaboi ai tau ta ia ura Iesu ia hereva henia neganai, ia be mai ura ida unai tau ia haroro henia. (Ioa. 3:1, 2) Iesu ese ia haroro henia taudia momo be iena hahediba taudia ai idia lao lasi. To ia ese taunimanima ibounai dekenai sivarai namona ia harorolaia. Hari inai negai, ita ura taunimanima ibounai dekenai sivarai namona ita harorolaia. (Kara 10:42) Unai bamona ita karaia totona, namona be eda haroro negadia ita haidaua.

¹⁴ Haroro negadia ita haidaua. Bema hanaihanai taim tamona dekenai ita haroro, reana sivarai namona idia ura kamonai taudia momo do ita davaria lasi. Painia ta ladana Matilda ia gwau: “Lau bona egu adavana be nega idauidau ai taunimanima ai haroro henia. Daba momokani ai, bisinesi gabudia dekenai ai haroro. Dina tubu ai, momo idia loaloa neganai troli haroro ai karaia. Adorahi ai, momo be edia ruma dekenai ai davaria.” Namo lasi iseda haroro sediual sibona ita badinaia, to taunimanima ita davaria negadia ai, ita haroro diba. Bema unai bamona ita karaia, ita diba Iehova do ia moale.

15. Luka 22:39-44 ena sivarai bamona, Iesu ena hanuaboi ginigabena ai dahaka ia vara?

¹⁵ Nisan 14, 33 C.E. ena adorahi momokani ai, Iesu be Getesemane umana dekenai ia lao. Unuseniai Iehova dekenai ena lalohisihisi ibounai ia gwauraia. (Luka 22:39-44 itaia.) Unai nega aukana lalonai, Iesu “ia noinoi goadagoada, mai taitai bona mai mata ranu ida.” (Heb. 5:7) Iesu do ia mase hanuaboina ai, dahaka totona ia guriguri? Ia be goada abia totona ia guriguri, unai amo Iehova do ia badinaia bona Iena ura do ia karaia.  Iehova ese ena Natuna ena guriguri ia kamonai bona aneru ia siaia ia hagoadaia totona.

16. Iesu be Getesemane umana ai ia guriguri neganai, dahaka dainai ia lalohisihisi bada?

¹⁶ Getesemane umana ai Iesu be mai taitai ida ia guriguri noho, badina ia lalohisihisi bada taunimanima ese ia be Dirava ena ladana hadikaia tauna bamona do idia laloa. Ia diba iena Tamana ia badinaia bona ena ladana ia hahelagaia be mai anina bada. Bema hekwakwanai badana ta oi davaria bona unai ese Iehova badinaia karana ia tohoa, Iesu ena mata ranu amo dahaka oi dibaia? Gau toi ma do ita herevalaia.

17. Iesu ena noinoi ia haerelaia karana amo Iehova dekenai dahaka ita dibaia?

¹⁷ Iehova be emu noinoi ia kamonai. Iehova be Iesu ena noinoi goadagoada karana ia kamonai. Dahaka dainai? Badina Iesu ese ia laloa bada gauna be, ena Tamana do ia badinaia bona Iena ladana do ia hahelagaia. Bema Iehova ita badinaia bona Iena ladana hahelagaia karana ita laloa bada, heduru totona ita gwauraia guriguri do ia haerelaia.​—Sal. 145:18, 19.

18. Edena dala ai Iesu be hebogahisi bona laloparara turana?

¹⁸ Iesu ese emu hemami ia lalopararalaia. Ita lalometau neganai, turana namona ta ese iseda hemami ia lalopararalaia dainai ita moale, ia be ita davaria hekwakwanai ia davaria danu. Iesu be unai turana namona. Bona ia ese ta ena goada ia ore bona heduru ia ura neganai, unai hemami ia diba. Ia be iseda manoka gaudia ia lalopararalaia, bona ia ura “nega maorona ai” heduru do ita abia. (Heb. 4:15, 16) Getesemane umana ai Iesu be aneru ena heduru ia abia dae hegeregerena, namona be mai ura ida Iehova ese ia henia heduru daladia ita abia dae, unai be pablikeisen, vidio, tok, eiava elda o lo turana ta ena vadivadi karana amo ita abia.

19. Hekwakwanai ta dainai emu Dirava badinaia karana ia tohoa neganai, edena dala ai goada do oi abia? Haheitalai gwauraia.

¹⁹ Iehova be oi dekenai “ena maino” do ia henia. Edena dala ai Iehova ese ita ia hagoadaia? Ita guriguri neganai, ita ese “Dirava ena maino, laloparara ibounai ia hereaia gauna” do ita abia. (Fili. 4:6, 7) Iehova ese ia henia  maino ese iseda lalona ia hanamoa bona ita ia durua ita laloa namonamo totona. Taihu ta, Lusi, be unai ia hamomokania. Ia gwau: “Nega momo lau mamia lau be sibona lau noho. Unai dainai nega haida lau laloa Iehova be lau ia lalokau henia lasi. To unai lalohadai lau abia neganai, karaharaga Iehova dekenai egu hemami lau gwauraia. Guriguri karana ese egu hemami ia hanamoa.” Taihu ena ekspiriens amo ia hahedinaraia, guriguri karana amo maino ita abia diba.

20. Iesu ia tai karana amo dahaka ita dibaia?

²⁰ Iesu ia tai karana ese ita dekenai goada ia henia bona gau haida ita dibaia! Namona be ita laloatao iseda turadia idia hisihisi neganai idia ita durua, bona iseda lalokau tauna ta ia mase neganai ita abia dae Iehova bona Iesu be ita do idia durua. Iehova Dirava bona Iesu Keriso be hebogahisi karana idia hahedinaraia, bona edia kara ita tohotohoa dainai haroro bona hadibaia gaukarana ita karaia. Bona lalogoada ita abia, badina Iehova bona ena Natuna lalokauna be iseda hemami idia lalopararalaia, iseda manoka gaudia idia diba, bona idia ura ita idia durua ita haheauka totona. Namona be ita dibaia gaudia ita badinaia noho ela bona Iehova ena gwauhamata namodia do ia hagugurua, unai nega ai “ia ese mata ranu ibounai be [iseda] matana amo do ia dahua ore”!​—Apok. 21:4.