JERUSALEM ena Bible Lands Museum dekenai nadi ta mai ena hereva ia noho, ia be lagani 700-600 B.C.E. bamona ai idia koroa. Unai nadi be Israela ai Heberona kahirakahira ia noho guria gabuna ena nadi matuna lalonai idia davaria. Unai toretore ia gwau: “Yahweh Sabaot ese Hagav ena natuna mero, Hagaf dekenai dika bada do ia mailaia.” Edena dala ai unai hereva ese Baibel ena hereva ia hamomokania? Ia hahedinaraia Baibel negadiai, Dirava ena ladana Iehova, Heberu leta YHWH ai idia torea be momo ese idia diba, bona dina ta ta lalonai idia gaukaralaia. Oibe, unai guria gabuna lalonai idia koroa toretore haida ese idia hahedinaraia haida be unuseniai idia hebou bona hunia neganai, haba dekenai sibona edia ladana idia torea, bona edia ladana lalonai Dirava ena ladana ia noho danu.

University of Georgia ai, Dr. Rachel Nabulsi ia gwau: “Hanaihanai inai ladana YHWH idia gaukaralaia be mai anina bada. . . . Unai hereva bona idia koroa herevana ese ia hahedinaraia, Israela bona Iuda taudia dekenai inai leta YHWH be mai anina bada bona dina ta ta lalonai idia gaukaralaia.” Unai ese Baibel ena hereva ia hamomokania, badina Baibel lalonai Dirava ena ladana YHWH Heberu leta ai be nega tausen momo idia torea. Nega momo taunimanima edia ladana lalonai Dirava ena ladana ia noho danu.

Nadi ai idia koroa herevana “Yahweh Sabaot,” ena anina be “Tuari oreadia edia Iehova.” Unai ese ia hahedinaraia Baibel negadiai Dirava ena ladana sibona idia gaukaralaia lasi, to inai hereva “Tuari oreadia edia Iehova” be dina ta ta ai idia gaukaralaia danu. Unai ese ia hamomokania Baibel lalonai “Tuari oreadia edia Iehova” idia gaukaralaia, ia be Heberu Revareva ginigunadia lalonai nega 283 ia hedinarai, bona Isaia, Ieremia bona Sekaraia edia toretore lalonai ia hedinarai momo.