1. Iehova ena hesiai taudia momo be edena bamona hekwakwanai momo idia davaria noho?

TANOBADA ibounai lalonai, Iehova ena hesiai taudia momo be idia lalohekwarahi bona idia lalohisihisi. Emu kongrigeisen lalonai unai oi itaia, a? Keristani taudia haida be gorere badadia idia davaria eiava edia lalokau taudia idia mase dainai idia lalohisihisi bada. To ma haida be disasta amo idia vara dika idauidau dainai idia lalohisihisi noho. Unai bamona tadikaka bona taihu ibounai ese hagoadaia hereva idia abia be namo. Edena bamona idia ita durua diba?

2. Dahaka dainai aposetolo Paulo be nega haida hagoadaia herevadia ia abia be namo?

² Aposetolo Paulo be ena mauri ia haboioa diba hekwakwanai idauidau ia davaria. (2 Kor. 11:23-28) Danu ia be reana gorere badana ta ia davaria bona unai gorere be “ginigini ta” bamona ena tauanina ia gwadaia. (2 Kor. 12:7) Bona ia ida ia gaukara hebou tauna Dema ese ia ia rakatania dainai ia lalohisihisi bada, badina “Dema be inai nega oromana ia ura henia bada.” (2 Tim. 4:10) Paulo be lauma helaga ese ia horoa Keristani tauna, bona mai ura ida haida ia durua, to nega haida ia lalomanoka danu.​—Roma 9:1, 2.

3. Paulo be daidia amo hagoadaia herevadia bona heduru ia abia?

³ Paulo be hagoadaia herevadia bona heduru ia abia. Edena dala ai? Iehova ese ena lauma helaga amo ia hagoadaia. (2 Kor. 4:7; Fili. 4:13) Danu Iehova ese Keristani taudia ma haida ia gaukaralaia ia idia hagoadaia totona. Paulo ia gwau, ia ida idia gaukara hebou taudia haida ese ia idia “durua bona hagoadaia bada.” (Kol. 4:11) Idia haida edia ladana ia gwauraia, idia be Arisitako, Tukiko, bona Mareko. Idia ese Paulo idia hagoadaia, bona idia durua ia haheauka totona. Unai Keristani taudia toi edia kara namodia be dahaka? Edena  dala ai ma haida ita durua bona hagoadaia neganai edia haheitalai ita tohotohoa diba?

4. Edena dala ai Arisitako be Paulo ena tura namona ta ai ia lao?

⁴ Makedonia Keristani tauna Arisitako be Tesalonika amo, bona ia be Paulo ia badinaia tura namona ta. Arisitako ena sivarai be Paulo ese Efeso dekenai ena misinari loaloa ihatoina ia karaia neganai ita kamonai. Arisitako be Paulo ia bamoa neganai, ma haida ese idia dogoatao. (Kara 19:29) Ia idia ruhaia neganai, ena mauri totona ia hunia lasi, to Paulo ia badinaia noho. Hua haida murinai, Gris dekenai Arisitako be Paulo ia do bamoa noho ena be dagedage taudia idia ura Paulo idia hamasea. (Kara 20:2-4) Lagani 58 C.E. bamona ai, Paulo be dibura ruma tauna bamona Roma dekenai idia siaia neganai, Arisitako ese ia bamoa, bona idia guia bouti be davara dekenai ia dika. (Kara 27:1, 2, 41) Roma dekenai idia ginidae neganai, Arisitako be Paulo ida ia noho sisina Paulo idia guia rumana ai. (Kol. 4:10) Arisitako be Paulo ia badinaia tura namona ta dainai unai kara ese Paulo ia hagoadaia bada!

5. Aonega Herevadia 17:17 ena hereva bamona, edena dala ai tura namona ta ai ita lao diba?

⁵ Arisitako bamona, tura namona ta ai ita lao diba, bema nega namodia bona “nega dika” ai iseda tadikaka taihu ita badinaia. (Aonega Herevadia 17:17 duahia.) Herevana iseda tadikaka taihu ese idia davaria tohoa gaudia idia ore, to namona be idia ita hagoadaia noho. Frances * ena tama sina be cancer gorere idia abia. Iena tamana ia mase bena hua toi murinai ena sinana ia mase. Frances, ia gwau: “Lau laloa unai metau be nega daudau lalonai ai haheaukalaia. Tura namodia edia kara dainai lau moale, badina ena be egu tama sina idia mase bona nega daudau ia hanaia, to idia laloparara lau do lalohisihisi noho.”

6. Tura namodia edia kara be edena bamona?

⁶ Tura namodia be edia mauri ai gau haida idia dadaraia edia tadikaka taihu  idia durua totona. Hegeregere, tadikaka ta ladana Peter be doketa ese idia hadibaia ia be gorere badana ta ia abia, bona unai gorere dainai ia mase diba. Peter ena adavana Kathryn, ia gwau: “Emai kongrigeisen dekenai idia noho headava tau bona hahine ta ese ai idia durua Peter ena appointment totona ai ida hospital dekenai ai lao. Unai hekwakwanai ai davaria negana amo ai idia hadibaia ai do idia rakatania lasi, bona heduru idia do henia noho.” Ita moale bada badina tura korikoridia ese ita idia durua diba hekwakwanai idauidau ita haheaukalaia totona!

7-8. Kolose 4:7-9 ena hereva bamona, edena dala ai Tukiko be tura korikorina ta ai ia lao?

⁷ Tukiko be Roma ena district, Asia amo ia mai Keristani tauna ta, bona ia be Paulo ia bamoa tura namona ta. (Kara 20:4) Lagani 55 C.E. bamona ai, Paulo ese Iudea Keristani taudia durua totona, kontribiusen moni haboua gaukarana ia gunalaia, bona reana Tukiko ia noia unai mai anina bada asainmen idia karaia hebou. (2 Kor. 8:18-20) Gabeai, Paulo be Roma dekenai nega ginigunana idia hadiburaia neganai, Tukiko ese ia durua gabu ma haida dekenai ena revareva ia abia lao totona. Ia ese Asia ai idia noho kongrigeisen dekenai, Paulo ena revareva bona hagoadaia herevadia ia abia lao.​—⁠Kol. 4:7-9.

⁸ Tukiko be Paulo ena tura korikorina ai ia lao. (Tito 3:12) Unai negai idia noho Keristani taudia haida edia kara be Tukiko ena kara bamona lasi. Lagani 65 C.E. bamona ai, Paulo be nega iharuana dibura ruma ai idia atoa neganai, ia gwau Asia provinsi dekenai idia noho Keristani taudia momo be ia idia bamoa lasi, reana Paulo idia inai henia taudia dekenai idia gari. (2 Tim. 1:15) To, Paulo ese Tukiko ia abidadama henia bona asainmen ma ta ia henia. (2 Tim. 4:12) Paulo ese ena hetura karana namona Tukiko ida ia moalelaia.

9. Edena dala ai Tukiko ita tohotohoa diba?

⁹ Tukiko ita tohotohoa diba bema tura korikorina ta ai ita lao. Hegeregere, iseda  tadikaka taihu ita durua edia dabu gaudia idia abia sibona lasi, to danu gau ma haida ita karaia idia ita durua totona. (Mat. 5:37; Luka 16:10) Heduru idia ura abia taudia idia diba do ita durudia neganai, goada bada idia abia. Taihu ta be inai bamona ia gwau, “Do oi lalohekwarahi lasi, badina oi abia dae momokani oi dekenai heduru do ia henia tauna be nega korikori ai oi do ia durua bona ena gwauhamata do ia badinaia.”

10. Aonega Herevadia 18:24 ena hereva bamona, hahetoho eiava lalohisihisi idia davaria taudia be daika ese ia hagoadadia diba?

¹⁰ Hahetoho eiava lalohisihisi karana idia haheaukalaia taudia be tura korikorina ta ese ia hagoadadia diba. (Aonega Herevadia 18:24 duahia.) Bijay, ena natuna mero be kongrigeisen amo idia atoa siri neganai ia lalohisihisi bona ia gwau, “Lau ura lau abidadama henia tauna ta dekenai egu hemami lau gwauraia hedinarai.” Carlos be kerere ta ia karaia dainai kongrigeisen dekenai ia ura henia bada maduna ia haboioa. Ia gwau, “Lau ura mai gari lasi ida ma haida dekenai egu hemami lau herevalaia.” Carlos ia diba, elda taudia dekenai ena hemami ia herevalaia, unai amo ia do idia durua ena hekwakwanai ia hanaia totona. Danu, ia diba ia herevalaia gaudia be elda taudia ese ma haida dekenai do idia herevalaia lasi.

11. Edena dala ai tura namona ta ai ita lao diba?

¹¹ Tura namona ta ai ita lao totona, haheauka karana ita hahedinaraia be namo. Zhanna be ena tau ese ia rakatania neganai, tura namodia dekenai ena hemami ia herevalaia bona ia idia hagoadaia. Ia gwau: “Mai haheauka ida lau idia kamonai henia, ena be gau haida lau gwauraia loulou.” Oi danu be tura namona ai oi lao diba, bema haida edia hereva oi kamonai namonamo.

12. Mareko be daika, bona edena dala ai mai ura ida ma haida ia hesiai henia?

¹² Mareko be Ierusalema dekenai ia noho Iuda Keristani tauna ta. Iena kasin Banaba be momo ese idia dibaia misinari ta. (Kol. 4:10) Mareko ena ruma bese be taga taudia, to unai ia laloa bada lasi. Mareko be ena mauri lalonai, mai ura ida haida hesiai henia karana ia moalelaia. Hegeregere, nega haida aposetolo Paulo bona Petero be edia gaukara idia karaia neganai, Mareko be idia durua totona, tauanina durua gaudia haida ia hegaegaelaia. (Kara 13:2-5; 1 Pet. 5:13) Paulo ia gwau, Mareko be ia ida ‘Dirava ena Basileia totona idia gaukara hebou’ bona ia ia “durua bona hagoadaia.”​—Kol. 4:10, 11.

13. Timoteo Iharuana 4:11 ese edena dala ai ia hahedinaraia, Paulo ese Mareko ena gaukara namona ia laloa bada?

¹³ Mareko be Paulo ena turana namona ta ai ia lao. Hegeregere, lagani 65 C.E. bamona ai, Paulo be Roma dekenai nega ginigabena idia hadiburaia neganai, ia be Timoteo dekenai ena revareva iharuana ia torea. Unai revareva lalonai Paulo ese Timoteo ia noia Roma dekenai do ia lao, bona Mareko ese ia bamoa be namo. (2 Tim. 4:11) Momokani, Paulo ese Mareko ena gaukara namona ia laloa bada, unai dainai ia ura unai nega aukana lalonai Mareko ia itaia. Mareko ese dala idauidau ai Paulo ia durua, reana aniani bona revareva do ia torea kohudia ia henia. Paulo do idia hamasea negana ia kahirakahira noho lalonai, ia abia heduru bona hagoadaia herevadia ese ia idia durua ia haheauka totona.

14-15. Mataio 7:12 ese edena dala ai ita ia durua, ma haida durua daladia ita laloa totona?

¹⁴ Mataio 7:12 duahia. Nega aukadia lalonai ma haida ese ita idia durua neganai,  ita moale bada! Ryan, ena tamana be aksiden ta ai ia mase. Ia gwau: “Oi lalohisihisi neganai, do ia auka dina ta ta ai oi karaia gaudia oi karaia totona. Ta ese oi durua totona ia karaia gauna ese oi ia hagoadaia diba, herevana ia be gau maragina sibona.”

¹⁵ Ma haida edia mauri dalana ita lalopararalaia neganai dala idauidau ai heduru ita henia diba. Hegeregere, taihu ta be abia hidi ia karaia, matamanai ita herevalaia taudia Peter bona Kathryn ia durua edia medikol appointment ibounai dekenai idia lao totona. Peter bona Kathryn be motuka do idia taria lou diba lasi dainai, unai taihu be sediual ta ia karaia, kongrigeisen amo tadikaka taihu ese edia motuka amo heduru idia henia totona. Unai ese dahaka namo ia havaraia? Kathryn ia gwau, “Ai mamia maduna metauna ta be emai pagana amo ia kokia bamona.” Namona be oi laloatao, emu kara namodia ese ma haida ia hagoadaia diba, herevana dala maragina ai unai oi karaia.

16. Mareko ena haheitalai amo hagoadaia karana dekenai dahaka mai anina bada gauna ta ita dibaia?

¹⁶ Iesu ena negai ia noho hahediba tauna Mareko be ia bisi bada Keristani tauna ta. Ia be tiokratik asainmen badadia ia karaia, hegeregere evanelia bukana Mareko ia torea. To, Mareko be nega ia atoa Paulo ia hagoadaia totona, bona Paulo be Mareko ena heduru ia noia diba. Angela be ena ruma bese ai ta ia mase neganai, mai ura ida ia idia hagoadaia taudia edia kara namo ia moalelaia. Ia gwau: “Bema turadia be mai momokani ida oi idia durua, do ia auka lasi edia heduru oi noia totona. Mai ura ida unai do idia karaia.” Sibona ita nanadaia, ‘Lau be dala idauidau ai tadikaka bona taihu lau durua noho, a?’

17. Korinto Iharuana 1:3, 4 ita laloa dobu karana ese edena dala ai ita ia hagoadaia?

¹⁷ Tadikaka taihu haida be heduru idia ura, bona idia ita hagoadaia be namo. Haida ese ita hagoadaia totona idia gaukaralaia heduru herevadia ita gaukaralaia diba, ma haida ita hagoadaia totona. Ena tubuna hahine ia mase taihu ta ladana, Nino ia gwau: “Iehova ese ita ia gaukaralaia diba  ma haida ita hagoadaia totona, bema ia dekenai ita tabekau.” (2 Korinto 1:3, 4 duahia.) Matamanai ita herevalaia taihu ladana Frances, ia gwau: “Korinto Iharuana 1:4 ena hereva be momokani. Ita abia hagoadaia herevadia amo ma haida ita hagoadaia diba.”

18. (a) Dahaka dainai ma haida be ta hagoadaia totona idia gari? (b) Edena dala ai ma haida ita hagoadaia diba? Haheitalai gwauraia.

¹⁸ Namona be haida ita durua, herevana nega haida ita gari. Hegeregere, reana nega haida do ia auka lalohekwarahi tauna ita hereva henia totona, badina ita diba lasi dahaka hereva do ita gwauraia eiava dahaka do ita karaia. Elda ta ladana Paul be ena tamana ia mase murinai, ma haida ese ia idia durua karana ia laloatao. Ia gwau: “Lau itaia idia dekenai ia auka lau idia hereva henia totona, badina idia diba lasi dahaka hereva do idia gwauraia. To, lau moale bada badina idia ura lau idia hagoadaia bona durua.” Unai hegeregerena, tano mareremarere badana ta ia vara neganai, tadikaka ta ladana Tajon ia gwau: “Tano mareremarere ia vara neganai, taunimanima ese lau dekenai idia siaia meseij ta ta lau laloatao lasi, to lau laloatao idia be lau idia laloa bada dainai lau idia sekea.” Ma haida ita hagoadaia diba bema ita hahedinaraia idia ita laloa bada.

19. Dahaka dainai emu lalona oi hadaia, ma haida oi “durua bona hagoadaia” totona?

¹⁹ Inai tanobada oromana ena dokona ia kahirakahira noho lalonai, tanobada be do ia dika bona mauri be do ia auka. (2 Tim. 3:13) Bona ita be mai iseda kara dika bona goevadae lasi taudia dainai ta ta ita hagoadaia heheni be namo. Aposetolo Paulo be mai abidadama ida ia haheauka ela bona ena mauri dokona, badina ena Keristani tadikaka ese ia idia hagoadaia bada. Namona be Arisitako bamona badinaia karana oi hahedinaraia, Tukiko bamona tura korikorina ta ai oi lao, bona Mareko bamona ma haida oi hesiai henia. Unai bamona ita karaia neganai, iseda tadikaka bona taihu ita durua diba mai abidadama ida Iehova idia hesiai henia noho totona.​—⁠1 Tes. 3:2, 3.