1-2. Lagani 33 C.E., Pentekoste dinana ai, dahaka mai anina bada gauna ta ia vara?

LAGANI 33 C.E., Sunday dabai Ierusalema dekenai, Pentekoste dinana ai, hahediba taudia 120 bamona be ruma ta ena atai daiutuna ai idia haboua. (Kara 1:13-15; 2:1) Dina haida gunanai, Iesu ese idia ia hadibaia Ierusalema ai do idia noho, badina idia ese harihari gauna namona ta do idia abia. (Kara 1:4, 5) Dahaka ia vara?

² Unai negai, “guba amo karaharaga rege ta ia mai, ia be lai bada ia toa regena bamona.” Unai rege be ruma lalonai idia kamonai. Bena, “lahi hururu . . . edia toana be malana ena toana bamona” be hahediba taudia edia kwarana ataiai idia hedinarai, bona idia ibounai be “lauma helaga amo idia honu.” (Kara 2:2-4) Unai dala hereadaena amo, Iehova ese idia dekenai iena lauma helaga ia henia. (Kara 1:8) Idia be lauma helaga amo ia horoa * taudia ginigunadia, bona edia helaro be Iesu ida guba ai do idia lohia.

3. Dahaka dainai Pentekoste dinana ai, lauma helaga idia abia taudia be idia daradara lasi lauma helaga ese idia ia horoa?

³ Mani oi laloa, bema oi be unai negai atai daiutu ai idia hebou hahediba tauna ta, reana unai dina do oi laloaboio lasi. Lahi hururu ena toana, malana bamona be emu kwarana ataiai ia hedinarai, bona oi be gado idauidau ai oi hereva matamaia! (Kara 2:5-12) Do oi daradara lasi badina oi diba  momokani lauma helaga ese oi ia horoa. To lauma helaga idia abia taudia ibounai be dala hereadaena tamona amo unai hahenamo idia abia, a? Lasi. Edena dala ai unai ita diba?

4. Keristani taudia ginigunadia edia negai, horoa taudia ibounai be nega tamona lauma helaga idia abia, a? Herevalaia.

⁴ Mani unai ia vara negana ita herevalaia. Pentekoste 33 C.E. ai, unai Keristani taudia 120 sibona be lauma helaga ese ia horodia lasi. Gabeai, taunimanima 3,000 bamona be Iesu ese idia dekenai ia gwauhamatalaia lauma helaga idia abia danu. Bapatiso idia abia negana amo, lauma helaga ese idia ia horoa. (Kara 2:37, 38, 41) To lagani haida murinai, horoa Keristani taudia haida be bapatiso idia abia dinana ai, Dirava ese ia horoa lasi. Hegeregere, Samaria taudia be bapatiso idia abia bona dina haida murinai Dirava ese ia horoa. (Kara 8:14-17) To Korenelio bona ena ruma bese be Dirava ese ia horodia, ena be idia do bapatiso lasi.​—Kara 10:44-48.

5. Korinto Iharuana 1:21, 22 ena hereva bamona, lauma helaga ese ta ia horoa neganai dahaka ia vara?

⁵ Lauma helaga ese ta ia horoa neganai ia vara gauna, mani ita herevalaia. Iehova ese lauma helaga amo ia horoa taudia haida, be matamanai idia davaria ia auka unai idia abia dae totona. Reana idia laloa, ‘Dahaka dainai Dirava ese lau ia abia hidi?’ To haida be unai bamona idia laloa lasi. To, aposetolo Paulo ese horoa taudia dekenai ia vara gauna be inai bamona ia herevalaia: “Ia umui abidadama henia murinai, Dirava ese ia gwauhamatalaia vadaeni lauma helaga amo umui ia makaia. * Bona unai be iena amo ia vara. Unai lauma helaga be hamomokania gauna, Dirava ese ia gwauhamatalaia gaudia ibounai be ita dekenai do ia henia.” (Efe. 1:13, 14) Unai dainai Iehova be ena lauma helaga ia gaukaralaia unai amo Keristani taudia dekenai ia hahedinaraia ia ese idia ia abia hidi. Unai dala amo, lauma helaga ‘gwauhamatalaia gauna’ ese idia do ia durua amo do idia diba idia be guba dekenai do idia noho to tanobada lasi.​—2 Korinto 1:21, 22 duahia.

6. Horoa Keristani tauna ta be ena guba ahuna ia abia totona dahaka ia karaia be namo?

 ⁶ Bema ta be Keristani horoa tauna ai ia lao, ia be maoromaoro guba helarona ia abia, a? Lasi. Ia diba ia idia abia hidi guba dekenai do ia lao. To, namona be inai sisiba herevana ia laloatao: “Tadikaka e, do umui gaukara goada Dirava ese umui ia boiria bona umui ia abia hidi karana umui hamomokania totona. Badina bema unai gaudia umui karaia noho, do umui moru lasi momokani.” (2 Pet. 1:10) Unai dainai ena be horoa Keristani tauna ta idia abia hidi guba dekenai do ia lao, unai ahuna do ia abia bema ena abidadama dekenai ia gini goada noho.​—Fili. 3:12-14; Heb. 3:1; Apok. 2:10.

7. Edena dala ai horoa taudia idia diba guba helarona do idia abia?

⁷ Edena bamona ta ia diba ia be guba helarona ia abia? Paulo ese Roma ai idia noho taudia dekenai ia gwauraia herevana amo haere ita abia, ia gwau, Dirava ese idia “ia boiria helaga taudia.” Danu ia gwau: “Dirava ena lauma ese igui hesiai taudia ai ita ia halaoa lasi bona ita ia hagaria lou lasi. To unai lauma amo Dirava ese ita be ena natudia ai ia halaoa, bona unai lauma ese ita ia hauraia bena ita boiboi: ‘Abba, Tamana!’ Dirava ena lauma bona iseda laloa dalana idia gwauraia hedinarai ita be Dirava ena natudia.” (Roma 1:7; 8:15, 16.) Unai dainai Dirava ese lauma helaga amo horoa taudia dekenai ia hahedinaraia goevagoeva, idia be guba helarona do idia abia.​—1 Tes. 2:12.

8. Ioane Ginigunana 2:20, 27 ese edena dala ai ia hahedinaraia, namo lasi ta ese horoa Keristani taudia ia hamaoroa idia be guba helarona idia abia eiava lasi?

⁸ Horoa taudia be edia kudouna bona darana amo idia abia dae momokani Iehova ese idia ia abia hidi guba helarona idia abia totona. (1 Ioane 2:20, 27 duahia.) Momokani, horoa Keristani taudia be ita bamona, badina kongrigeisen heboudia amo Iehova ese dala tamona ai ita ia hadibaia. To, namo lasi ta ese idia ia hamaoroa idia be guba helarona idia abia eiava lasi. Iehova ese iena siahu hereadaena, lauma helaga amo idia dekenai ia hahedinaraia goevagoeva ia ese idia ia horoa!

9. Efeso 1:18 ena hereva bamona, Dirava ese ta ia horoa neganai, ia dekenai dahaka ia vara?

⁹ Hari inai negai, Dirava ena hesiai taudia momo dekenai be ia auka Dirava ese ia horoa tauna dekenai ia vara gauna idia lalopararalaia totona. Dahaka dainai? Badina Dirava ese ta ia horoa karana idia do dibaia lasi. Dirava ese taunimanima ia karaia tanobada dekenai do idia mauri hanaihanai totona, to guba dekenai lasi. (Gen. 1:28; Sal. 37:29) To, Iehova ese haida ia abia hidi guba dekenai do idia noho totona. Unai dainai idia ia horoa neganai, edia helaro bona laloa dalana ia haidaua momokani, unai amo guba maurina idia laloa.​—Efeso 1:18 duahia.

10. Ta ia “vara lou” karana ena anina be dahaka? (Futnout itaia danu.)

¹⁰ Dirava ese Keristani taudia be lauma helaga amo ia horoa neganai, idia be idia “vara lou.” * Danu Iesu ia hahedinaraia, Dirava ese ia horoa lasi tauna dekenai ta ia “vara lou” eiava ‘lauma amo ia vara’ karana ita herevalaia be auka.​—Ioa. 3:3-8.

11. Dirava ese ta ia horoa neganai, ena laloa dalana ia idau karana mani oi herevalaia.

¹¹ Keristani taudia be horoa taudia ai idia lao neganai, edena dala ai edia laloa dalana  ia idau? Iehova ese unai Keristani taudia ia do horoa lasi neganai, idia be tanobada ai do idia mauri hanaihanai ena helaro idia laloa bada. Idia be mai ura ida Iehova ese tanobada be paradaiso ai do ia halaoa, bona kara dika taudia do ia haorea negana idia naria. Reana vaira negai edia ruma bese tauna ta eiava turana ta be mase amo ia toreisi lou neganai do idia welkam henia karana idia lalohadailaia. To, Dirava ese idia ia horoa neganai, edia laloa dalana ia idau. Edena dala ai? Idia gwau lasi, tanobada helarona be anina lasi. Bona idia gwau lasi, lalohekwarahi bona hisihisi idauidau dainai, idia ura guba dekenai idia lao haraga. Bona idia gwau lasi, tanobada ai mauri hanaihanai helarona idia hesikulaia. To, Iehova ese ena lauma helaga amo edia laloa dalana bona edia helaro ia haidaua.

12. Petero Ginigunana 1:3, 4 ena hereva bamona, horoa Keristani taudia ese edia helaro be edena bamona idia laloa?

¹² Horoa tauna be ia abia hahenamo dainai reana do ia mamia ia be hegeregere lasi. To, ia abia dae momokani Iehova ese ia ia abia hidi. Bona vaira negai do ia abia hahenamo ia laloa neganai, ia moale bada.​—1 Petero 1:3, 4 duahia.

13. Horoa taudia ese edia mauri tanobada dekenai be edena bamona idia laloa?

¹³ So unai ena anina be horoa taudia idia ura do idia mase, a? Aposetolo Paulo ese unai henanadai ia haerelaia. Ia ese edia tauanina be palai rumana ida ia hahegeregerea, bona ia gwau: “Momokani, unai palai rumana ai ita noho neganai ita taitai, bona ita lalometau, badina ita ura lasi unai palai rumana ita kokia, to ita ura noho gabuna ma ta ita abia, unai amo mauri ese mase diba gauna ena gabu ia abia.” (2 Kor. 5:4) Namo lasi ita laloa unai Keristani taudia be tanobada ai idia noho maurina dainai idia hesiku bona idia ura mase haraga. To, idia be edia mauri idia moalelaia bona idia ura dina ta ta ai, edia ruma bese bona turadia ida Iehova idia hesiai henia. Herevana dahaka idia karaia, to hanaihanai vaira negai do idia abia hahenamo hereadaena idia laloatao.​—⁠1 Kor. 15:53; 2 Pet. 1:4; 1 Ioa. 3:2, 3; Apok. 20:6.

14. Dahaka ese ia hahedinaraia lasi, ta be lauma helaga ese ia horoa?

¹⁴ Reana oi laloa, ‘Dirava ese lauma helaga amo lau ia horoa eiava lasi?’ Bema oibe, mani inai mai anina bada henanadai oi lalodia: Mai ura ida Iehova oi hesiai henia noho, a? Oi mamia oi be haroro gaukara oi karaia goadagoada noho, a? Oi be mai emu ura ida Baibel oi stadilaia bona “Dirava ena dobu gaudia” oi dibaia noho, a? (1 Kor. 2:10) Oi mamia Iehova ese emu haroro gaukara ai anina namona ia havaraia noho, a? Oi mamia oi be mai emu maduna ma haida oi durua Dirava idia dibaia totona, a? Emu mauri ai gau momo ese idia hamomokania Iehova ese dala idauidau ai oi ia durua, a? Bema unai henanadai ibounai dekenai emu haere be oibe, unai ese ia hahedinaraia hari oi be guba helarona oi abia, a? Lasi. Dahaka dainai? Badina Dirava ena hesiai taudia ibounai edia hemami be unai bamona, herevana idia be horoa taudia eiava lasi. Bona Iehova be ena lauma helaga do ia gaukaralaia iena hesiai taudia ibounai ia hagoadaia totona, herevana guba eiava tanobada helarona idia abia. Momokani, bema oi daradara Dirava ese lauma helaga amo oi ia horoa eiava lasi, unai daradara karana ese ia hahedinaraia Dirava ese oi ia horoa lasi. Iehova ese ia horoa taudia be idia daradara lasi bema idia ia horoa eiava lasi. To, idia diba momokani!

15. Edena dala ai ita diba Dirava ena lauma idia abia taudia ibounai be guba helarona do idia abia lasi?

 ¹⁵ Baibel lalonai, Dirava ese lauma helaga amo ia horoa abidadama taudia momo edia haheitalai idia noho; to idia ese guba helarona idia abia lasi. Davida be lauma helaga ese ia hakaua. (1 Sam. 16:13) Lauma helaga ena heduru dainai Davida ese Iehova ena dobu gaudia ia lalopararalaia bona Baibel ena kahana haida ia torea. (Mar. 12:36) To, aposetolo Petero ia gwau Davida be “guba dekenai ia daekau lasi.” (Kara 2:34) Ioane Bapatiso be ‘lauma helaga amo ia honu.’ (Luka 1:13-16) Iesu ia gwau, tau ta ese Ioane ia hereaia lasi, to ma ia gwau Ioane be guba Basileia do ia abia lasi. (Mat. 11:10, 11) Iehova ese ena lauma helaga amo unai taudia dekenai siahu ia henia hoa karadia idia karaia totona, to unai lauma helaga amo idia ia abia hidi lasi guba helarona idia abia totona. Unai ena anina be guba dekenai do idia lohia taudia edia abidadama ese idia edia abidadama ia hereaia, a? Lasi. Badina Iehova ese tanobada Paradaisona ai idia do ia hatorea isi lou.​—Ioa. 5:28, 29; Kara 24:15.

16. Dirava ena hesiai taudia momo, be dahaka hahenamo idia naria noho?

¹⁶ Tanobada ai, Dirava ena hesiai taudia momo be guba helarona idia abia lasi. Aberahamo, Sara, Davida, Ioane Bapatiso, bona Baibel negadiai idia noho tatau bona hahine haida bamona, idia be mai ura ida tanobada dekenai Dirava ena Basileia henunai do idia noho negana idia naria noho.​—Heb. 11:10.

17. Stadi atikol namba 5 ai edena henanadai do ita herevalaidia?

¹⁷ Hari inai negai, Dirava ena taunimanima huanai horoa taudia haida idia do noho dainai, henanadai haida idia vara. (Apok. 12:17) Hegeregere, Dirava ese ia horoa taudia be edena bamona idia sibona idia laloa be namo? Bema emu kongrigeisen dekenai ta be Memorial ai paraoa bona wain ia abia, edena bamona unai tauna do oi kara henia? Bona bema idia gwau horoa taudia edia namba be ia bada ia lao noho, be edena bamona? Unai oi lalohekwarahilaia be namo, a? Stadi atikol namba 5 ese unai henanadai do ia haerelaidia.