1. Davida be edena bamona Iehova ia laloa, bona unai ese ia durua dahaka ia karaia totona?

KING DAVIDA ia gwau: “[Iehova] ena ladana be bada herea, bona ita ese iena ladana do ita abia isi.” (Sal. 145:3) Davida be Iehova ia lalokau henia, bona unai ese ia durua “hebou taudia edia vairanai” Dirava ia hanamoa totona. (Sal. 22:22; 40:5) Momokani, oi danu be Iehova oi lalokau henia bona Davida ena hereva dekenai oi lalotamona, ia gwau: “[Iehova] e, aiemai sene taudia edia Dirava, ai ese oi do ai hanamoa ela bona hanaihanai.”​—⁠1 Siv. 29:10-13.

2. (a) Edena dala ai Iehova ita hanamoa diba? (b) Ma haida edia hekwakwanai be dahaka, bona dahaka do ita herevalaia guna?

² Hari, Iehova ita hanamoa dalana ta be, Keristani heboudia dekenai haere ita henia. To, iseda tadikaka taihu momo dekenai unai be hekwakwanai ta. Idia ura hebou ai haere idia henia to idia gari. Edena dala ai unai idia hanaia diba? Edena dala haida ese ita do ia durua iseda haere amo ma haida ita hagoadaia totona? Unai henanadai edia haere ita do haerelaia lasi lalonai, hebou ai ita haere ena badina foa mani ita herevalaia guna.

3-5. (a) Heberu 13:15 ena hereva bamona dahaka dainai hebou dekenai ita haere? (b) Ita ibounai be haere tamona ita henia be namo, a? Gwauraia hedinarai.

³ Iehova ese ita ibounai dekenai hahenamo ia henia ia ita hanamoa totona. (Sal. 119:108) Hebou ai haere ita henia karana be iseda “boubou gauna bamona” bona ta ese ita totona unai do ia karaia lasi. (Heberu 13:15 duahia.) Iehova be ia ura ita ibounai ese haere tamona ita henia, a? Lasi!

⁴ Iehova ia diba ita ta ta iseda diba bona noho dalana be idauidau bona ia dekenai ita henia boubou gaudia ia laloa bada, herevana idia be bada o maragi. Israela taudia ese ia  dekenai idia bouboulaia gaudia mani oi laloa. Israela taudia haida be mamoe o nanigosi ta idia bouboulaia diba. To ogogami Israela tauna ese “manu edia ladana kerea rua, o pune rua” ia bouboulaia diba. Bona bema Israela tauna ia hegeregere lasi manu rua ia bouboulaia totona, vadaeni paraoa namona ena “metau kilogaram ta do ia mailaia” bona Iehova be unai ia abia dae. (Lev. 5:7, 11) Unai negai, paraoa ena davana be maragi, to bema unai be “paraoa” namona, Iehova ese ia abia dae.

⁵ Hari inai negai, iseda lalokau Diravana be unai bamona ia laloa danu. Haere ita henia neganai, ia ura lasi iseda haere be Apolo ena hereva namonamo dalana o Paulo bamona lalona veria dalana ai ita haere. (Kara 18:24; 26:28) To, Iehova ia ura haere namodia ita henia. Koini maragidia rua ia udaia vabu oi laloatao, a? Iehova ese ena boubou ia laloa bada badina ia dekenai ia noho moni ibounai ia henia.​—Luka 21:1-4.

6. (a) Heberu 10:24, 25 ena hereva bamona, edena dala ai ma haida edia haere ese ita idia hagoadaia? (b) Edena dala ai ma haida edia haere dainai idia oi hanamoa?

⁶ Iseda haere karana amo ita hagoadaia heheni. (Heberu 10:24, 25 duahia.) Ita ibounai be iseda hebou ai ita kamonai haere idauidau ita moalelaia. Natu maragina ta ese mai kudouna ibounai ida ia henia haere kwadogina ita moalelaia. Ta be ena haere lalonai, hereva momokani ena kahana ta ia dibaia bona ia haerelaia neganai, unai ese ita ia hagoadaia. Ena be haida be idia hemarai o iseda gado idia dibaia matamaia, to “mai gari lasi ida” haere idia henia. (1 Tes. 2:2) Edia hekwarahi dainai, edena dala ai idia do ita hanamoa? Hebou ia ore murinai edia haere namodia dainai idia ita tanikiu henia diba. Dala ma ta be, ita sibona ese haere ita henia diba. Ma haida ese ita idia hagoadaia sibona lasi, to ita ese idia ita hagoadaia danu.​—⁠Roma 1:11, 12.

7. Edena dala ai ita sibona ese ita henia haere amo goada ita abia?

⁷ Ita sibona ese haere ita henia karana amo goada ita abia. (Isa. 48:17) Edena dala ai? Gau ginigunana be, bema haere henia totona palani ita karaia, do ita ura bada hebou totona ita hegaegae namonamo. Bema unai bamona ita karaia, Dirava ena Hereva ena anina do ita  lalopararalaia. Unai amo ita dibaia gaudia ita badinaia diba. Gau iharuana be, hebou do ita moalelaia badina hebou ai haere ita henia diba. Gau ihatoina be, haere ita henia totona ita hegaegae namonamo dainai, hebou ia ore murinai ita haerelaia gaudia ita laloatao noho.

8-9. (a) Malaki 3:16 ese ia hahedinaraia bamona, Iehova ese iseda haere be edena bamona ia laloa? (b) Dahaka ese haida ia koua idia haere totona?

⁸ Iseda haere karana amo ita hahedinaraia ita be Iehova ita hamoalea. Ita diba momokani Iehova be iseda haere ia kamonai bona hebou dekenai ita henia haere ia moalelaia. (Malaki 3:16 duahia.) Bema ita gaukara goada Iehova ita hamoalea, Ia ese ita do ia hanamoa.​—Mal. 3:10.

⁹ Momokani, badina momo dainai hebou dekenai haere ita henia diba. To, haida be edia imana abia isi totona idia gari. Bema oi be unai bamona oi mamia, oi lalomanoka lasi. Mani Baibel ena hakaua herevadia, haheitalai haida bona heduru herevadia haida ita herevalaia, badina unai ese ita ibounai do ia durua hebou dekenai haere momo ita henia totona.

10. (a) Ita momo be dahaka dainai ita gari? (b) Dahaka dainai oi laloa ma haida ese emu haere karana ia hereaia be kerere lasi?

¹⁰ Oi gari o oi hemarai dainai haere henia totona emu imana oi abia isi be auka, a? Bema oibe, ma haida danu be unai bamona idia mamia. Momokani, ita momo be haere ita henia neganai, ita gari. Emu gari karana oi hanaia totona, emu gari ena badina oi diba be namo. Oi gari dainai oi ura gwauraia gauna do oi laloaboio eiava haere kererena do oi gwauraia, a? Eiava oi laloa momo badina oi laloa haida edia haere ese emu haere do ia hereaia, a? Unai bamona oi mamia be kerere lasi. Unai ese ia hahedinaraia, oi be oi manau bona ma haida oi laloa danu. Iehova ese unai kara ia moalelaia. (Sal. 138:6; Fili. 2:3) To, Iehova ia ura ia oi hanamoa bona hebou ai emu tadikaka taihu oi hagoadaia. (1 Tes. 5:11) Oi ia lalokau henia bona oi do ia hagoadaia.

11. Edena Baibel ena sisiba haida ese ita do ia durua?

 ¹¹ Baibel ena sisiba haida mani oi laloa. Baibel ese ia hahedinaraia, iseda hereva bona ita gwauraia herevadia dekenai ita kerere diba. (Iam. 3:2) Iehova bona iseda tadikaka taihu idia diba ita be goevadae lasi taudia. (Sal. 103:12-14) Idia be iseda tadikaka taihu bona ita idia lalokau henia. (Mar. 10:29, 30; Ioa. 13:35) Idia laloparara, badina nega haida ita ura lasi gwauraia gaudia haida be iseda haere amo ita gwauraia.

12-13. Nehemia bona Iona edia haheitalai amo dahaka ita dibaia?

¹² Baibel ena haheitalai haida ese oi do idia durua emu gari oi hanaia totona. Mani Nehemia oi laloa. Ia be king ta ena ruma ai ia gaukara. Nehemia be ia lalometau badina ia kamonai Ierusalema ena magu bona geiti idia hadikaia vadaeni. (Neh. 1:1-4) Ia gari badina king ese ia nanadaia iena lalometau ena badina ia gwauraia hedinarai totona. Nehemia be karaharaga ia guriguri bona king ia haere henia. Ena gari lasi karana dainai, king ese Dirava ena taunimanima ia durua. (Neh. 2:1-8) Danu, Iona oi laloa. Iehova ese ia noia Nineva ai idia noho taudia ia haroro henidia totona, to Iona be ia gari dikadika dainai dala ma ta dekenai ia heau lao. (Iona 1:1-3) To, Iehova ena heduru dainai, Iona be Nineva taudia ia haroro henidia. Bona ia gwauraia herevadia ese Nineva taudia dekenai namo bada ia havaraia. (Iona 3:5-10) Nehemia amo ita dibaia gauna be, haere ita do henia lasi neganai ita guriguri guna be namo. Bona Iona amo ita dibaia gauna be, ena be ita gari to Iehova ese ita do ia durua ia ita hesiai henia totona. Oibe, Nineva taudia dekenai hahemaoro herevana gwauraia karana be auka, to kongrigeisen ai haere henia karana be auka lasi, ani?

¹³ Edena heduru herevadia ese oi do ia durua hebou ai emu haere amo ma haida oi hagoadaia diba? Mani heduru daladia ma haida ita herevalaia.

14. Dahaka dainai iseda hebou totona ita hegaegae namonamo, bona edena bamona negadiai ita hegaegae diba?

¹⁴ Hebou ta ta totona oi hegaegae. Bema palani oi karaia guna bona oi hegaegae namonamo, do oi gari lasi haere oi henia totona. (Aon. 21:5) Momokani, ita ibounai iseda hegaegae daladia be idauidau. Ena mauri lagani 80 vabu ta, Eloise, be ena Gima Kohorona Stadi totona, wiki lalonai ia hegaegae matamaia. Ia gwau: “Bema nega bada lau atoa lau hegaegae totona, hebou lau moalelaia bada.” Ful-taim moni gaukara ia karaia taihu, Joy, be Saturday ai nega ia atoa ena Gima Kohorona ia makaia totona. Ia gwau: “Unai dina lau abia hidi badina lau stadilaia gaudia lau laloatao diba.” Painia elda ta, Ike, ia gwau, “Wiki lalonai, hora haida lalonai hebou ena kahana ta ta lau hegaegaelaia.”

15. Edena dala ai hebou ta totona oi hegaegae namonamo diba?

 ¹⁵ Hebou totona ita hegaegae namonamo totona, dahaka ita karaia be namo? Emu hegaegae karana oi do hamatamaia lasi neganai, lauma helaga ena heduru totona Iehova oi noia. (Luka 11:13; 1 Ioa. 5:14) Bena, miniti haida lalonai oi ura stadilaia gauna, stadi ena sinado, hereva kwarana maragidia, haheitalai idauidau bona hadibaia mauadia oi duahia bona laloa dobu. Stadi ena paragraf ta ta oi duahia neganai, bema hegeregere, idia torea siridia ibounai oi duahia danu. Atikol ese ia gwauraia sisiba herevana oi laloa dobu bona oi ura henia haere oi laloa bada. Bema nega bada lalonai oi hegaegae, namo do oi davaria bona do ia auka lasi oi haere totona.​—⁠2 Kor. 9:6.

16. Dahaka tulu idia noho, bona edena dala ai oi gaukaralaia diba?

¹⁶ Bema hegeregere, iseda websait ai, oi dibaia gado ai idia halasia tulu idauidau oi gaukaralaia diba. Iehova be ena orea amo, ita dekenai iseda websait ai idia halasia tulu idauidau ia henia bona unai ese ita ia durua hebou totona ita hegaegae diba. Iseda mobael fon ai JW Library^® app ita gaukaralaia diba iseda stadi pablikeisen ita daonloud totona. Bena nega bona gabu idauidau ai ita stadi​—eiava stadi pablikeisen ita duahia o ita kamonai diba. Haida be edia gaukara bona sikuli gabudiai idia laga-ani negadiai, eiava basi o motuka ai idia lao neganai, unai tulu idia gaukaralaia. Watchtower Library bona Watchtower ONLINE LIBRARY^™ ese auka lasi dalanai ita ia durua, unai amo ita ura stadilaia gauna ena hereva ma haida ita tahua namonamo diba.

17. (a) Dahaka dainai haere momo oi hegaegaelaia be namo? (b) Vidio ladana, Iehova Ena Turana ai Lao​—Emu Haere Hegaegaelaia amo dahaka oi dibaia?

¹⁷ Bema hegeregere, paragraf ta ta edia haere oi hegaegaelaia. Dahaka dainai? Badina paragraf ibounai dekenai oi do idia makaia lasi haere oi henia totona. Ma haida be unai paragraf tamona idia haerelaia totona edia imana idia abia isi neganai, stadi naria tadikaka be idia ta ia makaia diba. Hebou be nega korikori ai ia ore totona, stadi naria tadikaka be haida sibona do ia abia hidi haere totona. Unai dainai, stadi matamana ai, bema oi idia makaia lasi, oi lalomanoka lasi. Bema haere momo oi hegaegaelaia, bona paragraf ta ai oi haere lasi, to ma paragraf ma ta dekenai haere oi henia diba. Emu haere dalana ma ta be stadi ena siri ta oi duahia diba. To bema ia hegeregere, sibona emu hereva dalana ai haere ta oi hegaegaelaia diba. *

18. Dahaka dainai haere kwadogina oi henia be namo?

 ¹⁸ Haere kwadogina henia. Nega momo, haida ese idia henia haere kwadogidia be ita idia hagoadaia. Unai dainai haere kwadogidia oi henia be namo. Mani sekeni 30 lalonai emu haere oi henia. (Aon. 10:19; 15:23) Bema lagani momo lalonai hebou dekenai haere oi henia, namona be haheitalai namona oi hahedinaraia​—⁠emu haere ia kwadogi be namo. Bema miniti haida lalonai haere latadia oi henia, ma haida be do idia laloa, haere henia karana dekenai emu diba ese edia diba ia hereaia. Danu, haere kwadogidia ese ma haida dekenai nega ia henia hebou dekenai idia haere totona. Bema oi idia makaia guna haere oi henia totona, henanadai ena haere maorona bona kwadogina oi henia be namo. Namo lasi paragraf ese ia gwauraia gaudia ibounai oi herevalaia. Paragraf ena point badadia idia herevalaia murinai, point ma haida oi haerelaia diba.​—⁠Maua ladana “ Dahaka Gaudia Lau Haerelaia Diba?” itaia.

19. Stadi naria tadikaka ese edena dala ai oi do ia durua, to dahaka oi karaia danu be namo?

¹⁹ Bema oi ura paragraf ta dekenai haere oi henia, stadi ia naria tadikaka oi hadibaia guna. Bema oi ura unai oi karaia, hebou ia do matamaia lasi neganai, stadi naria tadikaka oi hadibaia guna be namo. Oi hegaegaelaia paragraf oi haerelaia totona, emu imana oi abia isi haraga, unai amo stadi naria tadikaka ese oi do ia makaia.

20. Edena dala ai kongrigeisen heboudia be tura namodia ida aniani ta ita ania hebou bamona?

²⁰ Kongrigeisen heboudia be hegeregere tura namodia ida aniani ta ita ania hebou bamona. Mani oi laloa, kongrigeisen ai haida be moale karana ta idia hegaegaelaia bona oi idia boiria, bona oi idia noia aniani haida oi hegaegaelaia totona. Dahaka do oi karaia? Do oi gaukara goada unai amo ibounai ese idia moalelaia diba aniani ta do oi hegaegaelaia. Iehova, ita ia Boiria Tauna, be iseda hebou ai gau namodia momo ia hegaegaelaia. (Sal. 23:5; Mat. 24:45) Dirava be ia dekenai ita henia harihari gauna namo hereana ia moalelaia. Unai dainai namona be oi hegaegae namonamo bona haere momo oi henia. Bena Iehova ese ia hegaegaelaia gaudia amo namo do oi abia sibona lasi, to emu harihari gauna amo kongrigeisen tadikaka taihu oi hagoadaia diba.