1. Iehova ese ita ia havaraia neganai, ita dekenai dahaka ia henia?

IEHOVA ese ita ia havaraia neganai, ia ese ita dekenai laloa kehoa ia henia, unai amo hekwakwanai idauidau ita hamaoromaoroa bona vaira nega ita palanilaia diba. (Aon. 2:11) Danu, ita ia hagoadaia iseda palani ita hagugurua bona tahua gaudia maorodia ita atoa totona. (Fili. 2:13) Ma danu, ita dekenai lalomamina ia henia, unai amo maoro bona kerere edia idau ita gwauraia diba. Unai lalomamina ese ita ia durua kara kereredia ita dadaraia bona iseda kerere ita hamaoromaoroa totona.​—⁠Roma 2:⁠15.

2. Iehova ia ura ia amo ita abia gaudia be edena bamona ita gaukaralaia?

² Iehova ia ura ia amo ita abia gaudia ita gaukaralaia namonamo. Dahaka dainai? Badina ia ese ita ia lalokau henia, bona ia diba bema unai harihari gaudia ita gaukaralaia namonamo, do ita moale. Iehova ese iena Hereva amo ita ia hagoadaia ita abia gaudia ita gaukaralaia namonamo totona. Hegeregere, Baibel ia gwau: “Mai haheauka danu ia gaukara noho tauna ena laloa, ese anina ia havaraia bada noho,” bona “oiemu imana ese ia davaria gaukara ibounai, be do oi karaia mai oiemu goada ibounai danu.” (Aon. 21:5; Had. 9:10) Baibel ma ia gwau: “Dala ita davaria negadiai, namona be taunimanima ibounai dekenai kara namo ita karaia,” bona ‘ita ta ta ese harihari gauna ita abia hegeregerena, . . . do ita gaukaralaia ta ta ita hesiai henia totona.’ (Gal. 6:10; 1 Pet. 4:10) Unai ese ia hahedinaraia, Iehova ia ura ita karaia gaudia amo ita bona ma haida ese namo idia davaria.

3. Ita be dahaka ita karaia diba lasi?

³ Danu, Iehova ia diba iseda goada be mai hetoana. Ita sibona ese kara dika bona mase ita haorea diba lasi. Ma danu, ita ese ma haida ita biagua diba lasi, badina ita ibounai be mai iseda ura kwalimu. (1 Kin. 8:46) Bona ena be gau haida dekenai iseda diba ia bada ia lao, to Iehova ena matanai ita be do natudia bamona.​—⁠Isa. 55:⁠9.

4. Inai stadi ai dahaka do ita herevalaia?

⁴ Namona be nega ibounai Iehova dekenai ita tabekau, bona ita abia dae momokani ia ese ita do ia durua bona ita karaia diba lasi gaudia be ia ese ita totona do ia karaia. To bema ita hegeregere, namona be kara ta ita karaia hekwakwanai ta ita hamaoromaoroa bona ma haida ita durua totona. (Salamo 37:3 duahia.) * Oibe, namona be ‘Iehova dekenai do ita abidadama, bona kara namo do ita karaia.’ Unai idia karaia taudia haida mani ita laloa, idia be Noa, Davida, bona Dirava ena abidadama hesiai taudia ma haida. Idia be Iehova dekenai idia tabekau bona mai momokani ida idia kara. Do ita itaia edena bamona idia ese idia karaia diba lasi gaudia bona idia karaia diba gaudia hegeregerena idia kara.

5. Noa ena nega mani oi herevalaia.

⁵ Noa ena nega ai, matabodaga karadia bona kara “dika be gabu ibounai dekenai” idia vara. (Gen. 6:​4, 9-13) Ia diba kahirakahira Iehova ese iena nega ai idia noho kara dika taudia ibounai do ia haorea. Momokani, taunimanima edia kara dainai, reana Noa be ia lalohisihisi bada. Unai nega ai Noa ia laloparara, ia be gau haida sibona ia karaia diba, to gau ma haida be ia karaia diba lasi.

6, 7. (a) Noa be dahaka ia karaia diba lasi? (b) Edena dala ai iseda nega bona Noa ena nega be hegeregerena?

⁶ Noa ia karaia diba lasi gauna: Ena be Noa be mai abidadama ida Iehova ena hadibaia hereva ia harorolaia, to kara dika taudia ia doria lasi unai hereva idia abia dae totona, bona danu Abata ia mailaia haraga diba lasi. To, namona be Noa ia abia dae momokani Iehova ese iena gwauhamata hegeregerena kara dika do ia haorea bona nega maorona ai unai do ia karaia.​—⁠Gen. 6:⁠17.

⁷ Hari danu, tanobada be kara dika amo ia honu, bona ita diba Iehova ia gwauhamata unai dika ibounai do ia haorea. (1 Ioa. 2:17) To, taunimanima ita doria diba lasi “Basileia ena sivarai namona” idia abia dae totona. Bona ita ese “hisihisi badana” ita mailaia haraga diba lasi. (Mat. 24:​14, 21) Noa hegeregerena, iseda abidadama ia goada be namo, bona ita abia dae momokani kahirakahira Dirava ese kara ta do ia karaia. (Sal. 37:​10, 11) Oibe, kahirakahira Iehova ese inai tanobada dikana do ia hadikaia ore, bona ena ura do ia hagugurua.​—⁠Hab. 2:⁠3.

8. Edena dala ai Noa ia hahedinaraia ia be ia karaia diba gauna ia laloa? (Laulau ginigunana herevalaia.)

⁸ Noa ia karaia diba gauna: Noa be ia karaia diba gauna ia laloa, bona ia karaia diba lasi gaudia dainai ia lalomanoka lasi. Ia be “kara maoromaoro ia harorolaia tauna” dainai, Dirava amo ia abia hadibaia hereva ia harorolaia. (2 Pet. 2:⁠5) Noa be unai ia karaia dainai, iena abidadama be ia goada. To ia haroro sibona lasi, ia ese iena goada bona diba ia gaukaralaia Dirava ese ia henia maduna ia hagugurua totona, lagatoi haginia gaukarana unai.​—⁠Heberu 11:7 duahia.

9. Edena dala ai Noa ena haheitalai ita tohotohoa diba?

⁹ Noa hegeregerena, namona be “Lohiabada ena gaukara idauidau lalonai do [ita] bisi.” (1 Kor. 15:58) Unai gaukara haida be, tomadiho rumadia haginia bona hanamoa, hebou maragidia bona badadia ai heduru ita henia, eiava brens ofesi o rimout trensleisen ofesi ena gaukara ita durua. To gau badana be haroro gaukara dekenai ita bisi, badina unai gaukara ese iseda vaira nega ena helaro ia hagoadaia. Taihu ta ia gwau: “Ma haida dekenai Dirava ena Basileia ena hahenamo oi herevalaia neganai, do oi itaia idia be helaro lasi bamona, idia dekenai hari idia davaria hekwakwanai be ia noho hanaihanai gauna.” Momokani, haroro gaukara ese ita ia durua vaira nega ita laloa maoromaoro bona mauri ena heau helulu lalonai ita hesiku lasi totona.​—⁠1 Kor. 9:⁠24.

10. Davida dekenai ia vara gauna herevalaia.

¹⁰ Iehova be King Davida dainai ia gwau, ia be “egu lalohadai hegeregerena gau ibounai ia karaia.” (Kara 13:22) Oibe, Davida ese ena mauri ibounai lalonai Iehova ia kamonai henia. To, nega ta kara dika badana ia karaia. Ia be Bataseba ida ia heudahanai. Davida ia laloa unai kara dika do ia hunia toho, unai dainai dala ia karaia tuari lalonai Uria idia hamasea totona. Bena Uria hamasea revarevana be Uria sibona ese ia laohaia! (2 Sam. 11:​1-21) To gabeai Davida ena kara dika ia hedinarai. (Mar. 4:22) Unai ia vara neganai, Davida be dahaka ia karaia?

11, 12. (a) Davida ia kara dika murinai, dahaka ia karaia diba lasi? (b) Kara dika badana ita karaia murinai bema ita helalo-kerehai, Iehova be dahaka do ia karaia?

¹¹ Davida ia karaia diba lasi gauna: Davida be ia karaia karana ia haidaua diba lasi. Ma danu, iena kerere amo ia vara dika ia dadaraia diba lasi. Oibe, Davida ena mauri ibounai lalonai, iena kerere ese ia havaraia dika ia mamia. (2 Sam. 12:​10-12, 14) Unai dainai ia abidadama be namo. Bona ia abia dae momokani, bema ia helalo-kerehai, Iehova ese ena dika do ia gwauatao bona do ia durua iena kerere dainai idia vara dika ia haheaukalaia totona.

¹² Ita be goevadae lasi dainai, nega momo ita kerere. Bona ita karaia kerere haida be bada herea bona nega haida ia auka, ita karaia vadaeni kererena ita haidaua totona. To, iseda kerere dainai ia vara dika be iseda mauri ibounai lalonai do ita haheaukalaia. (Gal. 6:⁠7) To Dirava ena hereva ita abidadama henia be namo, badina ita diba bema ita helalo-kerehai, Iehova ese nega aukadia lalonai ita do ia durua​—⁠herevana unai nega aukadia be ita sibona ese ita havaraia.​—⁠Isaia 1:​18, 19; Kara 3:19 duahia.

13. Davida ese edena dala ai iena abidadama ia hagoadaia lou?

¹³ Davida ia karaia diba gauna: Davida ia ura Iehova ese do ia durua, unai amo ena abidadama ia hagoadaia lou diba. Unai dainai Iehova ena peroveta tauna Natana ena sisiba ia abia dae. (2 Sam. 12:13) Danu, Davida ese Iehova ia guriguri henia, iena kara dika ia gwauraia hedinarai, bona ia hahedinaraia ia ura bada Iehova ese do ia lalonamo henia lou. (Sal. 51:​1-17) Davida be ena kara kerere dainai ia lalomanoka lasi, to lalohadai maorona ia abia. Oibe, ia ese unai kara dika badadia ia karaia lou lasi. Lagani haida murinai, ia be mai abidadama ida ia mase. Oibe, Davida ena abidadama karana be Iehova ese do ia laloaboio lasi.​—⁠Heb. 11:​32-34.

14. Davida ena haheitalai amo dahaka ita dibaia?

¹⁴ Davida ena haheitalai amo dahaka ita dibaia? Bema kara dika badana ta ita karaia, namona be ita helalo-kerehai momokani bona Iehova ita noia iseda dika ia gwauatao totona. Namona be ia dekenai iseda kara dika ita gwauraia hedinarai. (1 Ioa. 1:⁠9) Danu, elda taudia edia heduru ita tahua be namo, idia ese Baibel amo ita do idia durua. (Iamesi 5:​14-16 duahia.) Bema Iehova ena dala ita badinaia, ita hahedinaraia ita be iena gwauhamata ita abidadama henia. Oibe, ia gwauhamata ita do ia hanamoa bona iseda dika do ia gwauatao. Unai dainai namona be lalohadai maorona ita abia, Iehova ita hesiai henia noho, bona mai lalogoada ida vaira nega ita naria.​—⁠Heb. 12:​12, 13.

15. Hana ena haheitalai amo dahaka ita dibaia?

¹⁵ Reana idaunegai abidadama taudia ma haida oi laloatao diba, idia be Iehova idia abidadama henia bona mai momokani ida idia kara. Hegeregere, Hana be ia gabani bona unai hekwakwanai be sibona ese ia hanamoa diba lasi. To ia diba Iehova ese ia do ia durua, unai dainai nega ibounai dubu helaga dekenai ia lao bona guriguri amo ena lalohekwarahi ia gwauraia. (1 Sam. 1:​9-11) Ia be haheitalai namona, ani? Bema ita be mai iseda gorere o ita davaria noho hekwakwanai be ita hamaoromaoroa diba lasi, namona be Iehova dekenai iseda lalohekwarahi ita gwauraia, badina ia be ita ia laloa bada. (1 Pet. 5:​6, 7) Bona ita gaukara goada Keristani heboudia bona hesiai gaukara ma haida amo goada ita abia totona.​—⁠Heb. 10:​24, 25.

16. Samuela ena haheitalai amo tama sina be dahaka idia dibaia?

¹⁶ Abidadama tama sina edia natudia be tomadiho momokani idia rakatania neganai, be edena bamona? Samuela ese ena natuna memero ia doria diba lasi kara maoromaoro taravatudia idia badinaia totona. (1 Sam. 8:​1-3) To unai hekwakwanai be Iehova ena imana dekenai ia rakatania. Bona ia hekwarahi iena guba Tamana, Iehova, ia badinaia bona hamoalea noho totona. (Aon. 27:11) Hari, Keristani tama sina momo be unai bamona hekwakwanai idia davaria danu. To idia diba ia boio merona ena parabole ese ia herevalaia tamana hegeregerena, Iehova be ia noho hegaegae edia kara dika amo idia helalo-kerehai taudia ia welkam henia totona. (Luka 15:20) Ma danu, tama sina idia gaukara goada Iehova idia badinaia noho totona, badina idia ura edia haheitalai amo edia natudia idia durua kongrigeisen dekenai do idia giroa lou.

17. Ogogami vabuna ena haheitalai ese edena dala ai ita ia hagoadaia diba?

¹⁷ Iesu ena negai ia noho ogogami vabuna mani ita laloa. (Luka 21:​1-4 duahia.) Ia ese dubu helaga lalonai idia vara kara kereredia ia koua diba lasi. (Mat. 21:​12, 13) Ma danu, gau ta ia karaia diba lasi ena ogogami maurina ia hanamoa totona. To, mai ura bada ida “moni maragimaragi rua” ia udaia, unai be “ena mauri durua moni ibounai.” Unai abidadama hahine ese ia hahedinaraia ia be mai kudouna ibounai ida Iehova ia abidadama henia, badina ia diba bema tomadiho karadia ia atoa guna, Dirava ese iena dabu gaudia do ia henia. Unai vabu ena abidadama karana ese tomadiho momokani ia durua. Unai hegeregerena, ita diba bema Basileia ita atoa guna, Iehova ese iseda dabu gaudia do ia henia.​—⁠Mat. 6:⁠33.

18. Mai momokani ida ia kara tadikakana ena haheitalai gwauraia.

¹⁸ Hari danu, iseda tadikaka taihu momo be Iehova idia abidadama henia bona mai momokani ida idia kara. Tadikaka Malcolm mani ita laloa. Ia be Dirava ia abidadama henia ela bona lagani 2015 ai ia mase. Ia bona ena adavana ese Iehova idia hesiai henia lalonai, idia ese nega namodia bona dikadia idia davaria. Ia gwau: “Ita diba lasi iseda mauri dekenai dahaka do ia vara, bona nega haida unai be auka. To Iehova ese ia dekenai idia tabekau taudia ia hanamoa.” Malcolm be dahaka hagoadaia herevana ia henia? Ia gwau: “Oi guriguri Iehova ese oi do ia durua iena hesiai gaukara oi goadalaia bona karaia noho totona. Oi karaia diba gaudia oi laloa, to oi karaia diba lasi gaudia oi laloa lasi.” *

19.(a) Dahaka dainai lagani 2017 ena siri badana be maoro? (b) Emu mauri ai, lagani 2017 ena siri badana be edena dala ai oi badinaia diba?

¹⁹ Inai nega oromana ai, “kara dika taudia . . . ese edia kara dika do idia habadaia momokani” dainai, nega aukadia do ita davaria. (2 Tim. 3:​1, 13) Unai dainai namo lasi ita davaria hekwakwanai ese iseda Dirava badinaia karana ia hadikaia. To gau badana be Iehova ita abidadama henia bona mai momokani ida ita kara. Lagani 2017 ena siri badana hegeregerena, ia gwau: “[Iehova] dekenai do oi abidadama, bona kara namo do oi karaia”!​—⁠Sal. 37:⁠3.