1. Mauri davalaia boubouna dainai, dahaka hahenamo ita abia?

IESU KERISO ena mauri davalaia boubouna dainai, hahenamo momo ita davaria. Oibe, mauri davalaia boubouna ese dala ia kehoa Adamu ena natudia ibounai, kara maoromaoro idia ura henia taudia unai, be Dirava ena ruma bese taudia ai idia lao totona. Danu, dala ia kehoa mai moale ida ita noho hanaihanai totona. To, Keriso ena mauri davalaia boubouna ese kamonai taudia dekenai vaira nega namona sibona ia henia lasi. Iesu be mai ena ura ida ena mauri ia bouboulaia neganai, ia hahedinaraia Iehova sibona ia lohia be maoro, tanobada bona guba taudia dekenai unai be mai anina bada.—Heb. 1:8, 9.

2. (a) Iesu ena guriguri ai dahaka mai anina bada gaudia ia herevalaia? (Laulau ginigunana herevalaia.) (b) Inai stadi ai dahaka do ita herevalaia?

² Lagani rua idia do noho bena Iesu ese mauri davalaia boubouna do ia henia neganai, ia ese ena hahediba taudia dekenai inai guriguri ia hadibaia: “Aiemai Tamana guba dekenai oi noho, namona be ibounai ese oiemu ladana do idia hahelagaia. Oiemu Basileia  do ia mai. Oiemu ura gauna tanobada dekenai do ia vara, guba dekenai ia vara bamona.” (Mat. 6:9, 10) Mani ita itaia edena dala ai mauri davalaia boubouna ese Dirava ena ladana ia hahelagaia, Dirava ena Basileia ia durua, bona Dirava ena ura ia hagugurua.

3. Iehova ena ladana ese dahaka ia hahedinaraia, bona edena dala ai Satani ese unai ladana helagana ia hadikaia?

³ Iesu ese ia hadibaia gurigurina ai, ia gwauraia noinoi ginigunana be Dirava ena ladana do idia hahelagaia. Iehova ena ladana ese iena kara namo, hairai, bona helaga karana ia hahedinaraia. Guriguri ma ta ai, Iesu ese Iehova ia gwauraia “Tamana Helagana.” (Ioa. 17:11) Iehova be ia helaga dainai, iena hakaua herevadia bona taravatu ibounai be idia helaga. To Eden umana ai, Satani ese koikoi dalanai Dirava ia atoa taravatudia ia hepapahuahulaia. Satani ese Iehova dainai ia gwauraia herevana be koikoi, bona ia ese Dirava ena ladana helagana ia hadikaia.—Gen. 3:1-5.

4. Edena dala ai Iesu ese Dirava ena ladana ia hahelagaia?

⁴ Iesu ese Iehova ena ladana ia ura henia bada. (Ioa. 17:25, 26) Bona Dirava ena ladana ia hahelagaia. (Salamo 40:8-10 duahia.) Tanobada ai ia ese kara maoromaoro ia badinaia, unai amo ia hamomokania Iehova be mai ena maoro taunimanima totona taravatu ia atoa. Ena be Satani ia karaia gaudia dainai Iesu be hisihisi bada ia mamia bona gabeai ia mase, to iena guba Tamana ia badinaia noho. Unai amo ia hamomokania goevadae tauna ese Dirava ena kara maoromaoro taravatudia ia badinaia goevagoeva diba.

5. Edena dala ai Dirava ena ladana do ita hahelagaia?

⁵ Edena dala ai do ita hahedinaraia ita be Iehova ena ladana ita ura henia? Iseda kara amo. Oibe, Iehova ia ura do ita helaga. (1 Petero 1:15, 16 duahia.) Anina be Iehova sibona do ita tomadiho henia bona mai kudouna ibounai ida ia do ita kamonai henia. Ena be ita idia dagedage henia, to namona be ita hekwarahi iena hakaua herevadia bona taravatu goevadaedia ita badinaia totona. Kara maoromaoro ita karaia neganai, iseda diari ita hahedinaraia bona unai amo Iehova ena ladana ita hanamoa. (Mat. 5:14-16) Ita be helaga taudia dainai, iseda mauri dalana amo do ita hamomokania Iehova ena taravatu be namo bona maoromaoro bona Satani ena samania herevadia be koikoi. Kerere ita karaia neganai, namona be ita helalo-kerehai bona Iehova ena ladana idia hadikaia karadia ita dadaraia.—Sal. 79:9.

6. Ena be ita be goevadae lasi, to dahaka dainai Dirava ese ita ia gwauraia maoromaoro?

⁶ Keriso ese ia henia boubou gauna amo Iehova ese abidadama taudia edia kara dika ia gwauatao. Bona edia mauri idia gwauhamatalaia taudia ia abia dae bona idia be ia idia tomadiho henia taudia ai idia lao. Iehova ese horoa Keristani taudia ia gwauraia maoromaoro bona iena natudia ai ia halaoa, bona ia ese “mamoe ma haida” ia gwauraia maoromaoro bona iena turana ai ia halaodia. (Ioa. 10:16; Roma 5:1, 2; Iam. 2:21-25) Hari danu, mauri davalaia boubouna dainai ita be iseda Tamana vairanai mai maoromaoro ida ita gini diba bona iena ladana ita hahelagaia.

7. Basileia ena lohia henunai, mauri davalaia boubouna dainai dahaka hahenamo do ita abia?

⁷ Iesu ese ia hadibaia gurigurina ai, Dirava ma ia noia: “Oiemu Basileia do ia mai.” Mauri davalaia boubouna bona Dirava ena Basileia be edena dala ai idia hegeregere? Mauri davalaia boubouna dainai, Dirava ese  taunimanima 144,000 ia haboudia, bona idia be Keriso ida guba dekenai king bona hahelaga gaukarana do idia karaia. (Apok. 5:9, 10; 14:1) Iesu bona 144,000 taudia be Dirava ena Basileia lalonai do idia lohia, bona lagani 1,000 lalonai, idia ese mauri davalaia boubouna ena hahenamo idauidau be kamonai taudia dekenai do idia henia. Oibe, tanobada be paradaiso ai do ia lao, abidadama taudia ibounai be goevadae taudia ai do idia lao, bona Dirava ena ruma bese taudia—guba bona tanobada ai—be mai lalotamona ida do idia noho. (Apok. 5:13; 20:6) Iesu ese gaigai ena kwarana do ia moia patapata bona Satani ena gwau-edeede karadia ibounai do ia kokia.—Gen. 3:15, BHḡ.

8. (a) Edena dala ai Iesu ese ena hahediba taudia dekenai ia hahedinaraia Dirava ena Basileia be mai anina bada? (b) Hari edena dala ai Basileia ita durua diba?

⁸ Iesu be tanobada ai ia noho neganai, ena hahediba taudia dekenai ia hahedinaraia Dirava ena Basileia be mai anina bada. Iesu ia bapatiso murinai, ia ese “Dirava ena Basileia ena sivarai namona” be gabu momo dekenai ia harorolaia. (Luka 4:43) Guba dekenai ia do daekau lasi neganai, ena hahediba taudia ia hamaoroa, “tanobada ena daudau momokani gabudia dekenai” ia do idia gwauraia hedinarai. (Kara 1:6-8) Basileia harorolaia gaukarana amo taunimanima ibounai be mauri davalaia boubouna ena namo idia dibaia bona Dirava ena Basileia ena lohia henunai do idia noho. Hari inai negai, Basileia ita durua dalana ta be Keriso ena tadikaka ida Basileia ena sivarai namona be tanobada ibounai dekenai ita harorolaia.—Mat. 24:14; 25:40.

9. Dahaka dainai ita abia dae momokani Iehova ese iena ura do ia hagugurua?

⁹ Iesu ena hereva ena anina be dahaka, ia gwau: “Oiemu ura gauna . . . do ia vara”? Iehova be Havaraia Tauna. Unai dainai ia gwauraia hereva ibounai be do idia guguru. (Isa. 55:11) Satani ena gwau-edeede karana ese ia do ia koua lasi, ia ese ena ura taunimanima totona do ia hagugurua. Matamana negana amo, Iehova ia ura tanobada be Adamu bona Heva edia goevadae natudia ese do idia hahonua. (Gen. 1:28) Unai dainai bema Adamu bona Heva be natudia idia do havaraia lasi neganai idia mase, Dirava ena ura edia natudia totona be do ia guguru lasi. To, Adamu bona Heva idia kara dika murinai, natudia idia havaraia, bona Iehova ese unai ia koua lasi. Mauri davalaia boubouna dainai, Dirava ese abidadama taudia ibounai dekenai goevadae maurina do ia henia bona do idia noho hanaihanai. Iehova be taunimanima ia lalokau henia, bona ia ura kamonai taudia be iena ura hegeregerena do idia noho.

10. Mauri davalaia boubouna ese edena dala ai mase taudia ia durua?

¹⁰ Idia mase vadaeni taudia bilioni momo be Iehova idia do dibaia o hesiai henia lasi neganai, idia mase. Idia dekenai dahaka do ia vara? Mauri davalaia boubouna ese dala ia kehoa mase taudia idia toreisi lou totona. Iseda lalokau guba Tamana ese idia do ia hatorea isi lou bona idia dekenai nega do ia henia iena ura idia dibaia bona mauri hanaihanai idia abia totona. (Kara 24:15) Iehova ia ura lasi taunimanima idia mase, to ia ura idia noho hanaihanai. Ia be mauri ena Badina dainai, idia toreisi lou taudia ibounai edia Tamana ai do ia lao. (Sal. 36:9) Unai dainai Iesu ese ia hadibaia gurigurina ai, ia gwau: “Aiemai Tamana guba dekenai oi noho.” (Mat. 6:9) Iehova ese Iesu dekenai mai anina bada gaukarana ia henia, ia ese mase taudia do ia hatorea isi lou. (Ioa. 6:40, 44) Paradaiso ai, Iesu ese ena gaukara do ia hagugurua, ia gwau: “Toreisi lou be lau bona mauri be lau.”—Ioa. 11:25.

11. Dirava ena ura “hutuma bada” taudia totona be dahaka?

 ¹¹ Iehova ena hariharibada karana be taunimanima haida sibona dekenai do ia hahedinaraia lasi, badina Iesu ia gwau: “Dirava ena ura ia karaia tauna be egu tadikaka, egu taihuna bona egu sinana.” (Mar. 3:35) Dirava ia ura bese, iduhu, bona gado idauidau amo idia mai “hutuma bada” taudia be ia idia tomadiho henia taudia ai idia lao. Keriso ena mauri davalaia boubouna idia abidadama henia bona Dirava ena ura idia karaia taudia ibounai do idia gwau: “Emai hahemauri be emai Dirava, terona ai ia helai tauna amo bona Mamoe Natuna amo.”—Apok. 7:9, 10.

12. Iesu ese ia hadibaia gurigurina ese edena dala ai Iehova ena ura ia hahedinaraia?

¹² Iesu ese ia hadibaia guriguri ai ia gwauraia noinoi herevadia ese Iehova ena ura kamonai taudia totona ia hahedinaraia. Unai guriguri hegeregerena, ita ura bada Iehova ena ladana ita hahelagaia. (Isa. 8:13) Iesu ena ladana ena anina be “Iehova be Hahemauri Tauna,” bona ia ese mauri davalaia boubouna amo ita ia hamauria, unai amo Iehova ena ladana ia hanamoa. Dirava ena Basileia ena lohia henunai, taunimanima ibounai be mauri davalaia boubouna amo namo do idia davaria. Momokani, Iesu ese ia hadibaia gurigurina ese ia hahedinaraia, Dirava ese ena ura do ia hagugurua, bona gau ta ese ia do ia koua lasi.—Sal. 135:6; Isa. 46:9, 10.

13. Iseda bapatiso amo dahaka ita hahedinaraia?

¹³ Ita hahedinaraia ita be mauri davalaia boubouna dainai ita moale, bema unai boubou gauna ita abidadama henia dainai, iseda mauri be Iehova dekenai ita gwauhamatalaia bona ita bapatiso. Unai amo ita hahedinaraia “ita be Iehova ena.” (Roma 14:8) Oibe, ita bapatiso neganai, ita ese Dirava ita noia lalomamina namona ia henia totona. (1 Pet. 3:21) Iehova ese unai noinoi ia abia dae bona  Keriso ena boubou gauna ena rara amo ita ia hagoevaia. Unai dainai ita abia dae momokani ia ese ita dekenai ia gwauhamatalaia gaudia ibounai do ia henia.—Roma 8:32.

14. Dahaka dainai iseda dekena taudia ita lalokau henia be namo?

¹⁴ Edena dala ma ta ai ita hahedinaraia mauri davalaia boubouna dainai ita moale? Iehova ese ia karaia gaudia ibounai amo iena lalokau ia hahedinaraia, unai dainai ia ura ia idia tomadiho henia taudia ese lalokau do idia hahedinaraia. (1 Ioa. 4:8-11) Iseda dekena taudia ita lalokau henia neganai, ita hahedinaraia ita ura ‘iseda Tamana guba ai ia noho ena natudia ai do ita lao.’ (Mat. 5:43-48) Taravatu ginigunana be Iehova do ita lalokau henia, bona iharuana be iseda dekena taudia do ita lalokau henia. (Mat. 22:37-40) Iseda dekena taudia dekenai lalokau ita hahedinaraia dalana badana be, idia dekenai Dirava ena Basileia ena sivarai namona ita harorolaia. Momokani, taunimanima dekenai iseda lalokau ita hahedinaraia neganai, Dirava ena hairai ita hahedinaraia. Danu, iseda tadikaka bona ma haida ita lalokau henia neganai, ita dekenai Dirava ena lalokau ia hedinarai goevagoeva.—1 Ioa. 4:12, 20.

15. (a) Hari Iehova amo dahaka hahenamo ita abia? (b) Vaira nega ai dahaka hahenamo do ita abia?

¹⁵ Mauri davalaia boubouna ita abidadama henia neganai, Dirava ese iseda kara dika do ia gwauatao. Baibel ia gwau ia ese iseda “kara dika do ia kokia.” (Kara 3:19-21 duahia.) Matamanai ita herevalaia bamona, mauri davalaia boubouna dainai, Iehova ese iena lauma amo ia horoa taudia be iena natudia ai ia halaoa. (Roma 8:15-17) To Iehova ese ita—“mamoe ma haida”—eda ladana be setifiket ta dekenai ia torea bamona. Ita be goevadae taudia ai ita lao bona hahetoho ginigabena ita hanaia murinai, Iehova be mai moale ida unai setifiket do ia sainia, bona ita be iena tanobada natudia ai do ia halaoa. (Roma 8:20, 21; Apok. 20:7-9) Iehova ena lalokau iena natudia totona be do ia noho hanaihanai. Mauri davalaia boubouna amo do ita abia hahenamo danu be do ia noho hanaihanai. (Heb. 9:12) Oibe, unai harihari gauna amo ita davaria namo be noho hanaihanai gauna. Tau ta o siahu ta ese ita amo unai do ia kokia diba lasi.

16. Edena dala ai mauri davalaia boubouna ese ita ia ruhaia?

¹⁶ Idia helalo-kerehai bona Iehova ena ruma bese taudia ai idia lao taudia be Diabolo ese ia koudia diba lasi. Iesu be “nega tamona sibona” ia mase. Unai dala amo mauri davalaia boubouna ia henia. (Heb. 9:24-26) Bona Adamu amo ita abia hanai kara dika bona mase ia haorea momokani. Keriso ese ia henia boubou gauna dainai, ita be Satani ena tanobada ese ia guia lasi, bona mase dainai ita gari lasi.—Heb. 2:14, 15.

17. Iehova ena lalokau karana be edena bamona oi laloa?

¹⁷ Dirava ena gwauhamata ibounai ita abidadama henia diba. Iena havaraia gaudia ese ia atoa taravatudia idia badinaia namonamo hegeregerena, ia ese iena gwauhamata ibounai do ia hagugurua. Ia be ia idau diba lasi. (Mal. 3:6) Iehova ese ita dekenai mauri sibona ia henia lasi. To ita dekenai iena lalokau ia hahedinaraia danu. Baibel ia gwau: “Ita diba bona ita abia dae Dirava ese ita ia lalokau henia. Dirava be lalokau.” (1 Ioa. 4:16) Tanobada ibounai be paradaiso ai do ia lao, bona tanobada ai idia noho taudia ibounai ese Dirava ena lalokau do idia hahedinaraia. Bona Dirava ena guba oreana ida ita gwau: “Namona be iseda Dirava dekenai hahenamo, hairai, aonega, tanikiu, hemataurai, siahu bona goada do idia noho ela bona hanaihanai. Amen.”—Apok. 7:12.