1. Edena dala ai Iehova ena gwauhamata laloa dobu karana ese ita ia durua?

 IEHOVA ia gwauhamata ia idia badinaia taudia be “mauri hanaihanai” do idia abia. (Roma 6:23) Iehova ena gwauhamata ita laloa dobu neganai, iseda lalokau ia dekenai ia bada ia lao. Mani oi laloa: Iseda guba Tamana be ita ia lalokau henia bada bona ia ura lasi ia ita rakatania.

2. Edena dala ai mauri hanaihanai gwauhamatana ese ita ia durua?

² Dirava ena gwauhamata mauri hanaihanai dekenai ese ita ia hagoadaia hari ita davaria hekwakwanai ita haheaukalaia totona. Hegeregere, ena be iseda inai taudia idia ura ita idia alaia, to Iehova do ita badinaia noho. Dahaka dainai? Badina ta be bema Iehova dainai mai abidadama ida ita mase, ita do ia hatorea isi lou bona do ita mauri hanaihanai. (Ioa 5:28, 29; 1 Kor. 15:55-58; Heb. 2:15) Dahaka dainai ita abia dae momokani mauri hanaihanai do ita abia? Mani badina haida ita herevalaia.

3. Dahaka dainai ita abia dae momokani Iehova be ita dekenai mauri hanaihanai ia henia diba? (Salamo 102:12, 24, 27)

³ Ita diba momokani Iehova be ita dekenai mauri hanaihanai ia henia diba, badina ia be mauri ena badina bona ia be noho hanaihanai Diravana. (Sal. 36:9) Mani Baibel ena siri haida ita itaia, idia hamomokania Iehova be gunaguna amo ia noho bona do ia noho hanaihanai. Salamo 90:2 ia gwau Iehova be idaunega “amo ela bona hanaihanai” ia noho. Salamo 102 be unai bamona ia hereva danu. (Salamo 102:12, 24, 27 duahia.) Bona peroveta tauna Habakuku ese iseda guba Tamana  be inai bamona ia herevalaia: “Iehova e, oi be gunaguna negana amo oi noho ema bona hari, ani? Egu Helaga Diravana e, oi be oi mase diba lasi.”​—Hab. 1:12.

4. Iehova be idaunega amo ia noho ema bona hari ita lalopararalaia lasi neganai, ita daradara be namo, a? Herevalaia.

⁴ Iehova be “noho hanaihanai Diravana” oi lalopararalaia be auka, a? (Isa. 40:28) Taunimanima momo danu be unai idia lalopararalaia lasi. Elihu ese Dirava ia herevalaia ia gwau: “Ia noho ena daudau ita diba lasi.” (Iobu 36:26) To, gau ta ita lalopararalaia lasi dainai, namo lasi ita gwau ia be ia noho momokani lasi. Hegeregere, bema paua ena gaukara dalana ita lalopararalaia lasi, anina be paua ia noho lasi, a? Lasi, ia noho! Unai hegeregerena, Iehova be idaunegai amo ia noho bona do ia noho hanaihanai herevana be taunimanima ese idia lalopararalaia lasi. Ena be unai ita lalopararalaia eiava lasi, to hereva momokani be inai: Iehova be noho hanaihanai Diravana. (Roma 11:33-36) Bona guba bona tanobada gaudia, hegeregere dina bona hisiu ia do karaia lasi neganai, Iehova Dirava be ia noho vadaeni. Ita diba momokani Iehova “ese ena siahu amo tanobada ia karaia.” Oibe, “guba be dabua ta bamona ia kehoa badabada” lasi neganai, Dirava ia noho vadaeni. (Ier. 51:15; Kara 17:24) Ita abia dae momokani do ita mauri hanaihanai diba ena badina ma ta be dahaka?

5. Dirava ese Adamu bona Heva be dahaka ia henia?

⁵ Iehova ese tanobada ai ia havaraia mauri gaudia haida be do idia mase, to taunimanima be unai bamona lasi. Ia karadia idia noho hanaihanai totona. To, Iehova ese Adamu ia sisiba henia: “Namo bona dika dibaia auna ena huahua oi ania lasi, badina oi ania dinana ai, do oi mase.” (Gen. 2:17) Bema Adamu bona Heva be Iehova idia kamonai henia, do idia mase lasi. To ita abia dae diba reana Iehova ese nega maorona ai, idia do ia hamaoroa “mauri auna” ena huahua idia ania totona. Unai ese do ia hamomokania Iehova be ia ura do idia “mauri hanaihanai.” b​—Gen. 3:22.

6-7. (a) Dahaka ese ia hamomokania Dirava be taunimanima ia havaraia idia mauri hanaihanai totona? (b) Paradaiso ai oi ura dahaka gauna dekenai emu diba do oi habadaia? (Laulau oi itaia.)

⁶ Saiens taudia haida idia davaria iseda harana be infomeisen momo herea ia haboua  diba. Unai be hoa gauna. Lagani 2010 ai, magasin ta ia gwau, unai be hegeregere ita rekodia vidio ta ena lata be hora 3 milioni bamona be iseda harana lalonai ita haboua. Unai vidio be lagani 300 mai kahana lalonai do ita itaia. Unai ese ia hamomokania, Iehova ese iseda harana ia karaia be lagani 70 o 80 sibona lalonai do ita gaukaralaia lasi, to lagani momo lalonai do ita gaukaralaia diba.​—Sal. 90:10.

⁷ Iehova be ita dekenai mauri hanaihanai urana ia atoa. Baibel ia gwau Dirava ese “taunimanima edia kudouna ai noho hanaihanai urana ia atoa.” (Had. 3:11) Unai dainai mase be iseda inai tauna bamona. (1 Kor. 15:26) Bema gorere badana ta ita davaria, do ita hekure sibona bona ita mase, a? Lasi. Vaia, doketa do ia itaia bona muramura ita abia unai gorere hanamoa totona. Momokani, unai do ita karaia badina ita ura lasi ita mase. Bona bema iseda lalokau tauna ta ia mase, herevana ia be matamata o buruka, to lagani momo lalonai do ita lalohisihisi noho. (Ioa. 11:32, 33) Oibe, hanaihanai gau matamatadia do ita dibaia noho bona iseda ura be do ita mauri hanaihanai, badina iseda lalokau Havaraia tauna ese unai bamona ita ia karaia. Unai ese ia hahedinaraia ia ese ita dekenai mauri hanaihanai ia henia diba. To, ita mauri hanaihanai diba ena badina ma haida idia noho. Mani idaunegai bona hari Iehova ese ia karaia gaudia ita herevalaia, unai ese idia hamomokania Iehova be iena palani ia haidaua lasi.

8. Isaia 55:11 amo dahaka ita dibaia?

⁸ Ena be Adamu bona Heva ese edia natudia dekenai mase idia mailaia, Iehova be iena palani  ia haidaua lasi. (Isaia 55:11 duahia.) Bona ia ura abidadama taudia be do idia mauri hanaihanai. Iehova ese ia gwauraia bona karaia gaudia ita laloa neganai, ita diba ia ura iena palani do ia hagugurua.

9. Dirava ena gwauhamata be dahaka? (Daniela 12:2, 13)

⁹ Iehova ia gwauhamata mase taudia do ia hatoredia isi lou bona idia dekenai mauri hanaihanai do ia henia. (Kara 24:15; Tito 1:1, 2) Abidadama tauna Iobu ia abia dae momokani Iehova ia ura dikadika idia mase taudia do ia hamauridia lou. (Iobu 14:14, 15) Peroveta tauna Daniela ia diba mase taudia be do idia toreisi lou bona do idia mauri hanaihanai. (Sal. 37:29; Daniela 12:2, 13 duahia.) Iesu ena negai, Iuda taudia idia diba Iehova ese ena abidadama hesiai taudia dekenai “mauri hanaihanai” do ia henia. (Luka 10:25; 18:18) Iesu be unai gwauhamata ia herevalaia momo bona ia danu be iena Tamana ese ia hatorea isi lou.​—Mat. 19:29; 22:31, 32; Luka 18:30; Ioa. 11:25.

10. Idaunegai idia vara toreisi lou sivaraidia ese dahaka ia hamomokania? (Laulau herevalaia.)

¹⁰ Iehova be Mauri Ia Henia Diravana bona mai ena siahu taunimanima ia hamauridia lou totona. Ia ese Elia dekenai siahu ia henia Sarepata vabu ena natuna mero ia hamauria totona. (1 Ki. 17:21-23) Gabeai, Dirava ena heduru amo peroveta tauna Elisaia be Suneme hahinena ena natuna mero ia hatorea isi lou. (2 Ki. 4:18-20, 34-37) Unai bona toreisi lou sivaraidia ma haida idia hamomokania, Iehova be mai ena siahu mase taudia ia hatorea isi lou totona. Iesu be tanobada ai ia noho neganai, ia hamomokania ena Tamana ese unai siahu be ia dekenai ia henia danu. (Ioa. 11:23-25, 43, 44) Hari Iesu be guba dekenai bona ‘Dirava ese ia dekenai siahu ia henia, guba bona tanobada gaudia ibounai ia biagua totona.’ Unai dainai, ia be mai ena siahu unai gwauhamata do ia hagugurua bona “gara gabudia ai idia noho taudia ibounai” do ia hatoredia isi lou bona mauri hanaihanai do idia abia.​—Mat. 28:18; Ioa. 5:25-29.

11. Edena dala ai Iesu ena mauri davalaia boubouna ese dala ia kehoa mauri hanaihanai ita abia totona?

¹¹ Dahaka dainai Iehova ese ena lalokau Natuna idia hamasea karana ia koua lasi? Iesu ese ena badina ia hahedinaraia, ia gwau: “Dirava ese tanobada ia lalokau henia bada dainai, ena Natuna korikorina ia henia, unai amo ia idia abidadama henia taudia ibounai be do idia mase lasi, to mauri hanaihanai do idia abia.” (Ioa. 3:16) Dirava ese ena Natuna ia henia iseda mauri davana karaia totona, unai ese dala ia kehoa mauri hanaihanai ita abia diba. (Mat. 20:28) Aposetolo Paulo ese Dirava ia laloa bada gauna ia herevalaia, ia gwau: “Tau tamona amo mase ia vara, unai hegeregerena tau tamona amo mase taudia do idia toreisi lou. Adamu dainai taunimanima ibounai idia mase noho, unai hegeregerena Keriso amo taunimanima ibounai be mauri do idia abia.”​—1 Kor. 15:21, 22.

12. Basileia ese edena dala ai Iehova ena ura ita totona do ia hagugurua?

¹² Iesu ese ena murinai idia raka taudia ia hadibaia ena Basileia do ia mai bona ena ura tanobada ai do ia karaia idia gurigurilaia totona. (Mat. 6:9, 10) Dirava ena ura ta be, taunimanima be tanobada ai do idia mauri hanaihanai. Unai ia hagugurua totona, Iehova ese ena Natuna be Mesia Basileiana ena King ai ia halaoa. Dirava ese tanobada amo 144,000 taudia ia abia hidi Iesu ida do idia gaukara hebou Dirava ena ura idia hagugurua totona.​—Apok. 5:9, 10.

13. Hari Iehova be dahaka ia karaia noho, bona oi be edena bamona ia oi durua?

¹³ Hari Iehova be “hutuma bada” taudia ia  haboua noho bona iena Basileia henunai do idia noho totona idia ia treinia noho. (Apok. 7:9, 10; Iam. 2:8) Ena be inai heheni bona tuari dainai, taunimanima idia noho hebou lasi, to “hutuma bada” taudia be idia gaukara goada inai heheni karadia idia dadaraia totona. Laulau dalanai edia tuari kaia be tano geia gaudia ai idia halaoa bamona. (Mika 4:3) Idia be tuari lalonai idia vareai lasi, to taunimanima dekenai Dirava momokanina bona ena ura idia hadibaia, unai amo idia danu be “mauri korikorina” idia abia diba. (1 Tim. 6:19) Dirava ena Basileia gaukara idia durua dainai, reana famili taudia ese idia dagedage henidia eiava edia moni be ia hegeregere lasi, to Iehova ese edia dabu gaudia ia henia noho. (Mat. 6:25, 30-33; Luka 18:29, 30) Unai ese idia hamomokania Dirava ena Basileia be ia noho momokani bona Dirava ena ura do ia hagugurua noho.

14-15. Iehova ena gwauhamata mase do ia ore momokani be edena bamona do ia guguru?

¹⁴ Iesu be hari guba ai Dirava ena Basileia ena King ai ia lao bona Iehova ese ia gwauhamatalaia gaudia do ia hagugurua. (2 Kor. 1:20) Lagani 1914 amo, Iesu be ena inai taudia huanai ia lohia noho. (Sal. 110:1, 2) Kahirakahira, ia bona ena lohia taudia do idia kwalimu bona kara dika taudia ibounai do idia hadikaia ore.​—Apok. 6:2.

 ¹⁵ Iesu ena Lohia Lagani 1,000 lalonai, mase taudia do idia toreisi lou bona kamonai taudia be do idia goevadae. Hahetoho ginigabena ai, Iehova ese ia gwauraia kara maoromaoro taudia be “tanobada do idia abia, bona tanobada ai do idia noho ela bona hanaihanai.” (Sal. 37:10, 11, 29) Ita moale badina “mase, ita inai henia gauna ginigabena, be do ia ore momokani.”​—1 Kor. 15:26.

16. Iehova ita badinaia ena badina badana be dahaka?

¹⁶ Inai atikol amo ita itaia, Baibel ese mauri hanaihanai ena helaro ia gwauraia. Inai nega aukadia lalonai, unai helaro ese ita ia durua diba Dirava ita badinaia noho totona. To Iehova ena lalonamo ita abia totona, mauri hanaihanai ita ura abia sibona be hegeregere lasi. Oibe, Iehova bona Iesu ita badinaia ena badina badana be idia ruaosi ita lalokau henia. (2 Kor. 5:14, 15) Unai lalokau ese ita ia hagoadaia idia ita tohotohoa bona ma haida dekenai iseda helaro ita harorolaia. (Roma 10:13-15) Bema ma haida ita laloa bada bona hariharibada karana ita hahedinaraia, Iehova do ia ura ita ia tura henia.​—Heb. 13:16.

17. Dahaka abia hidi do ita karaia? (Mataio 7:13, 14)

¹⁷ Mauri hanaihanai do idia abia taudia huanai do ita noho, a? Iehova ese mauri hanaihanai do ita abia dalana ia kehoa. Hari, ita sibona ese abia hidi do ita karaia mauri ia lao henia dalana ita badinaia noho totona. (Mataio 7:13, 14 duahia.) Noho hanaihanai ena mauri be edena bamona? Atikol 50 ai unai henanadai ena haere do ita herevalaia.