1, 2. (a) Dahaka mai anina bada karana ita hahedinaraia diba, bona dahaka dainai? (b) Inai stadi ai dahaka do ita herevalaia?

ITA be Keristani taudia korikoridia dainai, namona be mai aonega ida ita abia sivarai ita tahua namonamo bona lalohadai maorodia ita abia. (Aon. 3:21-23; 8:4, 5) Bema aonega karana ita hahedinaraia lasi, do ia auka lasi Satani bona ena tanobada ese iseda laloa dalana idia hadikaia totona. (Efe. 5:6; Kol. 2:8) Oibe, bema sivarai maorodia ita dibaia, lalohadai maorodia do ita abia. Aonega Herevadia 18:13 ena hereva bamona, “hereva do oi kamonai guna, gabeai do oi haere. Bema oi haere haraga, oi be kavakava, bona hemarai do oi davaria.”

² Inai stadi ai, ita ese sivarai maorodia bona lalohadai maorodia abia karana idia koua daladia haida do ita herevalaia. Danu, Baibel ena hakaua herevadia bona haheitalai idauidau ese ita idia durua mai aonega ida sivarai maorona ita tahua namonamo dalana do ita herevalaia.

3. Dahaka dainai Aonega 14:15 ena hakaua herevana ita badinaia be namo? (Laulau ginigunana herevalaia.)

³ Hari inai negai, taunimanima be dala idauidau amo infomeisen idia abia. Hegeregere, intanet websait, televisen bona nius halasia oreadia ma haida. Taunimanima momo be edia turadia bona gaukara turadia amo e-mail, teks mesiji, bona sivarai idauidau idia abia. Hari, infomeisen kereredia siaia bona hereva maorodia hagagevaia karana be ia bada noho dainai, namona be ita naria namonamo bona ita kamonai gaudia ita tahua namonamo. Edena Baibel ena hakaua herevana ese ita ia durua diba? Aonega 14:15 ia gwau: “Mai ena lalona kehoa lasi tauna ese, hereva ibounai ia hamomokania noho, to laloa kehoa tauna ese, iena raka dalana ia laloa namonamo noho.”

4. Edena dala ai Filipi 4:8, 9 ese ita ia durua ita duahia gaudia ita abia hidi namonamo, bona dahaka dainai infomeisen maorona ita abia be mai anina bada? (Maua ladana “Infomeisen Maorodia Ita Abia Daladia Haida” itaia danu.)

⁴ Disisen maorodia ita karaia totona, hamomokania gaudia idia noho be namo. Unai dainai, namona be do ita duahia gaudia ita abia hidi namonamo. (Filipi 4:8, 9 duahia.) Iseda nega ita haorea kava lasi intanet ai idia halasia nius o e-mail amo idia siaia infomeisen koikoidia ita itaia o duahia totona. Mai anina bada gauna be aposteit taudia ese idia halasia websait idauidau ita dadaraia be namo. Edia ura badana be Dirava ena taunimanima edia abidadama idia hadikaia bona hereva momokani idia hakoikoia. Bema infomeisen maorona ita abia lasi, abia hidi kereredia ita karaia diba. Namona be ita laloatao, infomeisen kererena ese ta ena lalona bona kudouna ia hadikaia diba.​—1 Tim. 6:20, 21.

5. Israela taudia be dahaka sivarai koikoi idia kamonai, bona idia dekenai dahaka ia vara?

⁵ Sivarai koikoina abia dae karana ese dika bada ia havaraia diba. Hegeregere, mani Mose ena nega ai ia vara gauna ita laloa, Gwauhamata Tanona idia itaia totona idia siaia spai taudia 12 amo 10 ese sivarai koikoi idia mailaia. (Num. 13:25-33) Edia sivarai koikoi bona hagaria herevadia dainai, Iehova ena taunimanima idia lalomanoka. (Num. 14:1-4) Dahaka dainai unai ia vara? Reana spai taudia momo be sivarai koikoi idia mailaia dainai, idia gwauraia herevana idia abia dae. Bona idia ura lasi abidadama tatau Iosua bona Kaleba ese idia mailaia sivarai maorona idia kamonai. (Num. 14:6-10) Danu hamomokania gaudia idia tahua lasi bona Iehova idia abidadama henia lasi dainai, sivarai koikoi idia abia dae. Unai be aonega karana lasi!

6. Dahaka dainai ita hoa lasi bema Iehova ena taunimanima dekenai idia gwauraia sivarai idauidau ita kamonai?

⁶ Namona be ita naria namonamo bema Iehova ena taunimanima dekenai idia gwauraia sivarai idauidau ita kamonai. Namona be ita laloaboio lasi Satani be Dirava ena abidadama hesiai taudia ia samania tauna. (Apok. 12:10) Unai dainai, Iesu be ita ia hadibaia iseda inai taudia be ita dekenai “mai koikoi ida hereva dikadia idauidau [do] idia gwauraia.” (Mat. 5:11) Bema unai hadibaia herevana ita laloa bada, Iehova ena taunimanima idia gwauraia dika sivaraidia ita kamonai neganai do ita hoa lasi.

7. E-mail o teks mesiji oi do siaia lasi lalonai, dahaka oi karaia be namo?

⁷ Oi be emu turadia bona gaukara turadia dekenai e-mail bona teks mesiji siaia karana oi moalelaia, a? Bema oibe, vadaeni TV o reidio ai idia halasia sivarai matamata ta oi itaia o ekspiriens ta oi kamonai neganai, reana do oi ura nius ripoti tauna bamona unai sivarai oi gwauraia haraga. To, mesiji o e-mail oi do siaia lasi lalonai, sibona oi nanadaia: ‘Lau ura siaia infomeisen be momokani, a? Hamomokania gaudia idia noho, a?’ Bema oi naria namonamo lasi, iseda tadikaka oreana lalonai sivarai koikoi do oi halasia diba. Bema oi daradara, oi siaia lasi.

8. Tano ma haida ai iseda inai taudia ese dahaka idia karaia, bona edena dala ai ita diba lasi dalanai edia koikoi karana ita durua diba?

⁸ E-mail o teks mesiji siaia haraga karana ena dika ma ta ia noho danu. Hegeregere, tano haida dekenai iseda haroro gaukara idia taravatua o koua momokani. Unai tanodia dekenai iseda inai taudia be unai bamona sivarai idia gwauraia loaloa ita idia hagaria o iseda huanai ta ta abidadama henia karana idia hadikaia totona. Guna Soviet Union ai ia vara gauna mani oi laloa. KGB ena pulisi taudia be sivarai koikoi idia gwauraia loaloa, idia gwau tadikaka haida ese Iehova ena taunimanima idia samania koikoi. * Madi, momo be unai bamona sivarai koikoi idia abia dae dainai, Iehova ena orea idia rakatania. Moale gauna be, gabeai momo idia giroa mai to haida be lasi, badina edia abidadama ia dika. (1 Tim. 1:19) Edena dala ai unai bamona dika ita dadaraia diba? Sivarai koikoi o dikadia ita gwauraia loaloa lasi. Namo lasi gau ibounai ita abia dae sibona. To, mai iseda hamomokania gaudia be namo.

9. Dahaka ese sivarai maorona abia dalana ia koua diba?

⁹ Nega haida sivarai ena kahana haida sibona be momokani, unai ese lalohadai maorodia ita abia karana ia koua diba. Sivarai ta ena kahana haida sibona be momokani neganai, momo ia hakaua kerere diba. Unai dainai edena dala ai unai bamona sivarai ita dadaraia diba?​—Efe. 4:14.

10. Edena dala ai Israela taudia be kahirakahira edia tadikaka ida idia tuari, bona edena dala ai unai idia hanaia?

¹⁰ Iosua ena nega ai, Ioridane Sinavai ena west kahana ai idia noho Israela taudia dekenai ia vara gauna mani ita laloa. (Ios. 22:9-34) Ripoti ta idia kamonai Ioridane Sinavai ena ist kahana ai idia noho Israela taudia (Rubena iduhu, Gado iduhu, bona Manase ena iduhu kahana taudia) ese Ioridane kahirakahira ai boubou patana badana ta idia haginia. Unai ripoti ena kahana haida sibona be momokani. West kahana ai idia noho Israela taudia be unai ripoti ena kahana haida sibona idia kamonai dainai, idia laloa edia tadikaka be Iehova dekenai idia gwau edeede, unai dainai idia haboua, ist kahana ai idia noho Israela taudia do idia tuari henia totona. (Iosua 22:9-12 duahia.) To, idia do tuari lasi lalonai, idia ese abidadama tatau haida idia siaia unai ripoti hamomokania gaudia idia abia totona. Unai tatau be dahaka idia dibaia? Unai Israela besena, Rubena iduhu, Gado iduhu, bona Manase ena iduhu kahana taudia ese idia haginia boubou patana be boubou gauna totona lasi, to idia haginia laloatao gauna ta bamona. Badina idia ura gabeai taunimanima ibounai do idia diba idia danu be Iehova ena abidadama hesiai taudia. West kahana ai idia noho Israela taudia be idia moale badina edia tadikaka ida unai ripoti koikoi dainai idia tuari lasi, to nega idia atoa ripoti maorona idia abia totona!

11. (a) Edena dala ai Mepiboseta be haida ese idia kara namo henia lasi? (b) Edena dala ai Davida ese unai kara gageva ia hanaia diba?

¹¹ Ita ta ta danu, be reana haida ese idia kara namo henia lasi badina sivarai koikoi eiava sivarai edia kahana haida sibona be ma haida dekenai idia gwauraia loaloa. King Davida bona Mepiboseta edia haheitalai mani ita laloa. Davida be Mepiboseta dekenai ena tubuna Saulo, ena tano ibounai ia henia lou karana ese ena hariharibada bona hebogahisi ia hahedinaraia. (2 Sam. 9:6, 7) To gabeai, Davida be Mepiboseta ena sivarai dikana ta ia kamonai. Davida be sivarai maorona ia tahua lasi, bona ia ura Mepiboseta ena kohu ibounai ia abia. (2 Sam. 16:1-4) Gabeai, Mepiboseta ia hereva henia neganai, Davida be sibona ena kerere ia lalopararalaia bona Mepiboseta ena kohu ia henia lou. (2 Sam. 19:24-29) To unai kara gageva be do ia vara lasi bema Davida be nega ia atoa hamomokania gaudia ia tahua namonamo.

12, 13. (a) Iesu dekenai samania hereva koikoi idia gwauraia neganai dahaka ia karaia? (b) Bema ta be hereva koikoi ia gwauraia loaloa dahaka ita karaia diba?

¹² Dahaka do oi karaia bema ta be oi dekenai samania hereva koikoi ia gwauraia? Iesu bona Ioane Bapatiso be unai bamona hahetoho idia davaria. (Mataio 11:18, 19 duahia.) Unai sivarai koikoi dainai Iesu be dahaka ia karaia? Ia be ena nega bona goada ibounai ia haorea lasi sibona ia gimaia totona. To, taunimanima ia hagoadaia ia hamomokania gaudia​—hegeregere ia karaia bona ia hadibaia gaudia​—idia itaia totona. Iesu ia gwau bamona, “tau ta ese ia karaia kara namodia ese idia hamomokania, ia be aonega tauna.”​—Mat. 11:19.

¹³ Unai mai anina bada sivaraina amo gau namona ta ita dibaia. Reana nega haida, taunimanima ese ita dekenai idia gwauraia herevadia be maoro lasi o hadikaia herevadia idia gwauraia. Reana ita ura dikadika hahemaoro goeva ita karaia o kara ta ita karaia unai amo iseda ladana ia namo totona. To, gau ta ita karaia diba. Bema ta be hereva koikoi ta ia gwauraia loaloa, namona be iseda kara amo ita hahedinaraia unai hereva be koikoi. Momokani, Iesu ena haheitalai ese ia hahedinaraia, iseda Keristani kara namodia amo, unai sivarai idauidau ita hakoikoia diba.

14, 15. Edena dala ai sibona iseda diba dekenai ita tabekau karana ese ita ia hahekwakwanaia diba?

¹⁴ Sivarai maorodia ita abia karana amo lalohadai maorodia do ita abia. Hekwakwanai badana ma ta be ita be goevadae lasi taudia. Bema lagani momo lalonai mai abidadama ida Iehova ita hesiai henia be edena bamona? Reana laloa kehoa bona diba maorona ita hahedinaraia vadaeni. Eiava reana haida ese iseda diba maoromaoro dainai ita do idia matauraia. To, unai ese ita ia hahekwakwanaia diba, a?

¹⁵ Oibe, nega momo sibona eda diba dekenai ita tabekau karana ese ita ia tarapua diba. Iseda hemami bona sibona eda lalohadai ese iseda laloa dalana ia biagua diba. Reana do ita mamia hekwakwanai ta ita lalopararalaia bona hamaoromaoroa diba, ena be hamomokania gaudia ibounai ita diba lasi. Unai be lalohadai kererena! Baibel be ita ia hadibaia sibona iseda diba dekenai ita tabekau lasi.​—Aon. 3:5, 6; 28:26.

16. Unai laulau sivaraina lalonai, restaurant ta ai dahaka ia vara? bona Tom be kara haraga dahaka lalohadai ia abia?

¹⁶ Mani inai laulau sivaraina ita laloa: Adorahi ta, restaurant ta ai, elda gaukara ia diba momo tadikaka ta ladana Tom, be ia hoa badina elda ma ta ladana John, ia itaia teibolo ma ta ai hahine ta ida ia helai. Tom ia itaia idia ruaosi be mai moale ida idia kiri, idia herevahereva, bona ta ta idia rosia. Unai ese Tom ia hahekwakwanaia bona ia laloa: Unai kara dainai John bona ena adavana do idia divos, a? John ena adavana dekenai dahaka do ia vara? John ena natudia dekenai dahaka do ia vara? Tom be guna unai bamona hekwakwanai idauidau ia itaia. Bema unai be oi, edena bamona do oi laloa?

17. Inai sivarai lalonai, Tom be gabeai dahaka ia dibaia, bona unai ese ita dekenai dahaka ia hadibaia?

¹⁷ Herevana Tom be John dekenai lalohadai kererena ia abia haraga, to mai ena hamomokania gaudia, a? Unai adorahi ai, Tom be John ia rini henia. Bona Tom ia davaria, unai hahine be John ena taihuna korikorina ia be daudau taoni amo ia mai, vadivadi totona. Idia ruaosi be lagani momo lalonai ta ta idia itaia lasi. Bona hora haida sibona do ia noho dainai, John be restaurant ai ena taihuna ia hedavari henia. Unai dainai ena hahine be ia ida ia lao lasi. Tom ia moale badina ia abia lalohadai kererena be ma haida dekenai ia sivarailaia lasi. Unai sivarai amo dahaka ita dibaia? Herevana Keristani maurina lalonai iseda diba be bada, namo lasi ita laloa hamomokania gaudia momo ita diba.

18. Edena dala ai iseda tadikaka ita lalodika henia karana ese lalohadai kererena ia havaraia diba?

¹⁸ Laloa maoromaoro karana ia koua dalana ma ta be, bema kongrigeisen lalonai tadikaka ta ese ma ta ia inai henia. Bema hanaihanai iseda tadikaka ida gau ta dekenai ita lalotamona lasi, reana iseda tadikaka do ita badu henia diba. Bona unai tadikaka ena ripoti dikana ita kamonai neganai, reana do ita abia dae sibona. Unai sivarai amo dahaka ita dibaia? Bema iseda tadikaka ita lalodika henia, bona hamomokania gaudia ita tahua namonamo lasi, lalohadai kereredia do ita abia. (1 Tim. 6:4, 5) Unai ia vara lasi totona namona be iseda kudouna ai badu bona mama karana ita kokia. Unai bamona hemami dikadia ita abia lasi totona, namona be iseda tadikaka taihu lalokau henia karana ita laloa bona mai kudouna ibounai ida edia dika ita gwauatao.​—Kolose 3:12-14 duahia.

19, 20. (a) Edena Baibel ena hakaua herevadia ese ita do idia durua sivarai maorodia ita tahua totona? (b) Vaira wiki ena stadi ai dahaka do ita herevalaia?

¹⁹ Hari inai negai, hamomokania gaudia ita abia bona tahua namonamo karana be mai ena hekwarahi, badina infomeisen be momo lasi, sivarai ena kahana haida sibona be maoro, bona ita be goevadae lasi taudia. To, dahaka ese ita ia durua diba? Namona be Baibel ena hakaua herevadia ita diba bona badinaia. Hegeregere hakaua herevana ta be, bema ta be hamomokania hereva ibounai ia kamonai lasi bona ia haere haraga, unai tauna be kavakava bona hemarai do ia abia. (Aon. 18:13) Baibel ena hakaua herevana ma ta ese ita ia hadibaia, ita henanadai guna gabeai hereva ibounai ita abia dae. (Aon. 14:15) Bona dokonai, herevana Keristani maurina lalonai iseda diba be bada, ita naria namonamo sibona iseda diba dekenai ita tabekau lasi. (Aon. 3:5, 6) Baibel ena hakaua herevadia ese ita do idia gimaia, bema hamomokania gaudia be gabu maorodia amo ita abia, unai amo lalohadai maorona ita abia bona disisen maorona ita karaia diba.

²⁰ To hekwakwanai ma ta ia noho. Unai be ta ena toana amo ia ita hahemaoro henia karana. Vaira wiki ena stadi ai, edena dala haida ai unai kara ita hahedinaraia diba, bona unai ita dadaraia totona ita ia durua diba gaudia do ita herevalaia.