INAI “dina gabediai” metau idauidau idia vara noho dainai, Iehova ena taunimanima ese boga-auka karana idia hahedinaraia noho be namo. (2 Tim. 3:1-5) Inai tanobada ai ita be sibona idia laloa bada, idia ura lasi gwauhamata idia karaia, bona sibona edia ura idia biagua lasi taudia huanai ita noho. Unai bamona taudia dekenai boga-auka karana be lasi. Unai dainai, Keristani taudia ta ta be sibona idia nanadaia: ‘Lau be tanobada taudia bamona lau boga-auka lasi, a? Boga-auka ena anina be dahaka? Edena dala ai unai Keristani kara namona be egu kara ta ai lau halaoa diba?’

Baibel ese ia hahedinaraia inai hereva boga-auka, be ta ena kara haheaukalaia karana sibona lasi. To boga-auka tauna ena haheauka karana be mai ena badina. Ia be sibona ena namo ia laloa lasi, to ta ena namo ia laloa bada. Unai badina dainai, boga-auka tauna ta idia hahisia o dagedage henia neganai, ia hesiku lasi to ia abia dae edia hetura karana do ia namo lou. Ita daradara lasi, badina Baibel ia gwau, “boga-auka” be lalokau * ena kara ta. (1 Kor. 13:4) Danu Dirava ena hereva ia gwau, “boga-auka” be “lauma helaga ena huahua” ta. (Gal. 5:22, 23) Unai dainai, boga-auka karana ita hahedinaraia totona dahaka ita karaia be namo?

Boga-auka karana ita hahedinaraia totona, namona be Iehova ena lauma ena heduru totona ita guriguri, badina ia idia tabekau henia bona abidadama henia taudia sibona dekenai lauma helaga ia henia. (Luka 11:13) Dirava ena lauma helaga ena siahu be bada herea, to ita guriguri sibona be hegeregere lasi namona be iseda guriguri hegeregerena ita kara. (Sal. 86:10, 11) Anina be ita hekwarahi dina ta ta ai boga-auka karana ita hahedinaraia totona unai amo inai kara be iseda kudouna ai do ia noho. To, reana gau ma haida ita karaia danu boga-auka be iseda kara ta ai ia lao totona. Dahaka ese ita ia durua diba?

Iesu ena haheitalai namona ita stadilaia bona tohotohoa neganai, boga-auka karana ita hahedinaraia diba. Unai haheitalai hegeregerena, lauma helaga ena heduru amo aposetolo Paulo ese “mauri matamata,” “boga-auka” karana danu ia herevalaia, bena ita ia hadibaia “Keriso ena maino ese [iseda] kudouna ia biagua be namo.” (Kol. 3:10, 12, 15) Unai bamona maino ese iseda kudouna ia “biagua” diba, bema Iesu ena abidadama ita tohotohoa bona ita abia dae Dirava ese nega korikori ai ita davaria hekwakwanai ibounai do Ia hamaoromaoroa. Iesu ena haheitalai ita tohotohoa neganai, boga-auka karana do ita hahedinaraia noho, herevana ita dekenai dahaka ia vara.​—Ioa. 14:27; 16:33.

Herevana ita ura bada Dirava ese ia gwauhamatalaia tanobada matamatana ita itaia, to Iehova ena haheauka karana ita laloa dobu neganai ita boga-auka diba. Badina Baibel ia gwau: “Iehova be ena gwauhamata hagugurua totona ia metairametaira lasi, haida idia laloa bamona, to umui dekenai ia haheauka, badina ia ura lasi tau ta ia mase, to ia ura taunimanima ibounai idia helalo-kerehai.” (2 Pet. 3:9) Iehova ena haheauka karana ita laloa neganai, ita ura ma haida dekenai haheauka karana ita hahedinaraia, a? (Roma 2:4) Bona edena bamona negadiai boga-auka ita hahedinaraia diba?

Dina ta ta ai idia vara gaudia ese iseda boga-auka karana ia tohoa diba. Hegeregere, bema oi ura mai anina bada herevana ta oi gwauraia, namona be mai haheauka ida oi naria unai amo ma haida edia hereva oi utua lasi. (Iam. 1:19) Danu reana oi bamoa tadikaka taihu edia kara ese oi ia hahisia neganai boga-auka karana oi hahedinaraia be namo. Bona oi badu haraga lasi, to mai aonega ida Iehova bona Iesu ese iseda kerere idia haheaukalaia daladia oi laloa. Idia be iseda kerere maragimaragidia idia laloa bada lasi. To, iseda kara namodia idia itaia bona mai haheauka ida idia naria iseda kara ita haidaua totona.​—1 Tim. 1:16; 1 Pet. 3:12.

Iseda boga-auka karana ia tohoa diba gauna ma ta be, bema ta ia gwau ita hereva kerere o kara kererena ta ita karaia. Nega momo, reana ita badu haraga bona sibona ita gimaia toho. To, Baibel ia gwau: “Haheauka kara ese hekokoroku kara ia hereaia noho. Do oi badu haraga lasi. Bona bema badu be emu lalona dekenai oi dogoatao noho, inai be kavakava taudia edia kara.” (Had. 7:8, 9) Unai dainai, ena be ita dekenai idia gwauraia herevana be maoro lasi, namona be mai boga-auka ida ita laloa namonamo guna. Iesu be haida ese idia gwauraia koikoi neganai unai hakaua herevana ia badinaia.​—Mat. 11:19.

Tama sina ese edia natudia edia kara kerere, ura dikadia o lalohadai dikadia idia ura hamaoromaoroa neganai, boga-auka karana idia hahedinaraia be namo. Mani Europe ena Betele ai ia gaukara merona, Mattias, ena sivarai ita laloa. Mattias be mero matamata neganai, ia abia dae gaudia dainai, sikuli gabuna dekenai hanaihanai ia idia kirikirilaia karana ia haheaukalaia. Matamanai, iena tama sina be unai idia diba lasi. To idia itaia edia natuna be ia vara gauna dainai ena abidadama dekenai ia daradara. Mattias ena tamana, Gillis, ia gwau: “Ia vara gauna dainai haheauka karana ai hahedinaraia be namo.” Badina Mattias be inai henanadai idauidau ia henia: “Dirava be daika? Bema Baibel be Dirava ena Hereva lasi be edena bamona? Edena dala ai do ita diba Dirava ia ura inai o unai ita karaia?” Danu ena tamana dekenai do ia gwau: “Dahaka dainai ta ese lau do ia hahemaoro bema egu hemami bona abidadama be oiemu bamona lasi?”

Danu, Gillis ia gwau: “Nega haida emai natuna be mai badu ida ia henanadai, lau o ena sinana dekenai lasi, to hereva momokani dainai, badina ia mamia ena mauri be ia auka.” Edena dala ai Gillis ese unai kara ia haheaukalaia? Ia gwau: “Lau bona egu natuna ai helai bona hora momo lalonai do ai herevahereva. Nega momo lau kamonai bona henanadai idauidau lau henia, iena hemami bona ia laloa gaudia lau dibaia totona. Nega haida ia dekenai gau ta lau herevalaia murinai, dina ta o dina haida lau henia ia lalohadailaia totona, unai amo gabeai do ai herevalaia. Nega ma haida ai, do lau gwau dina haida lalonai ia gwauraia herevana ta lau lalohadailaia guna. Hanaihanai emai herevahereva karana dainai, Mattias be metairametaira mauri davalaia boubouna, Dirava ena lohia siahuna, bona Iehova ena lalokau karana ia lalopararalaia bona ia abia dae. Momokani nega daudau unai ai karaia, bona nega haida ia auka, to metairametaira, iena kudouna ai Iehova ia lalokau henia matamaia. Hari lau bona egu adavana ai moale bada, badina mai boga-auka ida emai natuna ena matamata laganidia lalonai ia ai durua karana ese anina namona ia havaraia bona ena kudouna ia hamarerea.”

Gillis bona ena adavana be Iehova ena heduru dekenai idia abidadama bona mai haheauka ida edia natuna mero ida idia gaukara hebou. Gillis be unai ia laloa lou neganai, ia gwau: “Nega momo, Mattias lau hamaoroa emai lalokau ia dekenai ese lau bona ena sinana ia hagoadaia hanaihanai ai guriguri goadagoada, unai amo Iehova ese ia do ia durua ia laloparara totona.” Unai tama sina be idia moale bada badina haheauka karana idia hahedinaraia!

Unai dainai Keristani taudia korikoridia be Dirava ena hereva amo gorere badadia idia abia famili o turadia idia durua neganai, mai lalokau ida haheauka karana idia hahedinaraia be namo. Mani Ellen * ena haheitalai ita laloa, ia danu be Europe ai ia noho.

Lagani eit bamona lalonai, Ellen ena adavana be nega rua stroke gorere ia abia, unai ese iena harana ena gaukara dalana ia hadikaia. Unai dainai, ia be hebogahisi, moale, bona lalohisihisi ena hemami ia abia diba lasi. Ellen dekenai unai be maduna badana. Ia gwau: “Hanaihanai lau haheauka bona guriguri karana lau hadokoa lasi.” Ma ia gwau: “Lau ia hagoadaia sirina be Filipi 4:13, ia gwau: ‘Lau dekenai siahu ia henia tauna amo goada lau abia gau ibounai lau karaia totona.’” Iehova ena heduru dainai, Ellen be mai abidadama ida ia haheauka.​—Sal. 62:5, 6.

Oibe, boga-auka karana dekenai, Iehova be haheitalai namona ita tohotohoa totona. (2 Pet. 3:15) Baibel lalonai Iehova ese boga-auka karana ia hahedinaraia edia sivarai momo idia noho. (Neh. 9:30; Isa. 30:18) Hegeregere, Aberahamo be Iehova ese Sodoma do ia hadikaia ena palani ia henanadailaia neganai, Iehova be dahaka ia karaia? Ginigunana be, Iehova ese Aberahamo ena hereva ia koua lasi. To, Iehova be mai haheauka ida Aberahamo ena henanadai bona lalohadai ta ta ia kamonai namonamo. Bena, Iehova be Aberahamo ena henanadai ia haerelaidia amo iena kamonai karana ia hahedinaraia, bona Ia hamaoroa Sodoma do Ia hadikaia lasi bema unai hanua dekenai kara maoromaoro taudia 10 sibona idia noho. (Gen. 18:22-33) Iehova be haheitalai namona kamonai karana dekenai bona ia badu haraga lasi!

Dirava ena haheauka karana be mai anina bada bona Keristani taudia ibounai ese dabua matamata bamona idia hahedokilaia be namo. Bema ita hekwarahi inai mai anina bada karana ita hahedinaraia totona, ita be iseda lalokau bona boga-auka guba Tamana ita hanamoa unai​—bona “abidadama bona haheauka karana amo Dirava ese ia gwauhamatalaia gaudia idia abia taudia” ida do ita noho.​—Heb. 6:10-12.