1. Edena dala ai mauri gaudia ese Iehova ena hariharibada karana idia hahedinaraia?

IEHOVA be gau ta ia do havaraia lasi neganai sibona ia noho, to ia be sibona ena namo ia laloa lasi. Unai dainai, ia ese harihari gauna, mauri, be aneru bona taunimanima dekenai ia henia. Iehova, “moale Diravana,” be ia ura gau namodia ia henia. (1 Tim. 1:11; Iam. 1:17) Danu ia ura ita moale dainai, ita dekenai hariharibada karana ia hadibaia.​—Roma 1:20.

2, 3. (a) Dahaka dainai henia karana ese moale ia havaraia? (b) Dahaka do ita herevalaia?

² Dirava ese taunimanima be iena toana hegeregerena ia karaia. (Gen. 1:27) Anina be, ita ia karaia iena kara ita hahedinaraia totona. Moale ita abia totona, Iehova ena haheitalai ita badinaia​—ma haida edia namo ita laloa bona hariharibada karana ita hahedinaraia. (Fili. 2:3, 4; Iam. 1:5) Dahaka dainai? Badina Iehova be mai lalokau ida taunimanima ia karaia. Ena be ita be goevadae lasi, ita kwalimu diba Iehova ena hariharibada karana ita tohotohoa totona.

³ Baibel ese ita dekenai hariharibada karana hahedinaraia dalana ia hadibaia. Bona unai kara amo do ita dibaia gaudia haida mani ita herevalaia. Hegeregere, hariharibada karana amo Dirava ena lalonamo ita abia bona unai kara ita hahedinaraia amo ita ia durua Dirava ese ita dekenai ia henia gaukara ita hagugurua dalana do ita itaia. Danu edena dala ai hariharibada karana ese moale ia havaraia bona dahaka dainai inai kara ita hahedinaraia noho ena badina do ita herevalaia.

4, 5. Hariharibada karana dekenai Iehova bona Iesu ese ita dekenai dahaka haheitalai namodia idia hahedinaraia?

⁴ Iehova ia ura taunimanima ese ia idia tohotohoa, bona hariharibada karana ita hahedinaraia neganai, ia moale. (Efe. 5:1) Ita ia karaia dalana bona tanobada ai ia karaia gau namodia ese idia hahedinaraia goevagoeva, Dirava ia ura taunimanima do idia moale. (Sal. 104:24; 139:13-16) Unai dainai, ma haida ita hamoalea neganai, Iehova ita hanamoa.

⁵ Keristani taudia momokanidia ese Keriso idia tohotohoa, badina iena haheitalai amo taunimanima ia hadibaia edena dala ai hariharibada karana idia hahedinaraia diba. Iesu ia gwau: “Taunimanima ena Natuna bamona, ia mai lasi taunimanima ese ia idia hesiai henia totona, to ma haida hesiai henia totona ia mai, bona ena mauri ia henia, taunimanima momo edia mauri davana karaia totona.” (Mat. 20:28) Danu, aposetolo Paulo ese Keristani taudia ia hagoadaia: “Keriso Iesu ena laloa dalana do umui dogoatao noho. Ena be ia be Dirava ena toana hegeregerena, . . . to ia dekenai idia noho gaudia ibounai ia rakatania bona igui hesiai tauna ena toana ia abia.” (Fili. 2:5-7) Ita sibona ita nanadaia, ‘Lau be Iesu ena haheitalai lau badinaia namonamo diba, a?’​—⁠1 Petero 2:21 duahia.

6. Iesu ese ia gwauraia Samaria tauna ena parabole amo dahaka ita dibaia? (Laulau ginigunana herevalaia.)

⁶ Iehova ena lalonamo ita moalelaia diba bema ia bona Keriso edia haheitalai namodia ita tohotohoa, ma haida edia namo ita laloa, bona idia durua daladia ita tahua. Oibe, Samaria tauna ena parabole ai Iesu ese ia hahedinaraia goevagoeva, ia ura ena murinai idia raka taudia ese edia ura idia dadaraia ma haida idia durua totona, noho dala idauidau taudia danu. (Luka 10:29-37 duahia.) Iesu ese Samaria tauna ena parabole ia do gwauraia lasi neganai, Iuda tauna ese ia gwauraia henanadai oi laloatao, a? Ia henia henanadai be inai: “Daika be egu dekena tauna?” Iesu ena haere ese ia hahedinaraia, unai Samaria tauna bamona mai ura ida hariharibada karana ita hahedinaraia be namo, bema ita ura Dirava ena lalonamo ita moalelaia.

7. Satani ese Eden umana ai dahaka hepapahuahu herevana ia havaraia, bona edena dala ai ita hamomokania Dirava ena dala be namo herea?

⁷ Keristani taudia be badina momo dainai hariharibada karana idia hahedinaraia diba. Badina ta be inai, Satani ese Eden umana ai hepapahuahu herevana ia havaraia. Edena dala ai? Satani ia gwau, Adamu bona Heva​—bona taunimanima ibounai​—be do idia moale bema sibona edia ura idia atoa guna to Dirava idia badinaia lasi. Heva be sibona ena namo ia laloa bada dainai, ia ura Dirava bamona do ia lao. Adamu danu be sibona ena namo ia laloa bada, badina ia ura Heva ia hamoalea. (Gen. 3:4-6) Idia karaia abia hidi ena anina ita itaia. Sibona ena namo ia laloa bada tauna be ia moale lasi. Hariharibada karana ita hahedinaraia neganai, ita hamomokania Dirava ena dala be namo herea.

8. Dahaka dainai tau bona hahine ginigunana ese hariharibada karana idia laloa bada guna be namo?

⁸ Ena be Eden umana dekenai tau bona hahine ginigunadia be sibodia idia noho, Dirava ese idia dekenai hadibaia herevadia ia henia ma haida edia namo idia laloa bada totona. Iehova ese Adamu bona Heva ia hanamodia bona idia ia hagoadaia bese do idia havaraia, do idia momo herea, tanobada ena gabu ibounai dekenai do idia noho, bona unai tano do idia biagua. (Gen. 1:28) Havaraia Tauna be mai ura bada ida ia karaia gaudia edia namo ia laloa bada hegeregerena, iseda tama sina ginigunadia ese do idia havaraia natudia edia namo idia laloa bada be namo. Iehova ia ura Adamu ena bese ese tanobada ibounai be paradaiso ai do idia halaoa. Unai gaukara badana idia karaia totona, idia gaukara hebou be namo.

9. Dahaka dainai tanobada be paradaiso ai idia halaoa karana ese moale ia havaraia diba?

⁹ Bema Adamu bona Heva idia kara dika lasi, tanobada be goevadae taudia amo do ia honu. Inai goevadae taudia ese tanobada be paradaiso ai idia halaoa totona, namona be Iehova ida idia gaukara hebou be mai anina bada bena Iehova ena laga-ani lalonai do idia vareai. (Heb. 4:11) Unai gaukara do idia hagugurua ena moale mani oi laloa! Ma haida edia namo totona sibona idia henia karana ese hahenamo bona moale bada do ia havaraia.

10, 11. Edena dala ai Dirava ese ia henia haroro bona hahediba taudia halaoa gaukarana ita hagugurua diba?

¹⁰ Hari, Iehova ese ena taunimanima dekenai haroro bona hahediba taudia halaoa gaukarana ia henia. Unai gaukara ita hagugurua totona, namona be mai momokani ida ma haida edia namo ita laloa bada. Mai haheauka ida inai gaukara ita karaia diba bema Dirava lalokau henia bona dekena taudia lalokau henia karana dekenai lalohadai maorona ita abia.

¹¹ Aposetolo edia negai, Paulo be ia sibona bona ena bamodia ia gwauraia ‘Dirava ida idia gaukara hebou taudia,’ badina Basileia ena hereva momokani ena uhe hadoa bona dairia gaukarana idia karaia. (1 Kor. 3:6, 9) Hari ita danu, ‘Dirava ida ita gaukara hebou’ diba, bema iseda nega, kohu, bona goada ita henia Dirava ese ia henia haroro gaukara ita karaia totona. Unai be hahenamo badana, ani!

12, 13. Hahediba taudia halaoa gaukarana ena namo be dahaka?

¹² Haroro bona hahediba taudia halaoa gaukarana lalonai, iseda nega bona goada ita henia karana ese moale bada ia havaraia. Baibel stadi idia karaia taudia momo idia gwau, unai gaukara ese namo ia havaraia. Hegeregere, stadi taudia be Dirava ena hereva idia lalopararalaia, edia abidadama ia goada, edia mauri idia haidaua, bona ma haida dekenai hereva momokani idia hadibaia neganai, unai ese moale bada ia havaraia. Iesu danu be ia siaia haroro taudia 70 be idia karaia gaukara namona dainai “mai moale ida idia giroa” neganai, ia moale bada.​—Luka 10:17-21.

¹³ Tanobada hegegemadai pablisa taudia be sivarai namona ese taunimanima edia mauri ia haidaua karana idia itaia neganai, idia moale bada. Taihu matamata ta, Anna, ena sivarai mani ita laloa, ia be Eastern Europe ai, pablisa be momo lasi gabuna ta dekenai ia lao ena haroro gaukara ia habadaia totona. * Ia gwau, “Iniseniai Baibel stadi be momo herea, bona unai lau ura henia bada.” Ma ia gwau, “Egu hesiai gaukara lau moalelaia bada. Ruma dekenai lau giroa neganai, egu hekwakwanai lau laloa lasi. To, lau stadi henia taudia edia hekwakwanai bona idia lalohekwarahilaia gaudia lau laloa. Bona dala idauidau ai idia lau hagoadaia bona durua. Lau abia dae momokani ‘henia kara ena moale be bada, to abia kara ena moale be maragi.’”​—Kara 20:35.

14. Edena dala ai emu haroro gaukara oi moalelaia diba, ena be momo idia ura lasi kamonai?

¹⁴ Ita moale diba bema taunimanima dekenai sivarai namona ita harorolaia, ena be idia ura lasi kamonai. To, hari ita abia hahegani be peroveta tauna Esekiela ena bamona, Iehova be ia dekenai ia gwau: “Herevana idia kamonai eiava lasi, to egu hereva be idia dekenai do oi gwauraia.” (Ese. 2:7 NWT; Isa. 43:10) Ena be ita harorolaia herevana idia kamonai lasi, Iehova be iseda hekwarahi ia laloa bada. (Heberu 6:10 duahia.) Pablisa ta ese ena haroro gaukara totona lalohadai maorona ia abia. Ia gwau: “Hadoa bona dairia gaukarana ai karaia, bona ai guriguri Iehova ese edia ura do ia habadaia.”​—1 Kor. 3:6.

15. Tanikiu karana idia hahedinaraia taudia sibona dekenai hariharibada karana ita hahedinaraia, a? Gwauraia hedinarai.

¹⁵ Iesu ia ura hariharibada karana ita hahedinaraia unai amo do ita moale. Taunimanima momo be hariharibada karana idia moalelaia. Ia gwau: “Henia kara do umui manadalaia, vadaeni taunimanima ese umui dekenai do idia henia. Emui rami do idia hahonua, do idia pataia diho, bona do idia hamarerea, bona do idia hahonua noho ela bona do idia bubua. Badina ma haida dekenai umui henia sikele hegeregerena, umui dekenai unai bamona sikele do idia henia.” (Luka 6:38) Oibe, ita hahedinaraia hariharibada karana be momo ese idia abia dae lasi, to bema idia abia dae, edia tanikiu karana ese haida ia durua diba. Unai dainai henia karana ita manadalaia noho ena be taunimanima ese idia laloa bada eiava lasi. Badina nega tamona sibona oi hahedinaraia hariharibada karana ese namo bada do ia havaraia.

16. Daidia dekenai hariharibada karana ita hahedinaraia be namo, bona dahaka dainai?

¹⁶ Oibe, hariharibada karana idia hahedinaraia taudia be, idia henia gaudia dekenai davana idia laloa lasi. Iesu be unai ia laloa dainai, ia gwau: “Aria ta oi karaia neganai, ogogami taudia, diseibol taudia, aena dika, bona matakepulu taudia oi boiria, bona do oi moale, badina idia dekenai gau ta ia noho lasi emu kara ena davana do idia haloua totona.” (Luka 14:13, 14) Baibel ia gwau: “Hariharibada tauna be do idia hanamoa.” Bona ma ia gwau: “Ogogami taudia ia laloa tauna be namo.” (Aon. 22:9 NWT; Sal. 41:1) Unai dainai, henia karana ita hahedinaraia be namo, badina ma haida durua karana amo moale do ita abia.

17. Edena bamona henia karana ese oi do ia hamoalea?

¹⁷ Paulo ese Iesu ena hereva, “henia kara ena moale be bada, to abia kara ena moale be maragi” ia gwauraia neganai, ia be kohu haria karana sibona ia herevalaia lasi to haida dekenai hagoadaia herevadia bona manoka taudia durua karana ia herevalaia danu. (Kara 20:31-35) Paulo ena hereva bona kara amo ita ia hadibaia iseda nega, goada, heduru, bona lalokau ita henia haida ita durua totona.

18. Hariharibada karana dekenai toretore taudia haida be dahaka idia gwau?

¹⁸ Danu taunimanima edia noho dalana idia stadilaia taudia idia davaria, henia karana ese taunimanima ia hamoalea. Atikol ta ia gwau, “taunimanima be kara namona ta idia karaia murinai idia moale bada.” Danu, tahua gaukara idia karaia taudia idia gwau, ma haida durua karana be mai anina bada edia mauri lalonai “henia karana ena badina bona anina idia lalopararalaia totona, badina unai ese taunimanima edia ura gaudia ia hagugurua.” Unai dainai diba bada taudia idia gwau, taunimanima be edia helt bona moale idia habadaia totona, komiuniti dekenai volantia gaukara idia karaia. Oibe, unai be hoa gauna lasi badina unai bamona taudia ese Havaraia Tauna, Iehova ena Hereva idia abia dae.​—2 Tim. 3:16, 17.

19, 20. Dahaka badina haida dainai oi ura hariharibada karana oi hahedinaraia?

¹⁹ Hariharibada karana hahedinaraia totona be mai ena hekwarahi bema sibona edia namo idia laloa bada taudia huanai ita noho. To, Iesu ese ia gwauraia taravatu hereadaedia rua be: Iehova ita lalokau henia mai iseda kudouna ibounai, mauri ibounai, darana ibounai, bona goada ibounai, bona iharuana be, dekena tauna lalokau henia, sibona ita lalokau henia hegeregerena. (Mar. 12:28-31) Inai stadi ai ita herevalaia bamona, Iehova idia lalokau henia taudia be ia idia tohotohoa. Iehova bona Iesu be haida dekenai hariharibada karana idia hahedinaraia. Bona ita idia hadibaia edia kara ita tohotohoa, badina unai ese ita do ia hamoalea. Bema ita gaukara goada Dirava bona dekena taudia dekenai hariharibada karana ita hahedinaraia, Iehova do ita hanamoa bona ita sibona bona ma haida be namo do ita abia.

²⁰ Momokani, oi gaukara goada noho tadikaka bona taihu dekenai hariharibada karana oi hahedinaraia totona. (Gal. 6:10) Bema unai oi karaia noho, oi do idia lalokau henia bona laloa bada, bona do oi moale. Aonega Herevadia 11:25 [NWT] ia gwau: “Hariharibada tauna ena gaudia be do idia momo, bona ma haida dekenai ranu ia henia tauna dekenai ranu do idia henia.” Momokani, ma haida laloa bada, hebogahisi, bona hariharibada karana, be iseda Keristani mauri bona haroro gaukara lalonai dala idauidau ai ita hahedinaraia diba, unai amo namo ita abia. Stadi gabena ai, unai dala haida do ita herevalaia.