INAI be November 1932, Mexico Siti ai taunimanima milioni ta idia noho. Wiki ta gunanai, unai siti ai trafik laiti ginigunadia idia atoa. To hari taunimanima be gau ma ta idia moalelaia. Trein steiseni ai, ripota taudia mai edia kamera be do ia vadivadi tauna ta idia naria noho. Do ia mai tauna be Joseph F. Rutherford, ia be Watch Tower Society ena presiden. Tadikaka taihu danu be idia noho hegaegae Tadikaka Rutherford idia welkam henia totona, ia be edia dina toi hebouhebouna totona ia mai.

The Golden Age magasin ia gwau: “Histori lalonai inai hebouhebou be mai anina bada, badina unai nega amo Republic of Mexico ai hereva momokani ia bada ia lao.” To, unai hebouhebou dekenai taunimanima 150 sibona idia lao, vadaeni dahaka dainai ia be mai anina bada?

Unai hebouhebou ia do vara lasi neganai, Mexico ai, momo be hereva momokani idia do kamonai lasi. Lagana 1919 amo, hebouhebou maragidia idia abia, to lagani haida murinai kongrigeisen edia namba ia diho. Lagani 1929 ai, Mexico Siti dekenai brens ofesi matamata idia kehoa neganai, idia laloa edia namba do ia bada daekau, to hekwakwanai haida idia vara. Orea ese kolpota taudia (painia taudia unai) ia haganidia, haroro lalonai bisinesi do idia karaia lasi. Unai dainai kolpota ta ia badu dikadika bona hereva momokani ia rakatania bona sibona ena Baibel stadi grup ia hamatamaia. Unai nega ai danu, brens ofesi ia naria tadikaka ena kara kererena dainai, ia idia kokia bona ta ese ena gabu ia abia. Mexico ai, Iehova idia badinaia taudia be heduru idia abia be namo.

Tadikaka Rutherford ena vadivadi lalonai, ia ese hebouhebou ai ia henia tok rua bona reidio amo ia halasia tok 5 amo unai abidadama goada tadikaka ia hagoadaia momokani. Mexico ai, unai be nega ginigunana tadikaka ese reidio amo sivarai namona idia halasia. Unai hebouhebou murinai, brens ofesi naria tadikaka matamatana idia abia hidi gaukara ia hakaua totona, bona Witnes taudia be mai moale ida idia haroro noho, badina idia diba Iehova ese idia ia lalonamo henia.

Murina laganina ai, hebouhebou rua idia abia, ta be Veracruz ai bona ma ta be Mexico Siti ai. Edia haroro gaukara ese anina namona ia havaraia matamaia. Hegeregere, lagani 1931 ai, pablisa ibounai be 82. Lagani 10 murinai, pablisa ena namba be nega ten ia bada daekau! Lagani 1941 ai, Mexico Siti dekenai idia karaia Tiokratik Hebouhebouna dekenai taunimanima 1,000 mai kahana idia mai.

Lagani 1943 ai, Witnes taudia ese Mexico ena siti idauidau 12 ai do idia karaia “Free Nation’s” Tiokratik Hebouhebou ena hadibaia herevana idia halasia  matamaia. * Kadi rua ai unai hadibaia hereva idia torea bona ta be edia vaira kahana bona ma ta be edia murina kahana idia atoa. Lagani 1936 amo Witnes taudia ese unai dala idia gaukaralaia.

Mexico Siti ai unai bamona haroro dalana ese namo bada ia havaraia dainai, magasin ta ladana La Nación ese Witnes taudia ia herevalaia, ia gwau: “Dina ginigunana ai, [Witnes taudia] idia hagania taunimanima momo idia boiria totona. Murina dinana ai, taunimanima momo herea idia mai.” Unai ia vara dainai, Catholic Tomadihona be ia moale lasi, bona Witnes taudia idia dagedage henia matamaia. Ena be unai ia vara, to tadikaka taihu be mai gari lasi ida idia haroro noho. La Nación magasin ma ia gwau: “Siti ai idia noho taudia ibounai ese idia itadia . . . tatau bona hahine be haroro kadi idia atoa.” Unai magasin ena laulau ta ai tadikaka be Mexico Siti ena strit ta ai idia gini. Unai laulau henunai inai hereva ia noho: “Strit ibounai dekenai idia haroro.”

Unai negadiai, Mexico ai idia noho Witnes taudia momo be hebouhebou dekenai idia lao totona, abia hidi badadia idia karaia. Idia momo be gunika gabudia amo idia mai, bona trein o motuka ena dala be lasi. Kongrigeisen ta ese ia siaia revarevana, ia gwau: “Trein ta be unai gabu dekenai ia lao diba lasi.” Unai dainai tadikaka taihu momo be doniki amo o idia raka trein abia gabudia dekenai idia ginidae totona, bena hebouhebou dekenai idia lao.

Witnes taudia momo be idia ogogami dainai, trein ena davana idia karaia diba lasi. To, hebouhebou gabuna dekenai idia ginidae neganai, Witnes taudia ma haida ese idia abidia dae bona idia ida idia noho. Ma haida be Kingdom Hall dekenai idia mahuta. Nega ma ta ai, hebouhebou idia lao taudia 90 bamona be brens dekenai idia noho. Unuseniai “buka boksi 20 be bedi bamona idia atoa bona latanai idia mahuta.” Yearbook ese ia hahedinaraia, unai tadikaka dekenai unai boksi amo idia karaia “bedi be namo herea, sement foloa bamona lasi.”

Edia tadikaka taihu ida idia hebamo karana ese gau ibounai ia hereaia. Hari, Mexico ena pablisa taudia edia namba ia bada daekau, kahirakahira milioni ta bamona, abidadama hesiai taudia edia hekwarahi ese ahuna namona ia havaraia. * Lagani 1949 ai Mexico ena brens ripoti, ese tadikaka ia herevalaia, ia gwau: “Nega aukadia ai tadikaka be edia abidadama idia rakatania lasi, badina ai abia hebouhebou ta ta be nega daudau lalonai idia herevalaia, bona nega momo idia henia henanadai be, Edena nega ai hebouhebou ma ta do ita abia?” Hari danu be unai nega hegeregerena.​—⁠Orea ena histori Central America amo.