Iesu idia inai henia taudia be ia bona ena hahediba taudia ida imana huria karana idia hepapahuahulaia sibona lasi. Goeva karana dekenai Mose ena Taravatu lalonai hahegani momo idia noho, hegeregere ta ena tauanina amo hura ia bubua, lepera gorere, bona taunimanima bona animal edia mase kopina dogoatao karana be miro. Unai taudia do idia goeva diba dalana ia herevalaia danu. Unai idia karaia totona, boubou gaudia idia henia, idia digu, o boubou patana dekenai rara idia negea.​—Lev., karoa 11-15; Num., karoa 19.

Iuda tomadiho gunalaia taudia ese unai taravatu ta ta idia badinaia goevagoeva. Buka ta ia gwau, miro kokia totona, idia ese ia miro tauna dekenai henanadai momo idia henia, hegeregere “edena dala ai oi miro, unai miro be ma haida dekenai edena bamona do ia hanaia, edena bamona gaudia ia hamirodia, bona dokonai, ia goeva totona dahaka ia karaia be namo.”

Iesu idia inai henia taudia ese ia idia nanadaia: “Dahaka dainai emu hahediba taudia ese sene taudia edia kara idia badinaia lasi, to imana mirona ida edia aniani idia ania?” (Mar. 7:5) Unai tomadiho gunalaia taudia be mai imana miro ida aniani karana amo idia vara gorere idia herevalaia lasi. Rabi taudia idia do aniani lasi neganai, ranu be edia imana latanai idia bubua guna, bona unai be tomadiho karana ta. Unai buka ma ia gwau: “Ma danu idia ese inai idia herevalaia, ranu bubua totona edena bamona kavabu do idia gaukaralaia, edena bamona ranu be namo idia gaukaralaia totona, daika ese do ia bubua, bona edena imana kahadia do idia huria.”

Iesu ese idia atoa taravatudia be edena bamona ia lalodia? Iuda tomadiho gunalaia taudia ia hamaoroa, ia gwau: “Isaia ese umui koikoi taudia ia perovetalaia, ia gwau: ‘Inai taudia be edia udu bibina amo lau idia hanamoa, to edia kudouna be lau [Iehova] amo ia daudau masemase. Lau idia tomadiho henia kava noho, badina edia hahediba herevadia be taunimanima edia taravatu sibona.’ Dirava ena taravatu umui dadaraia bona taunimanima edia sene karadia umui badinaia.”​—Mar. 7:6-8.