1. Dahaka dainai hebou ai haere ita henia?

 DAHAKA dainai kongrigeisen heboudia dekenai ita lao? Badina be ita ura Iehova ita hanamoa. (Sal. 26:12; 111:1) Danu, hebou ita lao unai amo inai nega aukadia lalonai ta ta ita hagoadaia diba. (1 Tes. 5:11) Hebou dekenai haere ita henia neganai, unai badina rua ita hagugurua.

2. Edena negai hebou dekenai haere ita henia diba?

² Wiki ta ta ai ita karaia hebou ena kahana haida ai haere ita henia diba. Hegeregere, wiken ena hebou ai, Gima Kohorona Stadi dekenai haere ita henia diba. Midwik ena hebou ai, Hakaua Hereva Namodia, Kongrigeisen Baibel Stadi, bona kahana haida dekenai haere ita henia diba.

3. Dahaka gaudia ese ita idia koua haere ita henia totona, bona edena dala ai Heberu 10:24, 25 ese ita ia durua?

³ Ita ibounai ita ura Iehova ita hanamoa bona iseda tadikaka taihu ita hagoadaia. To haere ita henia totona koua gaudia haida ita davaria. Haere henia totona ita gari, eiava ita ura haere ita henia to nega momo ita idia makaia lasi. Edena dala ai unai koua gaudia ita hanaia diba? Aposetolo Paulo ese Heberu taudia dekenai ia torea revareva amo  haere do ita davaria. Hebou karana ena namo ia herevalaia neganai, ia gwau “hagoadaia heheni” karana ita laloa bada be namo. (Heberu 10:24, 25 duahia.) Bema ita laloatao iseda haere ese ma haida ia hagoadaia diba, do ita gari lasi haere ita henia totona. Ena be nega momo haere totona ita idia makaia lasi, to ita moale be namo badina haida idia haere diba.​—1 Pet. 3:8.

4. Inai atikol ai edena point toi do ita herevalaia?

⁴ Inai atikol ai (1) haere henia taudia be momo lasi kongrigeisen maragina ai ta ta ita hagoadaia dalana, (2) haere henia taudia be momo kongrigeisen badana ai ta ta ita hagoadaia dalana, bona (3) iseda haere lalonai ita gwauraia herevadia ese ma haida ia hagoadaia dalana do ita herevalaia.

5. Edena dala ai ta ta ita hagoadaia bema hebou idia mai taudia be momo lasi?

⁵ Kongrigeisen eiava grup maragidia ai, haere taudia be momo lasi hakaua tauna ese ia makaia totona. Nega haida, do ia naria sisina haere taudia ese imana idia abia isi totona. Unai ese hebou ia halataia bona momo ia hagoadaia lasi. Dahaka oi karaia diba? Emu lalona oi hadaia haere momo oi henia totona. Unai dala amo ma haida do oi hagoadaia haere momo idia henia totona.

6-7. Dahaka ese ia do ia durua haere henia totona ita gari lasi?

⁶ Dahaka oi karaia diba bema haere henia totona oi gari? Momo be unai bamona idia mamia danu. To, emu haere amo tadikaka bona taihu oi hagoadaia totona, gari karana oi hanaia daladia haida oi laloa. Edena dala ai unai oi karaia diba?

⁷ Vanegai idia halasia Gima Kohorona ena hereva haida ese oi ia durua diba. b Hegeregere, oi hegaegae namonamo. (Aon. 21:5) Oi hegaegae namonamo neganai do oi gari lasi haere oi henia totona. Danu, emu haere oi hakwadogia be namo. (Aon. 15:23; 17:27) Bema emu haere ia kwadogi do oi gari lasi. Oi henia haere kwadogina, reana sentens ta o rua sibona ese tadikaka taihu ia durua idia laloparara totona, to emu haere ai point momo eiava haere latana oi gwauraia neganai do idia laloparara lasi. Sibona emu hereva dalana amo haere kwadogina oi henia neganai, oi hahedinaraia oi hegaegae namonamo bona stadi ena anina oi lalopararalaia.

8. Iehova ese ita karaia gauna be edena bamona ia laloa?

⁸ To edena bamona bema unai dala haida oi tohoa, to nega ta o rua haere oi henia totona oi do gari noho? Namona be oi diba Iehova ese emu goada hegeregerena oi karaia gauna ia abia dae. (Luka 21:1-4) Iehova be ita ia doria lasi ita karaia diba lasi gaudia ita karaia totona. (Fili. 4:5) Oi karaia diba gauna oi laloa, tahua gauna oi atoa unai oi karaia totona, bona lalomaino totona oi guriguri. Matamanai, reana emu tahua gauna be haere kwadogina ta do oi henia.

9. Kongrigeisen badadia ai dahaka koua gaudia haida idia vara?

⁹ Bema emu kongrigeisen ai pablisa be momo, reana emu koua gauna be idau.  Reana tadikaka bona taihu momo be haere totona imana idia abia isi momo dainai, haere totona oi idia makaia lasi. Hegeregere, Danielle be hanaihanai hebou ai haere henia karana ia moalelaia. c Haere karana be ena tomadiho karana ta, unai dala amo ma haida ia hagoadaia, bona Baibel amo ia dibaia hereva momokani ese ena abidadama ia hagoadaia. To kongrigeisen badana dekenai ia hanaia neganai, nega ta ta sibona haere totona ia idia makaia—to nega haida idia makaia lasi. Ia gwau: “Lau moale lasi. Lau mamia haere henia ena hahenamo lau reaia. Unai ia vara loulou neganai, do oi laloa reana tadikaka be badina ta dainai unai idia karaia.”

10. Edena dala ai haere ita henia noho diba?

¹⁰ Nega haida Danielle hegeregerena oi mamia danu, a? Bema oibe, reana do oi ura lasi haere oi henia bona do oi kamonai sibona. To haere karana oi hadokoa lasi. Dahaka oi karaia diba? Heduru dalana ta be, haere ma haida oi hegaegaelaia. Bema stadi ena matamana ai, haere totona oi idia makaia lasi, hebou ia lao noho lalonai paragraf ma ta ai oi haere diba. Gima Kohorona Stadi totona oi hegaegae neganai, paragraf ta ta be stadi ena sinado ida ia hegeregere dalana oi laloa. Unai ese oi do ia durua, reana leseni ena point namona do oi herevalaia. Danu, reana oi ese idia haerelaia diba lasi Baibel ena hereva dobudia idia herevalaia paragraf oi hegaegae diba. (1 Kor. 2:10) Dahaka dainai? Badina unai paragraf lalonai haida sibona be imana idia abia isi. Ena be unai dala idauidau oi badinaia, to haere totona oi idia makaia lasi be edena bamona? Reana hebou ia do matamaia lasi lalonai, stadi ia naria tadikaka oi hadibaia edena henanadai oi ura haerelaia.   

11. Filipi 2:4 ese ita ia hagoadaia dahaka ita karaia totona?

¹¹ Filipi 2:4 duahia. Aposetolo Paulo ese Keristani taudia ia hagoadaia ma haida edia namo do idia laloa. Edena dala ai unai sisiba be hebou ai ita badinaia diba? Ma haida  ita laloa idia danu be ita hegeregerena, idia ura haere idia henia.

12. Hebou ai haida hagoadaia dalana namona ta be dahaka? (Laulau itaia danu.)

¹² Mani inai ita laloa. Emu turadia ida oi kiki neganai, oi sibona oi hereva bona nega do oi henia lasi idia hereva totona, a? Unai do oi karaia lasi, ani? Oi ura idia danu do idia herevahereva. Unai hegeregerena, hebou dekenai, ita ura momo idia haere. Iseda tadikaka taihu ita hagoadaia dalana ta be, idia dekenai nega ita henia edia haere amo edia abidadama idia hahedinaraia totona. (1 Kor. 10:24) Edena dala ai unai ita karaia diba?

13. Edena dala ai momo be haere idia henia diba?

¹³ Iseda haere do ia kwadogi, unai amo nega ita henia haida idia haere totona. Elda bona lo tadikaka taihu ese haheitalai namona do idia hahedinaraia. Ena be haere kwadogina oi henia, to namo lasi point momo oi herevalaia. Point haida oi rakatania ma haida ese idia haerelaia totona. Inai paragraf ese dala rua ia herevalaia—emu haere do ia kwadogi bona point momo do oi gwauraia lasi. Bema oi idia makaia haere ginigunana oi henia totona, point tamona sibona oi haerelaia be namo.

14. Dahaka ese ita ia durua diba imana ita abia isi loulou lasi totona? (Laulau itaia danu.)

¹⁴ Namona be oi laloa namonamo nega hida hebou dekenai haere do oi henia. Bema iseda imana ita abia isi loulou, stadi ia hakaua tadikaka ita doria bamona ita ia makaia loulou totona, bena haida be haere do idia henia lasi. Unai ese haida edia hemami do ia hadikaia, bena do idia ura lasi do idia haere.​—Had. 3:7.

15. (a) Dahaka do ita karaia bema haere totona ita idia makaia lasi? (b) Edena dala ai stadi ia hakaua tadikaka ese ibounai ia laloa bada diba? (Maua ladana “ Bema Hebou Oi Naria” itaia.)

¹⁵ Hebou lalonai pablisa momo be imana  idia abia isi neganai, reana do ita haere momo lasi. Nega haida, stadi hakaua tadikaka be ita do ia makaia lasi. Bema ita idia makaia lasi, ita lalohisihisi lasi bona ita badu lasi be namo.​—Had. 7:9.

16. Edena dala ai idia haere taudia ita hagoadaia diba?

¹⁶ Ena be haere momo oi henia lasi, to haida edia haere oi kamonai namonamo bona hebou murinai idia oi hanamoa. Oi ura henia haere hegeregerena, emu hanamoa herevana ese tadikaka taihu ia hagoadaia diba. (Aon. 10:21) Hanamoa herevana gwauraia karana be ta ta hagoadaia karana ta.

17. (a) Edena dala ai tama sina ese natudia idia durua haere namodia idia hegaegaelaia totona? (b) Vidio hegeregerena, haere hegaegaelaia totona edena dala foa ia herevalaia? (Futnout itaia danu.)

¹⁷ Edena dala ma ta ai hebou dekenai ita hagoadaia heheni diba? Bema oi be tama sina, natudia edia mauri lagani hegeregerena idia totona haere umui hegaegaelaia. (Mat. 21:16) Nega haida stadi ese mai anina bada topik hegeregere, headava ena hekwakwanai o kara maoromaoro taravatudia badinaia karana ia herevalaia, to reana paragraf ta o rua dekenai natudia be haere idia henia diba. Danu, emui natudia  umui durua idia laloparara haere totona nega haida idia do idia makaia lasi. Unai amo ma haida idia makaia neganai do idia lalohisihisi lasi.​—1 Tim. 6:18. d   

18. Edena dala ai sibona iseda ekspiriens herevalaia karana ita dadaraia diba? (Aonega Herevadia 27:2)

¹⁸ Ita ibounai ese ta ta hagoadaia haere namodia ita hegaegaelaia diba Iehova ita hanamoa bona Keristani tadikaka taihu ita durua totona. (Aon. 25:11) Nega ta ta iseda ekspiriens kwadogina ita herevalaia diba, to sibona herevalaia momo karana ita dadaraia be namo. (Aonega Herevadia 27:2 duahia; 2 Kor. 10:18) Ita ura Iehova, iena Hereva, bona iena taunimanima ibounai ita laloa. (Apok. 4:11) To, bema paragraf ta ena henanadai ese oi ia noia emu ekspiriens do oi gwauraia, vadaeni unai oi karaia diba. Haheitalai be inai atikol ena paragraf ma ta ai do ita itaia.

19. (a) Dahaka do ia vara bema hebou ai idia noho taudia edia namo ita laloa? (Roma 1:11, 12) (b) Haere henia karana dekenai dahaka oi moalelaia?

¹⁹ Ena be haere henia totona taravatu aukana be lasi, to ita ibounai ita ura iseda haere amo ta ta ita hagoadaia. Anina be do ita haere momo. Eiava bema ita idia makaia lasi, ita lalohisihisi lasi, to ita moale badina ma haida idia haere danu. Kongrigeisen heboudia ai, haida edia namo ita laloa neganai, ‘ta ta hagoadaia karana’ do ita moalelaia.​—Roma 1:11, 12 duahia.