Dahaka ese Ita Ia Durua Vaira Nega Namona Ita Abia Totona?

PLAY

Atikol ginigunadia dekenai ita herevalaia bamona, momo be idia vara kava siahu gaudia idia abia dae, edukeisen bona kohu idia tahua, bona tau o hahine namona ai idia lao, badina idia laloa unai amo vaira nega namona do idia abia. To, unai bamona idia karaia neganai, unai be hegeregere mapu kererena idia gaukaralaia idia diba lasi gabuna ta dekenai idia lao totona. Unai ese ia hahedinaraia vaira nega namona abia totona, heduru dala ta ia noho lasi, a? Lasi!

HEDURU DALA NAMONA TA

Disisen ta ita ura karaia neganai, nega momo mauri lagani bada o aonega bada tauna amo heduru ita tahua. Unai hegeregerena, vaira nega namona ita moalelaia totona, iseda mauri lagani bona aonega ia hereaia tauna ta amo heduru dala maorona ita tahua be gau badana. Unai Tauna ena sisiba namodia be buka ta ladana, Baibel, ai ita duahia diba, unai be lagani 3,500 gunanai idia torea.

Dahaka dainai Baibel oi abidadama henia diba? Badina unai buka be iunives ia karaia aonega bada Tauna amo ia mai. Bona Baibel ia gwau ia be “Idaunegai Ia Noho Diravana,” bona “unai nega amo ela bona hanaihanai” ia noho. (Daniela 7:9; Salamo 90:2) Ia be “guba Havaraia Tauna, Dirava momokanina, tanobada ia karaia.” (Isaia 45:18) Ita ia hamaoroa iena ladana be, Iehova.—⁠Salamo 83:18.

Baibel be Havaraia Tauna amo ia mai dainai, Baibel ia gwau lasi ta ena kastom o bese ese ma ta ena ia hereaia. Baibel ena sisiba be hanaihanai namo ia havaraia bona tano idauidau ai idia noho taudia ia durua. Baibel be gado momo ai ia noho bona tanobada ibounai dekenai idia hariharilaia, buka ma haida bamona lasi. * Unai amo tano idauidau taudia ese idia duahia bona idia ia hakaua diba. Unai ese Baibel ena hereva ia hamomokania:

“Dirava be taunimanima edia toana ia laloa lasi, to bese ibounai lalonai ia idia gari henia bona kara maoromaoro idia karaia taudia be ia ese ia abia dae.” —KARA 10:34, 35.

Tama sina ese edia natudia idia lalokau henia bona durua hegeregerena, lalokau Tamana, Iehova Dirava, be iena Hereva, Baibel amo ita dekenai heduru ia henia. (2 Timoteo 3:16) Dirava be ita ia havaraia bona ita hamoalea dalana ia diba, unai dainai ena hereva Baibel ita abidadama henia be namo.

BAIBEL ENA HEREVA ITA ABIDADAMA HENIA

Baibel ese ia gwauraia vaira negana ita abidadama henia diba, badina lagani 2,000 gunanai Baibel ese do idia vara gaudia ia gwauraia bona hari idia guguru noho.

DO IDIA VARA GAUDIA

“Bese ta do ia toreisi bese ta do ia tuari henia, bona basileia ta ese basileia ta do ia tuari henia. Tano mareremarere badadia do idia vara, gabu idauidau ai hitolo bada bona gorere dikadia do idia vara.”—LUKA 21:10, 11.

TAUNIMANIMA EDIA KARA

“Dina gabedia ai nega aukadia do idia vara, unai ese taunimanima do idia hametaua bada. Badina taunimanima be sibona do idia laloa bada, moni do idia ura henia bada, do idia hekokoroku, hadikaia herevadia do idia gwauraia, tama sina do idia kamonai henia lasi, tanikiu karana do idia diba lasi, ma haida do idia badinaia lasi, famili lalonai lalokau do ia noho lasi, do idia lalotamona lasi, ladana do idia hadikaia, sibona do idia biagua lasi, do idia dagedage, kara namodia do idia ura henia lasi, edia turadia edia mauri hadikaia dalana do idia karaia, do idia kwara auka, do idia heagi, moale karadia do idia ura henia bada, bona Dirava do idia lalokau henia lasi.”—2 TIMOTEO 3:1-4.

Baibel ese idaunegai ia gwauraia gaudia be hari idia guguru noho, unai oi itaia neganai dahaka oi laloa? Leung, ia be Hong Kong amo, ena hereva dekenai do oi lalotamona, ia gwau: “Baibel ena peroveta herevadia be idaunegai idia torea. Bona ta be hegeregere lasi do idia vara gaudia ia gwauraia maoromaoro totona. Reana Baibel be iseda aonega ia hereaia tauna amo ia mai.”

Baibel ai peroveta herevadia handred momo idia noho, bona idia guguru vadaeni. * Unai ese ia hamomokania Baibel be Dirava ena Hereva. Iehova ia gwau: “Lau be Dirava, bona ta be lau bamona lasi. Dokona ai do idia vara gaudia be matamana ai lau gwauraia.” (Isaia 46:9, 10) Unai dainai, Baibel ese vaira nega totona ia gwauraia gaudia oi abia dae be namo.

NAMO IA HAVARAIA HAKAUA DALADIA

Toretore Helagadia dekenai idia noho hakaua herevadia oi badinaia neganai, namo do oi davaria. Mani haheitalai haida oi laloa.

MONI BONA GAUKARA DEKENAI LALOHADAI MAORONA ABIA

“Laga-ani sisina be mai ena namo, to gaukara goadagoada karana be lai lulua bamona.”—HADIBAIA TAUNA 4:6.

FAMILI IA MOALE DALANA

“Namona be umui ibounai ese emui hahine do umui lalokau henia, sibona umui lalokau henia hegeregerena. Hahine danu ese iena tau do ia matauraia bada be namo.”—EFESO 5:33.

MA HAIDA KARA HENIA DALANA

“Badu karana bona dagedage karana oi rakatania. Oi lalohisihisi lasi bona kara dika do oi karaia lasi.”—SALAMO 37:8.

Bema Baibel ena hereva oi badinaia, hari emu mauri do ia namo bona vaira nega namona do oi moalelaia. Baibel ai, Dirava ena gwauhamata namodia vaira nega totona idia noho, hegeregere

MAINO BONA NOHO NAMO

“Do idia moale bada, badina gabu ibounai dekenai maino do ia noho.” —SALAMO 37:11.

IBOUNAI BE MAI EDIA RUMA BONA ANIANI

“Ruma do idia haginia bona do idia noholaia, bona vain umadia do idia karaia bona edia huahua do idia ania.”—ISAIA 65:21.

GORERE BONA MASE DO IA ORE

“Mase, lalohisihisi, taitai, bona hisihisi be do idia ore.”—APOKALUPO 21:4.

Unai bamona vaira nega namona oi moalelaia totona, dahaka oi karaia be namo? Mani atikol gabena oi laloa.

^ par. 6 Baibel idia hahanaia bona hariharilaia dalana dekenai diba ma haida oi abia totona, oi lao www.jw.org bona BIBLE TEACHINGS > HISTORY & THE BIBLE oi itaia.

^ par. 16 Diba ma haida oi abia totona, buka ladana The Bible—⁠God’s Word or Man’s? ena karoa 9 oi itaia, Iehova ena Witnes taudia ese idia karaia. Unai buka be emai websait, www.jw.org. ai ia noho. Oi lao LIBRARY > BOOKS & BROCHURES.

Reana Inai Danu Oi Ura

GIMA KOHORONA

Diba Maorona Oi Abia Vaira Negana Totona

Dirava ese tanobada bona tanobada do idia noholaia taudia totona gau namodia ia gwauhamatalaia ena helaro laloa bada.

GIMA KOHORONA

Hari, Baibel be Ita Ia Durua Diba, A?

Hari, taunimanima be diba matamata idia abia dainai, idia ura lasi Baibel—kahirakahira lagani 2,000 gunanai idia torea guguru bukana—idia stadilaia

GIMA KOHORONA

Baibel Bona Emu Vaira Negana

Dirava ena Hereva ese ita ia durua diba ita vairanai idia noho gaudia ita itaia totona, unai gaudia be, inai tanobada dikana ai dina ta ta ai ita davaria hekwakwanai o metau. To unai sibona lasi. Baibel ese eda vaira negana ai do idia vara gaudia ia hadibaia danu.

GIMA KOHORONA