EMU VAIRA NEGA MAURINA TOTONA ABIA HIDI OI KARAIA VADAENI, A? Taunimanima haida idia gwau, edia mauri ai idia vara gaudia be ma haida ese idia abia hidi o biagua. Mauri ai edia tahua gaudia idia hagugurua lasi neganai, edia vairana toana amo idia hahedinaraia ia vara gauna ena badina idia diba. Idia gwau, ‘edia tahua gaudia idia hagugurua diba lasi badina ma haida ese edia mauri idia biagua.’

Ma haida be ita noholaia tanobadana ai idia vara noho gaudia, hegeregere, hisihisi bona kara dika idia itaia neganai, ia auka Dirava idia abidadama totona. Bona danu herevana idia ura edia noho dalana idia hanamoa​—to tuari, taravatu utua karadia, disasta, bona gorere ese edia palani o mauri ia hadikaia. Unai dainai sibodia idia nanadaia, ‘Dahaka dainai unai gaudia lau lalohekwarahilaia noho?’

Ta ena mauri lalonai idia vara gaudia ese ena mauri ia haidaua diba, a? (Hadibaia Tauna 9:11) Ita ta ta iseda vaira nega maurina totona, abia hidi ita karaia diba. Baibel ese ia hahedinaraia, vaira nega oi moalelaia totona, oi karaia abia hidi be mai anina bada. Baibel ena hereva mani ita itaia.

Israela besena be Gwauhamata Tanona ai idia do vareai lasi neganai, edia gunalaia tauna, Mose, be idia ia hamaoroa, ia gwau: “Lau be mauri bona mase, hanamoa kara bona hadikaia kara, umui emui vairana dekenai lau atoa, do umui abia hidi totona. Unai dainai mauri do umui abia hidi, vadaeni umui bona emui natudia do umui mauri noho. Lohiabada emui Dirava do umui lalokau henia, bona iena hereva do umui kamonai henia, bona Lohiabada do umui badinaia namonamo.”​—Deuteronomi 30:19, 20.

“Lau be mauri bona mase, hanamoa kara bona hadikaia kara, umui emui vairana dekenai lau atoa, do umui abia hidi totona. Unai dainai mauri do umui abia hidi.”​—⁠Deuteronomi 30:19

Momokani! Dirava ese Aigupito ena igui hesiai amo Israela taudia ia hamauria bona idia totona Gwauhamata Tanona ai mauri hereadaena ia hegaegaelaia. To unai mauri namona idia abia totona, idia hekwarahi be namo. Danu bema idia ura unai hahenamo idia abia, namona be ‘mauri do idia abia hidi.’ Edena dala ai? Namona be ‘Lohiabada edia Dirava do idia lalokau henia, bona iena hereva do idia kamonai henia, bona Lohiabada do idia badinaia namonamo.’

Emu vaira nega oi moalelaia totona, hari unai bamona abia hidi oi karaia diba, unai abia hidi ese do ia hahedinaraia oi be mauri namona oi ura henia. Namona be Dirava oi lalokau henia, iena hereva oi kamonai bona iena ura oi badinaia namonamo. Unai oi karaia neganai, oi hahedinaraia oi ura tanobada paradaisona ai mauri hanaihanai oi abia. To unai oi karaia totona, dahaka oi karaia be namo?

Lalokau be Dirava ena kara badana. Aposetolo Paulo be lauma helaga ena heduru amo, ia gwau “Dirava be lalokau.” (1 Ioa. 4:8) Unai badina dainai hahediba taudia ese taravatu hereadaena totona Iesu idia nanadaia neganai, idia dekenai ia gwau: “Namona be Iehova emu Dirava oi lalokau henia mai emu kudouna ibounai, mai emu mauri ibounai, bona mai emu darana ibounai ida.” (Mataio 22:37) Mai momokani ida Iehova Dirava ita tura henia, badina ia ita lalokau henia. To dahaka dainai ia ita lalokau henia?

Tama bona sina ese edia natudia idia lalokau henia hegeregerena, Iehova be taunimanima ia lalokau henia. Herevana tama sina be goevadae lasi, to idia gaukara goada edia natudia idia hadibadia, hagoadadia, durudia bona matahakani henidia, badina idia ura edia natudia idia moale bona mauri namona idia davaria. Tama sina idia ura edia natudia  ese dahaka do idia karaia? Idia ura edia natudia ese edia hereva idia kamonai bona idia lalokau henidia bona edia namo totona idia dekenai idia hadibaia gaudia be mai kudouna ibounai ida idia badinaia be namo. Iseda guba Tamana ese ita totona ia karaia gaudia dainai ia ita lalokau henia be namo.

Gado ginigunana ai idia torea Baibel ese ia hahedinaraia, inai hereva “kamonai” ese “badinaia” karana ia herevalaia danu. Natu maragi ta dekenai inai hereva, “Emu tama sina oi kamonai henia” ita gwauraia neganai, anina be ita ura ena tama sina ia badinaia, ani? To Dirava ena hereva kamonai henia ena anina be, ia gwauraia herevadia ita dibaia bona badinaia be namo. Momokani, Dirava ena gadona korikori ita kamonai diba lasi, to iena Hereva, Baibel ita duahia bona ita badinaia neganai, ia ita kamonai henia unai.​—1 Ioane 5:3.

Iesu ese ena aposetolo taudia dekenai Dirava ena hereva kamonai henia ena namo ia herevalaia neganai, idia dekenai ia gwau: “Taunimanima be aniani sibona amo lasi, to Iehova ena uduna amo idia mai hereva ibounai dainai do idia mauri.” (Mataio 4:4) Iseda mauri ai, aniani be mai anina bada, unai hegeregerena, Dirava ena aonega abia karana be mai anina bada danu. Dahaka dainai? Aonega tauna King Solomona ia gwau: “Aonega ese oi ia gimaia noho diba, moni ese oi ia gimaia noho diba hegeregerena. To aonega ese moni ia hereaia noho, badina aonega ese aonega tauna ia hamauria noho.” (Hadibaia Tauna 7:12) Dirava amo ita abia diba bona aonega ese hari ita ia gimaia bona ita do ia durua abia hidi maorodia ita karaia totona, unai amo vaira nega ai mauri hanaihanai ita abia diba.

Ita herevalaia vadaeni atikol ai, Iesu ena parabole lalonai, ia gwau: “Geiti maragina dekenai umui vareai, badina mase ia lao henia dalana be bada bona lababa herea, bona taunimanima momo be unai dala dekenai idia raka. To mauri ia lao henia dalana be ia maragi bona ena geiti be ia maragi momokani. Bona taunimanima haida sibona be unai dala idia davaria.” (Mataio 7:13, 14) Unai bamona dala ita badinaia totona, unai dala ia diba namonamo tauna ta ena heduru do ita tahua bona badinaia be namo, unai amo ita ura lao henia gabuna dekenai ita ginidae diba​—⁠unai be mauri hanaihanai. Unai dainai, Dirava kahirakahira ita noho be gau badana. (Salamo 16:8) To, edena bamona unai do ita karaia?

Dina ta ta ai, ita ura gaukara momo ita hagugurua bona gau momo ita laloa. Unai bamona gaudia ita karaia dainai ita be nega lasi Dirava ena ura ita laloa totona. Unai dainai Baibel ese ita ia hadibaia lou: “Unai dainai, emui raka dalana do umui naria namonamo, kavakava taudia bamona do umui raka lasi, to aonega taudia bamona do umui raka. Emui nega do umui gaukaralaia namonamo, badina inai nega be nega dikana.” (Efeso 5:15, 16) Bema ita ura Dirava kahirakahira ita noho, namona be eda mauri ai iseda hetura karana ia ida ita laloa bada.—Mataio 6:33.

Guna oi karaia gaudia do ia senisia diba lasi, to hari oi sibona bona emu famili totona abia hidi maorona oi karaia diba, mauri hanaihanai umui abia totona. Baibel ese ia hahedinaraia, iseda guba Tamana, Iehova Dirava be ita ia lalokau henia bada, bona ia ura ita dekenai ia hadibaia taravatu ita badinaia. Peroveta tauna Mika ena hereva mani ita laloa:

Ia gwau: “Lasi momokani! Lohiabada ese kara namo dalana ita ia hamaoroa vadaeni. Lohiabada ia ura ita karaia gauna be inai: Kara maoromaoro do ita karaia, taunimanima ibounai do ita lalokau henia nega ibounai, bona mai manau danu Dirava danu do ita raka hebou.”​—Mika 6:8.

Iehova be oi ia boiria noho, badina ia ura ia ida oi raka. Bema unai oi karaia, oi dekenai mauri hanaihanai ena hahenamo do ia henia. Unai boiboi herevana do oi abia dae, a? Abia hidi oi karaia!