Maoro Bona Kerere: Abia Hidi Oi Karaia be Namo
Ita karaia abia hidi ese do ia hahedinaraia, gabeai iseda mauri do ita moalelaia eiava lasi. Iehova Dirava be unai ia diba. Unai dainai ia ura iena kara maoromaoro taravatudia ita badinaia.
Iehova ia ura maino ai ita noho bona mauri ita moalelaia.
“Lau, Iehova, be emui Dirava, Lau ese umui lau hadibaia noho, namo umui davaria totona, Lau ese umui lau hakaua noho, dala maorona ai umui raka totona. Bema egu oda herevadia umui kamonai henia! Vadaeni emui maino be sinavai bamona do ia aru, bona emui kara maoromaoro be davara ena hurehure bamona do ia goada.”—Isaia 48:17, 18.
Dirava be iseda Havaraia Tauna dainai, mauri namona ita abia dalana ia diba. Ia ura ita ese ena hakaua hereva ita badinaia badina unai ese namo ia havaraia. Dirava ena oda herevadia ita badinaia neganai, ita diba momokani namo do ita davaria. Nega ibounai abia hidi maorona do ita karaia, unai ese ita dekenai maino bona moale do ia havaraia.
Iehova ese ita karaia diba lasi gaudia ia noia lasi.
“Umui dekenai lau gwauraia oda herevadia be idia auka lasi umui lalopararalaia totona, unai oda herevadia umui badinaia diba.”—Deuteronomi 30:11.
Dirava ena kara maoromaoro taravatudia ita badinaia totona iseda lalohadai bona kara ita haidaua be namo. Iehova ese ita karaia diba lasi gaudia ia noia lasi. Ia be iseda Havaraia Tauna dainai iseda goada ena hetoana ia diba. Iehova ita dibaia neganai, do ita itaia “iena taravatu be idia metau lasi.”—1 Ioane 5:3.
Iehova ia gwauhamata iena taravatu idia ura badinaia taudia do ia durua.
“Lau, Iehova emu Dirava, be emu imana idibana lau dogoatao noho, bona oi dekenai lau gwau noho, ‘Oi gari lasi. Lau ese oi do lau durua.’”—Isaia 41:13.
Dirava ena kara maoromaoro taravatudia ita badinaia diba badina ia ese ita do ia durua. Ia ese ena Hereva, Baibel amo ita ia durua, unai amo goada bona helaro ita abia.
Tanobada hegegemadai ai, taunimanima milioni momo idia davaria Baibel ena taravatu badinaia karana ese edia mauri ia hanamoa. Namona be Baibel ena sisiba namodia oi dibaia. Unai oi karaia totona, jw.org ai buklet ladana Mauri Moalelaia Hanaihanai! oi gaukaralaia diba, davana lasi. Buklet ai inai leseni idia noho:
-
Edena Dala ai Baibel ese Oi Ia Durua Diba?
-
Baibel ese Vaira Nega Namona Ia Gwauhamatalaia
-
Baibel Ena Hereva Oi Abia Dae Diba, A?
Dirava ena Hereva, Baibel oi tahua neganai, do oi diba iena hereva ‘ita abidadama henia diba hari ela bona hanaihanai.’ (Salamo 111:8) Baibel lalonai idia noho kara maoromaoro taravatudia be iseda mauri ai ita badinaia be namo herea. To, Dirava ese ita ia doria lasi unai ita karaia totona. (Deuteronomi 30:19, 20; Iosua 24:15) Unai abia hidi be ita ta ta sibona ese do ita karaia.
