Lasi, unai be siri ena anina lasi. To ena anina be tau ta be nega momo hekwakwanai idauidau ia davaria dainai ia moru, to ia toreisi lou badina ia haheauka.

Mani inai siri ena hereva ita laloa: “Kara maoromaoro tauna dekena amo henaoa totona, o iena ruma abia totona, hunia dekenai do oi naria noho lasi. Unai be kerere bada taudia idia karaia bamona. Badina be kara maoromaoro tauna, be nega momo do ia moru, to ma do ia toreisi. To kara dika tauna be hisihisi ese, do ia hadikaia ore momokani. Oi dekenai ia tuari tauna ia moru neganai, do oi moale lasi. Ia hekwakwanai neganai, do oi moale bada lasi.”​—Aon. 24:15-17.

Haida idia laloa siri 16 ena anina be ta be ia kara dika to ia helalo kerehai bona ena hetura karana Dirava ida ia hanamoa lou diba. England ai dubu gunalaia taudia rua idia gwau: “Idaunegai bona hari idia noho haroro taudia, ese unai siri be unai bamona idia gaukaralaia.” Ma idia gwau unai lalohadai ena anina be “kara maoromaoro tauna, be nega momo kara dika badadia lalonai do ia moru, to iena lalokau Dirava dekenai ia haboioa lasi, bona nega ibounai ia helalo kerehai karana dainai Dirava ese ia lalonamo henia.” Kara dika ia ura karaia tauna be unai lalohadai do ia abia dae. Reana do ia laloa ena be ia kara dika loulou, to Dirava ese hanaihanai do ia gwauatao.

Unai lalohadai ese siri 16 ena anina korikorina ia hahedinaraia lasi.

Siri 16 bona 17 ai idia torea herevana “moru” be Heberu gado ai dala idauidau ai idia gaukaralaia diba. Unai hereva be moru korikorina, hegeregere animal ta ia moru, ta be guhi amo ia moru diho, eiava nadi ta be tano dekenai ia moru karana ia herevalaia. (Deu. 22:4, 8; Amo. 9:9) Unai hereva be laulau dalanai idia gaukaralaia danu, hegeregere: “Tau namona ena raka dalana, be Lohiabada ese ia hakaua noho, bona unai tau ena kara ia ura henia dainai, Lohiabada ese do ia naria noho. Unai tau be do ia moru, to do ia diho momokani lasi, badina be Lohiabada ese, iena imana dekena amo do ia haginia lou.”​—Sal. 37:23, 24; Aon. 11:5; 13:17; 17:20.

To, Professor Edward H. Plumptre ia gwau: “Heberu herevana [“moru”] be idia gaukaralaia diba lasi kara dika idia herevalaia totona.” Diba bada tauna ma ta ese siri 16 be inai bamona ia gwauraia: “Dirava ena taunimanima dagedage henia karana be anina lasi, badina idia be hanaihanai do idia kwalimu, to kara dika taudia be lasi!”

Unai ese ia hahedinaraia Aonega Herevadia 24:16 be kara dika dekenai “moru” karana ia herevalaia lasi, to ta be hekwakwanai ia davaria loulou karana ia herevalaia. Inai kara dika tanobadana lalonai, kara maoromaoro tauna be gorere eiava hekwakwanai ia davaria diba. Eiava ena abidadama dainai gavamani ese do idia dagedage henia bada. To ia abia dae momokani Dirava ese do ia durua ia haheauka bona ia kwalimu totona. Sibona oi nanadaia: ‘Lau itaia Dirava ena hesiai taudia be hekwakwanai idia davaria to idia kwalimu, ani?’ Dahaka dainai? Baibel ese ita ia hagoadaia “Hisihisi idia abia noho taudia, be Lohiabada ese ia durua noho, bona dagedage taudia ese tau haida idia hahisia neganai, Lohiabada ese unai hisihisi taudia ia abia isi noho.”​—Sal. 41:1-3; 145:14-19.

“Kara maoromaoro tauna” be haida ese hekwakwanai idia davaria neganai ia moale lasi. To, ia moale badina ia diba, “Dirava idia gari henia taudia be do idia namo, idia ese Dirava idia matauraia noho dainai.”​—Had. 8:11-13; Iobu 31:3-6; Sal. 27:5, 6.