HEADAVA TAUDIA
2: Gaukara Hebou
ANINA BE DAHAKA?
Headava lalonai tau bona hahine idia gaukara hebou neganai, unai be hegeregere tau be peleini ena pilot 1 bona ena hahine be pilot 2, bona idia ruaosi edia palani be peleini do ia roho namonamo. Hekwakwanai negadiai, nega momo tau o hahine be inai hereva “lau” idia gwauraia momo, to “ita” idia gwauraia momo lasi.
BAIBEL ENA HAKAUA HEREVA: “Idia be rua lasi, to tauanina tamona.”—Mataio 19:6.
“Tau bona ena hahine idia gaukara hebou neganai, edia headava maurina do ia namo.”—Christopher.
DAHAKA DAINAI GAUKARA HEBOU BE GAU BADANA?
Hepapahuahu negadiai, idia gaukara hebou lasi headava taudia be hekwakwanai do idia hamaoromaoroa lasi to do idia inai heheni. Gau maragina be hekwakwanai badana ai do idia halaoa.
“Headava lalonai, gaukara hebou karana be mai anina bada. To bema lau bona egu adavana ai gaukara hebou lasi, ai be headava taudia bamona lasi, ena be ruma tamona dekenai ai noho—unai bamona taunimanima rua ese disisen badadia dekenai idia lalotamona be ia auka.”—Alexandra.
DAHAKA OI KARAIA DIBA?
OI SIBONA OI NANADAIA
-
Moni gaukara amo lau abia pei “ibounai be lauegu,” a?
-
Lau holidei namonamo totona, egu adavana amo lau daudau be namo, a?
-
Egu adavana ena varavara amo lau daudau, ena be egu adavana be idia ia tura henia, a?
EMU ADAVANA IDA OI HEREVALAIA HENANADAI
-
Iseda headava lalonai, dahaka gaudia ita karaia hebou namonamo?
-
Dahaka gau haida ita hanamoa o hamaoromaoroa diba?
-
Edena dala haida ita badinaia diba, unai amo ita gaukara hebou namonamo diba?
DALA MA HAIDA
-
Tenis gadara lalonai gadara tauna 1 be tenis kot ena right kahanai bona gadara tauna 2 be tenis kot ena left kahanai ia gini, to namo lasi umui headava taudia be unai bamona umui karaia. Vadaeni dahaka umui karaia diba, unai amo umui ruaosi be team tamona lalonai umui gini hebou bamona?
-
Namo lasi inai bamona oi laloa, ‘Edena bamona lau wini diba?,’ lasi, namona be inai bamona oi laloa: ‘Edena bamona ai ruaosi ai wini diba?’
“Daika be maoro bona daika be kerere lalohadaina umui dadaraia. Emui headava lalonai, maino bona lalotamona be gau badana.”—Ethan.
BAIBEL ENA HAKAUA HEREVA: “Umui sibona emui namo do umui laloa lasi, to ma haida edia namo danu do umui laloa.”—Filipi 2:3, 4.
