Matahakani ena anina be ta sisiba henia bona hadibaia, to ena anina ma ta be kerere hamaoromaoroa bona panisia karana. Iehova ese ita ia matahakani henia, unai amo ia abia dae dalana ai ia ita tomadiho henia diba. (Ro 12:1; He 12:10, 11) Nega haida matahakani dainai ita lalohisihisi diba, to unai be ita ia hakaua kara maoromaoro dalanai bona hahenamo ita abia diba. (Ao 10:7) Matahakani idia henia bona idia abia taudia ese dahaka idia laloatao be namo?

Matahakani ia henia tauna. Iehova bamona, elda taudia, tama sina, bona ma haida idia gaukara goada mai hebogahisi bona lalokau ida matahakani idia henia totona. (Ie 46:28) Matahakani aukana be ta ena kerere hegeregerena idia henia bona mai lalokau ida unai idia karaia be namo.​—Tit 1:13.

Matahakani ia abia tauna. Ena be dala idauidau ai matahakani ita abia, namona be ita dadaraia lasi, to karaharaga ita badinaia. (Ao 3:11, 12) Ita be goevadae lasi taudia dainai dala idauidau ai matahakani ita abia be namo. Reana Baibel ai ita duahia gaudia eiava kongrigeisen heboudia ai ita kamonai gaudia amo matahakani ita abia. Eiava nega haida ma haida be hahemaoro komiti amo matahakani idia abia be namo. Bema matahakani ita abia dae bona ita badinaia mauri namona do ita abia.​—Ao 10:17.

VIDIO LADANA “IEHOVA ESE IA LALOKAU HENIA TAUNA IA MATAHAKANI HENIA” ITAIA, BENA INAI HENANADAI HAERELAIA:

• Matamanai Canon ena mauri be edena bamona, bona gabeai dahaka ia vara?

• Edena dala ai Iehova ese mai lalokau ida ia matahakani henia?

• Iena ekspiriens amo dahaka gau haida ita dibaia?