LESENI 02
Baibel ese Vaira Nega Namona Ia Gwauhamatalaia
Tanobada ibounai dekenai taunimanima be problem idauidau idia davaria, unai ese idia dekenai lalohekwarahi bona lalohisihisi ia henia. Oi dekenai ia vara gauna ta dainai unai bamona oi mamia, a? Reana oi lalohisihisi badina gorere badana ta oi abia eiava emu lalokau tauna ta ia mase. Reana oi laloa, ‘Nega ta mauri do ia namo, a?’ Baibel ese unai henanadai ia haerelaia.
1. Edena dala ai Baibel ese helaro ia henia?
Baibel ese problem momo ita davaria ena badina sibona ia herevalaia lasi. To danu, kahirakahira Dirava ese problem ibounai do ia haorea ena sivarai namona ia gwauraia. Baibel ia gwau: “Vaira nega ai noho namo do [ita] davaria.” (Ieremia 29:11, 12 duahia.) Unai gwauhamata namodia ese ita idia durua, hekwakwanai ita haheaukalaia, lalohadai maorodia ita abia, bona nega ibounai ita moale totona.
2. Baibel ese vaira negana be edena bamona ia herevalaia?
Baibel ia gwau vaira nega ai “mase, lalohisihisi, taitai, bona hisihisi be do idia ore.” (Apokalupo 21:4 duahia.) Hari inai negai taunimanima ese idia davaria hekwakwanai, hegeregere ogogami, kara dika, bona mase be do idia ore momokani. Baibel ia gwauhamata taunimanima be tanobada Paradaiso ai mauri hanaihanai do idia moalelaia.
3. Edena bamona oi diba Baibel ena gwauhamata be do idia vara momokani?
Taunimanima momo idia ura gau namodia idia vara, to idia diba lasi unai gaudia do idia vara momokani o lasi. Baibel ese ia gwauhamatalaia gaudia be idau. Unai gwauhamata herevadia ita abia dae diba bema ‘Toretore Helagadia ita tahua namonamo.’ (Kara 17:11) Baibel oi stadilaia lalonai, vaira nega totona ia gwauraia gaudia do oi abia dae eiava lasi ena disisen be oi sibona ese do oi karaia.
DIBA MA HAIDA ABIA
Baibel ese vaira nega totona ia gwauhamatalaia gaudia haida oi laloa. Hari Baibel ese taunimanima dekenai helaro ia henia dalana itaia.
4. Baibel ia gwauhamata ita mauri hanaihanai diba bona hisihisi do idia ore
Baibel ai idia noho gwauhamata edia lista oi itaia. Edena gwauhamata oi ura henia bada? Dahaka dainai oi dekenai ia be mai anina bada?
Gwauhamata ta ta ena badinai idia noho Baibel siridia duahia, bena inai henanadai oi laloa:
-
Inai siri ese oi ia durua, a? Emu famili bona turadia ia durua diba, a?
Mani oi laloa, oi noho tanobadana ai
|
TA DO IA GWAU LASI . . . |
TAUNIMANIMA IBOUNAI . . . |
|---|---|
|
|
|
|
|
|
|
|
|
|
5. Baibel ena gwauhamata ese ta ia durua diba
Taunimanima momo be idia vara problem idauidau idia itaia dainai idia lalohisihisi eiava idia badu. Ma haida be idia gaukara goada gau namodia idia karaia totona. Baibel ena gwauhamata namodia ese hari inai negai taunimanima ia durua dalana oi itaia. VIDIO itaia, bona henanadai herevalaia.
-
Vidio lalonai, Rafika be edena kara dekenai ia lalohisihisi?
-
Ena be Rafika ia itaia kara kerere ia ore lasi, to edena dala ai Baibel ese ia durua?
Baibel ena gwauhamata namodia ese ita do ia durua lalohisihisi karana ita haheaukalaia, bona ita moale noho ena be problem idia vara. Aonega Herevadia 17:22 bona Roma 12:12 duahia, bena inai henanadai herevalaia:
-
Baibel ai ia noho vaira nega ena sivarai namona ese hari emu mauri ia hanamoa diba, a? Dahaka dainai unai bamona oi laloa?
HAIDA IDIA GWAU: “Baibel ese vaira nega totona ia gwauhamatalaia gaudia be do idia vara lasi.”
-
Dahaka dainai oi sibona ese hamomokania gaudia oi tahua be namo?
POINT BADANA
Baibel ese nega vaira totona gwauhamata namodia momo ia gwauraia, unai ese ita dekenai helaro ia henia bona hari inai negai iseda mauri ia hanamoa.
Riviu
-
Dahaka dainai taunimanima ese Dirava ena gwauhamata idia diba be namo?
-
Baibel ese vaira nega be edena bamona ia gwauraia?
-
Edena dala ai vaira negana laloa karana ese oi ia durua diba?
REFERENS ITAIA
Hekwakwanai oi davaria negadia ai, helaro ese oi ia durua daladia ma haida oi dibaia.
“Helaro—Edeseniai Oi Davaria Diba?” (Noga!, April 22, 2004)
Vaira nega namona ena helaro ese gorere taudia ia durua dalana do oi dibaia.
“Baibel ese Nega Daudau Idia Gorere Taudia Ia Durua Diba, A?” (Websait atikol)
Inai miusik vidio oi itaia neganai, sibona oi piksaia, oi bona emu famili be Baibel ese ia gwauhamatalaia Paradaiso ai mauri umui moalelaia noho.
Social activist ta ena sivarai do oi duahia, Baibel ena helaro vaira nega totona ia dibaia neganai ena mauri ia haidaua.
“Hari Lau Diba, Tanobada ai Idia Vara Gaudia Lau Haidaua Diba Lasi” (Gima Kohorona, July 1, 2013)
Reana Inai Danu Oi Ura
Momo Edia Henanadai
Iehova Ena Witnes Taudia be Dahaka Baibel Stadi Kosi Idia Karaia?
Iehova Ena Witnes Taudia ese idia karaia Baibel stadi be davana lasi, bona oi ura henia Baibel oi gaukaralaia diba. Emu ruma bese eiava turadia oi boiria diba stadi lalonai idia helai totona.
