Pura haida lalonai Iesu be Perea ai ia noho, unai be Ioridane kahanai. (Ioane 10:40) Bona hari ia be Ierusalema dekenai ia lao, unai be saut kahanai.

Iesu be sibona ia lao lasi. Iena hahediba taudia bona “hutuma bada,” takisi gogoa taudia bona kara dika taudia danu be ia ida idia lao. (Luka 14:25; 15:1) Farisea bona Taravatu hadibaia taudia, Iesu ena hereva bona ia karaia gaudia idia gwauraia dika taudia unai, be idia lao danu. Iesu ese boio mamoe, boio merona, taga tauna, bona Lasaro edia parabole ia herevalaia murinai, kamonai taudia be unai idia lalohadailaia be namo.​—Luka 15:2; 16:14.

Reana ia idia inai henia taudia edia hereva aukadia bona hevaseha herevadia ia laloa dainai, iena hahediba taudia ia hereva henia. Guna Galilea ai ia hadibaia gaudia ia herevalaia lou.

Hegeregere, Iesu ia gwau: “Hahekwakwanaia gaudia be do idia vara. To hahekwakwanaia gaudia ia havaraia tauna be dika do ia davaria! . . . Umui naria namonamo. Bema emu tadikaka ia kara dika, ia oi sisiba henia, bona bema ia helalo-kerehai, ena dika oi gwauatao. Ena be dina ta lalonai nega 7 oi dekenai ia kara dika bona nega 7 oi dekenai ia giroa mai bona ia gwau, ‘Egu dika oi gwauatao,’ namona be iena dika oi gwauatao.” (Luka 17:1-4) Reana unai hereva dokona amo Petero ia laloatao, ia danu be Iesu ia nanadaia bema ena tadikaka ena dika be nega 7 do ia gwauatao.​—Mataio 18:21.

Hahediba taudia be Iesu ena sisiba do idia badinaia, a? Iesu dekenai idia gwau, “Mani emai abidadama do oi habadaia” neganai, idia ia hamaoroa: “Bema emui abidadama be mastadi uhena maragina bamona, inai au dekenai do umui gwau, ‘Oi sibona oi kokia bona davara dekenai oi gini,’ bona emui hereva do ia badinaia.” (Luka 17:5, 6) Oibe, ena be ta ena abidadama be maragi, to gau badadia ia karaia diba.

Iesu ese aposetolo taudia ia hadibaia, manau bona sibona laloa maragi karana be mai anina bada, ia gwau: “Bema umui ta ena hesiai tauna ta be uma dekenai ia geigei eiava mamoe ia naria, bona ia lou mai neganai, ia dekenai dahaka do oi hereva? Do oi gwau, ‘Oi mai haraga bona teibolo ai oi aniani,’ a? Lasi, to ia dekenai do oi gwau, ‘Egu adorahi aniani oi hegaegaelaia, bona emu gaukara dabua oi karaia bona lau oi hesiai henia ela bona egu aniani lau haorea, unai murinai oi aniani diba.’ Hesiai tauna ese biaguna ena gaukara ibounai ia karaia dainai, ena biaguna ese do ia hanamoa, a? Lasi. Unai hegeregerena, umui dekenai idia henia gaukara ibounai umui karaia neganai, umui gwau: ‘Ai be anina lasi hesiai taudia sibona. Ai karaia gaukara be emai maduna.’”​—Luka 17:7-10.

Namona be ita laloparara Dirava ena ura atoa guna karana be mai anina bada. Danu, namona be ita laloatao, ita be Dirava ena ruma bese lalonai bona ia ita tomadiho henia be hahenamo badana.

Unai murinai, gwaukau tauna ta ia ginidae; Maria bona Mareta ese idia siaia. Idia be Lasaro ena taihudia, bona Iudea ena hanua ladana Betania dekenai idia noho. Unai tauna ia gwau: “Lohiabada e, kamonai! Oi lalokau henia tauna be ia gorere.”​—Ioane 11:1-3.

Ena be Iesu ia kamonai iena turana Lasaro ia gorere bada, to ia daradoko lasi. Ia gwau: “Inai gorere ese mase do ia havaraia lasi, to Dirava dekenai hairai do ia henia, vadaeni Dirava ena Natuna be unai dala amo idia hanamoa diba.” Ia noho gabuna ai dina ma rua ia noho bena ena hahediba taudia ia hamaoroa:  “Namona be Iudea dekenai ita giroa lou.” To idia haere: “Rabi e, vanegai sibona Iudea taudia idia ura nadi amo oi idia hodoa, ma oi ura unuseniai oi giroa lou, a?”​—Ioane 11:4, 7, 8.

Iesu ia haere: “Dina ta ena diari be hora 12, ani? Bema ta be dina ena diari lalonai ia raka, gau ta do ia bampaia lasi, badina inai tanobada ena diari ia itaia. To bema tau ta be hanuaboi ai ia raka, gau ta do ia bampaia, badina ia lalonai diari be lasi.” (Ioane 11:9, 10) Anina be Iesu ena haroro gaukara totona Dirava ese ia abia hidi negana be ia do ore lasi. Unai dainai Iesu ese ia do noho nega kwadogina ia gaukaralaia namonamo be namo.

Iesu ma ia gwau: “Iseda turana Lasaro be ia mahuta, to unuseni do lau lao, ia lau hanogaia totona.” Hahediba taudia idia laloa Lasaro be ia laga-ani sibona bona do ia namo lou dainai, idia gwau: “Lohiabada e, bema ia mahuta, ia be do ia namo.” Iesu be idia dekenai ia hereva hedinarai: “Lasaro ia mase vadaeni . . . Vadaeni namona be ia dekenai ita lao.”​—Ioane 11:11-15.

Toma ia diba reana Iudea ai Iesu do idia hamasea, to ia ura ia do ia durua noho, unai dainai hahediba taudia oredia dekenai ia gwau: “Namona be ita danu ita lao, unai amo ia ida do ita mase.”​—Ioane 11:16.