Sabati dinana ma ta ai, reana Galilea ai, Iesu be sinagoga ta dekenai ia lao. Unuseniai tau ta ia itaia, ena imana idibana be ia dika. (Luka 6:6) Taravatu hadibaia taudia bona Farisea taudia be Iesu idia raraia. Dahaka dainai? Inai henanadai amo edia lalohadai korikorina ia hedinarai, idia gwau: “Sabati ai gorere hanamoa be taravatu eiava lasi?”​—Mataio 12:10.

Iuda tomadiho gunalaia taudia idia laloa, Sabati ai bema gorere tauna be kahirakahira ia mase, unai nega sibona ai ta ese ia hanamoa be taravatu lasi. To Sabati ai bema ta ena turia ia kwaidu, idia hamaoromaoroa o dabua amo idia kumia be taravatu, badina unai bero dainai ta be do ia mase lasi. Unai ese ia hahedinaraia, taravatu hadibaia taudia bona Farisea taudia be gorere tauna ena hisihisi idia laloa lasi, to lalohadai ma ta dainai Iesu idia nanadaia. Oibe, dala idia tahua Iesu idia samania totona.

To Iesu be edia lalohadai kererena ia diba. Ia laloparara idia be sibona edia taravatu idia badinaia goada, bona Baibel ese Sabati dinana totona ia gwauraia taravatuna idia badinaia lasi. (Esodo 20:8-10) Ena be vaia Iesu be gaukara namodia ia karaia, to ia idia gwauraia dika. Vadaeni edia lalohadai kererena hamaoromaoroa totona, Iesu ese imana dika tauna ia hamaoroa: “Oi toreisi bona huanai oi mai.”​—Mareko 3:3.

Bena taravatu hadibaia taudia bona Farisea taudia dekenai ia gwau: “Bema umui ta be mai ena mamoe tamona, bona Sabati dinana ai unai mamoe be guri lalonai ia moru, do oi dogoatao bona veria daekau lasi, a?” (Mataio 12:11) Mamoe amo bisinesi idia karaia dainai, bema ta be guri lalonai ia moru, unuseniai do idia rakatania lasi ela bona murina dinana, badina dika ia mase bena moni do idia karaia lasi. Danu Baibel ia gwau: “Kara maoromaoro tauna be ena animal idauidau ia naria.”​—Aonega Herevadia 12:10.

Iesu ese mamoe ena haheitalai ia gwauraia murinai, ia gwau: “Taunimanima be mamoe idia hereaia! Unai dainai Sabati dinana ai ta ese kara namona ia karaia be taravatu lasi.” (Mataio 12:12) Unai hegeregerena, Iesu be unai tauna ia hanamoa neganai, ia be Sabati taravatuna ia utua lasi. Iesu be gorere tauna ia hebogahisi henia, bona ena hereva be maoro. Unai dainai Farisea bona taravatu hadibaia taudia be hereva ta idia gwauraia lasi.

Iesu ia diba edia lalohadai be kerere dainai, ia moale lasi. Vadaeni ia giroa bena imana dika tauna dekenai ia gwau: “Emu imana oi atoa maoromaoro.” (Mataio 12:13) Unai tau ese ena imana ia atoa maoromaoro neganai, ena imana ia namo. Bona ia moale bada, to Iesu idia ura samania taudia be dahaka idia laloa?

Ena imana ia namo dainai Farisea taudia idia moale be namo, to lasi, maoromaoro idia lao bona “Heroda ena orea taudia ida idia hebou, Iesu hamasea dalana idia palanilaia totona.”  (Mareko 3:6) Sadukea taudia be Iuda tomadihona ena memba taudia, bona idia be Heroda ena politikol oreana lalonai. Sadukea bona Farisea taudia be idia inai heheni, to hari idia gaukara hebou Iesu idia inai henia totona.