Unai dina ai Iesu ia gaukara goada bona ia hesiku. Dina ia diho neganai, ena hahediba taudia ia hamaoroa: “Gohu ena kahana dekenai ita hanaia lao,” unai be Kaperanauma kahanai.​—Mareko 4:35.

Galilea Gohu ena ist kahanai be Gerasa tanona ia noho, ia be Dekapoli ena karana ta. Dekapoli ena siti momo ai Greek taudia idia noho, to Iuda taudia momo danu be unuseni idia noho.

 Iesu be Kaperanauma ia rakatania neganai, taunimanima ese idia itaia. Bouti haida danu be gohu idia hanaia matamaia. (Mareko 4:36) Galilea Gohu ena lata be kilomita 21 bamona bona ena lababa be kilomita 12 bamona. Unai dainai ia be daudau lasi.

Ena be Iesu be goevadae tauna, to ia haroro goadagoada dainai ia hesiku. Unai dainai kone idia rakatania neganai, bouti ena murina kahanai ia hekure, ena kwarana be pilo dekenai ia atoa, bena ia mahuta.

Aposetolo haida be bouti taria dalana idia diba namonamo, to hari do idia hekwarahi bada. Galilea Gohu be ororo ese ia hagegea, bona gohu ena ranu be nega ibounai ia siahu. Nega haida, lai kerumana be ororo amo ia toa bona gohu ena ranu siahuna ia botaia neganai, lai gubana ia havaraia. Hari unai ia vara. Hurehure badadia ese bouti idia botaia. Bouti be “ranu amo ia honu matamaia bona kahirakahira idia mutu.” (Luka 8:23) To Iesu be ia mahuta noho!

Aposetolo taudia idia hekwarahi bada bouti idia taria totona, guna lai guba negadiai idia karaia bamona. To idia hegeregere lasi. Idia gari dika idia mase, unai dainai Iesu idia hanogaia bona idia boiboi: “Lohiabada e, ita oi hamauria, ita be kahirakahira do ita mase!” (Mataio 8:25) Hahediba taudia idia gari, idia laloa do idia maloa mase!

Iesu ia toreisi neganai, aposetolo taudia dekenai ia gwau: “Umui abidadama maragimaragi taudia, dahaka dainai umui gari dikadika?” (Mataio 8:26) Bena Iesu ese lai bona hurehure ia gwau henia, ia gwau: “Hadokoa! Regerege lasi!” (Mareko 4:39) Vadaeni lai ia doko bona gohu ia manada lou. (Mareko bona Luka ese unai sivarai idia torea, idia ese Iesu be hoa dalanai lai gubana bona hurehure ia hadokoa karana idia herevalaia guna, bena hahediba taudia edia abidadama lasi karana idia herevalaia.)

Hahediba taudia edia hemami mani oi laloa! Idia ese lai gubana bona hurehure badadia idia itaia, to hari gohu be ia manada momokani. Idia gari dikadika bona ta ta dekenai idia gwau: “Inai tauna be daika? Lai bona hurehure ese ia idia kamonai henia danu!” Vadaeni gohu ena kahana ma ta dekenai idia ginidae bona dika ta idia davaria lasi. (Mareko 4:41–5:1) Reana idia ida idia lao bouti haida danu be kone dekenai idia ginidae.

Ita moale badina ita diba Dirava ena Natuna be mai ena siahu lai gubana bona hurehure ia biagudia totona! Basileia do ia lohiaia neganai, taunimanima ibounai be do idia gari lasi, badina disasta ta ese idia do ia hadikaia lasi!