Beibi ia vara neganai, ena tama sina idia moale, to danu idia mamia idia hegeregere lasi unai maduna idia huaia totona. Bema ia be emui beibi ginigunana, do umui davaria emui nega bona goada ibounai do umui gaukaralaia emui beibi naria totona. Umui mahuta namonamo lasi bona emui hemami ia idau dainai, emui headava lalonai hekwakwanai idia vara diba. Umui ese gau haida do umui haidaua, unai amo emui beibi umui naria bona emui headava umui moalelaia diba. Edena dala ai Baibel ena sisiba ese umui ia durua diba unai maduna umui huaia totona?

BAIBEL IA GWAU: “Lalokau be ia boga-auka, bona ia hebogahisi.” Danu, lalokau “be sibona ena namo ia tahua lasi, bona ia badu haraga lasi.” (1 Korinto 13:4, 5) Bema oi be sina bona unai be emu beibi ginigunana, vaia beibi sibona do oi laloa momo. To, reana emu adavana do ia mamia oi be ia oi laloa bada lasi. Unai dainai namona be oi hahedinaraia ia danu oi laloa bada. Oi haheauka bona kara namo oi hahedinaraia, unai amo emu adavana do ia mamia ia oi ura henia bona ia danu be oi ia durua diba beibi umui naria totona.

“Umui tatau e, . . . mai laloa namonamo ida idia do umui kara henia.” (1 Petero 3:7) Namona be oi laloparara emu hahine ese ena goada ibounai be beibi naria totona do ia haorea. Ia be maduna matamatana ia huaia dainai, reana do ia lalohisihisi, hesiku bona lalometau. Nega haida ia ese oi do ia badu henia, to namona be oi manau, badina “haheauka tauna ese, tuari tauna goadana ia hereaia.” (Aonega Herevadia 16:32) Namona be laloparara oi hahedinaraia bona ia oi durua.​—Aonega Herevadia 14:29.

OI KARAIA DIBA GAUNA:

• Tama: Emu adavana oi durua beibi oi naria totona, hanuaboi ai danu. Guna oi karaia gaudia haida do oi karaia momo lasi, unai amo emu nega bada be emu hahine bona beibi ida oi noho

• Sina: Emu adavana ia ura beibi ia naria neganai, iena heduru oi abia dae. Bema gau ta ia karaia namonamo lasi, oi gwau henia lasi, to mai manau ida karaia dalana oi hadibaia

BAIBEL IA GWAU: “Ruaosi be tauanina tamona do idia lao.” (Genese 2:24) Ena be emu ruma bese lalonai beibi matamatana ia noho, to laloatao oi bona emu adavana be “tauanina tamona.” Oi gaukara goada emui headava ia goada totona.

Hahine e, emu adavana ena heduru oi moalelaia. Ia dekenai tanikiu herevadia oi gwauraia karana be “hamauria” gauna bamona. (Aonega Herevadia 12:18) Tau e, emu adavana oi hamaoroa ia oi lalokau henia bona oi laloa bada. Ia ese ruma bese ia naria namonamo dainai oi hanamoa.​—Aonega Herevadia 31:10, 28.

“Namo lasi ta be sibona ena namo ia tahua, to namona be ma ta ena namo ia tahua.” (1 Korinto 10:24) Hanaihanai emu adavana ena namo totona gau haida oi karaia. Nega umui atoa umui herevahereva hebou, ta ta dekenai hanamoa herevadia umui gwauraia bona umui kamonai heheni. Mahuta hebou karana dekenai namo lasi oi sibona emu ura oi laloa bada. To emu adavana ena ura oi laloa danu. Baibel ia gwau: “Umui headava taudia ese ta ta dekenai mahuta hebou karana umui koua lasi. To bema umui ruaosi umui lalotamona unai umui koua.” (1 Korinto 7:3-5) Unai dainai, umui ruaosi ese mahuta hebou karana be mai momokani ida umui herevalaia be namo. Emui laloparara bona haheauka karana ese emui headava do ia hagoadaia.

OI KARAIA DIBA GAUNA:

• Nega oi atoa oi bona emu adavana sibona totona

• Gau maragidia oi karaia unai amo emu adavana do ia mamia ia oi lalokau henia. Hegeregere, revareva kwadogina o harihari gauna ta oi henia

BAIBEL IA GWAU: “Beibi negana amo Toretore Helagadia oi diba, unai ese oi dekenai aonega ia henia bona Keriso Iesu abidadama henia karana amo hahemauri oi abia.” (2 Timoteo 3:15) Beibi hadibaia totona palani umui karaia. Ena be beibi ia do vara lasi, ia ura gau idauidau ia dibaia. Beibi be sinana ena bogana lalonai ia noho neganai, sinana ena gado regena bona hemami ia diba. Ia do maragi noho lalonai ia dekenai umui duahiduahi be namo. Ena be oi duahia gauna ia lalopararalaia lasi, to ia bada ia lao neganai duahiduahi karana do ia moalelaia.

Beibi dekenai Dirava umui herevalaia be namo. Namona be ia kamonai umui ese Iehova umui guriguri henia. (Deuteronomi 11:19) Ia ida umui gadara neganai, Iehova ese ia karaia gaudia umui herevalaia. (Salamo 78:3, 4) Beibi ia bada ia lao neganai, do ia itaia umui be Iehova umui lalokau henia bada, bena Iehova lalokau henia karana do ia dibaia danu.

OI KARAIA DIBA GAUNA:

• Dirava amo aonega oi noia, emu beibi oi hadibaia totona

• Hereva bona lalohadai badadia oi gwauraia loulou emu beibi dekenai, unai amo do ia dibaia matamaia