Ita ia havaraia Diravana ena aonega ese eda aonega ia hereaia. Ia be eda Tamana lalokauna bona ita ia laloa bada. Danu, Ia ura lasi ia ita rakatania. (Ieremia 10:23) Tama sina ese edia natu maragina idia hakaua hegeregerena, Dirava ese ita ia hakaua be maoro. (Isaia 48:17, 18) Baibel ese ita ia hakaua diba—unai be Dirava ena harihari gauna ta.—2 Timoteo 3:16 duahia.

Iehova ena taravatu ese hari mauri dalana namona ita dekenai idia hadibaia, bona vaira negai mauri hanaihanai abia dalana idia hahedinaraia. Dirava ese ita ia havaraia dainai, mai eda moale ida Ia sibona ena taravatu ita badinaia be maoro.—Salamo 19:7, 11; Apokalupo 4:11 duahia.

Baibel ena hereva momokani badadia haida be ita idia hadibaia, Dirava ia ura dala momo ai ita ia hakaua. Vaia, taravatu haida edia anina be, idia hedinarai goevagoeva. (Deuteronomi 22:8) To, Baibel ena hereva momokani badana ta ita laloa dobu be namo, unai amo do ita laloparara dahaka ita karaia diba. (Aonega Herevadia 2:10-12, NW) Hegeregere, Baibel ena hahediba herevana ta be inai: Mauri be Dirava ena harihari gauna. Unai hereva momokani badana ese ita ia hakaua diba. Unai hereva momokani ita laloatao hanaihanai neganai, eda mauri bona ma haida edia mauri hadikaia karadia do ita karaia lasi.—Kara 17:28 duahia.

Iesu be taravatu badadia rua ia herevalaia. Ginigunana be eda mauri lalonai do ita karaia gaudia ia hahedinaraia, hegeregere: Namona be Dirava ita diba, ita lalokau henia, ita kamonai henia, bona ita hesiai henia. Unai dainai, abia hidi o  disisen idauidau ita karaia neganai, unai taravatu ginigunana ita laloa guna be namo. (Aonega Herevadia 3:6) Unai taravatu idia badinaia taudia edia hahenamo be inai: Dirava ena turana ai idia lao, moale korikori idia davaria, bona mauri hanaihanai do idia abia.—Mataio 22:36-38 duahia.

Taravatu badana iharuana be ita ia hakaua diba, ma haida ida maino ai ita noho hebou totona. (1 Korinto 13:4-7) Unai taravatu ita badinaia totona, namona be Dirava ese taunimanima ia kara henia daladia ita tohotohoa.—Mataio 7:12; 22:39, 40 duahia.

Dirava ena taravatu ese famili ia hadibaia, edena dala ai lalokau amo lalotamona ia vara diba. (Kolose 3:12-14) Danu, Baibel ese famili ia gimaia hereva momokani ta be inai: Namona be tau bona hahine ese edia headava idia hamakohia lasi.—Genese 2:24 duahia.

Baibel ena taravatu ita badinaia neganai, eda hemami bona kohu ita gimaia namonamo diba. Haheitalai be inai: Haida be Baibel ena taravatu idia badinaia dainai, moni gaukara gabudiai idia koikoi lasi bona gaukara idia karaia goada. Unai dainai, edia bosi ese idia ura henidia. (Aonega Herevadia 10:4, 26; Heberu 13:18) Danu, Baibel ese ita ia hadibaia aniani, dabua o unai bamona gaudia ita moalelaia diba, bona namo lasi unai gaudia ita atodia guna, to Dirava tura henia karana ita atoa guna be gau badana.—Mataio 6:24, 25, 33; 1 Timoteo 6:8-10 duahia.

Baibel ena taravatu ita badinaia neganai, eda tauanina ita naria o gimaia namonamo diba. (Aonega Herevadia 14:30; 22:24, 25) Haheitalai be inai: Dirava ese kekero karana ia taravatua, bona unai taravatu ita badinaia neganai, gorere badadia o aksiden do ita davaria lasi. (Aonega Herevadia 23:20) Iehova ese alkahol (wain o bia) ita inua karana ia taravatua lasi, to ia ese kekero o inuinu momo karana sibona ia taravatua. (Salamo 104:15; 1 Korinto 6:10) Dirava ena taravatu ese ita ia hadibaia eda kara bona lalohadai danu ita naria namonamo, unai amo namo ita davaria. (Salamo 119:97-100) To, Keristani taudia momokanidia ese Dirava ena taravatu idia badinaia, badina idia ura namo idia davaria, bona Iehova idia hanamoa.—Mataio 5:14-16 duahia.