INISENIAI ia gini tauna be aposetolo Petero bona ena turana haida be ia murinai idia gini. To dahaka dainai inai tauna be Petero vairanai ia tui diho? Unai bamona ia karaia be maoro, a? Ia oi diba, a?

Unai tauna be Korenelio. Ia be Roma ami ofesa ta. Korenelio be Petero ia diba lasi, to ta ese ia hadibaia ena ruma dekenai do ia boiria. Unai ibounai idia vara dalana mani ita itaia.

Iesu murinai idia raka taudia ginigunadia be Iuda taudia, to Korenelio be Iuda tauna ta lasi. To Dirava ia lalokau henia, ia guriguri henia, bona taunimanima ia kara namo henidia. Adorahi ta ai, aneru ta be ia dekenai ia hedinarai bona ia gwau: ‘Dirava ia moale oi dekenai bona emu guriguri do ia haerelaia. Tatau haida oi siaia tau ta ladana Petero abia totona. Ia be davara badinai, Iopa dekenai, Simona ena ruma ai ia noho.’

Maoromaoro Korenelio ese tatau haida ia siaia Petero idia tahua totona. Murina dinana ai, Iopa kahirakahira idia ginidae neganai, Petero be Simona ena ruma ena guhi palakana latanai ia helai. Unuseniai Dirava ena siahu amo Petero ia laloa ia ese dabua badana ta guba amo ia diho ia itaia. Unai dabua lalonai be animal idauidau idia noho. Dirava ena taravatu hegeregerena, unai animal be goeva lasi, to gado ta ia gwau: ‘Petero e, oi toreisi! Oi alaia bona oi ania.’

Petero ia haere: ‘Lasi! Miro gaudia be nega ta lau ania lasi.’ To unai gadona ese Petero ia hamaoroa: ‘Oi gwau lasi hari Dirava ia gwauraia goeva gaudia be miro.’ Nega toi unai bamona ia vara. Petero be unai ibounai edia anina ia do laloa noho lalonai, Korenelio ese ia siaia taudia be ruma dekenai idia ginidae bona Petero totona idia henanadai.

Petero ia diho bona ia gwau: ‘Umui tahua tauna be lau. Dahaka dainai umui mai?’ Unai tatau ese idia hahedinaraia, aneru ese Korenelio ia hamaoroa ena ruma dekenai Petero ia boiria be namo neganai, Petero be edia hereva ia abia dae. Murina dinana ai, Petero bona ena turadia be Kaisarea dekenai idia lao, Korenelio idia hedavari henia totona.

Korenelio ese ena varavara bona turadia ia haboudia vadaeni. Petero ia mai neganai, Korenelio ese ia hedavari henia. Petero ena aena badinai ia tui diho, inai laulau dekenai oi itaia bamona. To Petero ia gwau: ‘Oi toreisi; lau danu taunimanima.’ Oibe, Baibel ese ia hahedinaraia tau ta vairanai ita tui diho bona ita tomadiho henia be maoro lasi. Iehova sibona ita tomadiho henia be namo.

Vadaeni, Petero be idia hebou taudia dekenai ia haroro. Petero ia gwau: ‘Lau itaia Dirava be ena hesiai gaukara idia ura karaia taudia ibounai ia abia dae.’ Bona ia hereva noho lalonai, Dirava ese ena lauma helaga ia siaia bona hebou taudia be gado idauidau ai idia hereva matamaia. Unai dainai Petero idia bamoa Iuda hahediba taudia idia hoa, badina idia laloa Dirava be Iuda taudia sibona ia ura henia. Unai ese idia ia hadibaia, Dirava ese bese ma haida amo bese ta ia laloa bada lasi. Unai be gau namona ita ibounai ese ita laloatao totona, ani?