IESU be gabu idauidau dekenai ia loaloa neganai, gorere taudia ia hanamoa. Iena hoa karadia edia sivarai be hanua ibounai dekenai idia herevalaia. Unai dainai taunimanima ese ia dekenai aena dika, matakepulu, taia kudima, bona gorere taudia momo idia mailaia. Bona Iesu ese ibounai ia hanamodia.

Ioane ese Iesu ia bapatisoa bena lagani toi idia ore vadaeni. Bona Iesu ese ena aposetolo taudia ia hamaoroa kahirakahira ia be Ierusalema dekenai do ia lao, unuseniai ia do idia hamasea bona do ia toreisi lou. To unai nega ia naria lalonai, Iesu ese gorere taudia ia hanamodia noho.

Dina ta Iesu be Sabati dinanai ia hadibaia. Sabati be Iuda taudia edia laga-ani dinana. Iniseniai oi itaia hahinena be ia gorere bada. Lagani 18 lalonai ena doruna ia gageva. Unai dainai Iesu ese ena imana ia dekenai ia atoa bona ia gini maoromaoro. Ia namo lou!

Unai ese tomadiho gunalaia taudia ia habadua. Idia ta be hutuma dekenai ia boiboi: ‘Dina 6 lalonai ita gaukara bona unai dina dekenai gorere hanamoa totona umui mai, Sabati dinana ai umui mai lasi!’

To Iesu ia haere: ‘Umui be tatau dikadia. Sabati dinana ai emui doniki umui ruhaia bona ranu henia totona umui hakaua lao. Vadaeni, edena bamona? Inai hahine be lagani 18 ia gorere. Sabati dinana ai do lau hanamoa lasi, a?’ Iesu ena hereva ese unai tatau dikadia ia hahemaraia.

Gabeai Iesu bona ena aposetolo taudia be Ierusalema dekenai idia lao. Ieriko ena murimuriai idia noho neganai, matakepulu noinoi taudia rua idia kamonai Iesu ia hanaia. Unai dainai idia boiboi: ‘Iesu e, ai oi durua!’

Iesu ese idia ia boiria bona ia nanadaidia: ‘Umui ura dahaka lau karaia?’ Idia gwau: ‘Lohiabada e, emai matana oi kehoa.’ Iesu ese edia matana ia daua toho bona maoromaoro idia itaia diba! Iesu ese unai hoa karadia ia karaia ena badina oi diba, a? Badina taunimanima ia lalokau henia bona ia ura idia ese ia idia abidadama henia. Unai dainai ita diba King bamona ia lohia neganai, tanobada dekenai tau ta be do ia gorere lou lasi.