INAI kekeni maragina ia gwauraia noho sivaraina oi diba, a? Ia be inai hahine dekenai Iehova ena peroveta tauna Elisaia, bona Iehova ena heduru amo ia karaia hoa karadia edia sivarai ia gwauraia noho. Inai hahine be Iehova ia diba lasi, badina ia be Israela hahinena lasi. Inai kekeni be inai hahine ena ruma dekenai ia noho ena badina mani ita itaia.

Inai hahine be Suria hahinena ta. Iena adavana be Namana, Suria tuari taudia edia biaguna. Suria taudia ese inai Israela kekeni maragina idia abia, bona Namana ena hahine dekenai idia laohaia ena hesiai gaukara ia karaia totona.

Namana be mai ena gorere dikana ladana lepera. Unai gorere ese ta ena tauanina ia ania ore diba. Unai dainai inai kekeni be Namana ena adavana ia hamaoroa noho: ‘Bema egu lohia be Israela dekenai ia noho Iehova ena peroveta tauna dekenai ia lao be namo. Iena lepera gorerena do ia hanamoa.’ Gabeai, hahine ese ena tau ia hamaoroa.

Namana ia ura bada ia namo; unai dainai Israela dekenai ia lao. Unuseniai ia ginidae neganai, Elisaia ena ruma dekenai ia lao. Elisaia ese ena hesiai tauna be Namana dekenai ia siaia lao bona Namana ia hamaoroa Ioridane Sinavaina dekenai nega 7 do ia digu. Inai hereva dainai, Namana ia badu bada, bona ia gwau: ‘Egu gabu ena sinavai ese Israela sinavai ibounai edia namo idia hanaia!’ Namana be unai bamona ia hereva murinai, unai gabu ia rakatania.

To ena hesiai tauna ta ese ia hamaoroa: ‘Biaguna e, bema Elisaia ia gwau gau aukana ta oi karaia, do oi karaia. Vadaeni, dahaka dainai oi digu lasi ena hereva bamona?’ Namana be ena hesiai tauna ena hereva ia kamonai bona Ioridane Sinavaina ai nega 7 ia digu. Unai bamona ia karaia neganai, ena kopina ia namo bona ia goeva lou!

Namana ia moale momokani. Elisaia dekenai ia giroa bona ia hamaoroa: ‘Hari lau diba tanobada ibounai dekenai Israela ena Dirava be Dirava momokani tamona. Unai dainai, mani emu kara, egu harihari gauna oi abia.’ To Elisaia ia gwau: ‘Lasi, do lau abia lasi.’ Elisaia ia diba harihari gauna ia abia be kerere badina Iehova ese Namana ia hanamoa. To Elisaia ena hesiai tauna Gehasi be unai harihari gauna ia ura henia.

Unai dainai Gehasi be inai bamona ia karaia. Namana ese ia rakatania murinai, Gehasi be ia murinai ia heau lao. Ia gwau: ‘Elisaia ese lau ia siaia oi henia gwauraia harihari gaudia haida abia totona. Harihari idia mai vadivadi taudia dekenai ia henidia gwauraia.’ Unai be koikoi. To Namana ia diba lasi; unai dainai Gehasi dekenai gau haida ia henia.

Gehasi be ruma dekenai ia giroa neganai, Elisaia be ia karaia karana ia diba vadaeni. Iehova ese ia hadibaia. Unai dainai ia gwau: ‘Oi kara dika dainai, Namana ena lepera do oi abia.’ Bona maoromaoro ia abia!

Unai sivarai amo dahaka ita dibaia? Gau ginigunana be, hari kekeni maragina bamona, Iehova ena sivarai ita gwauraia be namo. Unai ese namo bada ia havaraia diba. Gau iharuana be, ita hekokoroku lasi guna Namana ia karaia bamona, to Iehova ena hesiai taudia ita kamonai henia be namo. Bona gau ihatoina be, namo lasi ita koikoi, Gehasi ia karaia bamona. Buka helaga duahia karana amo gau momo do ita dibaia, ani?