INAI tau be Iehova dekenai ia guriguri ena badina oi diba, a? Dahaka dainai inai revareva be Iehova ena boubou patana vairanai ia atoa? Inai tauna be Hesekaia. Ia be Israela ena saut kahana iduhu rua edia king. Bona ia be ia lalo-hekwarahi bada. Dahaka dainai?

Badina Asuria ena tuari taudia ese not kahana ena iduhu 10 idia hadikaia ore vadaeni. Iehova ese unai ia koua lasi badina unai taudia edia kara be dika momokani. Bona hari Asuria ena tuari taudia be iduhu rua basileiana idia tuari henia gwauraia.

Asuria ena king ese Hesekaia dekenai revareva ia siaia. Hesekaia ese unai revareva be Dirava vairanai ia atodia. Unai revareva ese Iehova idia hevasehalaia, bona Hesekaia idia hamaoroa gau ta do ia karaia lasi. Unai dainai Hesekaia ia guriguri: ‘Iehova e, Asuria ena king amo ai oi hamauria. Bena bese ibounai do idia diba oi sibona be Dirava.’ Iehova be Hesekaia do ia kamonai henia, a?

Hesekaia be king namona. Ia be Israela edia iduhu 10 basileiana edia king dikadia, eiava ena tamana dikana Ahasa bamona lasi. Hesekaia ese Iehova ena taravatu ibounai ia badinaia namonamo. Unai dainai, Hesekaia ese ena guriguri ia haorea murinai, peroveta tauna Isaia ese Iehova ena hereva ia siaia, ia gwau: ‘Asuria ena king be Ierusalema dekenai do ia vareai lasi. Ena tuari tauna ta be kahirakahira dekenai do ia mai lasi. Diba ta danu be hanua lalonai do idia pidia vareai lasi.’

Inai rau dekenai ia noho laulau mani oi itaia. Inai mase tuari taudia ibounai oi diba, a? Idia be Asuria taudia. Iehova ese ena aneru ia siaia, bona hanuaboi tamona lalonai Asuria taudia 185,000 ia alaia mase. Unai dainai Asuria ena king ia hegeregere lasi bona ia giroa lou.

Iduhu rua basileiana ia roho mauri, bona taunimanima be nega sisina lalonai maino lalonai idia noho. To Hesekaia ia mase murinai, ena natuna Manase be king ai ia lao. Manase bona ena natuna Amono be king dikadia. Unai dainai idia noho tanona be taravatu utua karadia bona dagedage karadia amo ia honu. Amono be ena hesiai taudia ese idia hamasea neganai, ena natuna Iosaia be iduhu rua basileiana ena king ai ia lao.