KING Ieroboama ia mase murinai, Israela ena iduhu 10 basileiana edia lohia taudia ibounai edia kara be dika. King Ahaba ena kara be dika momokani. Ena badina oi diba, a? Badina badana ta be ena adavana, Kwini dikana Iesebele.

Iesebele be Israela hahinena ta lasi. Ia be Sidono ena king ena natuna. Dirava koikoi Bala ia tomadiho henia, bona ia ese Ahaba bona Israela taudia momo danu ia veria Bala idia tomadiho henia totona. Iesebele ese Iehova ia inai henia bona ena peroveta taudia momo ia alaia mase. Haida be kohua lalodiai idia hunia unai amo do ia aladia lasi. Bema Iesebele be gau ta ia ura, taunimanima do ia alaia unai gau ia abia totona.

Dina ta King Ahaba be ia lalohisihisi bada. Unai dainai, Iesebele ese ia nanadaia: ‘Dahaka dainai hari dina oi moale lasi?’

Ahaba ia haere: ‘Naboto ena hereva dainai. Lau ura ena vain umana lau hoia. To lau ia hamaoroa do lau abia lasi.’

Iesebele ia gwau: ‘Laloa lasi. Oi totona do lau abia.’

Unai dainai Iesebele ese Naboto ena hanua ena tatau badadia dekenai revareva ia torea. Idia ia hamaoroa: ‘Kara dika herea tatau haida umui abia bena do idia gwau, Naboto ese Dirava bona king ia gwauraia dika. Bena hanua murimuri ai Naboto be nadi amo umui hodoa mase.’

Iesebele be Naboto ena mase sivaraina ia kamonai neganai, Ahaba ia hamaoroa: ‘Hari oi lao bona ena vain uma oi abia.’ Iesebele be ia karaia kara dika rohorohona dainai idia panisia be namo, ani?

Unai dainai, Iehova ese Iehu ia siaia ia panisia totona. Iesebele be Iehu ena mai sivaraina ia kamonai neganai, ena vairana ia penia bona herahera gaudia ia atoa ia sibona ia hahairaia totona. To Iehu ia mai bona Iesebele be uindo dekenai ia itaia neganai, ruma lalonai idia noho tatau dekenai ia boiboi: ‘Ia umui negea diho!’ Unai tatau idia kamonai, inai laulau dekenai oi itaia bamona. Ia idia negea diho, bona ia mase. Unai be Kwini dikana Iesebele ena dokona.