INAI itotohi eiava au dekenai idia tubu flaoaflaoa bona idia mage vadaeni alamona huahua mani oi itaia. Inai be Arona ena au. Hanuaboi tamona lalonai inai flaoaflaoa bona huahua be Arona ena au dekenai idia tubu! Mani ena badina ita itaia.

Israela taudia be taunimanima idia noho lasi tanona dekenai nega sisina daudau idia loaloa vadaeni. Haida idia ura lasi Mose ese idia ia gunalaia eiava Arona be edia hahelaga tauna badana. Unai bamona lalohadai idia abia taudia haida be Kora, Datana, Abirama bona taunimanima idia gunalaia taudia 250. Ibounai idia mai Mose dekenai bona idia gwau: ‘Dahaka dainai oi ese ai oi lohiaia?’

Mose ese Kora bona ia murinai idia raka taudia ia hamaorodia: ‘Kerukeru dabai lahi udaia gaudia umui abia bona bonana namona muramura umui udaia. Bena Iehova ena palai dubuna dekenai umui mai. Do ita diba Iehova ese daika do ia abia hidi.’

Murina dinana ai Kora bona ena taunimanima 250 be palai dubuna dekenai idia mai. Unai tatau durudia totona ma haida idia mai danu. Iehova be ia badu momokani. Mose ia gwau: ‘Inai kara dika taudia edia palai ruma amo do umui raka siri. Edia gau ta umui dogoatao lasi.’ Bena kamonai taudia be Kora, Datana bona Abirama edia palai ruma amo idia raka siri.

Bena Mose ia gwau: ‘Iehova ese do ia abia hidi tauna do umui diba. Tano do ia kehoa bona inai dika taudia be lalonai do idia moru.’

Mose ena hereva ia hadokoa neganai, tano ia kehoa. Kora ena palai ruma bona kohu bona Datana bona Abirama bona edia taunimanima ibounai idia moru diho, bona tano ese ia koudia. Taunimanima be idia moru taudia edia taitai idia kamonai neganai, idia boiboi: ‘Heau! Reana tano ese ita do ia koua danu!’

To Kora bona ena taunimanima 250 be palai dubuna kahirakahira dekenai idia do gini noho. Unai dainai Iehova ese lahi ia siaia, bona idia ibounai ia araia ore. Bena Iehova ese Arona ena natuna Eleasara ia hamaoroa, idia mase taudia edia lahi udaia gaudia do ia abia bona boubou pata ataiai koua gauna severana ta ia karaia. Israela taudia ese unai koua gauna idia itaia neganai, do idia diba Arona bona ena natuna sibona be Iehova ena hahelaga taudia.

To Iehova ia ura hahedinaraia ia ese Arona bona ena natuna memerodia ia abia hidi hahelaga taudia bamona. Unai dainai Mose ia hamaoroa: ‘Iduhu ta ta edia biagudia oi hamaoroa, edia au idia mailaia. Levi iduhu lalonai, Arona ese ena au do ia mailaia. Bena au ibounai be palai dubu lalonai Taravatu Mauana vairanai oi atoa. Lau abia hidi tauna ena au dekenai flaoaflaoa do idia tubu.’

Dabai, Mose ia itaia neganai, Arona ena au dekenai inai flaoaflaoa bona alamona huahua idia tubu! Iehova ese Arona ena au dekenai flaoaflaoa ia hatubua ena badina be hari oi diba, ani?